Utuku ne lutulu menemene anyi?

KUTUKU muanji kumvua tshiji tshikole bua ngikadilu mubi wa muntu kampanda anyi? Utuku uya ne malu lukasa lukasa patu balunda bebe ba pa muoyo babanga kuenza malu mabi anyi?

Kuenza bualu ne muoyo umue ne mitalu kutu misangu mikuabu kukengedibua bua mpekatu munene kafiki ku ditangalaka to. Tshilejilu, pavua malu mabi matuadije kunyanga bena Isalele mu lukama lua 15 lua bidimu K.B.B., Pinehasa, muikulu wa Alona wakadisuika ne muoyo umue bua kumbusha malu mabi. Yehowa Nzambi wakanyisha tshiakenzaye, kuambaye ne: “Pinehasa . . . wakalekesha tshiji tshianyi kudi Bena Isalele, bualu bua yeye wakadi ne mukau bu mukau wanyi munkatshi muabo.”​—Nomba 25:1-11.

Pinehasa wakenza bualu buvua bukengedibua bua bubi abu kabutungunuki ne kutampakana to. Kadi tudi mua kuamba tshinyi bua difika tshiji patupu patupu bua bilema bia bakuabu? Tuetu baye ne malu lukasa lukasa, katuakulua babingishi ba buakane to, tudi mua kulua bantu badi bapange lutulu, badi kabayi balekelela bakuabu bilema biabu. Ntshinyi tshidi mua kutuambuluisha bua kuepuka buteyi ebu?

‘Yehowa udi ukulekelela bilema biebe bionso’

Yehowa udi “Nzambi wa mukawu (lukunukunu); Nzambi udi kayi witaba ditembangana nende.” (Ekesode 20:5, NW, note) Bu mudiye Mufuki, udi ne bukenji bua kutulomba bua tuetu kumulamata amu yeye. (Buakabuluibua 4:11) Nansha nanku, Yehowa udi ulekela bantu matekete abu ne lutulu. Davidi mufundi wa Misambu wakimba ne: “[Yehowa] udi dinanga ne luse, kena ufika munda lukasa, udi muule tente ne dinanga. [Kakutungunuka dîba dionso ne kutalulangana bilema] . . . Kena ulondesha mibi yetu, kena utunyoka bilondeshile bilema bietu.” Eyowa, tuetu banyingalale bua mibi yetu, Nzambi ‘udi utulekelela [bilema] bietu bionso.’​—Musambu 103:3, 8-10, MMM.

Bu mudi Yehowa mumanye ne: bantu mbena mpekatu, ‘kêna utungunuka ne kutalula bilema’ bia benji ba malu mabi badi banyingalala bua mpekatu yabu to. (Musambu 51:5; Lomo 5:12) Tshipatshila tshiende ntshia kumbusha mpekatu ne dipanga bupuangane. Kadi kumpala kua tshiotshi kukumbanatshi, Nzambi “kêna ulondesha mibi yetu” to, udi utufuila luse bua mulambu wa Yezu Kristo udi upikula bantu. Muntu nansha umue kavua mua kukumbanyina lupandu bu Yehowa kayi mutufuile luse bua bilema bietu. (Musambu 130:3) Tudi ne bua kuikala ne dianyisha dia bungi bua mudi Tatu wetu wa mu diulu, eu udi utulomba bua kumulamata amu yeye, muikale Nzambi wa luse!

Bidi bikengela kuikala ne nkatshinkatshi

Bu mudi Mukalenge Munene wa diulu ne buloba ulekela bantu bapange bupuangane bilema ne lutulu, nanku ki ntshitudiku petu ne bua kuenza anyi? Tudi mua kumvuija lutulu bu dibenga kufika munda bua malu adi bakuabu bamba anyi benza. Yonso wa kutudi udiku ne ngikadilu eu wa kuleja lutulu ne dipitshisha malu adi bakuabu bamba anyi benza, adi kaayi mpekatu minene, kadi mikale pamu’apa kaayi makumbane anyi?

Nansha nanku, tudi ne bua kuepuka bua kunekesha mu kulekelelangana kua bilema ne lutulu. Tshilejilu, kutu kuenzeka malu mabi matambe padi balombodi ba bitendelelu balekela badiambike batu misangu yonso bakuata bana ba balume ne ba bakaji bua kuenda nabu masandi. Kamona-kamba mukuabu wa mu ditunga dia Irlande wakamba ne: “Bu mutubu bamona tshidi tshienzekela bana bu mpekatu wa mu mpukapuka, balombodi ba ekeleziya  batu batuma mudiambike udi muenze bibi [muaba mukuabu].”

Kutuma muntu wa buena eu muaba mukuabu ntshilejilu tshia dilekelangana dimpe dia bilema ne lutulu anyi? Tòo. Fuanyikija ne: batangidi ba mpitadi badi banyishila munganga udi kayi mumanye mua kupandangana bimpe bua atungunuke ne kupandangana, bangata bamutuma mu lupitadi lukuabu, nansha muvuaye ushipa babedi anyi ubakosa bitupa bia mubidi. Ngumvuilu mubi wa tshidibu babikila ne: diumvuangana dia baminganga udi mua kulela dilekela bilema dia mushindu’eu. Kadi tudi mua kuamba tshinyi bua bantu bavua bajimije mioyo yabu anyi bapete lutatu lunene bua dilengulula malu anyi mene bua dibunda dia bilumbu?

Kudi kabidi njiwu padi muntu ubuikidilangana bilema ne lutulu anu kakese menemene. Pavua Yezu pa buloba, bamue bena Yuda bavuabu babikila ne: ba-Zelote bavua badiamba muvuabu balonda tshilejilu tshia Pinehasa bua kubingisha malu avuabu benza. Bumue bualu bunekeshe buvua ba-Zelote benza buvua bua “kudisangisha ne bisumbu bia bantu mu Yelushalema mu bikondo bia mafesto ne bibilu bikuabu ne pashishe batua baluishi babu tuele.”

Tuetu bena Kristo katuena ne bua kuenza malu bu muvua ba-Zelote benza, tuluisha badi kabayi batusankisha nansha. Kadi dipanga lutulu didiku ditusaka bua kuluisha bantu batudi katuyi basue mu imue mishindu, pamu’apa tubapenda anyi? Bituikala ne lutulu menemene, katuakunyemena ku bipendu to.

Bafalese ba mu bidimu lukama bia kumpala bavua pabu tshisumbu tshia bantu bavua bapange lutulu. Bavua misangu yonso bapisha bantu ne kabavua babalekelela bilema bivuabu benza nansha. Bafalese bena lutambishi abu bavua bapepeja bantu, babamba ne: bavua “bedibua mulau.” (Yone 7:49) Ke bualu kayi Yezu wakela bilema bia bantu aba bavua badimona bu bakane patoke, kubambilaye ne: ‘Nuenu bafundi ne Bafalese, nudi bena lubombo! Mulawu ulualua kunudi; bualu bua nuenu nutu nuafila tshia dikumi tshia luenyi, ne tshia tshidibi’a luenyi, ne tshia tshikote, kadi nuakulekela kuenza malu makole a mikenji ya Nzambi, bulelela ne luse ne ditabuja; biakadi bimpe bia nuenu kuenza malu aa a ku nyima, ki mbimpe nulengulule mua kuenza malu au a ku mpala kabidi.’​—Matayo 23:23.

Pakamba Yezu mêyi aa, kavua upetula mushinga wa ditumikila Mikenji ya Mose to. Uvua uleja patupu ne: bitupa ‘bikole’ anyi bia mushinga bia Mikenji bivua bilomba bua kubitumikila ne nkatshinkatshi ne luse. Ke bua tshinyi Yezu ne bayidi bende bakatumba kupita Bafalese ne ba-Zelote bavua kabayi balekelelangana kalema nansha kamue!

Ni n’Yehowa ni n’Yezu Kristo kakuena muntu udi wanyisha malu mabi to. Mu katupa kîpi emu, Nzambi ‘neadisombuele kudi bantu badi kabayi bamumanye ne kudi badi kabayi batumikila lumu luimpe.’ (2 Tesalonike 1:6-10) Bua lukunukunu ludi nalu Yezu bua buakane, katu upanga kuidikija ngikadilu wa Tatuende wa mu diulu muena lutulu, muena luse ne udi munange bantu bonso badi basue kuenza malu makane. (Yeshaya 42:1-3; Matayo 11:28-30; 12:18-21) Etshi ntshilejilu tshilenga tshidi Yezu mutushile!

Nulekelelangane mibi yenu ne lutulu

Nansha tuetu mua kuikala ne lukunukunu lukole bua malu makane, tutumikilayi mubelu wa mupostolo Paulo eu: ‘Nulejangane lutulu, nulekelelangane mibi yenu, bikala muntu ne mukuabu tshilumbu; bu muakanubuikidila Mukalenge mibi yenu; nuenu nuenze muomumue kabidi.’ (Kolosai 3:13; Matayo 6:14, 15) Lutulu ludi lutulomba bua tuetu kubuikidilangana bilema ne mapanga etu pa buloba ebu bua bantu bapange bupuangane. Tudi ne bua kuikala ne nkatshinkatshi mu malu atudi tujinga bua bakuabu benze.​—Filipoi 4:5.

Kuikala ne lutulu kakuena kumvuija kuanyisha dienza dia malu mabi anyi kubuikila mêsu pa bilema nansha. Imue misangu ngelelu wa meji anyi ngikadilu wa muena Kristo netu kampanda udi mua kuikala kayi umvuangana ne mikenji ya Yehowa. Nansha mudi disesuka edi kadiyi dinene menemene bua kumufikisha ku dimubengabu kudi Nzambi, didi mua kuikala  tshimanyinu tshidi tshileja ne: mmuakanyine imue mibelu. (Genese 4:6, 7) Bulelela, bidi bileja dinanga padi aba badi bakumbaje malu malomba a mu nyuma bapingaja muntu udi mupambuke mu njila mu bitulu. (Galatia 6:1) Kadi bua kukumbajabu muanda eu, bidi bikengela buobu kuikala ne lungenyi lua diambuluishangana pamutu pa lua ditobololangana.

“Ne bupole ne kanemu”

Kadi netuambe tshinyi bua kuikala ne lutulu kudi bantu ba mu bitendelelu bikuabu? “Dilongesha dia bantu bonso” divuabu balamike mu Bilongelu bia Mbulamatadi bionso bia mu ditunga dia Irlande mu 1891 didi diamba ne: “Yezu Kristo kavua mulongolole bua kuenzejabu bantu ne tshikisu bua bitabe tshitendelelu tshiende to. . . . Kukokangana ne bantu netu ne kubamba mêyi mabi ki mmushindu wa kubatuisha bua se: tuetu tudi babinge ne bobu mbapile nansha. Bidi anu bu tudi tubajadikila ne: katuena ne meji a buena Kristo nansha.”

Ndongeshilu ne ngenzelu wa malu wa Yezu bivua bikoka bantu bua kuteleja Dîyi dia Nzambi, ke mutudi petu ne bua kuenza nanku. (Mâko 6:34; Luka 4:22, 32; 1 Petelo 2:21) Bu muvuaye muntu mupuangane uvua Nzambi mupeshe meji a pa buawu, uvua umona malu avua mu mitshima ya bantu. Ke bualu kayi pavuabi ne mushinga, Yezu uvua uleja bilema bia baluishi ba Yehowa patoke. (Matayo 23:13-33) Kavua wenza nanku bualu uvua mupange lutulu nansha.

Tuetu katuena ne bukole bua kumona malu adi mu mitshima ya bantu bu Yezu to. Pa nanku, tudi ne bua kulonda mubelu wa mupostolo Petelo wa se: “Nemekayi Kristo mu mitshima yenu bu Mfumu. Nuikale badilongolole bua kuandamuna bonso badi banulomba majingulula a bualu bua ditekemena didi munda muenu. Kadi nuandamune ne bupole ne kanemu.” (1 Petelo 3:15, 16, MML) Bu mutudi basadidi ba Yehowa, tudi ne bua kubingisha malu atudi tuitabuja bualu mmangatshila mu Dîyi dia Nzambi. Kadi tudi ne bua kuenza nunku mu mushindu udi uleja ne: tudi tunemeka bakuabu ne malu abu onso adibu bitabuje ne muoyo mujima. Paulo wakafunda ne: ‘Mêyi enu ikale ne ngasa misangu yonso, matue bu luepu, bua nuenu numanye mua kuandamuna muntu ne muntu dîyi.’​—Kolosai 4:6.

Yezu wakamba mu Muyuki wende muende lumu wakenzaye pa Mukuna ne: “Nuenzele bantu malu onso anudi basue banuenzele.” (Matayo 7:12) Nunku, tubuikidilanganayi bilema ne lutulu ne tunemekayi bantu batudi tuyisha lumu luimpe. Tuetu bikale ne lukunukunu lua buakane ne lutulu ludi Bible ulomba, netusankishe Yehowa ne netuikale ne lutulu lua menemene.

[Tshimfuanyi mu dibeji 23]

Epuka dipanga lutulu dia buena dia Bafalese

[Tshimfuanyi mu dibeji 23]

Yezu uvua ne lutulu lua buena lua Tatuende. Udi pebe nalu anyi?