‘Mputa mutapa kudi mulunda’

MUPOSTOLO Paulo wakamona ne: bivua bikengela kupesha bena Kristo ba mu Galatia mu bidimu lukama bia kumpala imue mibelu. Pamu’apa bua kudianjila kubambuluisha bua kabayibengi, wakabakonka ne: “Nunku nakulua muena lukuna wenu bualu bua ndi nuambila bualu bulelela, anyi?”​—Galatia 4:16.

Pavua Paulo ‘ubambila bulelela,’ kavua mulue muena lukuna wabu to. Kadi muanda eu uvua upetangana ne dîyi dia mu Bible edi dia ne: ‘Padi mulunda mukutape mputa udi mua kumueyemena.’ (Nsumuinu 27:6) Paulo uvua mumanye ne: aba bavua bapambuke bavua mua kumvua mibelu eyi ibatapa ku muoyo. Kadi uvua mujadike ne: kubenga kupesha muenji wa mpekatu dinyoka didi dimuakanyine kuvua mua kuleja ne: Yehowa kavua mua kumuleja dinanga to. (Ebelu 12:5-7) Nunku, bu muvuaye mulunda wa lulamatu uvua uditatshisha katshia kuonso aku bua tshisumbu, Paulo kakabenga bua kubapesha mibelu ivua mua kubambuluisha to.

Lelu, Bantemu ba Yehowa badi bakumbaja mudimu wabu wa ‘kuvuija ba bisamba bionso bayidi, kubalongesha mua kuenza malu onso akamba [Yezu Kristo].’ Padibu benza mudimu eu, bena Kristo balelela aba kabena babenga kulamata ku bulelela bua mu Bible budi bubenga ne buela malongesha a dishima ne bilele bidi kabiyi bia bena Kristo patoke. (Matayo 15:9; 28:19, 20; 1 Kolinto 6:9, 10) Pamutu pa kuluabu bu baluishi ba kuipata, badi baleja dinanga ditu nadi balunda balelela.

Mufundi wa Misambu wakafunda ne bujinguludi bua kudi Nzambi ne: ‘Muntu muakane antute, muanda eu newikale luse kundi; ambele biende, kubela kuandi nekuikale bu manyi pa mutu panyi; mutu wanyi kaubengi manyi au.’​—Musambu 141:5.