Utuku ‘udisumbila tshikondo’ anyi?

MUPOSTOLO Paulo wakabela bena Kristo ba mu Efeso ba mu bidimu lukama bia kumpala ne: ‘Nudimuke bienu bu munudi nuenda; kanuendi bu badi kabayi ne meji, kadi nuende bu bena meji; nudisumbile tshikondo patshiditshiku tshia kuenzamu malu mimpe, bualu bua matuku adi mabi.’ (Efeso 5:15, 16) Bua tshinyi mubelu eu uvua ne mushinga? Diandamuna ku lukonko elu didi dilomba kumpala bua kuanji kumanya nsombelu uvua nende bena Kristo ba mu tshimenga tshia kale etshi.

Tshimenga tshia Efeso tshivua tshimanyike bua bubanji buvuamu, tshiendenda, bilumbu, kumanyika kabidi ne bua mishindu ya bungi ya ditendelela ba-demon ivuamu. Muvua kabidi malongesha a nkindi ya malu avua atangila tshikondo ta dîba. Bena Efeso bavua kabayi bena Kristo bavua balongesha ne: matuku a muoyo wa muntu kaena aya anu muyayawu amu matangile ku ndekelu wawu to. Bavua balonge mu nkindi ya bena Greke ne: muoyo wa muntu utu wenda upitshila mu bitupa bishilangane bia muoyo, muteke wende uya kauyi ne ndekelu. Nanku padi muntu mujimije dîba diende mu tshimue tshitupa tshia muoyo, udi mua kudipetela kabidi mu tshitupa tshikuabu tshia muoyo. Ngelelu wa meji wa mushindu’eu uvua mua kuikala mufikishe bena Kristo ba mu Efeso ku dilengulula tshikondo anyi mushindu udi Yehowa ulongolola malu ende, kubafikisha ku kabidi ku dilengulula too ne tshikondo tshidiye muteke dilumbuluisha diende. Ke bualu kayi Paulo wakababela bua ‘kudisumbila tshikondo’ tshiakane.

Paulo kavua wakula bua dîba anu mu bualabale patupu nansha. Muaku wa tshiena-Greke udibu benza nawu mudimu udi mua kumvuija: tshikondo, anyi lupolo kampanda lua dîba dikumbane bua kuenza bualu busunguluke. Paulo wakabela bena Kristo ba mu bidimu lukama bia kumpala bua kuenza mudimu bimpe ne dîba divuabu nadi kumpala kua kujikadi, bualu tshikondo tshia kumona luse lua Nzambi ne lupandu ludiye ufila tshivua ne bua kutua ku tshibungubungu.​—Lomo 13:11-13; 1 Tesalonika 5:6-11.

Tudi petu mu tshikondo tshikumbane tshia muomumue. Pamutu pa kujimija dîba ditudi nadi edi didi kadiyi mua kutupinganyina kabidi, tudinyangila amu mu kukeba kua masanka a panu a tshitupa tshîpi, tuetu bena Kristo tudi ne bua kuleja ne: tudi ne meji patudi tuenza mudimu ne dîba ditudi nadi bua kuikala ne ‘bienzedi bia ditshina dia Nzambi.’ Tuetu tuenza malu mushindu’eu netushemeje bulunda ne Mufuki wetu Yehowa Nzambi.​—2 Petelo 3:11; Musambu 73:28; Filipoi 1:10.