Tudifilayi mu disanka dia kupa!
Tudifilayi mu disanka dia kupa!
“Disanka dia kupa ndipite dia kupeta.”—BIENZEDI 20:35, MMM.
1. Mmushindu kayi udi Yehowa uleja disanka dia kupa?
DISANKA dia mutudi bamanye bulelela ne mabenesha adi bulelela ebu butupetesha mmapa a kudi Yehowa. Bantu badi bafike ku dimanya Yehowa badi ne malu a bungi a kusankila. Kadi nansha mudiku disanka padi muntu upeta tshintu, didiku kabidi padiye upangana pende. Yehowa udi Mufidi wa ‘kupa kuonso kuimpe ne dipa dionso diakane,’ ne udi “Nzambi wa disanka.” (Yakobo 1:17; 1 Timote 1:11, NW) Udi ufila malongesha malenga kudi buonso badi bateleja, ne udi usanka padiye umona badiye ulongesha bamutumikila, anu mutu baledi basanka patu bana batumikila malu malenga adibu babalongesha.—Nsumuinu 27:11.
2. (a) Ntshinyi tshiakamba Yezu bua kupa? (b) Ndisanka kayi ditudi tupeta patudi tulongesha bantu bulelela budi mu Bible?
2 Bia muomumue, pavua Yezu pa buloba uvua ne disanka dia kumona bantu bitaba malongesha ende. Mupostolo Paulo wakatela mêyi a Yezu aa: “Disanka dia kupa ndipite dia kupeta.” (Bienzedi 20:35) Disanka ditudi tupeta patudi tulongesha bantu bulelela bua mu Bible ki ndisanka patupu dia mutudi bafikishe muntu ku ditaba malu atudi tumulongesha to. Kadi tudi ne disanka dipite apu dia mutudi bamanye ne: tudi tupesha bantu tshintu tshia mushinga menemene ne wa kashidi. Patudi tupesha bantu bintu bia mu nyuma, tudi mua kubambuluisha bua kupetabu masanka kubangila ku mpindieu too ne kashidi ne tshiendelele.—1 Timote 4:8.
Kupa kudi kupetesha muntu disanka
3. (a) Mmushindu kayi uvua mupostolo Paulo ne Yone baleje disanka diabu dia kuambuluisha bantu mu nyuma? (b) Bua tshinyi kulongesha bana bulelela mmushindu wa kubaleja dinanga?
3 Eyowa, anu mudi Yehowa ne Yezu basanka bua kupeshangana bintu bia mu nyuma, bena Kristo pabu badi basanka bua kuenza nunku. Mupostolo Paulo wakapeta disanka bua muvuaye mumanye ne: uvua muambuluishe bantu bua kulongabu bulelela bua mu Dîyi dia Nzambi. Wakafundila tshisumbu tshia mu Tesalonike ne: ‘Ditekemena dietu didi tshinyi, anyi disanka dietu, anyi tshifulu tshia butumbi? Kabiena nuenu nkayenu, anyi, kumpala kua Mukalenge wetu Yezu ku dilua diende? Bualu bua nuenu nudi butumbi buetu ne disanka dietu.’ (1 Tesalonike 2:19, 20) Pavua mupostolo Yone wakula bua bana bende ba mu nyuma, wakafunda pende ne: “Pandi ngumvua ne: bana banyi badi benda mu bulelela, ndisanka dipite masanka makuabo onso andi mua kupeta.” (3 Yone 4, MMM) Ela kabidi meji bua disanka ditudi tupeta patudi tuambuluisha bana betu balela bua kuluabu bana betu ba mu nyuma! Kukolesha bana mu “dilongesha ne mu mibelu bia kudi Mfumu” mmushindu udi baledi baleja bana dinanga. (Efeso 6:4, Muanda Mulenga Lelu) Padi baledi benza nunku, badi baleja ne: badi bajingila bana babu disanka dia tshiendelele. Padi bana batumikila bidibu babalongesha, baledi badi bapeta disanka dia bungi.
4. Mbualu kayi buenzeke budi buleja disanka dia kupangana mu nyuma?
4 Dell udi muyishi wa ku dîba ne ku dîba ne mamu wa bana batanu. Udi wamba ne: “Ndi ngumvua bimpe disanka divua nadi mupostolo Yone pakambaye mêyi aa, bualu ndi ne dianyisha dia bungi bua mudi bana banyi banayi ‘benda mu bulelela.’ Ndi mumanye bimpe ne: padi mêku mikale mu buobumue mu ntendelelu mulelela, bidi bipesha Yehowa lumu ne butumbi, nunku ndi ne disanka dia bungi pandi mmona Yehowa mubeneshe mudimu undi muenze bua kulongesha bana banyi bulelela. Muoyo kawuyi ndekelu mu mparadizu undi muindile meme ne dîku dianyi udi umpesha ditekemena ne unsaka bua kunanukila nansha mu ntatu anyi bipumbishi.” Diakabi, bakipata muana wa bakaji umue wa Dell mu tshisumbu bualu wakalonda njila udi kayi wa buena Kristo. Nansha nanku, Dell udi wenza muende muonso bua kuikala ne disanka. Udi wamba ne: “Ndi mutekemene ne: dimue dituku muananyi eu neadipuekeshe ne muoyo mujima bua kupinganaye kudi Yehowa. Kadi ndi ngela Yehowa tuasakidila bua mudi ba bungi ba ku bana banyi batungunuka ne kumusadila ne lulamatu. Disanka dindi nadi ditu dimpesha bukole bua bungi.”—Nehemiya 8:10.
Tukebayi balunda ba tshiendelele
5. Patudi tudifila mu mudimu wa divuija bantu bayidi, ndimanya dia malu kayi didi ditupesha disanka?
5 Yezu wakambila bayidi bende bua kuvuija bantu bayidi ne kubalongesha malu a Yehowa ne bidiye ulomba bantu. (Matayo 28:19, 20) Yehowa ne Yezu mbambuluishe bantu ne kalolo bua kulonga bulelela. Nunku patudi tudifila mu mudimu wa divuija bantu bayidi, tudi tupeta disanka dia mutudi bamanye ne: tudi tuidikija tshilejilu tshia Yehowa ne Yezu anu muakatshidikija bena Kristo ba kumpala. (1 Kolinto 11:1) Patudi tuenzejangana mudimu nunku ne Nzambi Wa-Bukole-Buonso ne Muanende munanga, muoyo wetu udi upeta mushinga wawu mulelela. Ndisankapu kayi ditudi nadi dia kuikala munkatshi mua ‘benzejanganyi ba mudimu’ ne Nzambi! (1 Kolinto 3:9) Ne katuenaku mene tutshionkomoka bua mudi too ne banjelu benza pabu mudimu eu wa kuyisha lumu luimpe anyi?—Buakabuluibua 14:6, 7.
6. Mbanganyi badi balua balunda betu patudi tupeshangana bintu bia mu nyuma?
6 Bulelela, patudi tuenza mudimu eu wa dipesha bantu bintu bia mu nyuma, tudi mua kulua ki ng’anu benzejanganyi ba mudimu ne Nzambi, kadi tudi kabidi mua kudia nende bulunda bua kashidi ne tshiendelele. Abalahama wakalua mulunda wa Yehowa bua ditabuja diende. (Yakobo 2:23) Tuetu tuenza muetu muonso bua kuenza disua dia Nzambi, tudi mua kulua petu balunda bende. Tuetu tuenza nanku, tudi tulua kabidi balunda ba Yezu. Wakambila bayidi bende ne: ‘Ngakunubikila balunda; bualu bua ngakunumanyisha malu onso angakumvua kudi Tatu wanyi.’ (Yone 15:15) Bantu ba bungi badi basanka bua mudibu babangata bu balunda ba bantu banene anyi bakokeshi, kadi tuetu badi mua kutuangata bu balunda ba bantu batambe bunene babidi badiku mu diulu ne pa buloba.
7. (a) Mmushindu kayi uvua mukaji kampanda mupete mulunda wa pa muoyo? (b) Ukadiku mupete bualu bua buena ebu anyi?
7 Patudi tuambuluisha bantu bua kumanya Nzambi, buobu pabu badi balua balunda betu, ne ebi bidi bitupesha disanka divule. Joan (udi mu États-Unis) wakatuadija kulongesha muntu mukaji mukuabu Bible, diende Thelma. Nansha muvua balela ba Thelma bamubengela bua kulonga, wakatungunuka ne kulonga ne kutambulaye kunyima kua tshidimu. Joan wakafunda ne: “Dimanyangana dietu kadiakashikila anu apu to; kadi diakandamuka bulunda bukadi buenze mpindieu bidimu bitue ku 35. Pa tshibidilu tuvua tuya pamue mu mudimu wa diyisha ne mu mpungilu. Kunyima, ngakamuangala meme kuya kusombela mutantshi wa kilometre 800. Kadi Thelma udi utungunuka ne kumfundila mikanda mimpe mitambe ne idi indenga ku muoyo, ungambila ne: udi anu mumvuluke bikole ne udi ungela tuasakidila bua mundi mulunda wende wa pa muoyo, ne bua mundi mumulongeshe bulelela bua mu Bible. Kupeta mulunda wa pa muoyo wa nunku ndifutu dilenga dia dikema bua bionso bindi muenze bua kumulongesha malu adi atangila Yehowa.”
8. Ndungenyi kayi luimpe luatuambuluisha patudi tuyisha?
8 Ditekemena dia kupeta muntu udi musue kulonga bulelela didi mua kuambuluisha bua kunanukila nansha padi bantu ba bungi batudi tupeta kabayi baleja dijinga nansha dikese dia kuteleja Dîyi dia Yehowa. Dibenga kuteleja dia bantu dia mushindu’eu didi mua kutatshisha ditabuja ne ditantamana dietu. Kadi, kuikala anu ne musangelu nekutuambuluishe. Fausto, muena mu ditunga dia Guatemala wakamba ne: “Pandi nyisha bantu, ndi ngela meji bua disanka dingikala mua kupeta bu muntu undi ngakula nende mua kulua muanetu wa balume anyi wa bakaji wa mu nyuma. Ntu ngela meji ne: nansha muntu umue ungayikila nende udi mua kulua ndekelu wa bionso kuitaba bulelela bua Dîyi dia Nzambi. Lungenyi elu ludi lungambuluisha bua kutungunuka ne kuyisha ne ludi lumpesha disanka dilelela.”
Tubutshilayi bintu mu diulu
9. Ntshinyi tshiakamba Yezu bua mpetu ya mu diulu, ne bualu ebu budi mua kutulongesha tshinyi?
9 Kuvuija bantu bayidi, nansha buobu bana betu balela anyi bantu ba tshianana, kakutu bualu bupepele to. Kudi mua kulomba matuku, lutulu ne disuminyina. Vuluka ne: bantu ba bungi mbasue kuenza mudimu mukole bua kubumba biuma bia bungi, bitu kabiyi nansha bibapesha disanka ne kabidi kabiyi bishala kashidi to. Yezu wakambila bateleji bende ne: bivua bitambe buimpe bua kuenza mudimu bua kupeta biuma bia mu nyuma. Wakamba ne: “Lekelayi kubumba mpetu pa buloba padi mbumbu ne bishi mua kuyidia, ne padi bena mutshima mua kutubula bimana, kuyiba. Kadi bumbayi mpetu yenu mu diulu, mudi mbumbu ne bishi kabiyi mua kuyidia, bena mutshima kabayi mua kutubula bimana bua kuyiba.” (Matayo 6:19, 20, MMM) Patudi tukumbaja bipatshila bietu bia mu nyuma bu mudi kuenza mudimu wa mushinga mukole wa kuvuija bantu bayidi, tudi mua kupeta disanka dia kumanya se: tudi tuenza disua dia Nzambi ne edi dia se: yeye neatufute. Mupostolo Paulo wakafunda ne: ‘Nzambi kêna upanga buakane bua kupueye muoyo wa mudimu wenu ne wa dinanga dinuakaleja bua dîna diende.’—Ebelu 6:10.
10. (a) Bua tshinyi Yezu uvua ne mpetu ya mu nyuma? (b) Mmunyi muakadifila Yezu, ne bualu ebu buakapetesha bantu tshinyi?
10 Tuetu tuenza mudimu wa kuvuija bantu bayidi ne tshisumi, tudi tubumba ‘mpetu mu diulu’ anu muakamba Yezu. Ebi bidi bitupesha disanka dia kupeta. Tuetu tupeshangana ne kalolo, tudi tufika ku didivuija babanji. Yezu uvua musadile Yehowa munkatshi mua bidimu bungi kabuyi kubala. Ela meji bua mpetu ivuaye mubumbe mu diulu! Nansha nanku, kakakeba disanka diende nkayende to. Mupostolo Paulo wakafunda ne: “[Yezu] wakadifila bua malu mabi etu bua yeye atusungile munkatshi mua tshikondo etshi tshibi bu mudi disua dia Nzambi Tatu wetu.” (Galatia 1:4; tuetu mbadi baladike maleta.) Yezu wakadifila mu mudimu wende ne kalolo, ne wakafila kabidi muoyo wende bua kupikula bantu bakuabu bua se: bobo pabu bapete mushindu wa kubumba mpetu mu diulu.
11. Bua tshinyi mapa a mu nyuma mmapite a ku mubidi?
11 Patudi tulongesha bantu malu a Nzambi, tudi tubambuluisha bua bamanye pabu mudibu mua kubumba mpetu ya mu nyuma itu kayiyi inyanguka. Ntshintu kayi tshinene tshiudi mua kupesha muntu? Wewe mupeshe mulunda webe dîba, vuatire nansha nzubu wa mushinga mukole, mulunda eu neikale pamu’apa ne dianyisha ne disanka, ne wewe neupete disanka dia kupa. Kadi tshintu tshiudi mumupeshe atshi netshikale mushindu kayi kunyima kua bidimu 20? 200? 2 000? Kadi, wewe mudifile bua kuambuluisha muntu bua kusadilaye Yehowa, dipa adi didi mua kumupetesha masanka tshiendelele.
Tukebayi bantu badi basue bulelela
12. Mmunyi mudi bantu ba bungi badifile bua kuambuluisha bakuabu mu nyuma?
12 Bantu ba Yehowa mbafike too ne ku ntengu ya buloba bua kudifila mu disanka dia kupeshangana bintu bia mu nyuma. Bavule mbashiye matunga ne mêku abu bua kuya kuenza mudimu wa bu-misionere mu matunga mudibu balonge miakulu ne bibidilu bipiabipia. Bakuabu mbaye miaba ya mu matunga abu mudibu dijinga dikole ne bamanyishi ba Bukalenge. Bakuabu pabu mbalonge muakulu wa ku ba bende bua kupeta mushindu wa kuyisha benyi badi balua mu matunga abu. Tshilejilu, muanetu mukuabu wa balume ne mukajende badi basombele mu New Jersey (Étas-Unis), bakabanga kuenza bumpanda-njila ne kulonga tshiena-Chine kunyima kua bamane kukolesha bana babu babidi badi mpindieu basadila ku biro bidi bilombola mudimu wa Bantemu ba Yehowa mu buloba bujima. Mu bidimu bisatu, bakalonga Bible ne bantu 74 bavua bakula tshiena-Chine bavua balonga mu iniversiste uvua pabuipi nabu. Udiku mua kuvudija mudimu webe mu mushindu kampanda bua wewe kupeta disanka dia bungi mu mudimu wa divuija bantu bayidi anyi?
13. Ntshinyi tshiudi mua kuenza biwikala musue bua mudimu webe kupatulawu mamuma a bungi?
13 Bumue udi ne dijinga dikole dia kulombola dilonga dia Bible kadi kuyi upeta mushindu wa kudilombola to. Mu amue matunga bitu bikole bua kupeta bantu badi basankidila bulelela. Pamu’apa bantu baudi upeta kabena basankidila Bible to. Bikalabi nanku, udi mua kuikala uleja Yehowa dijinga diebe edi mu masambila, mumanye ne: Yehowa ne Yezu Kristo badi baditatshisha bikole bua mudimu eu ne badi mua kukulombola kudi muntu udi mufuane mukoko. Lomba lungenyi kudi bana betu ba mu tshisumbu badi bamanye malu a kuyisha bikole ne batu bapatula mamuma mu mudimu eu. Londa malu adibu balongesha ne ngenyi idibu bafila mu bisangilu bietu bia bena Kristo. Tumikila mibelu idibu bafila kudi batangidi bena ngendu ne bakaji babu. Ne tshidi ne mushinga wa bungi ntshia se: kupinganyi tshianyima nansha. Muena meji wakafunda ne: “Kuna maminu ebe ne dinda, kuikishi dilolo; bualu bua kuena mumanye ne bidi bidiunda ngebi anyi mbiabia, anyi bubidi buabi nebidiunde.” (Muambi 11:6) Vuluka kabidi balume ba lulamatu aba: Noa ne Yelemiya. Nansha muakateleja bantu bakese menemene diyisha diabu, mudimu wabu kawakapangila to. Tshivua ne mushinga ntshia se: mudimu eu wakasankisha Yehowa.
Enze tshiudi mua kukokesha
14. Mmunyi mudi Yehowa umona aba badi bakulakajile mu mudimu wende?
14 Nsombelu webe udi mua kuikala kayi ukupetesha mushindu wa kuenza mudimu wa bungi bu muudi musue to. Tshilejilu, bukulakaje budi mua kukupangisha mua kuenza malu makuabu mu mudimu wa Yehowa. Nansha nanku, vuluka mêyi akafunda muena meji aa: ‘Nsuki mitoke too idi tshifulu tshia butumbi, nebatshipete mu njila wa buakane.’ (Nsumuinu 16:31) Bidi bisankisha Yehowa padi muntu ufila muoyo wende mu mudimu Wende. Mukanda wa Nzambi udi wamba kabidi ne: “Nengikale amu nnulama nenku too ne munuakulakaja. Nennulame bo bo bo, too ne munuatoka nsuki. Meme ke uvua munuambule kale, ntshidi amu nnuambula ne ku lelu. Eyowa, nuenu ke bandi mulame. Nennusungidile.” (Yeshaya 46:4, Mukanda wa Mvidi Mukulu [Mishonyi, MMV]) Tatu wetu wa mu diulu muena dinanga udi ulaya bua kukolesha ne kukuatshisha bena lulamatu bende.
15. Udi witabuja bua se: Yehowa udi ukumvuila bilondeshile nsombelu webe anyi? Bua tshinyi?
15 Pamu’apa udi uluangana ne disama, utantamena buluishi bua muena dibaka nebe udi kayi muena Kristo nebe, anyi udi ne majitu a bungi a mu dîku peshi lutatu lukuabu. Yehowa mmumanye bidi bitukolele bua kuenza ne ntatu yetu, ne mmutunange bua mutudi tudienzeja ne muoyo mujima bua kumusadila. Udi utunanga nansha padi bitudi tuenza mua kuikala bikese ku bidi bakuabu benza. (Galatia 6:4) Yehowa mmumanye bimpe ne: tudi bapange bupuangane, ne kêna utulomba malu atudi katuyi mua kukumbaja nansha. (Musambu 147:11) Tuetu benze muetu muonso, tudi mua kushala bajadike ne: Nzambi udi utuangata ne mushinga ne kakupua bienzedi bietu bia ditabuja muoyo nansha.—Luka 21:1-4.
16. Mmu mushindu kayi mudi tshisumbu tshijima tshivuija muntu muyidi?
16 Vuluka kabidi ne: mudimu wa kuvuija bantu bayidi mmudimu wa mu tshibungi. Muntu umue nkayende kêna mua kuvuija muyidi to, anu mudi dimata dimue dia mâyi kadiyi mua kudisha mutshi. Bulelela, Ntemu umue udi mua kupetangana ne muntu kampanda ne kubanga kumulongesha Bible. Kadi padi anu muntu mupiamupia eu ulua ku Nzubu wa Bukalenge, tshisumbu tshijima tshidi tshimuambuluisha bua kumanya bulelela. Musangelu wa bana betu udi uleja bukole bua nyuma wa Nzambi. (1 Kolinto 14:24, 25) Bana ne bansonga badi bafila mandamuna mimpe, bileja mupiamupia eu ne: bansonga betu mbashilangane ne bansonga ba panu. Bana betu badi basama, badi balema ne badi bakulakaje ba mu tshisumbu badi balongesha bapiabapia tshidi ditantamena ntatu diumvuija. Nansha tuetu bikale bukole kayi anyi katuyi ne mushindu wa kuenza amue malu, tuetu bonso tudi tuenza mudimu wa mushinga mu diambuluisha bapiabapia padi dinanga diabu dia bulelela dienda dikola ne baya kumpala too ne padibu bafika ku ditambula. Dîba dionso ditudi tuenza mu mudimu wa diyisha, ditudi tupinganyina muntu, ditudi tuyikila ne muntu udi usankidila bulelela ku Nzubu wa Bukalenge, didi mua kumueneka bu didi kadiyi ne mushinga to, kadi padi didi munkatshi mua mudimu wa bukole udi Yehowa wenda ukumbaja.
17, 18. (a) Pa kumbusha mudimu wa kuvuija bantu bayidi, mmushindu kayi utudi mua kudifila mu disanka dia kupa? (b) Patudi tudifila mu disanka dia kupa, nganyi utudi tuidikija?
17 Bulelela, pa kumbusha dienza mudimu wa mushinga mukole wa kuvuija bantu bayidi, tuetu bena Kristo tudi kabidi tudifila mu disanka dia kupeshangana bintu mu mishindu mikuabu. Tudi mua kufila makuta bua kukuatshisha ntendelelu mulelela ne kuambuluisha bantu badi mu dikenga. (Luka 16:9; 1 Kolinto 16:1, 2) Tudi mua kukeba mishindu ya kuakidila benyi. (Lomo 12:13) Tudi mua kudienzeja bua ‘kuenzela bantu bonso bimpe, kadi tutamba kuenzela bena dîku dia bena kuitabuja bimpe.’ (Galatia 6:10) Ne tudi tuenzela bakuabu tu-malu tukese kadi tuikale tua mushinga, bu mudi patudi tufundila muntu mukanda, tumubikila ku nshinga, tumupesha tshintu, tumuambuluisha mu bualu kampanda anyi tumukankamija ne tu-meyi tuimpe.
18 Patudi tupa bakuabu bintu, tudi tuleja ne: tudi tuidikija Tatu wetu wa mu diulu. Tudi kabidi tuleja bana betu dinanga, didi dikale tshimanyinu tshia bena Kristo balelela. (Yone 13:35) Kuvuluka malu aa kudi mua kutuambuluisha bua kudifila mu disanka dia kupa.
Udi mua kumvuija anyi?
• Mmunyi mudi Yehowa ne Yezu batupeshe tshilejilu mu dipeshangana bintu bia mu nyuma?
• Mmushindu kayi utudi mua kupeta balunda ba tshiendelele?
• Mmalu kayi atudi mua kuenza bua mudimu wetu kupatulawu mamuma a bungi?
• Mmushindu kayi udi bonso badi mu tshisumbu mua kudifila mu disanka dia kupa?
[Nkonko ya dilonga]
[Bimfuanyi mu dibeji 13]
Padi bana batumikila bidibu babalongesha, baledi badi bapeta disanka dia bungi
[Tshimfuanyi mu dibeji 15]
Patudi tuvuija bantu bayidi, tudi mua kupeta balunda balelela
[Tshimfuanyi mu dibeji 16]
Yehowa udi ulama bakulakaje
[Bimfuanyi mu dibeji 17]
Tudi tupeta disanka dia kupa nansha mu tu-malu tukese kadi tuikale tua mushinga