Bamanyishi ba Bukalenge badi balonda

Majinga ende a mu nyuma akakumbana

CHYPRE ntshidila tshidi mu ditumba dia ku Nord-Est kua Mbuu wa Mediterane. Mu tshikondo tshia kale, Chypre uvua muende lumu bua argent ne mabaya mimpe a kuibaka nawu nzubu. Paulo ne Bânaba bakayishamu lumu luimpe lua Bukalenge mu luendu luabu lua kumpala lua bu-misionere. (Bienzedi 13:4-12) Lelu, lumu luimpe lutshidi lulengeja kabidi nsombelu wa bantu ba bungi ba mu Chypre. Ke tshidi tshifikile Lucas, muntu mulume wa bidimu 40 ne pa mutu. Udi wamba ne:

“Mvua muledibue mu dîku dia bana muanda-mutekete ku tshimunyinu tshia ngombe. Kubangila ku buana buanyi, mvua musue kubala bikole. Mukanda wanyi umvua mutambe kunanga uvua Bible mukese wa Mikanda ya tshiena-Gelika ya bena Kristo. Pangakakumbaja bidimu dikumi, meme ne bamue balunda banyi tuakenza kasumbu kakese ka balongi ba Bible. Kadi kasumbu ketu aka kakakenza matuku a bungi to bualu bantu bakole ba mu musoko wetu bakatuadija kutubikila ne: batontolodi.

“Kunyima, pamvua nya mu kalasa mu États-Unis, mvua mpetangana ne bantu ba mu bitendelelu bishilangane. Biakampesha dijinga dikole dia kumanya malu a Nzambi. Mvua mpitshisha matuku anyi a bungi mu tshilaminu tshia mikanda tshia iniversite mbala anu kubala malu a bitendelelu bishilangane. Ngakabuela kabidi mu bitanda bia bungi, kadi nansha mungakenza bionso ebi, majinga anyi a mu nyuma kaakakumbana to.

“Pangakajikija tulasa tuanyi, ngakapingana mu Chypre, meme kubanga kuenza mudimu wa mutangidi wa laboratware wa malu a luondapu. Muntu mulume mukuabu mukulakaje, diende Antonis (Ntemu wa Yehowa), uvua ne tshibidilu tshia kulua kuntangila muaba umvua ngenzela mudimu au. Ndekelu wa bionso bena Ekeleziya wa Ortodokse wa bena Gelika bakafika ku dimanya ne: uvua ulua kuntangila.

“Mpindieu, muena teoloji mukuabu kuluaye kunkeba bua kungambila bua tshikadi nyikila kabidi ne Bantemu ba Yehowa to. Bu muvuabu bandongeshe katshia ku buana ne: Ekeleziya Ortodokse wa bena Gelika uvua ne bulelela, ngakitaba, meme kulekela kuyikila ne Antonis, e kubanga kuyikila malu a mu Bible ne muena teoloji au. Ngakabuela kabidi mu nzubu mivule ya badiambike mu Chypre. Ngakaya ne ku Nord kua Gelika bua kumona Mukuna wa Athos, utubu bangata kudi bena Kristo bena Ortodokse bu mukuna mutambe bunsantu. Nansha nanku, nkonko ya malu a mu Bible imvua nayi kayivua mianji kupeta mandamuna to.

“Nanku ngakalomba Nzambi bua angambuluishe mpete bulelela. Kunyima kua matuku makese, Antonis kuluaye kuntangila kabidi muaba umvua ngenzela mudimu au, meme kumona ne: adi divua diandamuna dia disambila dianyi. Ngakalekela kuyikila ne muena teoloji au, meme kutuadija kulonga Bible ne Antonis. Ngakatungunuka ne kukola mu nyuma, ne mu ngondo wa dikumi mu 1997, ngakatambula bua kuleja ne: mvua mudilambule kudi Yehowa.

“Kumpala, mukajanyi ne bana banyi babidi ba bakaji bakavua babandile (wa bidimu 14, ne wa bidimu 10) kabavua basue dilonga edi to. Kadi bua ngikadilu wanyi muimpe, mukajanyi wakangata dipangadika dia kubuela mu bisangilu ku Nzubu wa Bukalenge. Malu malenga a Bantemu ba Yehowa ne mushindu uvuabu bamusankidile biakamukemesha bikole. Tshiakatamba kabidi kumukemesha mmushindu uvuabu babala Bible. Nunku mukajanyi ne bana banyi babidi ba bakaji aba bakitaba bua kulonga Bible ne Bantemu ba Yehowa. Ela meji bua disanka dimvua nadi pakatambulabu busatu buabu mu Mpungilu wa Distrike wa “Dîyi dia Nzambi dia mulayi” mu 1999!

“Bushuwa, ngakapeta bulelela bumvua nkeba. Mpindieu dîku dianyi dijima, ne mukajanyi ne bana banyi banayi, didi mu buobumue mu ntendelelu mulelela wa Yehowa.”