Tumbishayi Yehowa bua malu ende manene!

‘Muoyo wanyi udi utumbisha Mukalenge, bualu bua udi ne bukole wakungenzela malu manene.’​—LUKA 1:46-49.

1. Mbua malu kayi manene butudi tutumbishila Yehowa?

 YEHOWA mmuakanyine kumutumbisha bua malu ende manene. Pavua muprofete Mose ulonda mushindu uvua Nzambi mupikule Isalele mu bupika mu Ejipitu, wakamba ne: ‘Kadi mêsu enu akatangila malu manene onso akenza Yehowa.’ (Dutelonome 11:1-7) Bia muomumue, pavua muanjelu Gabaliele umanyisha nsongakaji Mariya (patshivuaye kamama) bua diledibua dia Yezu, wakamba ne: ‘Muoyo wanyi udi utumbisha Mukalenge, bualu bua udi ne bukole wakungenzela malu manene.’ (Luka 1:46-49) Bu mutudi Bantemu ba Yehowa, tudi tutumbisha Yehowa bua malu manene bu mudi dipatula bena Isalele mu bupika mu Ejipitu ne dimitshibua dia Muanende munanga mu tshishima.

2. (a) ‘Dipangadika dia kashidi’ dia Nzambi bua bantu bena butumike didi tshinyi? (b) Mmalu kayi akamona Yone pavuaye mu tshisanga tshia Patemo?

² Malu manene a bungi a Yehowa adi atangila “dipangadika diende dia kashidi” dia kubenesha bantu bena butumike ku diambuluisha dia Masiya ne Bukalenge buende. (Efeso 3:8-13, MMM) Dipangadika adi divua dienda dimueneka patoke ku kakese ku kakese pakalejabu mupostolo Yone (ukavua mukulakaje) tshikena-kumona tshia tshiibi tshiunzuluke mu diulu. Wakumvua dîyi bu dia mpungi diamba ne: ‘Ubande biebe kunu, ne nenkuleje malu adi ne bua kulua kunyima kua malu aa.’ (Buakabuluibua 4:1) Pavua mbulamatadi wa bena Lomo mutume Yone ku bukole mu tshisanga tshia Patemo ‘bualu bua dîyi dia Nzambi ne bua dimanyisha dia Yezu,’ wakapeta ‘buakabuluibua bua Yezu Kristo.’ Malu akamona mupostolo eu ne akumvuaye akasokolola mianda ya bungi idi itangila dipangadika dia kashidi dia Nzambi, kupeshawu bena Kristo balelela buonso butoke bua mu nyuma ne kubakankamijawu mu tshikondo tshiakanyine.​—Buakabuluibua 1:1, 9, 10.

3. Bakulu 24 bavua Yone mumone mu tshikena-kumona badi tshimfuanyi tshia banganyi?

³ Pavua tshiibi atshi tshiunzuluke mu diulu, Yone wakamona bakulu 24, basombe mu nkuasa ya butumbi ne bavuale bifulu bu bakalenge. Bakadiela panshi kumpala kua Nzambi bamba ne: ‘Wewe, Mukalenge wetu ne Nzambi wetu, udi muakane bua kuangata butumbi ne bunême ne bukole; bualu bua wewe wakafuka bintu bionso, ne bualu bua disua diebe biakadiku, ne biakafukibua.’ (Buakabuluibua 4:11) Bakulu aba badi tshimfuanyi tshia bena Kristo bela manyi bonso babishibue ku lufu ne baye mu diulu bikale ne muanzu mubandile uvua Nzambi mubalaye. Badi batumbisha Yehowa bua malu ende manene adi atangila bufuki. Tuetu petu tudi tukema patudi tumona tshijadiki tshia ‘bukole bua tshiendelele ne Bunzambi’ bua Yehowa. (Lomo 1:20) Ne patudi tutamba kulonga malu a Yehowa, tudi tupeta bikuabu bijadiki bia bungi bidi  bitusaka bua kumutumbisha bua malu manene adiye muenze.

Manyishayi bantu malu a butumbi a Yehowa!

4, 5. Fila bilejilu bidi bileja muvua Davidi mutumbishe Yehowa.

⁴ Davidi mufundi wa Misambu wakatumbisha Nzambi bua malu Ende manene. Tshilejilu,wakimba ne: ‘Nuimbile Yehowa udi mushikame mu Siona misambu ya kumutumbisha nayi; numanyishe bienzedi biende munkatshi mua bantu ba pa buloba. Yehowa, umfuile luse, tangila dikenga dindi nadi kudi badi nanyi lukuna; wewe udi umbisha bua kungumbusha ku biibi bia ku lufu; bua meme kumanyisha bantu bua butumbi buebe buonso ku biibi bia muana wa bakaji wa Siona.’ (Musambu 9:11, 13, 14) Kunyima kua Davidi mumane kuleja muanende Solomo mushindu wa kuibaka ntempelo, wakatumbisha Nzambi ne kumusamunaye ne: ‘Yehowa, bunene ne bukole ne butumbi ne kutamba ne bulengele butambe mbiebe; bukalenge mbuebe, ne wewe udi ubandishibua ku mutu kua bionso. Nunku, Nzambi wetu, tudi tukusakidila, tudi tutumbisha dîna diebe dia butumbi.’​—1 Kulondolola 29:10-13.

⁵ Misangu ne misangu Mukanda wa Nzambi udi utulomba ne utubela bua kutumbisha Nzambi anu bu muakenza Davidi. Mukanda wa Misambu udi ne mêyi a bungi a kutumbisha nawu Nzambi; tshia bibidi tshia misambu eyi ntshifunda kudi Davidi. Uvua misangu yonso utumbisha ne usakidila Yehowa. (Musambu 69:30) Katshia ku kale, batu bangata misambu ivua Davidi ne bantu bakuabu bafunde ku bukole bua nyuma wa Nzambi bua kutumbisha nayi Yehowa.

6. Mmushindu kayi udi Misambu mifundisha kudi Nzambi ituambuluisha?

⁶ Mukanda wa Misambu udi ne diambuluisha dia bungi kudi batendeledi ba Yehowa! Patudi basue kusakidila Yehowa bua malu manene adiye utuenzela, tudi mua kuvuluka mêyi malenge adi mu Misambu. Tshilejilu, patudi tubika mu dinda, tudi mua kuamba mêyi a muomumue ne aa: ‘Bidi bimpe bua kusakidila Yehowa, ne bua kuimba misambu ya kutumbisha nayi dîna diebe, Nzambi Mutambe Bunene wa mulu. Bidi bimpe bua kuambila bantu bua luse luebe lujalame ne dinda, ne bua kubamanyisha dilolo bu muudi wewe mua kueyemenyibua, bualu bua wewe, Yehowa, wakunsankisha bua bienzedi biebe; bua midimu ya ku bianza biebe nengimbe misambu ya disanka.’ (Musambu 92:1-4) Patudi tutshimuna bualu kampanda buvua butupangisha bua kudiunda mu nyuma, tudi mua kumvua muoyo wa kuleja disanka ne dianyisha mu disambila, anu muakenza mufundi wa Misambu pakimbaye ne: ‘Luayi bienu, tuimbile Yehowa musambu; tuelele dibue dia lupandu luetu mbila ya disanka! Tuye kumpala kuende ne disakidila, tumusankidile ne dîyi dikole ne misambu ya disanka.’​—Musambu 95:1, 2.

7. (a) Ntshinyi tshitudi ne bua kumanya bua misambu mivule itutu tuimba? (b) Mbualu kayi bukuabu butudi ne bua kufikila mu bisangilu kumpala kua dîba ne kushalamu too ne ku ndekelu?

⁷ Pa tshibidilu tutu tuimba misambu ya kutumbisha nayi Yehowa mu bisangilu bia tshisumbu, mu mpuilu ne mu mpungilu. Tshia tuetu kumanya ntshia se: ya bungi ya ku misambu eyi mmiangatshila ku ngenyi idi mu mukanda wa Misambu idi Nzambi mufundishe. Tudi ne disanka dia bungi bua mutudi ne mukanda wa misambu mimpe ya kutumbisha nayi Yehowa! Kuimba misambu ya kutumbisha nayi Nzambi mbumue bua ku malu atudi ne bua kufikila mu bisangilu kumpala kua dîba ne kushalamu too ne ku ndekelu, bua tuetu kuimba misambu bua kutumbisha Yehowa ne kuteleja disambila pamue ne bana betu.

 “Tumbishayi Yehowa!”

8. Muaku wa “Aleluya” udi umvuija tshinyi?

⁸ “Aleluya” mmuaku wa mu tshiena-Ebelu udibu bakudimune misangu mivule ne: ‘Tumbishayi Yehowa.’ Tshilejilu, mu Musambu 135:1-3, tudi tusanganamu lubila lua musangelu elu: ‘Tumbishayi Yehowa. Tumbishayi dîna dia Yehowa. Numutumbishe, nuenu bena mudimu ba Yehowa, nuenu badi bimane mu nzubu wa Yehowa, mu biendedi bia mu nzubu wa Nzambi wetu. Tumbishayi Yehowa, bua Yehowa udi muimpe; nuimbe misambu ya kutumbisha nayi dîna diende, bualu ebu budi bulengele.’

9. Mmalu kayi adi atusaka bua kutumbisha Yehowa?

⁹ Patudi tubandila bintu bia dikema bidi Nzambi mufuke ne malu ende onso adiye mutuenzele, dianyisha dia muoyo mujima didi ditusaka bua kumutumbisha. Patudi tuela meji bua malu a bishima avua Yehowa muenzele bantu bende kale, mitshima yetu idi itusaka bua kumusamuna. Ne patudi tuela meji bua milayi ya malu manene ikala Yehowa mua kulua kuenza, tudi tukeba mishindu ya kumutumbisha ne kumuleja dianyisha.

10, 11. Mmunyi mudi muoyo utudi nawu ne bua kutusaka bua kutumbisha Nzambi?

¹⁰ Muoyo mene utudi nawu ntshintu tshia mushinga tshitudi ne bua kutumbishila Yehowa. Davidi wakimba ne: ‘Ndi nkusakidila [Yehowa], bualu bua difukibua dianyi didi dilengeja meji a mua kukunemeka bikole, didi dinkemesha. Midimu yebe yonso idi malu a kukema; mutshima wanyi udi mumanye bualu ebu bimpe.’ (Musambu 139:14) Bulelela, ‘difukibua dietu didi dikemesha.’ Tudi ne bipedi bilenga bu mudi lumonu, lumvu, ne tshieledi tshia meji. Nanku patudi ne muoyo apa tukebe mishindu ya kutumbisha Mufuki wetu. Paulo wakamba bualu bua muomumue pakafundaye ne: “Nunku binuadia anyi binuanua, anyi malu onso anudi nuenza, nuenze malu onso bua kutumbisha Nzambi.”​—1 Kolinto 10:31.

¹¹ Netuenze malu onso bua kutumbisha Yehowa bituikala bamunange menemene. Yezu wakamba ne: mukenji wa kumpala udi se: “Udi ne bua kunanga Mfumu [Yehowa] webe ne muoyo webe wonso, ne mutshima webe wonso, ne meji ebe onso ne bukole buebe buonso.” (Mâko 12:30, Muanda Mulenga Lelu; Dutelonome 6:5) Kakuyi mpata, tudi ne bua kunanga Yehowa ne kumutumbisha bualu udi Mufuki wetu ne Muena ‘kupa kuonso kuimpe ne dipa dionso diakane tshishiki.’ (Yakobo 1:17; Yeshaya 51:13; Bienzedi 17:28) Tudi ne bua kuenza nanku bualu tshipedi tshietu tshia diela meji, bukole bua kumanya malu a mu nyuma ne makanda a mubidi atudi nawu, ngikadilu yetu yonso ne bionso bitudi nabi mbifumine kudi Yehowa. Bu mudiye Mufuki wetu, yeye ke utudi ne bua kunanga ne kutumbisha.

12. Ntshinyi tshiudi umvua bua malu manene a Yehowa ne bua mêyi a mu Musambu 40:5?

¹² Malu manene a Yehowa adi atupesha bijadiki bivule bidi bitusaka bua tuetu kumunanga ne kumutumbisha! Davidi wakimba ne: ‘Yehowa Nzambi wanyi, wakuvudija malu a kukema awakuenza ne malu awakupangadija bua kutuenzela; kakuena mukuabu utudi bamanye mua kuelekeja nebe. Bingakeba kualondolola ne bua kuambila bantu malu aa, neampite bua kuabala.’ (Musambu 40:5) Davidi kavua mua kubala malu onso a kukema a Yehowa to, nansha tuetu katuena mua kuabala to. Kadi misangu yonso tuikalayi tutumbisha Nzambi patudi tuvuluka nansha bualu kayi buonso bua ku malu ende manene.

Malu adi atangila dipangadika dia Nzambi dia kashidi

13. Mmunyi mudi ditekemena dietu dikale mu malu manene a Yehowa?

¹³ Ditekemena dietu didi mu malu manene a butumbi adi atangila dipangadika dia Nzambi dia kashidi. Kunyima kua buntomboji bua mu Edene, Yehowa wakamanyisha mulayi wa kumpala uvua ufila ditekemena. Nzambi wakamba pakakoselaye nyonka tshibawu ne: “Nenteke lukuna pankatshi pebe ne mukaji, ne pankatshi pa dimiinu diebe ne dimiinu diende. Yeye neakuboze ku mutu ne wewe neumuboze ku tshikankanyi.” (Genese 3:15, NW) Bena lulamatu ba kale bakashala batekemene Dimiinu dia mukaji divuabu balaye kunyima kua Yehowa mumane kuenza bualu bunene bua dikuba Noa ne dîku diende ku Mvula wa kabutu wa buloba bujima wakashipa bantu babi bonso. (2 Petelo 2:5) Milayi ya tshiprofete yakapeshaye bantu ba ditabuja  bu mudi Abalahama ne Davidi yakumvuija kabidi malu avua Yehowa ne bua kuenza ku diambuluisha dia Dimiinu adi.​—Genese 22:15-18; 2 Samuele 7:12.

14. Tela bualu bumue butambe buimpe bua ku malu manene adi Yehowa muenzele bukua-bantu.

¹⁴ Bualu bupite onso buakenza Yehowa bua kuleja ne: udi muenji wa malu manene bua diakalenga dia bukua-bantu buakenzeka pakafilaye Muanende mulela umue, Dimiinu dilaya, Yezu Kristo bu mulambu bua kufuilaye bantu ne kubapikula. (Yone 3:16; Bienzedi 2:29-36) Mulambu eu wakapesha bantu mushindu wa kupungabu tshiakabidi ne Nzambi. (Matayo 20:28; Lomo 5:11) Yehowa wakabueja bantu ba kumpala bakapungaye nabu mu tshisumbu tshia bena Kristo, tshiakasabu mu Pentekoste wa mu 33 B.B. Ku diambuluisha dia nyuma muimpe, bakayisha lumu luimpe miaba yonso, baleja muvua lufu lua Yezu ne dibika diende biunzuluila bantu bena butumike njila wa kupeta mabenesha a tshiendelele pikala Bukalenge bua Nzambi bua mu diulu ne bua kukokesha.

15. Mbualu kayi bua dikema budi Yehowa muenze mu matuku etu aa?

¹⁵ Mu tshikondo tshietu etshi, Yehowa mmusangishe bashadile bena Kristo bela manyi ba ndekelu mu mushindu wa dikema. Mbakuate mpepele ya kabutu bua kumona mua kufila mushindu wa kutua bashadile ba ku bantu 144 000 bakokesha ne Kristo mu diulu tshimanyinu. (Buakabuluibua 7:1-4; 20:6) Nzambi mmupikule bena Kristo bela manyi ku bupika bua mu nyuma bua mu “Babulona Munene,” nsangilu wa bitendelelu bia dishima bia buloba bujima. (Buakabuluibua 17:1-5) Bupikudi ebu buakenzeka mu 1919 ne bukubi bua Nzambi budibu bapete mbibambuluishe bua kuenza tshinyi? Mbibapeshe mushindu wa kukenka padibu bayisha bua musangu wa ndekelu kumpala kua Yehowa kutumaye nshikidilu wa tshikondo etshi tshibi mu “dikenga dinene” didi disemena pabuipi ne lubilu.​—Matayo 24:21; Danyele 12:3; Buakabuluibua 7:14.

16. Ntshinyi tshidi tshienda tshienzeka lelu ku diambuluisha dia mudimu wa dimanyisha Bukalenge pa buloba bujima?

¹⁶ Bantemu ba Yehowa bela manyi mbatungunuje mudimu wa dimanyisha Bukalenge mu buloba bujima ne lukunukunu. Ke bualu kayi bantu ba bungi badi bikale “mikoko mikuabo” badi benda balua mpindieu batendeledi ba Yehowa. (Yone 10:16) Tudi tusanka bua mutshidiku anu mushindu bua bena bupuekele ba pa buloba kudisangishabu netu bua kutumbisha Yehowa. Bantu badi bitaba lubila lua ‘kulua’ nebabakube mu dikenga dinene bua buobu kumona mua kutumbisha Yehowa kashidi ne tshiendelele.​—Buakabuluibua 22:17.

Bantu binunu bivule mbasangile mu ntendelelu mulelela

17. (a) Mmunyi mudi Yehowa wenda wenza malu manene mu mudimu wetu wa buambi? (b) Mmunyi mudi mêyi a mu Zekâya 8:23 enda akumbana?

¹⁷ Mpindieu Yehowa udi wenda wenza malu manene a butumbi mu mudimu wetu wa diamba lumu luimpe. (Mâko 13:10) Mu bidimu bishale ebi, ‘mmunzulule tshiibi tshinene tshia kuenza mudimu.’ (1 Kolinto 16:9) Muanda eu mmufile mushindu wa kuyisha lumu luimpe mu miaba ya bungi ivua baluishi ba bulelela batukangile njila. Bantu ba bungi bavua kumpala mu mîdima ya mu nyuma badi mpindieu bitaba lubila lua kulua kutendelela Yehowa. Badi bakumbaja mêyi a mulayi eu: ‘Yehowa wa misumba udi wamba dîyi edi ne: Mu matuku au bantu dikumi ba mu muaku ne mu muaku nebakuate ku luzemba lua tshivualu tshia muena Yuda, bamuambila ne: tudi basue kuya nebe, bualu bua tuakumvua ne Nzambi udi nebe.’ (Zekâya 8:23)  “Bantu” aba mbena Yuda ba mu nyuma, bashadile bena Kristo bela manyi badiku lelu’eu. Bu mudi tshishiferi dikumi mua kuleja bujima bua bintu bia pa buloba, “bantu dikumi” badi baleja “musumba munene” udibu basangishe pamue ne ‘Isalele wa Nzambi,’ bua kuenzabu “tshisumbu tshimue.” (Buakabuluibua 7:9, 10, MMM; Galatia 6:16) Ndisanka kayipu bua kumona se: bantu bapite bungi mpindieu badi benza mudimu wa tshijila pamue bu batendeledi ba Yehowa Nzambi!

18, 19. Ntshinyi tshidi tshijadika ne: Yehowa udi ubenesha mudimu wa buambi?

¹⁸ Tudi tutshionkomoka bua mudi bantu binunu bivule, nkama ya binunu mene, benda babuela mu ntendelelu mulelela mu matunga muvua bitendelelu bia dishima bikuate muaba kumpala, muvua malu asua kumueneka bu se: bantu kabavua mua kuitaba lumu luimpe. Bala mukanda wa Annuaire des Témoins de Jéhovah wa tshidimu etshi, ne tangila matunga adi mpindieu ne bamanyishi ba bukalenge kubangila ku 100 000 too ne ku bantu batue ku 1 000 000. Etshi ntshijadiki tshikole tshia se: Yehowa udi ubenesha mudimu wa dimanyisha Bukalenge.​—Nsumuinu 10:22.

¹⁹ Bu mutudi bantu ba Yehowa, tudi tutumbisha ne tusamuna Tatu wetu wa mu diulu bua mudiye mutumanyishe tshipatshila tshilelela tshia muoyo, mutupeshe mudimu wende muimpe ne ditekemena dia malu malenga atshilualua. Tudi bindile ne muoyo kulukulu bua kumona muakumbana milayi yonso ya Nzambi ne tudi bapangadike bua ‘kudilama mu dinanga dia Nzambi, batekemene muoyo wa tshiendelele.’ (Yuda 20, 21) Tudi ne disanka dia bungi bua kumona musumba munene udi utumbisha Nzambi mpindieu muikale ne bantu batue ku 6 000 000! Bua dibenesha dia Yehowa, bashadile bela manyi ne balunda babu mikoko mikuabo badi mpindieu mu bisumbu bitue ku 91 000 mu matunga 235. Tuetu bonso tudi tudia bimpe mu nyuma bua mudimu wa kashendende udi “mupika wa lulamatu ne wa budimu” wenza. (Matayo 24:45, NW) Bulongolodi bua Nzambi ebu budi buenda budiunda ne budi ne batangidi ba dinanga budi bulombola mudimu wa Bukalenge mu biro bia filiale 110 ya Bantemu ba Yehowa. Tudi ne dianyisha dia bungi bua mudi Yehowa musake mitshima ya bantu bende bua ‘kumutumbishabu ne biuma biabu.’ (Nsumuinu 3:9, 10) Nunku mudimu wetu wa diyisha buloba bujima udi utungunuka, ne tudi tuenda tuibaka nzubu ya kupatuila mikanda, nzubu ya Betele, ya ba-misionere, Nzubu ya Bukalenge ne ya mpuilu padibi bikengela nanku.

20. Patudi tuelangana meji bua malu manene a butumbi a Yehowa, bidi ne bua kutusaka ku tshinyi?

²⁰ Kakuena mushindu wa tuetu kutela malu manene onso a butumbi adi Tatu wetu wa mu diulu muenze nansha. Kadi kudiku muntu wa mutshima muakane udi mua kubenga bua kudisangisha ne tshisumbu tshinene tshia bantu badi batumbisha Yehowa anyi? Nansha kakese! Bua nanku, bantu bonso badi banange Nzambi bele lubila ne disanka ne: ‘Tumbishayi Yehowa! Tumbishayi Yehowa, nuenu ba mu diulu; numutumbishe mu miaba ya mulu! Numutumbishe, nuenu banjelu bende bonso; bansongalume ne bansongakaji kabidi, bantu banunu ne bana, bamutumbishe! Batumbishe dîna dia Yehowa, bualu bua dîna diende nkayadi didi ditumbishibua; butumbi buende budi pa mutu pa buloba ne diulu.’ (Musambu 148:1, 2, 12, 13) Tutumbishayi Yehowa bua malu ende manene mpindieu too ne kashidi ne tshiendelele!

Newandamune munyi?

• Nng’amue malu manene kayi a butumbi adi Yehowa muenze?

• Bua tshinyi udi umvua muoyo ukusaka bua kutumbisha Yehowa?

• Mmunyi mudi ditekemena dietu dikale mu malu manene a Nzambi?

• Mmunyi mudi Yehowa wenza malu manene a butumbi mu mudimu wa buambi?

[Nkonko ya dilonga]

[Tshimfuanyi mu dibeji 10]

Utuku wimba pebe misambu ya kutumbisha nayi Yehowa ne muoyo mujima anyi?

[Bimfuanyi mu dibeji 13]

Tudi tusanka bua mutshidiku anu mushindu wa bena bupuekele kudisangishabu netu bua kutumbisha Yehowa