‘Wakananukila too ne ku nshikidilu’

MU BANDE wa video wa mu 1993 utubu baleja bana betu bakuabu badibu basakidila ku badi basadila ku biro bidi bilombola mudimu wa Bantemu ba Yehowa pa buloba bujima, Lyman Alexander Swingle wakamba bua kuleja muvuaye wangata kuenzela Yehowa mudimu ne: “Fuaku ne bisabata biebe ku makasa!” *

Muanetu Swingle (uvua ne bidimu 90) wakenza anu tshivuaye ukankamija bakuabu bua kuenza. ‘Wakananukila too ne ku nshikidilu.’ (Matayo 24:13) Nansha muvuaye usama, bu muvuaye muena mu Kasumbu Kaludiki ka Bantemu ba Yehowa, mu Disatu dia 7 Luabanya, wakabuela mu tshisangilu tshiaku. Mu dibidi dia lumingu luakalonda, disama diende diakakola, ne pa dîba 4 wa dinda ne minite 26, mu dia 14, munganga uvua umondapa wakamanyisha bua se: Swingle wafu.

Lyman Swingle wakatuadija mudimu wende ku Betele wa Bantemu ba Yehowa wa ku Brooklyn, mu New York, mu dia 5 Tshisanga 1930. Wakenzaku mudimu bidimu bitue ku 71. Kumpala bakapesha Lyman mudimu mu tshibambalu mudibu balamakajila mikanda, pashishe kumutumabu mu tshia dipatuila mikanda ku biamu, ne wakambuluisha kabidi bua kuenza mâyi a kufunda nawu ku biamu. Muanetu Swingle wakashala mu nzubu wa dienza mâyi a kufunda nawu ku biamu bidimu 25 bijima. Wakenza kabidi bidimu 20 bulubulu mu tshibambalu tshia difunda. Munkatshi mua bidimu 17 bia ndekelu bia muoyo wende, wakenza mudimu mu Biro bia Tshibutshilu.

Muanetu Lyman uvua mumanyishi wa Bukalenge uvua ne dikima. Mu bidimu biende bia ntuadijilu mu Brooklyn, yeye ne Arthur Worsley uvuabu nende mu nzubu umue bavua ne tshibidilu tshia kuya ne amue a ku mazuwa a Bantemu pa Musulu wa Hudson. Bavua bangata bikolokolo bia mêyi, benda bamanyisha mukenji wa Bukalenge mu misoko ya ku muelelu wa musulu eu.

Muanetu Swingle uvua muledibue mu dia 6 Kasuabanga 1910 mu Lincoln (mu Nebraska), kadi kunyima kua matuku makese dîku diabu diakaya kusombela mu Salt Lake City (mu Utah). Momu amu, baledi bende kuluabu Balongi ba Bible (badibu babikila lelu ne: Bantemu ba Yehowa). Dîku dia tatu Swingle diakakidila bangamba-malu bavule bavua bumbukila ku Betele wa ku Broklyn munkatshi mua bidimu bia bungi, ne balume aba bakambuluisha Lyman mu malu a bungi. Mu 1923, pavuaye ne bidimu 12, wakatambula bua kuleja ne: uvua mudilambule kudi Nzambi.

Kunyima kua yeye mumane kusadila munkatshi mua bidimu bipite pa 26 ku Brooklyn mu bujike, Lyman wakapeta masanka a bungi pakaselaye Crystal Zircher mu dia 8 Kabalashipu 1956. Bavua anu bu mukaba ne tshilamba, bavua anu bayisha pamue too ne pakafua Crystal mu 1998. Bidimu bu bisatu kumpala kua lufu luende, Crystal wakateketa luseke, yeye kushala kayi ne mushindu wa kuenda to. Mushindu uvua Muanetu Lyman udifila dituku dionso bua kumuambuluisha uvua tshilejilu tshia lulamatu tshiakakolesha bantu bonso, nangananga aba bavua bamona Lyman upusa Crystal mu dikalu dia balema mu njila ya bena ku makasa pabuipi ne Betele ne Crystal wabanyina bapitshi ba njila Tshibumba tshia Nsentedi ne Réveillez-vous!

Muanetu Swingle uvua muntu mujalame, wa musangelu uvuabu banange bikole kudi bantu bakafika ku dimumanya. Anu bu tatuende ne mamuende, Swingle uvua ne ditekemena dia mu Bible dia kusomba ne Yezu Kristo mu Bukalenge bua mu diulu, ditekemena ditudi bajadike ne: diakumbanyi mpindieu.​—1 Tesalonike 4:15-18; Buakabuluibua 14:13.

[Mêyi adi kuinshi]

[Tshimfuanyi mu dibeji 31]

Muanetu Swingle wakenza bidimu 25 mu nzubu wa dienzela mâyi a kufunda nawu ku biamu

[Tshimfuanyi mu dibeji 31]

Lyman ne Crystal bavua anu bu mukaba ne tshilamba