Malu atu ashala akemesha bantu

TSHIDIMU tshionso, Bantemu ba Yehowa batu badisangisha mu matunga bua kuenza mpuilu ne mpungilu ya bena Kristo. Batu badisangisha bua kulonga malu a mu nyuma adi akolesha ne bua kutuilangana ne bana babu. Kadi malu makuabu atu amueneka mu bisangilu biabu ebi atu kabidi mua kushala akemesha benyi batu babuelamu.

Tshilejilu, mu ditunga dia Mozambique, mu ngondo wa muanda-mutekete 1999, Bantemu binunu ne binunu bavua badisangishe mu Mpungilu ya Distrike ya matuku asatu ivua ne malu mimpe mapite bungi. Mpungilu ayi ivua ne tshiena-bualu tshia se: “Diyi dia mulayi dia Nzambi.” Bua bantu ba bungi bavua babuelamu, au uvua musangu wabu wa kumpala. Malu avuabu bumvue ku tshiakuidi ne bionso bivuabu bamone munkatshi muabu biakakemesha bantu abu bikole.

Tangila amue mêyi akambabu ku Nzubu wa Mpuilu wa mu Maputo: “Katshia tshitu muanji kumona muaba muimpe bu eu to! Mu biowedi bia mâyi muvua nsabanga ne mmuenu, ne muvua kabidi mutuma mupuya muimpe be! Bantu bavua basombe mu ditalala, kakuyi mutoyi wa bana baluangana. Ne kakuvua disakilangana to! Ngakamona bansonga ne disanka bayikila malu avua akankamija. Ngakakema kabidi bua mushindu uvua muntu yonso muvuale bimpe menemene. Musangu udi kumpala, nendue ne bana banyi, ne nengambile bayanyi bua itabe bua tuetu kubuela mu mpungilu wa buena eu.”

Bushuwa, bantu kabatu bapanga kumona muoyo mutoke, lulamatu ne mankenda bidi nabi Bantemu ba Yehowa. Bua tshinyi Bantemu mbashilangane ne bantu bakuabu? Bualu badi badienzeja ne muoyo mujima bua kutumikila malu adibu balonga mu Bible. Bua wewe kudimuena malu aa, bua tshinyi kubenga kudisangisha nabu tshidimu etshi mu mpungilu yenzabu mu ditunga dijima anyi mu bisangilu biabu bia ku lumingu bitu bienzekela ku Nzubu wa Bukalenge wa muaba uudi?

[Tshimfuanyi mu dibeji 32]

ZAMBIE

[Tshimfuanyi mu dibeji 32]

KENYA

[Tshimfuanyi mu dibeji 32]

MOZAMBIQUE