Tshidi mua kukuambuluisha bua kumvua Bible

BIBLE mmukanda wa pa buawu. Bantu bakafunda Bible bakamba ne: Nzambi nguvua mubapeshe lungenyi lua kufunda mukanda eu, ne malu adimu adi ajadika bimpe menemene se: bavua bambilemu. (2 Timote 3:16) Bible udi utuleja kutudi bafumine, tshitudi bikadile ne muoyo ne udi utuleja kutuyaya. Bushuwa, mukanda eu mmukumbanyine bua tuetu kuubala!

Imue misangu ukadi mutete bua kubala Bible, kadi kukukolelabi bua kumumvua. Bumue kuena nansha umona kuudi mua kupetela mandamuna a nkonko yebe to. Bikalabi nenku, manya ne: kuena nkayebe to. Tshilumbu tshiebe etshi tshidi bu tshia mulume mukuabu wa mu lukama lua bidimu lua kumpala. Uvua mu luendu mu ditempu diende umbukila ku Yelushalema mutangile mu ditunga diabu dia Atiopa. Munene wa bena Atiopa eu uvua wenda ubala ne dîyi dikole mukanda uvua muprofete Yeshaya mufunde kumane kupita bidimu bipite pa nkama muanda mutekete.

Diakamue, wakumvua bamuela dîyi kudi muntu uvua unyema ku luseke lua ditempu diende. Muntu au uvua Filipo, mulongi wa Yezu, wakakonka muena Atiopa au ne: ‘Udi mujingulule bualu buudi ubala anyi?’ Muena Atiopa kumuandamuna ne: ‘Ndi mua kujingulula munyi, bikala muntu kayi mundeje?’ Pashishe kulombaye Filipo bua abande mu ditempu diende. Filipo kumumvuijaye tshivuaye wenda ubala ne kumuambilaye ‘lumu luimpe lua Yezu.’​—Bienzedi 8:30-35.

 Anu muvua Filipo muambuluishe muena Atiopa bua kumvua Dîyi dia Nzambi bimpe kale, ke mudi Bantemu ba Yehowa bambuluisha bantu lelu bua kumvuabu Bible. Nebikale ne disanka bua kukuambuluisha wewe pebe. Pa tshibidilu, bitu bimpe kulonga Bible ku kakese ku kakese, kutuadija ne malongesha a nshindamenu. (Ebelu 6:1) Paudi uya kumpala ne dilonga diebe, neukumbane bua kudia tshivua mupostolo Paulo mubikile ne: ‘biakudia bikole,’ mbuena kuamba ne: malu male a bulelela. (Ebelu 5:14) Nansha mudibi bua se: Bible ke uudi ulonga, mikuabu mikanda idi payi yambuluisha bua kulonga Bible idi mua kukukuatshisha bua kupeta muaba udi mvese kampanda ne kumvua tshidiyi yumvuija mu biena-bualu bishilashilangane.

Dilonga didi mua kuenzeka dîba ne muaba biudi mumone ne: mbimpe buebe wewe. Bamue batu balongela nansha ku telefone. Dilonga kadiena dienzeka bu mu kalasa to; didi dienzeka bilondeshile nsombelu webe, malu audi mumanye ne dimanya dia mukanda diudi nadi. Kuena ufuta kantu to. (Matayo 10:8) Kabena bakuela mateta to, ne kakuena bualu bua kusamishila mutu to. Neupete mandamuna a nkonko yebe ne neulonge mua kulua mulunda wa Nzambi. Kadi bua tshinyi udi ne bua kulonga Bible? Tangila amue malu adi aleja mudi dilonga dia Bible mua kukupetesha disanka.