Nkonko ya babadi

Bua tshinyi mu 2 Petelo 3:13 Bible wa Traduction du Monde Nouveau udi wakula bua “Diulu [ku bungi] ne buloba bupiabupia”, padi eku mu Buakabuluibua 21:1 umanyisha bua “diulu [ku bumue] dipiadipia ne buloba bupiabupia”?

Bualu ebu budi nangananga butangila mushindu uvua miakulu ya ntuadijilu. Kabiena bimueneka bikale ne diumvuija dia pa buadi pa bidi bitangila ngumvuilu wa mvese eyi nansha.

Tutangilayi tshia kumpala mu Mikanda ya tshiena-Ebelu. Mu mikanda ivuabu bafunde mu muakulu wa ku ntuadijilu, muaku wa mu tshiena-Ebelu sha·maʹyim, udibu bakudimune ne: “diulu,” utu anu ku bungi. Bidi bimueneka ne: dikala dia muaku eu ku bungi didi dileja, ki “nditeka tshintu ku bungi bua kuleja lumu luatshi,” kadi “lungenyi lua bitupa bipite bungi bia tshintu tshinene tshialabale mu muaba munene wa tshibuashibuashi.” Abi bidi bileja se: bia mu diulu bidi bimueneka mbitangalake mulu mutantshi mule ne buloba ku nseke ne ku nseke yonso, munkatshi muabi mudi mitoto miliyare ne miliyare. Tshilejilu mu Yeshaya 66:22, mu Traduction du monde nouveau mbakudimune muaku sha·maʹyim padiwu mudianjidila kudi tshidibu babikila mu mfualansa ne: article défini ku bungi (les) mushindu wa muomumue ne: “diulu” (ku bungi). Kadi padi sha·maʹyim kayi ne article défini eu, badi mua kuukudimuna ku bumue (“diulu,” bu mudibi mu Genese 1:8; 14:19, 22; Musambu 69:34, NW) anyi ku bungi (bu mudibi mu Genese 49:25; Balumbuluishi 5:4; Yobo 9:8; Yeshaya 65:17, NW).

Mu Yeshaya 65:17 ne 66:22, muaku wa mu tshiena-Ebelu udibu bakudimune diulu udi ku bungi, ne mbasungule bua kuukudimuna mushindu wa muomumue bua: “diulu [ku bungi] dipiadipia ne buloba bupiabupia.”

Muaku wa mu tshiena-Gelika ou·ra·nosʹ udi umvuija ne: “diulu” ne padiwu ku bungi: ou·ra·noi,ʹ udi umvuija “diulu” (ku bungi). Tshia kumanya ntshia se: bakudimunyi ba Bible wa Septante mbafunde muaku eu ku bumue mu Yeshaya 65:17 ne 66:22.

Netuambe tshinyi bua miaba ibidi idi tshiambilu “diulu dipiadipia [ku bungi ta ku bumue] ne buloba bupiabupia” mu Mikanda ya tshiena-Gelika ya bena Kristo?

Mu 2 Petelo 3:13 (NW) mupostolo Petelo wakangata muaku wa mu tshiena-Gelika muikale ku bungi. Kadi mu mvese idi midianjidile eyi, mmumue ne: mu mvese wa 7, wa 10 ne wa 12, mmuakule bua “diulu” dibi didiku mpindieu, muangate muaku wa ku bungi. Nunku kakuena tshidiye mushintulule padiye muangate muaku udi muikale ku bungi mu mvese wa 13. Kabidi, bidi bimueneka ne: uvua utela mêyi a ku ntuadijilu adi mu Yeshaya 65:17, mudi muaku wa mu tshiena-Ebelu muikale ku bungi, anu bu mudibi mu 2 Petelo 2:22, muvuaye utela mêyi a mu tshiena-Ebelu adi mu Nsumuinu 26:11. Nenku Petelo uvua wakula bua ‘diulu dipiadipia [ku bungi] ne buloba bupiabupia bitudi batekemene bilondeshile mulayi wende.’

Dishilangana dikese didi se: mu Buakabuluibua 21:1 mupostolo Yone mmulonde mushindu udibu bakudimune mu Yeshaya 65:17 mu Bible wa Septante uvua ne muaku wa tshiena-Gelika udibu bakudimune ne: “diulu” ku bumue, anu mutukadi baleje. Bua nunku mêyi a Yone avua se: ‘Ngakatangila diulu dipiadipia [ku bumue] ne buloba bupiabupia; bualu bua diulu dia kumudilu ne buloba bua kumudilu biakumuka.’

Aa mmalu a mushindu uvuabu bafunda muakulu adi atangila nkudimuinu. Tudi tuambulula ne: ngumvuilu wa mvese eu kêna ushintuluka to nansha muntu yeye mubale anyi muakule bua “diulu dipiadipia [ku bungi]” anyi “diulu dipiadipia [ku bumue].” Diumvuija dia miaku eyi didi anu mushindu umue.

[Mêyi a dianyisha bua tshimfuanyi mu dibeji 31]

Mitoto: Frank Zullo