“Nzambi utu ufundila bantu tshibawu bua kubuosha mu inferno anyi?”

“Nutu nulonga tulasa tua teoloji anyi?”

Lukonko elu luakakemesha Joel ne Carl. Bansongalume babidi aba (badi benza mudimu wa budisuile ku tshilombuelu tshia midimu ya Bantemu ba Yehowa ku Brooklyn mu provense wa New York) bavua bela dîsu mu mikanda ya mu tshisumbishilu tshia mikanda tshivua pabuipi nabu. Pavua Joel munkatshi mua ditangila mikanda ya concordance ya mêna ne miaku ya mu Bible, Carl uvua umulondela bualu buvuabu bayikile mu buambi ne muntu mukuabu. Kunyima kua munga muntu uvua muimane pabuipi apu mumane kumvua amue malu avuabu bayukila aa, muntu au wakumvua muoyo umusaka bua kuyikila nabu.

Kadi tshilumbu tshia muntu eu katshivua tshia kumanya bu bikala bansonga babidi aba bavua balonga anyi kabavua balonga teoloji to, uvua yeye ne buende buvua bumutonde munda. Wakabumvuija ne: “Ndi muena Yuda, ne bamue balunda banyi bena Kristo mbangambile ne: nengoshike mu inferno bualu bena Yuda bakabenga Yezu. Bualu ebu budi bumpapakaja bikole. Kabiena bimueneka biakane bua dinyoka dia nunku kufuminadi kudi Nzambi wa dinanga. Nzambi utu ufundila bantu tshibawu bua kubuosha mu inferno anyi?”

Joel ne Carl bakamuambila ne: batu balongi ba Bible ba tshisumi. Buobu kumulejabu tshidi Bible wamba bua bafue ne: ki mbamanye bualu nansha bumue ne mbalale bindile dibika. Nanku bafue kabatu bakenga peshi batata mu inferno wa kadilu nansha. (Musambu 146:3, 4; Muambi 9:5, 10; Danyele 12:13; Yone 11:11-14, 23-26) Ku ndekelu kua diyuki diabu adi dia minite 45, muntu eu wakapesha Joel ne Carl adrese wende ne kubalombaye mumvuija makuabu pa tshilumbu etshi.

Bu inferno wa kapia muikale muaba wa makenga makole, kuvuaku muntu uvua mua kulomba bua kuyamu anyi? Pabi, nkambua Yobo, pavuaye ukeba bua kunyema makenga ende makole, wakalomba ne: “Wewe anu munsokoke mu inferno.” (Yobo 14:13, TOB) Bushuwa, Yobo kavua wangata inferno bu muaba wa makenga nansha. Kadi uvua ukeba bua kupengamamu. Lufu ndibenga kuikala ne muoyo, ne Bible udi umvuija ne: inferno ndukita.

Wewe musue kumanya malu makuabu bua tshidi tshituenzekela patudi tufua ne ditekemena didiku, tudi tukusengelela bua kuitaba tshidibu bakulomba kuinshi eku.