Nkonko ya babadi
Nkonko ya babadi
Bilondeshile Danyele 9:24, ndîba kayi divuabu bajidile ‘Muaba mupite tshijila’ anyi bawele manyi?
Danyele 9:24-27 mmulayi udi utangila dimueneka dia “[Masiya Mulombodi, NW],” anyi Kristo. Diela ‘Muaba mupite tshijila’ manyi divuabu bamanyishe adi kadiena diumvuija kuela Muaba Mutambe Bunsantu wa mu ntempelo wa mu Yelushalema manyi to. Kadi ‘Muaba mupite tshijila’ eu mmuaba wa mu diulu wa ditendelela Nzambi, Muaba Mutambe Bunsantu wa mu diulu, mu ntempelo munene wa mu nyuma wa Yehowa. *—Ebelu 8:1-5; 9:2-10, 23.
Ndîba kayi diakatuadija ntempelo wa mu nyuma wa Nzambi mudimu wende? Vuluka tshiakenzeka dîba diakatambula Yezu mu tshidimu tshia 29 B.B. Kubangila anu dîba adi, Yezu uvua ukumbaja mêyi a mu Musambu 40:6-8. Mupostolo Paulo wakalua kuleja ne: Yezu wakasambila Nzambi ne: ‘Kuakasua nyama mishipa ne bintu bifila, kadi wakandongoluela mubidi.’ (Ebelu 10:5) Yezu uvua mumanye bimpe ne: Nzambi kavua ‘musue’ bua bantu kutungunukabu ne kufila milambu ya nyama mu ntempelo uvua mu Yelushalema to. Yehowa wakalongoluela Yezu mubidi mupuangane wa bumuntu bua kuulambulaye pa muaba wa milambu ayi. Yezu wakaleja kabidi dijinga divuaye nadi mu mutshima wende ne: ‘Mona, ngakulua, (mu mukanda muvunga udi ufundibua bua bualu buanyi) bua kuenza disua diebe, Nzambi.’ (Ebelu 10:7) Kadi Yehowa wakamba tshinyi? Evanjeliyo wa Matayo udi wamba ne: ‘Pakamubatizabu nunku, Yezu wakumuka mu mâyi; ne monayi, diulu diakamubulukila, yeye wakatangila nyuma wa Nzambi upueka bu nyunyi wa nkutshi, umuikila; ne umvuayi, dîyi diakafuma mu diulu ne: Eu udi Muana wanyi munanga, yeye udi unsankisha bimpe.’—Matayo 3:16, 17.
Ditaba dia Yehowa mubidi uvua Yezu ne bua kulambula divua dileja ne: kuvua kuenzeke tshioshelu tshinene tshipite etshi tshiena dîna tshivua mu ntempelo wa mu Yelushalema. Tshioshelu etshi tshidi tshiumvuija “disua” dia Nzambi anyi mushindu uvuaye mulongolole bua kuitaba muoyo wa bumuntu uvua Yezu ne bua kulambula. (Ebelu 10:10) Diela Yezu manyi a nyuma muimpe divua dileja ne: mpindieu Nzambi uvua muenze ntempelo wende mujima wa mu nyuma. * Ke bualu kayi pakatambula Yezu, bakela muaba udi Nzambi musombele mu diulu manyi, peshi wakalua muaba mujidila, ‘Muaba mupite Tshijila’ mu ntempelo munene wa mu nyuma.
[Mêyi adi kuinshi]
^ tshik. 3 Bua wewe kupeta mumvuija a bitupa bishilangane bia ntempelo wa mu nyuma wa Nzambi, bala Tshibumba tshia Nsentedi tshia 1 Kashipu 1996, dibeji dia 14-19.
^ tshik. 5 Ke tshidibu bumvuije mu dibeji dia 194-195 dia mukanda wa Tutumayi ntema ku mulayi wa Danyele!
[Tshimfuanyi mu dibeji 27]
Bakela ‘Muaba mupite Tshijila’ manyi dîba diakatambuishabu Yezu