Didi dilala bikole kupita ngolo mulengeja

BANTU batu bakeba ngolo bikole bua bulenga buende ne bualu utu ulala bikole. Batu batamba kumukeba bualu utu ushala anu ubalakana ne kayi ukuata dimoma. Bidi nanku bualu mâyi, lupepele lua oksijene, soufre ne bintu bikuabu pabuipi ne bionso kabitu mua kunyanga ngolo to. Bintu bia bungi bienza ne ngolo bidibu bangule muinshi mua mâyi ne miaba mikuabu bitshidi anu bibalakana nansha mukadibi bienze nkama ya bidimu.

Kadi Bible udi wamba ne: kudi tshintu tshitu tshilala bikole ne tshitu ‘tshipite [ngolo udi ujimina] ne udibu bateta mu kapia.’ (1 Petelo 1:7, MMM) Ngolo ‘muteta’ anyi mulengeja ne kapia anyi mu mishindu mikuabu udi mua kulengela, kupeta buimpe bua 99,9 pa lukama. Kadi nansha ngolo mulengeja utu ujimina anyi wenguluka buobu bamuele mu mâyi adibu babikila ne: eau régale, mmumue ne: aside wa klore musambakaja ne aside wa azote. Nenku Bible udi upetangana ne siyanse padiye wamba ne: “ngolo udi ujimina.”

Kadi ditabuja dilelela dia bena Kristo diodi ndishilangane ne ngolo bualu ‘didi dipetesha muoyo.’ (Ebelu 10:39) Bantu badi mua kushipa muntu udi ne ditabuja dikole anu muakashipabu Yezu Kristo. Kadi badi balaya bantu badi ne ditabuja dia bushuwa ne: ‘Wikale biebe ne dieyemena too ne ku lufu, nunku nenkupe tshifulu tshia butumbi tshia muoyo.’ (Buakabuluibua 2:10) Nzambi utu ushala muvuluke bena lulamatu badi bafua, ne neababishe. (Yone 5:28, 29) Ngolo nansha bamuamba bungi kayi kêna mua kuenza bualu ebu to. Ke bua tshinyi tudi tuamba ne: ditabuja didi ne mushinga wa bungi menemene kupita ngolo. Kadi bua ditabuja kuikaladi ne mushinga eu, didi padi ne bua kutetshibua. Bushuwa, ‘ditabuja ditetshibua’ diakamba Petelo didi ne mushinga wa bungi menemene kupita ngolo. Bantemu ba Yehowa nebasanke bua kukuambuluisha bua kulonga Bible bua wewe kumona mua kupeta ne kulama ditabuja dikole dia Nzambi mulelela Yehowa ne Muanende Yezu Kristo. Bilondeshile Yezu, kuenza nunku ke kudi kupetesha “muoyo wa tshiendelele.”​—Yone 17:3.