“Yehowa mmungenzele malu mimpe be!”

DITUKU dikuabu dilolo mu ngondo muisatu wa tshidimu tshia 1985, bana betu ba bakaji ne ba balume ba mu Tshibambalu tshia Difunda ku biro bidi bilombola mudimu wa Bantemu ba Yehowa pa buloba bujima, ku New York (États-Unis), bakamona bualu bukuabu bua mushinga mukole. Dituku adi Karl Klein uvua mukumbaje bidimu 60 katshia wabanga mudimu wa ku dîba ne ku dîba. Ne disanka wamba kufua, Muanetu Klein wakamba ne: “Yehowa mmungenzele malu mimpe be!” Wakaleja ne: Musambu 37:4 uvua mvese wende munene. Pashishe, wakasanguluja bonso bavua muaba au pakimbaye lunzenze luende lunene (violoncelle).

Bidimu 15 biakalonda, Muanetu Klein wakatungunuka ne kuikala umue wa ku bawetu bena mu tshibambalu tshia difunda, wakatungunuka kabidi ne kusadila mu Kasumbu Kaludiki ka Bantemu ba Yehowa. Pashishe, mu dia 3 ngondo wa kumpala 2001, wakajikija lubilu luende pa buloba ne lulamatu muikale ne bidimu 95.

Karl uvua muledibue mu Allemagne. Dîku diabu diakamuangala kuya kusombela mu États-Unis ne wakakolela mu musoko wa ku mpenga kua tshimenga tshia Chicago, (mu Illinois). Karl ne muakunyende wa balume Ted bakananga malu a mu Bible bikole patshivuabu bapuekele. Karl wakatambula mu 1918, ne malu akatelejaye mu mpungilu wa Balongi ba Bible wakenzeka mu 1922 akamujula dijinga dikole dia kuyisha. Kavuaku unanga bua kupitshisha lumingu kayi uyisha to, ne ke tshiakatungunukaye ne kuenza too ne mu matuku ende a ndekelu pa buloba.

Karl wakatuadija kusadila mu 1925 ku biro bidi bilombola mudimu wa Bantemu udi wenzeka pa buloba bujima, kubangaye ne mudimu mu tshiapu tshia mikanda. Uvua munange mijiki bikole bia menemene, ne munkatshi mua ndambu wa bidimu uvua muimbi wa lunzenze lunene wa mu tshisumbu tshia bimbi ba mijiki tshivua tshimba ku kadiomba ka Bantemu ba Yehowa [ka WBBR]. Kunyima wakenza mudimu mu Tshibambalu tshia Mudimu pamue ne Thomas Sullivan uvua mutangidi watshi. Mu tshikondo atshi, Ted wakasela Doris, ne bubidi buabu kutuadijabu bumisionere mu Porto Rico.

Munkatshi mua bidimu 50, Karl Klein wakenza mudimu mu Tshibambalu tshia Difunda. Wakambuluisha bikole mu tshibambalu etshi bualu uvua munange dienza makebulula ne uvua mumanye Bible mpala ne nyima. Mu 1963, Karl wakasela Margareta, misionere muena Allemagne uvua wenzela mudimu mu ditunga dia Bolivie. Nansha muvua Karl ukavua ne tusamasama, Margareta wakamuambuluisha, kuenzaye mudimu bidimu bia bungi too ne pakavuaye mumane kukumbaja bidimu bitu bantu ba bungi baya mu pansio. Dikala muena malu malenga katshia ku buana, kusangishaku ne musangelu wa bu kangimba wa misambu, bivua bimuambuluisha bua kuenza miyuki mimpe mu bisumbu ne mu mpungilu idi bantu bashale bavuluke too ne lelu. Matuku makese kumpala kua lufu luende, wakalombola ntendelelu wa mu dinda mu dîku dinene dia Betele ku New York, wakasankisha bonso.

Bantu ba bungi batu ne tshibidilu tshia kubala Tshibumba tshia Nsentedi kabakupua muoyo muyuki wa malu a mu nsombelu wa Klein uvua mupatuke mu nimero wa dia 1 Kasuabanga 1984. Wewe muubale anyi muubalulule, neumone ne: mufundi wawu eu wakatungunuka ne kuikala muena Kristo wa lulamatu munkatshi mua bikuabu bidimu bipite pa dikumi ne bitanu.

Bu muvuaye muikale muela manyi wa Mukalenge, Muanetu Klein uvua ujinga ne muoyo mujima bua kukokesha pamue ne Kristo mu diulu. Tudi bajadike se: Yehowa mmumane kukumbaja dijinga divua nadi Klein adi.​—Luka 22:28-30.

[Tshimfuanyi mu dibeji 31]

Karl mu 1943 ne Thomas Sullivan ne Ted ne Doris

[Tshimfuanyi mu dibeji 31]

Karl ne Margareta mu Kasuabanga 2000