Tuambuluishayi bakaji bakamba mu makenga abu

UMUE wa ku miyuki ya mu Bible idi yakula bua bakaji bakamba idi bantu ba bungi bamanye bimpe mmuyuki wa Luta ne mamuenende Naomi. Luta ne Naomi bavua bakaji bakamba. Naomi uvua yeye mufuishe bayende ne bana bende ba balume babidi, ne umue wa ku bana bende ba balume abu uvua musele Luta. Bu muvuabu basombele muaba uvua bantu balume ba bungi bikale ba bidime, Luta ne Naomi bavua mu lutatu lukole.​—Luta 1:1-5, 20, 21.

Nansha nanku, Naomi uvua ne Luta mukaji wa muanende uvua mubenge bua kushiyangana nende, uvua mulunda wende mulenga uvua umusamba. Mu bule bua matuku, Luta wakalua “mupite bana ba balume muanda mutekete buimpe” ku mêsu kua Naomi, kabiyi anu bualu uvua munange Naomi bikole to, kadi bualu uvua kabidi munange Nzambi. (Luta 4:15) Pavua Naomi muambile Luta bua apingane mu tshisamba tshiabu tshia bena Moaba, Luta wakandamuna ne mêyi a mushinga mukole ne a lulamatu aa wamba ne: ‘Nenye kuwaya, nendale kuwalala, bantu bebe nebikale bantu banyi ne Nzambi webe neikale Nzambi wanyi; nemfue kuwafua, nenjikibuepu kabidi;  bialua tshintu tshikuabu pankatshi petu bua kutupandulula, anu lufu nkayalu, Yehowa angenzele muonso muenzeye too ne pa mutu.’​—Luta 1:16, 17.

Yehowa Nzambi kakapanga kumona ngikadilu wa Luta nansha. Wakabenesha Naomi ne Luta, ne ndekelu wa bionso Boaza (muena Isalele) wakasela Luta. Muana wakalelabu uvua Naomi utshiunga anu bu muanende mulela wakalua nkambua wa Yezu Kristo. Muyuki eu udi uleja mushindu udi Yehowa umvuila bakaji bakamba badi bamukeba ne bamueyemena. Bible udi kabidi uleja ne: Nzambi mmusue aba badi bambuluisha bakaji bakamba mu makenga abu. Kadi mmunyi mutudi mua kukuatshisha bakaji bakamba badi munkatshi muetu lelu’eu?​—Luta 4:13, 16-22; Musambu 68:5.

Tufile diambuluisha anu pa diodi katuyi tuenzejangana malu ku bukole to

Patudi tujinga kuambuluisha mukaji mukamba, mbimpe tumutokeshile dijinga dietu dia kumuambuluisha pamutu pa kukeba bua kumuenzeja malu ku bukole. Epuka mêyi adi kaayi ne mushinga, bu mudi aa: “Paudi dijinga ne tshintu kampanda ungambile.” Kuamba nenku kudi anu bu kuambila muntu udi ne mashika ne nzala ne: ‘Ya biebe talala, wote kapia, ukute’ kadi katuyi tumuambuluisha to. (Yakobo 2:16) Bantu ba bungi kabatu balomba diambuluisha padibu dijinga ne tshintu to; batu bakenga ne ntatu munda. Bua kuambuluisha bantu ba buena aba, bidi bikengela kuikala ne busunguluji bua malu anyi kumanya tshidi majinga abu. Kadi kudipampamika mu malu abu, nangananga kudiangatshila bujitu bua kulombola nsombelu wa mukaji mukamba kudi mua kufikisha ku dimunyingalaja anyi ku dipanga kumvuangana nende. Ke bualu kayi Bible udi utulomba bua kumanya mushindu muimpe utudi mua kusomba ne bakuabu. Udi eku utulomba bua kubenga kukeba bua kusankisha anu majinga etu nkayetu ne, eku utulomba bua katuikadi ba-kapitshishi bisaka.​—Filipoi 2:4; 1 Petelo 4:15.

Luta wakenzela Naomi malu mimpe mu mushindu mukumbanyine. Kavua mushale mulamate mamuenende eku muikale umuenzeja malu ku bukole anyi umutumina dîyi nansha. Wakenza malu mimpe bu mudi: kukeba biakudia buende yeye ne bua mamuende muenu Naomi. Uvua kabidi utumikila malu avua Naomi umuambila.​—Luta 2:2, 22, 23; 3:1-6.

Bulelela, muntu ne muntu utu ne ende majinga. Sandra (utudi batele mu tshiena-bualu tshishale) udi wamba ne: “Mvua ne bionso bimvua nabi dijinga mu tunyinganyinga tuanyi, mmumue ne: balunda banyi ba pa muoyo bavua nanyi pabuipi.” Kadi Elaine muena bualu butuvua batele ku ntuadijilu eku uvua kabidi dijinga ne dîba kampanda dia kuanjiku kudishadila nkayende. Nenku patudi tuambuluishangana tudi ne bua kumanya mua kusunguluja malu anyi kuikala pabuipi bua kuenzaku bualu kampanda kadi bamanye ne: utudi tukeba kuambuluisha udi ukengela tuetu kumushilaku dîba dia kusombaye nkayende.

Diambuluisha dia kudi bena mu dîku

Dîku dia musangelu ne dinanga (pikaladi kuoku) didi mua kuenza muadi muonso bua kuambuluisha mukaji mukamba bua kusombaye bimpe ne bukamba buende. Nansha mutu bamue bena mu dîku mua kuenza bia bungi bua kuambuluisha eku bakuabu mua kuenza anu bikese, tshionso tshidi bonso benza tshidi ne mushinga. Bible udi wamba ne: ‘Bikala mukaji wa mu lufuila ne bana bende balela anyi bikulu bende, bobo badianjile kuyila mua kunemeka ba mu dîku diabu ne mua kupingajila baledi babu bintu bia kubakuatshisha nabi; bua bualu ebu mbudi Nzambi witabuja.’​—1 Timote 5:4.

Misangu ya bungi, kubambuluisha ne makuta anyi ‘kubapingajila bintu’ kudi mua kuikala kakuyi ne mushinga to. Bamue bakaji bakamba batu  ne makuta makumbane bua kukumbaja majinga abu, bakuabu pabu (mu amue matunga) batu babambuluisha kudi mbulamatadi. Kadi padi bakaji bakamba bikale ne dijinga dia tshintu, bena mu dîku diabu benze muabu muonso bua kubapesha natshi. Pikala mukaji mukamba kayi ne balela badi mua kumukuatshisha anyi muikale nabu kadi kabayi ne mushindu, Mukanda wa Nzambi udi ulomba bena Kristo nende bua kumuambuluisha, wamba ne: ‘Bualu bua Nzambi bua bushuwa ne budi kabuyi bunyanguka ku mêsu kua Nzambi Tatu budi nunku: bua kutangila bana ba nshiya ne bakaji ba mu lufuila mu dikenga diabu.’​—Yakobo 1:27.

Bulelela, bantu badi batumikila mibelu ya mu Bible eyi badi ‘banemeka bakaji ba mu lufuila.’ (1 Timote 5:3) Kunemeka muntu kudi kumvuija: kumuleja kanemu. Bantu batubu banemeka batu bamona ne: bakuabu badi babangata ne mushinga, kabidi ne: mbabanange ne mbabateke pa muaba wabu. Kabena bamona ne: bantu badi babambuluisha anu bua padibu badimona benzejibue bua kubambuluisha to. Nansha muvua Luta muikale mukamba munkatshi mua lupolo kampanda, uvua munange Naomi ne uvua umunemeka, ujinga anu kujinga bua Naomi kuikalaye bimpe mu bionso. Ngikadilu mulenga uvua nende Luta eu wakamuendeshila lumu luimpe, bualu muntu wakalua bayende wakamuambila ne: ‘Bena musoko bonso badi bamanye ne: wewe udi mukaji wa kanemu.’ (Luta 3:11) Kabiyi mpata, bu muvua Naomi pende ne dinanga, kayi muenzejanganyi wa malu ku bukole, muikale muena dianyisha bua mudimu mukole uvua Luta umuenzela, Luta uvua umuambuluisha ne disanka. Naomi udi tshilejilu tshimpe tshitambe bua bakaji ba mu lufuila ba lelu!

Shemeja bulunda ne Nzambi

Bena mu dîku ne balunda kabena mua kupingajila mukaji bayende to. Bua bualu ebu, bidi bia mushinga bua muntu udi mufuishe eu kuya kudi ‘Tatu wa luse ne Nzambi wa busambi buonso, utu watusamba mu makenga etu onso.’ (2 Kolinto 1:3, 4) Tuangate tshilejilu tshia Ana, mukaji mukamba uvua mutendeledi wa Nzambi ne ukavua ne bidimu 84 mu tshikondo tshiakaledibua Yezu.

Pakafua bayende wa Ana kunyima kua bidimu muanda-mutekete patupu bia dibaka diabu, Ana wakanyemena kudi Yehowa bua amusambe. ‘Kavua umbuka mu ntempelo, [uvua] utendelela Nzambi butuku ne munya, ujila biakudia, umulomba.’ (Luka 2:36, 37) Yehowa wakenzelaku Ana bualu kampanda buimpe bua muvuaye mumulamate anyi? Eyowa! Yehowa wakaleja ne: uvua mumunange mu mushindu wa pa buawu, bualu wakamuanyishila bua kumona muana uvua ne bua kukola ne kulua Musungidi wa bantu. Bualu ebu buakasankisha Ana ne kumusamba bikole be! Kakuyi mpata, wakamona bulelela bua Musambu 37:4: ‘Wikale ne disanka diebe mu Yehowa, ne yeye neakupe milombu idi mutshima webe ulomba.’

Nzambi utu ukuata mudimu ne bena Kristo netu bua kufila diambuluisha

Elaine udi wamba ne: “Matuku a bungi kunyima kua lufu lua David, mubidi uvua unsama ngumvua anu bu bantue kele mu mbadi. Ngakela meji ne: mmu tshifu muvua munkutakane. Dimue edi, meme kumvua bibi menemene, meme kujinga bua kuya kua munganga. Muanetu mukuabu wa bakaji wa mu nyuma uvua kabidi mulunda wanyi wakangambila ne: kanyinganyinga ke kavua mua kuikala kansamisha nanku, yeye kungambila bua kulomba Yehowa diambuluisha ne busambi. Ngakatumikila mubelu wende musangu umue, meme kuenza disambila mundamunda ne mutshima wanyi wonso, kulomba Yehowa bua ankuatshishe mu tunyinganyinga tuanyi atu. Yehowa wakankuatshisha.” Elaine wakatuadija kumvua bimpe, ne kunyima kua matuku makese kusama kuende kuakajika.

Nangananga bakulu badi mu tshisumbu badi mua kuambuluisha bakaji bakamba mu mushindu muimpe. Bakulu buobu babakuatshisha ne babasamba mu nyuma ne meji ne busunguluji, bidi mua kubambuluisha bua kushala balamate Yehowa nansha mu makenga. Padiku mushindu, bakulu badi kabidi mua kulongolola bintu bia kubambuluisha nabi. Bushuwa bakulu bena luse ne bena busunguluji ba nunku badi mua kulua ‘tshisokomenu ku tshipepele.’​—Yeshaya 32:2; Bienzedi 6:1-3.

Mfumu mupiamupia wa buloba udi ufila busambi bua kashidi

Eu uvua Ana musankidile pakamumonaye kukadi  mpindieu bidimu bitue ku 2 000 ukadi mulue Masiya Mukalenge wa Bukalenge bua Nzambi mu diulu. Bukalenge ebu ki buajikija malu onso adi akebesha tunyinganyinga ne lufu. Buakabuluibua 21:3, 4 udi wamba ne: ‘Tangilayi, nzubu wa tshilulu wa Nzambi udi munkatshi mua bantu. Yeye neakupule tshinsonji tshionso ku mesu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ Udiku mumone ne: mvese eu udi wakula bua “bantu” anyi? Lufu ne madilu ne miadi yonso idi lufu lukebesha kabiakuikalaku kabidi to!

Kadi umvua lumu luimpe lukuabu! Bible udi ulaya kabidi ne: bafue nebabike. ‘Dîba nedilue diumvua bonso badi mu nkita dîyi [dia Yezu], nebajuke.’ (Yone 5:28, 29) Anu bu Lazalo uvua Yezu mubishe, nebabike anu bu bantu, kadi ki mbu bifukibua bidi ne mubidi wa mu nyuma to. (Yone 11:43, 44) Bantu bikala mua ‘kuenza malu mimpe’ nebalue bapuangane ne nebadimuene muikala Yehowa Tatu wetu mua kubambuluisha, bualu ‘udi ubulula tshianza tshiende, tshintu tshionso tshidi ne muoyo utshiukutshisha ne diakalengele.’​—Musambu 145:16.

Aba badi bajimije bananga babu ne balue kuitabuja ditekemena dijalame edi, badi badimona dikala dibasamba bikole menemene. (1 Tesalonike 4:13) Nunku biwikala mukaji wa mu lufuila, ikala ‘usambila dîba dionso’ bua kupeta busambi ne diambuluisha diudi nadi dijinga dituku dionso bua kumona mua kupita ne ntatu yebe yonso. (1 Tesalonike 5:17; 1 Petelo 5:7) Keba dîba dituku dionso bua kubala Dîyi dia Nzambi bua meji a Nzambi kukusambawu. Wewe muikale wenza nanku, nansha muikale ne makenga ne ntatu ya bukamba, wewe nkayebe neumone ne: kakuyi mpata, Yehowa udi mua kukuambuluisha bua kupeta ditalala.

[Lungenyi lunene lua mu dibeji 5]

Patudi tuambuluishangana tudi ne bua kumanya mua kusunguluja malu anyi kuikala pabuipi bua kuenzaku bualu kampanda kadi bamanye ne: utudi tukeba kuambuluisha udi ukengela tuetu kumushilaku dîba dia kusombaye nkayende

[Tshimfuanyi mu dibeji 7]

Nzambi wakabenesha Ana, mukaji mukamba ukavua mukulakaje