Nuikale bakumbane ne batuishibue bikole

Mibelu idi ifikila bansonga pa dîba diayi

EPAFA uvua muena Kristo wa mu bidimu lukama bia kumpala uvua muye mu Lomo. Nansha muvuaye muyemu, meji ende avua anu mu Kolosai, tshimenga tshia mu Asia Mukese. Uvua muyishamu lumu luimpe ne kabiyi mpata, uvua kabidi muambuluishe bamue bena Kolosai bua kuluabu bayidi ba Yezu Kristo. (Kolosai 1:7) Epafa uvua uditatshisha bikole bua bena Kristo nende ba mu Kolosai bualu mu mukanda uvua mupostolo Paulo mufundile mu Lomo, wakabambila ne: “Epafa . . . udi unutumina muoyo, udienzeja misangu yonso bua bualu buenu mu masambila ende, bua ndekelu wa bionso nuikale bakumbane ne batuishibue bikole bua malu onso adi Nzambi musue.”​—Kolosai 4:12, NW.

Bia muomumue, batatu ne bamamu bena Kristo ba matuku etu aa batu pabu basambila bikole bua bana badibu balele bikale bimpe mu nyuma. Baledi aba batu badienzeja bua kukuna dinanga dia Nzambi mu mitshima ya bana batshidi bansonga bua batuishibue mu ditabuja.

Bansonga bena Kristo ba bungi batu balombe diambuluisha bua kumona mua kutantamena ntatu idibu bapeta mu tulasa ne miaba mikuabu. Nsongakaji mukuabu wa bidimu 15 wakamba ne: “Ntatu yetu idi yenda ikola. Nsombelu utudi nende udi wenza buôwa bua bungi. Tudi dijinga ne diambuluisha!” Malomba a bansonga aba ne masambila a baledi babu badi batshina Nzambi akadiku mapete mandamuna anyi? Eyowa. “Mupika wa lulamatu ne wa budimu” utu anu ufila mibelu ya mu Bible. (Matayo 24:45, NW) Mu tshiena-bualu etshi tudi tuleja imue mikanda idi miambuluishe bansonga bungi tshianana bua kuikalabu “bakumbane ne batuishibue bikole.” Tumonayi mikese ya ku mikanda eyi.

“Tangilayi . . . Bantemu bapiabapia 15 000!”

Mu ngondo wa muanda-mukulu 1941, bantu 115 000 bavua badisangishe mu Saint Louis, mu Missouri (États-Unis), mu mpungilu mutambe bunene wakenza Bantemu ba Yehowa tshikondo atshi. Dituku dia ndekelu dia mpungilu eu divua “Dituku dia Bana,” ne bana batue ku 15 000 bavua basombe pabuibi ne tshiakuidi, bateleje ne ntema yonso muyuki wa Joseph Rutherford uvua ne tshiena-bualu tshia se: “Bana ba Mukalenge.” Pabuipi ne ku ndekelu kua muyuki wende, Muanetu Rutherford (muikale ne bidimu 71 dîba adi) wakakula ne dîyi dia butatu wamba ne:

“Nuenu buonso . . . bana badi bitabe . . . bua kutumikila Nzambi ne Mukalenge udiye muteke, imanayi kuulu bu nuenu mua kusua.” Bana buonso e kujuka kuulu. Muanetu Rutherford kutuaye tshikemu e kuamba ne: “Tangilayi, bantemu bapiabapia ba Bukalenge bapite pa 15 000!” Bikashi e kudilabi bu makubakuba. Yeye kuambaye kabidi ne: “Nuenu bonso bikala mua kuenza muenu muonso bua kuambila bantu malu a Bukalenge bua Nzambi. . . , ambayiku ne: Eyowa.” Bana bakandamuna ne dîyi dikole ne: “Eyowa!” Pashishe yeye kuleja mukanda mupiamupia wa Bana (Angl.), wakakidilabu ne bikashi bikole kabiyi bikoseka.

Kunyima kua muyuki mulenga eu, basonga bakela mulongo mule bapitshila pa tshiakuidi pavua Muanetu Rutherford ubapeshila mukanda mupiamupia eu. Muanda eu wakapuekeshisha bateleji binsonji. Muanetu umue uvua mu mpungilu au wakamba ne: “Anu muntu uvua ne mutshima wa dibue ke uvua mua kubenga kumvua disanka pavuaye umona bana [baleja] muvuabu beyemena ne bitabuja Nzambi wabu Yehowa ne muoyo mujima.”

Mu mpungilu au ukena kupua muoyo, bansonga 1 300 bakatambula bua kuleja patoke ne: bavua badilambule kudi Yehowa. Ba bungi ba kudibu mbashale batuishibue mu ditabuja too ne lelu wa ndaya. Badi bambuluisha bisumbu biabu, benza mudimu wa budisuile ku Betele, anyi wa bu-misionere mu matunga a ku ba bende. Bushuwa, bansonga ba bungi batu bashale bavuluke “Dituku dia Bana” ne mukanda wa Bana.

“Bitu bifika anu pa dîba menemene”

Mu bidimu bia 1970, Bantemu ba Yehowa bakapatula mikanda mikuabu isatu yakalenga mitshima ya bansonga bavule. Mikanda ayi nyoyi eyi: Telejayi Mulongeshi munene, Votre jeunesse​—comment en tirer le meilleur parti, ne Miyuki ya mu Mukanda wa Nzambi. Mu 1982, biena-bualu bia “Les jeunes s’interrogent . . .” biakabanga kupatuka mu tshibejibeji tshia Réveillez-vous! Biena-bualu ebi mbisankishe mitshima ya bansonga ne bantu bakole. Muana mukuabu wa bidimu 14  wakamba ne: “Dilolo dionso ntu ngela Nzambi tuasakidila bua mudibu bayipatule.” Munga wa bidimu 13 wakamba ne: “Ntu musue biena-bualu ebi be, bitu bifika anu pa dîba menemene.” Baledi ne bakulu bena Kristo badibu bateke mu tshisumbu badi bitaba ne: biena-bualu ebi bitu bifika pa dîba ne bitu biambuluisha bikole.

Kubangila mu 1989, biena-bualu bia “Les jeunes s’interrogent . . .” bitue ku 200 mbipatuke mu Réveillez-vous! Mu mpungilu wa distrike uvua ne tshiena-bualu tshia “Bulamate kudi Nzambi” wakenzeka mu tshidimu atshi, bakapatulamu mukanda wa Les jeunes s’interrogent​—Réponses pratiques. Mukanda eu mmuambuluishaku bansonga bua kuikalabu batuishibue mu ditabuja anyi? Bansonga basatu bakafunda ne: “Mukanda eu mmutuambuluishe bikole bua kumvua ntatu itudi nayi ne bua kumanya tshia kuenza padiyi itufikila. Tuasakidilayi bua munudi nuditatshisha bua bualu buetu.” Bansonga bavule badi babale mukanda eu pa buloba bujima badi bitaba bualu ebu.

“Mbijikije nzala yetu”

Mu 1999, Bantemu ba Yehowa bakapatuila bansonga tshintu tshikuabu tshidi tshibapesha mibelu ya pa dîba diayi: bande wa video wa mu Anglais udi ne tshiena-bualu tshia se: Young People Ask​—How Can I Make Real Friends? Bande eu wakasankisha bansonga bikole. Umue Nsonga wa bidimu 14 wakamba ne: “Bande eu mmulenge mutshima wanyi bikole be.” Mamu mukuabu uvua udikoleshila nkayende bana wakamba ne: “Bande eu neikale mu biakudia bietu bia mu nyuma bia dituku dionso.” Munga muanetu wa bakaji ukadi kuende wakamba ne: “Bidi bisankisha bikole bua kumona se: Yehowa Mulunda wetu Mulenga mmunange bansonga badi mu bulongolodi buende budi pa buloba bujima ne udi ubambuluisha.”

Mmunyi mudi bande wa video eu muambuluishe? Bansonga bakuabu badi bamba ne: “Mmungambuluishe bua meme kutangila bantu bandi nsomba nabu, kuvudija bungi bua bantu bandi ntantshila mu tshisumbu, ne bua kudienza mulunda wa Yehowa.” Mukuabu pende ne: “Mmungambuluishe bua meme kukandamena bansonga nanyi ba bikadilu bibi.” Munga ne: “Mmukoleshe dipangadika dindi muangate dia kusadila Yehowa muanyi muonso.” Mulume mukuabu ne mukajende bakafunda pabu ne: “Tudi tunuela tuasakidila ne muoyo mujima bua munudi batupeshe ‘biakudia’ ebi. Mbijikije nzala yetu.”

“Mupika wa lulamatu ne wa budimu” muela manyi mmukumbaje mudimu udi Nzambi mumupeshe bualu mmufile biakudia bia mu nyuma pa dîba diabi bua bantu bonso bikala mua kuanyisha bua kubidia. Katuenaku tumvua disanka patudi tumona mudi mibelu ya mu Mukanda wa Nzambi yambuluisha bansonga lelu bua ‘bikale bakumbane ne batuishibue bikole bua malu onso adi Nzambi musue’ anyi?