Bua tshinyi kulonga Bible?
Bua tshinyi kulonga Bible?
BILL uvua nsongalume, wa mubidi muvumakane, mumanye mukanda bikole ne muena kantu ku bianza. Kadi bionso abi kabivua bimusankisha to. Kavua mumanye tshivuaye muikadile ne muoyo to, ne bualu ebu buvua butatshisha lungenyi luende bikole. Bua kumanya tshivuaye muikadile ne muoyo, wakabuela mu bitendelelu kabukabu, kadi kakapeta tshivuaye ukeba nansha. Mu 1991 wakayukila ne Ntemu wa Yehowa mukuabu, yeye kumushila mukanda uvua ne malu a mu Bible adi aleja mushinga wa muoyo. Bakatuadija kulonga Bible ne Bill bua kukoka ntema yende ku tshiena-bualu atshi ne ku bikuabu kabidi.
Bill udi wamba ne: “Tuakatuadija dilonga dietu bua musangu wa kumpala, ne bu mutuvua tubala mvese mu Bible misangu ya bungi, ngakamona se: atshi ke tshimvua nkeba menemene. Mandamuna avua Bible ufila avua ansankisha bikole bia dikema. Tujikija dilonga, meme kubanda ne mashinyi anyi lubilu pa mikuna, meme kupatuka mu mashinyi, kuela mukunda bua disanka dimvua nadi. Mvua ne disanka dia bungi menemene bualu mvua ngenda mpeta mandamuna a nkonko yanyi.”
Bushuwa, muntu yonso utu upeta bulelela budi mu Bible katu wela mukunda bua kuleja disanka to. Kupeta mandamuna a makonka manene adi bantu badiela mbualu bua disanka kudi ba bungi. Badi bumvua disanka bu dia buena dia muntu wa mu mufuanu wa Yezu wakangula tshiuma tshivua tshisokoka mu budimi. Yezu wakamba ne: ‘Mu disanka diende, wakaya, wakapana bintu biende bionso, wakasumba budimi abu.’—Tshidi tshikengela bua kuikala ne muoyo udi ne mushinga
Bill uvua utamba kudiela lukonko elu: Muoyo udi ne mushinga kayi? Bena malu a nkindi, a teoloji ne a sianse mbatate bikole bua kuandamuna lukonko elu kukadi bidimu mbombo ne binunu. Bantu mbafunde mikanda bungi tshianana bua kukeba bua kuandamuna lukonko elu. Bionso bidibu benze mbiye mu mâyi, ne ba bungi mbafike too ne ku diamba ne: kakuena muntu udi mua kuandamuna lukonko elu to. Pabi diandamuna didiku. Nansha mudidi ne malu male, ki ndijingakane to. Mbadiumvuije bimpe mu Bible. Tshidi tshikengela bua kupeta disanka ntshiotshi etshi: Tudi ne bua kuikala mu malanda mimpe ne Yehowa, Mufuki wetu ne Tatu wetu wa mu diulu. Kadi mmunyi mutudi tufika ku muanda eu?
Kudi malu abidi adi amueneka bu kaena apetangana adi atangila didia bulunda ne Nzambi. Bantu badi badia bulunda ne Nzambi badi ne bua kumutshina ne kumunanga. Tukonkononayi mvese ibidi idi ijadika bualu ebu. Kale, Mukalenge wa meji Solomo wakalonga bimpebimpe mushindu utu bantu ne pashishe kufundaye malu akamonaye mu mukanda wa mu Bible wa Muambi. Wakafunda kulejaye malu akamonaye mu tshikoso ne: ‘Eu udi nshikidilu wa malu onso; malu onso adi mumvuike. Utshine Nzambi, utumikile mikenji yende; ebu mbualu buonso budi muntu ne bua kuenza.’ (Muambi 12:13; tuetu mbadi baladike maleta.) Panyima pa nkama ya bidimu, pakakonkabu Yezu mukenji uvua mupite mikuabu yonso mu Mikenji ya Mose, wakandamuna ne: ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso.’ (Matayo 22:37; tuetu mbadi baladike maleta.) Bidiku bikunyungulula mutu paudi umvua bua se: tudi ne bua kutshina Nzambi ne kumunanga anyi? Tuanji kukonkonona mushinga udi nawu kutshina ne kunanga ne mushindu udi ngikadilu yonso ibidi eyi yambuluisha muntu bua kuikalaye mu malanda mimpe ne Nzambi.
Tshidi kutshina Nzambi kumvuija
Kutshina kuimpe kudi ne mushinga wa bungi bituikale ne bua kutendelela Nzambi mushindu udiye musue. Bible udi wamba ne: ‘Ditshina dia Yehowa didi tshibangidilu tshia meji.’ (Musambu 111:10) Mupostolo Paulo wakafunda ne: ‘Tuikale ne disakidila, ditudi bamanye mua kukuatshila Nzambi udi unusankisha mudimu ne kunemekela ne ditshina.’ (Ebelu 12:28) Bia muomumue, muanjelo uvua mupostolo Yone mumone munkatshi mua diulu mu tshikena kumona wakatuadija kumanyisha lumu luimpe ne mêyi aa: “Nutshine Nzambi, numutumbishe.”—Buakabuluibua 14:6, 7.
Ditshina dia Nzambi dia nunku didi ne mushinga wa bungi bua kuikala ne disanka mu nsombelu ki mbuôwa bua tshintu tshidi mua kutuenzela bibi to. Buôwa bua mushindu’eu budi mua kutukuata padibu batuluisha kudi muntu wa tshikisu. Kadi ditshina dia Nzambi diodi nkanemu kakole katudi ne bua kuleja Mufuki. Didi kabidi diumvuija diepuka bua kubungamija Nzambi bualu yeye udi Nzuji Mutambe Bunene ne Wa-Bukole-Buonso, udi ne bukole ne bukenji bua kunyoka bonso badi kabayi bamutumikila.
Ditshina ne dinanga bidi bienda pamue
Nansha nanku, Yehowa ki mmusue bua bantu bamusadile anu bualu badi ne buôwa bua bualu buende to. Udi Nzambi wa dinanga dia pa buadi. Mupostolo Yone wakafika too ne ku difunda ne: “Nzambi udi dinanga.” (1 Yone 4:8) Yehowa Nzambi mmuezele bantu malu a bungi a dinanga, ne udi musue bua bantu bamunange pabu. Kadi ndiumvuangana kayi didi mua kuikala pankatshi pa dinanga edi ne ditshina dia Nzambi? Ditshina dia Nzambi ne dimunanga bidi bu mukaba ne tshilamba. Mufundi wa misambu wakafunda ne: “Bulunda bujalame bua Yehowa budi kudi badi bamutshina.”—Musambu 25:14.
Anji ela meji bua kanemu ne buôwa bitu nabi muana kudi tatuende bua mukitshi ne meji bidiye nabi. Nansha nanku muana eu udi unanga tatuende bualu mmumunange pende. Neeyemene tatuende ne neikale anu dijinga ne mibelu yende, mujadika se: mibelu eyi neimupeteshe malu mimpe. Bia muomumue, tuetu bikale banange Yehowa ne tumutshina, netulonde tshidiye utuambila ne netupete malu malenga. Tangila tshivua Yehowa muambe bua Isalele: “Bu bobo ne muoyo wa kuntshina ne kunemeka meyi anyi nenku matuku onso, bavua mua kuikala bena diakalenga kashidi, bobo ne bana babo.”—Dutelonome 5:29, Mukanda wa Mvidi Mukulu [Katolike, MMM].
Eyowa, ditshina dia Nzambi kadiena dibueja muntu mu bupika to, kadi didi dimufikisha ku budikadidi, kadiena dimubungamija to, kadi didi dimupetesha disanka. Yeshaya wakafila mulayi uvua utangila Yezu ne: ‘Disanka diende nedikale mu [ditshina] diende dia Yehowa.’ (Yeshaya 11:3) Ne mufundi wa misambu wakafunda ne: “Wa diakalenga mmuntu udi utshina [Yehowa], udi munange bikole mikenji yende.”—Musambu 112:1, MMM.
Tshidibi, katuena mua kutshina Nzambi ne kumunanga bituikale katuyi bamumanye to. Ke bua tshinyi kulonga Bible kudi ne mushinga wa bungi be. Dilonga edi didi dituambuluisha bua kumanya bumuntu bua Nzambi ne kufika ku ditaba ne dianyisha dionso se: dilonda mibelu yende mmuanda wa meji. Patudi tulua balunda ba Nzambi, tudi tunanga bua kuenza disua diende ne bidi bitusaka bua kulama mikenji yende, bajadika se: neyitupeteshe disanka.—1 Yone 5:3.
Bidi bienza muntu disanka bua kumanya se: udi mu njila wa muoyo. Ke tshidi tshienzekele Bill utudi bakule bualu buende ku ntuadijilu. Uvua muambe matuku adi panshi aa ne: “Mu bidimu tshitema bikadi bipite pangakabanga kulonga Bible musangu wanyi wa kumpala, malanda anyi ne Yehowa mmakole. Disanka dimvua nadi ku ntuadijilu ndilue kuvula bikole mu nsombelu wanyi. Ndi anu ne mmuenenu wa malu muimpe bua muoyo. Matuku anyi mmuule tente ne midimu mimpe, kadi ki ne dikeba masanka adi kaayi ne mushinga to. Yehowa mmulue mpindieu muntu mulelela kundi, ne ndi mumanye se: udi uditatshisha bua diakalenga dianyi.”
Mu tshiena-bualu tshidi tshilonda netumone bia bungi bua mushindu udi dimanya dia Yehowa dituadila muntu disanka ne diambuluisha bantu badi baditumikila.
[Lungenyi lunene lua mu dibeji 5]
Kudia bulunda ne Nzambi kudi kumvuija ne: tudi bamunange ne tudi tumutshina
[Tshimfuanyi mu dibeji 6]
Yezu uvua utshina Yehowa ne disanka