Enza bua kudiunda kuebe kumueneke patoke

‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso.’​—1 TIMOTE 4:15.

1. Ntshinyi tshidi mua kukuleja ne: tshimuma kampanda tshikadi tshibobe ne ntshifike pa dîba dia kutshidia?

 VULUKA tshimuma tshiutu musue bikole, tshidi mua kuikala tshikaka, tshibote, dingaya anyi tshimuma tshikuabu. Udiku mua kuamba bua kuleja dîba dikaditshi tshibobe ne tshikumbane bua kutshidia anyi? Eyowa, udi mua kuleja bualu ebu. Mupuya watshi, tshizubu tshiatshi ne mushindu uditshi tshiumvuika ku bianza, bionso ebi bidi bikuleja ne: ukadi pa kutshilabula ne kumvua muditshi tshimpe. Paudi wela anu kapesa ka tshimuma etshi mukana, udi mua kuamba wanyisha ne: tshidi ne butamu bua dikema! Ntshishême be! Bushuwa, tshidi tshikusankisha bikole menemene.

2. Mmunyi mutu diboba dia mu nyuma dimueneka, ne mmunyi mudidi diambuluisha mu malanda a muntu ne bakuabu?

² Tshilejilu etshi tshipepele tshidi tshipetangana ne malu makuabu a mu nsombelu wetu. Anu mutu diboba dia tshimuma, diboba dia mu nyuma dia muntu ditu kabidi dimueneka mu mishindu ya bungi. Tudi tumona ne: muntu ukadi mubobe mu nyuma patudi tumona dijingulula diende dia malu, meji ende ne bikuabu. (Yobo 32:7-9) Bulelela, bitu bisankisha bikole bua kusomba ne kuenza mudimu ne bantu badi ngikadilu eyi imuenekela mu malu adibu bamba ne adibu benza.​—Nsumuinu 13:20.

3. Ntshinyi tshidi mêyi avua Yezu muambe bua bantu ba mu tshikondo tshiende aleja bua diboba?

³ Kadi muntu udi mua kuikala umueka bu ukadi muntu mukole ku bidimu, kadi ngakuilu wende ne ngenzelu wende wa malu bidi mua kuleja ne: lungenyi luende ki nduanji kukola, kabidi ne: ki mmuanji kukola mu nyuma nansha. Tshilejilu, pavua Yezu wakula bua bantu ba tshitshiu ba mu tshikondo tshiende, wakamba ne: ‘Yone wakalua kayi udia bidia, kayi unua maluvu; badi bamba ne: Udi ne demon munda. Muana wa muntu wakulua udia bidia, unua maluvu;  badi bamba ne: Yeye udi muena mudi, udi mukuatshiki wa maluvu.’ Nansha muvua bantu abu bikale bantu bakole, Yezu wakamba ne: bavua benza malu bu “bana bakese” bualu kabavua banji kuboba to. Ke yeye kuamba kabidi ne: “Bienzedi bia lungenyi bidi bilujadika.”​—Matayo 11:16-19.

4. Mmu mishindu kayi mudi didiunda ne diboba bia mu nyuma bimueneka?

⁴ Mêyi a Yezu aa adi atuleja ne: malu adi muntu wenza ne bipeta bidiwu apatula bidi mua kutuleja ne: udi anyi kêna ne meji (adi mikale tshimanyinu tshinene tshia dikola). Tangila mubelu uvua mupostolo Paulo mupeshe Timote bua muanda eu. Yeye mumane kutela malu avua Timote ne bua kukumbaja, Paulo wakamba ne: ‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso.’ (1 Timote 4:15) Bushuwa, didiunda dia muena Kristo mutangile ku diboba dia mu nyuma ditu ‘dimueneka’ anyi dijinguluka patoke. Diboba anyi dipia dia mu nyuma dia muena Kristo ki ngikadilu musokome udi kayi umueneka to, didi anu bu muinda mutemesha. (Matayo 5:14-16) Bua nanku tumonayi mpindieu mishindu minene ibidi itudi mua kuleja patoke didiunda ne diboba dietu dia mu nyuma: (1) kuvudija kua dimanya ne ngumvuilu wetu wa malu ne meji; (2) kuikala ne mamuma a nyuma.

Buobumue bua ditabuja ne bua dimanya

5. Diboba ntshinyi?

⁵ Nkonga-miaku ya bungi idi yumvuija muaku diboba anyi dipia bu dikulumpa menemene, ne difika pa muaba anyi mulongo wa ndekelu udi ukengedibua. Anu mutudi baleje ku ntuadijilu, tshimuma ntshibobe paditshi tshifike ku ndekelu kua dikola diatshi, ne padi mubidi watshi, tshizubu, mupuya ne mushindu uditshi tshiumvuika mukana bileja ne: mpindieu ntshikumbane bua kutshidia. Nenku dipia anyi diboba didi diumvuija dilengela tshishiki, dikumbana anyi dipuangana menemene.​—Yeshaya 18:5; Matayo 5:45-48; Yakobo 1:4.

6, 7. (a) Ntshinyi tshidi tshileja ne: Yehowa Nzambi mmusue bua batendeledi bende bonso badiunde batangile ku diboba dia mu nyuma? (b) Diboba dia mu nyuma didi diumvuangana bikole ne tshinyi?

⁶ Yehowa Nzambi mmusue bua batendeledi bende bonso badiunde ne baye batangile ku diboba dia mu nyuma. Bua kufikilaku, mmufile mapa malenga mu tshisumbu tshia bena Kristo. Mupostolo Paulo wakafundila bena Kristo ba mu Efeso ne: ‘Wakapa bakuabu bua kuikala bapostolo, ne bakuabu bua kuikala baprofete, ne bakuabu bua kuikala batangidiki, ne bakuabu bua kuikala [bamanyishi ba lumu luimpe], ne bakuabu bua kuikala bayishi; bua kulengejabu bansantu tshishiki bua buobu benze mudimu wa kukuatshisha bakuabu, bua kudiundishabu ekeleziya udi mubidi wa Kristo; too ne patuapeta buonso buetu buobumue bua ditabuja ne bua [dimanya dijalame] dia Muana wa Nzambi, too ne patuafika ku mulongo wa muntu mukole, too ne ku luidi lua dikola didi mu tshiuwidi tshia Kristo. Wakenza nunku bua tuetu katuikadi bu bana kabidi badi batshikishibua eku ne eku ne badi batambakajibua ku lupepele luonso lua diyisha, ku majimbu a bantu, ku budimu budibu balonda mu mashimi abu.’​—Efeso 4:11-14.

⁷ Mu mvese eyi, Paulo wakumvuija ne: Nzambi mmufile mapa a mu nyuma aa mu tshisumbu bua bonso ‘bapete buobumue bua ditabuja ne bua dimanya dijalame,’ bafike ku “mulongo wa muntu mukole” ne ku ‘luidi lua dikola didi mu tshiuwidi tshia Kristo.’ Anu tuetu benze nunku ke tuetu kubenga kutshikishibua eku ne eku  kudi malongesha ne ngenyi ya dishima bu bana bakese mu nyuma. Nenku tudi tumona diumvuangana dikole pankatshi pa kudiunda batangile ku diboba mu nyuma dia bena Kristo ne dipeta dia ‘buobumue bua ditabuja ne bua dimanya dijalame dia Muana wa Nzambi.’ Mu mubelu wa Paulo eu mudi ndambu wa malu atudi ne bua kutumikila.

8. Kupeta “buobumue” mu ditabuja ne mu dimanya dijalame kudi kulomba tshinyi?

⁸ Tshia kumpala: bu mutudi ne bua kulama “buobumue” buetu, muena Kristo yonso ukadi mubobe mu nyuma udi ne bua kuikala mu buobumue ne mu diumvuanga dikole ne bena Kristo nende mu ditabuja ne mu dimanya. Kêna ubingisha anyi ulonda ngenyi yende yeye bua bidi bitangila mushindu wa kumvua Bible nansha. Kadi, udi weyemena bulelela budi Yehowa Nzambi mufile ku diambuluisha dia Muanende Yezu Kristo ne “mupika wa lulamatu ne wa budimu.” Tuetu bikale ne tshibidilu tshia kudia biakudia bia mu nyuma bidibu batupesha “mu tshikondo tshiakanyine,” bitudi tupetela mu mikanda yetu ya bena Kristo, mu bisangilu bietu, mu mpuilu ne mu mpungilu yetu, dîba adi tudi mua kujadika ne: tudi mu “buobumue” ne bena Kristo netu mu ditabuja ne mu dimanya.​—Matayo 24:45, NW.

9. Fila diumvuija dia muaku ‘ditabuja’ udi Paulo mutele mu mukanda wende uvuaye mutumine bena Efeso.

⁹ Tshibidi: muaku ‘ditabuja’ udibu batele muaba eu udi utangila malu onso atudi bitabuje, ‘butshiame ne bule, butumbuke, buondoke’ bua ditabuja edi. (Efeso 3:18, MMM; 4:5; Kolosai 1:23; 2:7) Mmunyi mudi muena Kristo mua kuikala mu buobumue ne bena Kristo nende bikalaye witaba anu tshitupa kampanda tshia ‘ditabuja’ edi? Bidi biumvuija ne: katuena ne bua kusanka anu bua kumanya malongesha manene a mu Bible anyi kuikala ne dimanya dia bulelela didi kadiyi disunguluke anyi dia pa mutu pa mutu. Kadi tudi ne bua kuenza mudimu ne bionso bidi Yehowa mutupeshe anyi mutulongoluele mu bulongolodi buende bua tuetu kukebulula malu a bungi mu Dîyi diende. Tudi ne bua kudienzeja bua kupeta ngumvuilu yonso mujalame wa disua dia Nzambi ne malu adiye mulongolole bua kuenza. Ebi bidi bilomba bua kuikala ne dîba dia kubala ne kulonga Bible pamue ne mikanda yetu, kuikala ne dîba dia kusambila Nzambi bua kumulomba diambuluisha ne mibelu, kuikala ne dîba dia kubuela mu bisangilu bia tshisumbu pa tshibidilu ne kuenza mudimu wetu wa diyisha Bukalenge ne divuija bantu bayidi.​—Nsumuinu 2:1-5.

10. Tshiambilu tshia se: ‘too ne patuapeta buonso buetu’ tshidi mu Efeso 4:13, tshidi tshiumvuija tshinyi?

¹⁰ Tshisatu: Paulo wakafila diumvuija dia tshipatshila tshia bitupa bisatu etshi ne mêyi aa: ‘too ne patuapeta buonso buetu.’ Mukanda kampanda wa malu a mu Bible udi wamba bua miaku “buonso buetu” ne: “ki mbuonso muntu ku muntu batapuluke to, kadi mbonso pamue.” Tudi mua kuamba kabidi ne: yonso wa kutudi udi ne bua kuenza muende muonso bua kulua muena Kristo mubobe mu nyuma pamue ne bana betu bonso badi pa buloba. Munga mukanda (The Interpreter’s Bible) udi wamba ne: “Muntu muditole pa nkayende kêna mua kukumbana tshishiki mu nyuma to, anu mudi tshitupa tshimue tshia mubidi tshienda tshitantamana anu padi mubidi mujima utungunuka ne kukola bimpe.” Paulo wakavuluija bena Kristo ba mu Efeso ne: bavua ne bua kudienzeja bua kujingulula bibadi bionso bia ditabuja ‘pamue ne bansantu bonso.’​—Efeso 3:18a.

11. (a) Kudiunda mu nyuma kakuena kumvuija tshinyi? (b) Ntshinyi tshitudi ne bua kuenza bua kudiunda mu nyuma?

¹¹ Mêyi a Paulo aa adi atuleja patoke ne: kudiunda mu nyuma kakuena kumvuija anu kuuja lungenyi luetu ne dimanya dia bungi to. Muena Kristo mubobe mu nyuma kêna ukeba kukemesha bakuabu ne dimanya didiye nadi nansha. Bible udi wamba ne: ‘Njila wa bantu bakane udi bu dîba dia kabundubundu, didi ditema ne dikenkakenka too ne pakumbana dîba dia munda munya.’ (Nsumuinu 4:18) Bulelela, ‘njila’ ke udi ‘ukenkakenka,’ kadi ki mmuntu nansha. Netuikale tuenda tudiunda mu nyuma bituikala tudienzeja bua kutungunuka ne kuikala ne ngumvuilu muimpe wa Dîyi dia Nzambi udi Yehowa upesha bantu bende. Nenku kutungunuka kudi kumvuija kuya kumpala, ne ke bualu butudi  tuetu bonso mua kuenza.​—Musambu 97:11; 119:105.

Tulejayi “mamuma a nyuma”

12. Bua tshinyi kuleja mamuma a nyuma kudi ne mushinga bua kudiunda kuetu kua mu nyuma?

¹² Nansha mudi kupeta ‘buobumue bua ditabuja ne bua dimanya dijalame’ kuikale ne mushinga, bidi kabidi ne mushinga bua tuetu kuleja mamuma a nyuma wa Nzambi mu malu etu onso. Bua tshinyi bidi nanku? Bualu anu mutudi bamone, diboba dia mu nyuma ki mmuanda musokome udi wenzekela mundamunda to, kadi didi dimuenekela bimpe ku ngikadilu idi mua kuambuluisha bakuabu ne kubakolesha. Bushuwa, patudi tukeba bua kudiunda mu nyuma kabiena bisua kumvuija ne: tudi tukeba patupu bua kuikala ne ngikadilu milenga ya batumone batuambe nansha. Kadi, patudi tukola mu nyuma, tulonda mushindu udi nyuma wa Nzambi utuludika, ngikadilu ne bienzedi bietu bidi bishintuluka bilua bilenga menemene. Mupostolo Paulo wakamba ne: ‘Endayi mu nyuma muimpe, nunku kanuena nulonda lukuka lua mubidi.’​—Galatia 5:16.

13. Ndishintuluka kayi didi dikale tshimanyinu tshia patoke tshia se: muntu udi udiunda mu nyuma?

¹³ Paulo wakatungunuka ne kutela “malu mabi adi mubidi wenza,” adi mikale a bungi ne “amueneka” patoke. Bangabanga ne muntu kufika ku dianyisha malu adi Nzambi ulomba, uvua kumpala ulonda malu a bena panu ne uvua mua kuikala wenza amue malu adi Paulo mutele aa: ‘tshiendenda, meji mabi, masandi, ditendelela dia mpingu, kupaka kua manga, lukuna, kutandangana, mukawu, tshiji, kutapuluka, mpata, diyoyo, mutshiawudi, bukuatshiki bua maluvu, manaya a bundu ne malu [a buena aa].’ (Galatia 5:19-21) Kadi padi muntu ukola mu nyuma, ku kakese ku kakese udi ulekela “malu mabi adi mubidi wenza” ne upingajapu “mamuma a nyuma.” Dishintuluka edi didi dimueneka bimpe ntshimanyinu tshia patoke tshia se: muntu udi wenda uya mutangile ku diboba dia bena Kristo.​—Galatia 5:22.

14. Umvuija biambilu bibidi ebi: “malu mabi adi mubidi wenza” ne “mamuma a nyuma.”

¹⁴ Tuimanyinayi kabidi pa biambilu bibidi ebi: tshia “malu mabi adi mubidi wenza” ne tshia “mamuma a nyuma.” “Malu” aa mbipeta bia tshidi muntu wenza. Tudi mua kuamba kabidi ne: malu mabi adi mubidi wenza adi Paulo mutele adi mua kuikala bipeta bia tshidi muntu mupangadije bua kuenza ne muoyo mujima anyi bipeta bia dipanga bupuangane dia bumuntu. (Lomo 1:24, 28; 7:21-25) Kadi tshiambilu tshia “mamuma a nyuma” tshidi tshiotshi tshiumvuija ne: ngikadilu idibu batele eyi mbipeta bia mudimu wa nyuma wa Nzambi mu nsombelu wa muntu, kadi kayena ifumina ku didienzeja dia muntu nkayende bua kulengeja ngikadilu yende nansha. Anu mudi mutshi ukuama bimuma  padibu baudisha bimpe, muntu udi uleja mamuma a nyuma padi nyuma muimpe wenza mudimu bipepele mu nsombelu wende.​—Musambu 1:1-3.

15. Bua tshinyi tudi ne bua kutuma ntema ku “mamuma a nyuma” onso?

¹⁵ Bualu bukuabu bua mushinga mbua muaku udi Paulo muangate wa “mamuma” bua kuakula bua ngikadilu yonso milenga yakatelaye. Nyuma kêna ukuamisha mishindu kabukabu ya mamuma bua tuetu kukeba bua kusungula anu adi atusankisha to. Ngikadilu yonso idi Paulo mutele: dinanga, disanka, ditalala, lutulu, luse, buimpe, bunanukidi bua lulamatu, kudipuekesha ne kudikanda idi ne mushinga wa muomumue, ne yonso pamue idi mua kuambuluisha muntu bua kupeta bumuntu bupiabupia bua bena Kristo. (Efeso 4:24; Kolosai 3:10) Bua nanku, nansha mutudi mua kumona ne: imue ya ku ngikadilu eyi idi itamba kumueneka mu nsombelu wetu bilondeshile bumuntu buetu ne ngikadilu yetu, tuetu tudi ne bua kutuma ntema ku ngikadilu yonso idi Paulo mutele muaba eu. Tuetu tuenza nunku, tudi mua kupeta bumuntu bufuanangane menemene ne bua Kristo.​—1 Petelo 2:12, 21.

16. Ntshipatshila kayi tshitudi natshi patudi tukeba kuikala bena Kristo babobe mu nyuma, ne mmunyi mutudi mua kutshikumbaja?

¹⁶ Dilongesha dia mushinga ditudi mua kupeta mu malu adi Paulo muleje aa ndia se: patudi tukeba bua kuikala bena Kristo babobe mu nyuma, tshipatshila tshietu ki ntshia kupeta dimanya dia tuyayi tukamone peshi tshia kupeta ngikadilu milenga ya kudileja nayi ku bantu nansha. Kadi tshitudi tukeba ntshia se: nyuma wa Nzambi ikala wenza mudimu bipepele mu nsombelu wetu. Padi ngelelu wetu wa meji ne bienzedi bietu bifika anu ku dilonda buludiki bua nyuma wa Nzambi, tudi tulua bapie anyi bantu babobe mu nyuma. Mmunyi mutudi mua kukumbaja tshipatshila etshi? Tudi ne bua kunzuluila nyuma wa Nzambi mutshima wetu ne lungenyi luetu. Bidi biumvuija ne: tudi ne bua kuikala ne tshibidilu tshia kubuela ne kuandamuna mu bisangilu padibu bela nkonko. Tudi kabidi ne bua kuikala ne tshibidilu tshia kulonga Dîyi dia Nzambi ne kuela meji bua bitudi tulonga ebi, tulekela Dîyi dia Nzambi edi ditulombola mu malanda etu ne bakuabu, mu bionso bitutu tupangadija bua kuenza. Tuetu benze nanku, didiunda dietu nedimueneke patoke.

Diunda mu nyuma bua butumbi bua Nzambi

17. Mmunyi mudi kudiunda mu nyuma kutumbishisha Tatu wetu wa mu diulu?

¹⁷ Bua kujikija, padi didiunda dietu dimueneka patoke, tuetu ki mbadibu batumbisha, kadi badi batumbisha Yehowa Tatu wetu wa mu diulu, eu udi utuambuluisha bua kuboba mu nyuma. Butuku bua muladilu wa lufu luende, Yezu wakambila bayidi bende ne: ‘Tatu wanyi udi utumbishibua mu bualu ebu ne: Nudi nukuama mamuma a bungi; nunku nenuikale bayidi banyi.’ (Yone 15:8) Bayidi bakatumbishisha Yehowa ku mamuma a nyuma avuabu nawu ne ku mamuma anyi bipeta biakapatulabu mu mudimu wabu.​—Bienzedi 11:4, 18; 13:48.

18. (a) Ndinowa kayi dia disanka didi dienzeka lelu? (b) Mmalu kayi adi dinowa edi dilomba?

¹⁸ Lelu, Yehowa udi ubenesha bantu bende padibu benza mudimu wa dinowa dia mu nyuma pa buloba bujima. Kukadi mpindieu bidimu bia bungi, ku tshidimu tshionso bantu bapiabapia batue ku 300 000 mbadilambule kudi Yehowa ne batambule mu mâyi bua kuleja didilambula diabu edi. Bualu ebu budi butusankisha, ne kakuyi mpata, budi busankisha kabidi mutshima wa Yehowa. (Nsumuinu 27:11) Kadi bua biobi kutungunuka ne kufila disanka ne kutumbishisha  Yehowa, bapiabapia bonso aba badi ne bua ‘kuikala benda mu Kristo; bikale ne miji yabu miedibue munda muende, bikale bashibue munda muende, ne bikale bajadikibue mu ditabuja diabu.’ (Kolosai 2:6, 7) Muanda eu udi ne malu abidi adiwu ulomba bantu ba Nzambi bua kukumbaja. Bua kumpala: biwikala udi ufuma ku ditambula, neudifile bua “kudiunda kuebe kumueneke kudi bonso” anyi? Buibidi: biwikala mu bulelela kukadi matuku a bungi, newitabe bua kuambuluisha bapiabapia bua bikale ne makanda a mu nyuma anyi? Mu mishindu yonso ibidi eyi, mbiumvuike ne: bidi bikengela kuya batangile ku diboba dia mu nyuma.​—Filipoi 3:16, 17; Ebelu 6:1, 2.

19. Ndiakalenga ne mabenesha kayi biudi mua kupeta bikala kudiunda kuebe kua mu nyuma kumueneke?

¹⁹ Masanka mavule mmindile bonso badi benza mudimu mukole bua kudiunda kuabu kumueneka patoke. Vuluka mêyi adi akankamija a Paulo akambaye kunyima kua yeye mumane kubela Timote bua kudiunda kuende kumueneka, a se: ‘Wikale mudimuke ku malu ebe ne ku diyisha diebe. Unanukile kushala mu malu aa; bua pawenza nunku, neudisungile wewe ne bobu kabidi badi bumvue mêyi ebe.’ (1 Timote 4:16) Wewe mudienzeje ne tshisumi bua kudiunda kuebe kumueneke, udi pebe mua kupeta diakalenga dia kutumbisha dîna dia Nzambi ne kupeta mabenesha adiye ufila.

Udi muvuluke anyi?

• Mmu mishindu kayi mudi diboba dietu dia mu nyuma mua kumueneka patoke?

• Ndimanya ne ngumvuilu bia mushindu kayi bidi bileja diboba dia mu nyuma?

• Mmunyi mudi kuleja “mamuma a nyuma” kuikale tshimanyinu tshia didiunda dia mu nyuma?

• Mmalu kayi atudi ne bua kuitaba bua kukumbaja patudi tuya batangile ku diboba dietu dia mu nyuma?

[Nkonko ya dilonga]

[Tshimfuanyi mu dibeji 13]

Dipia anyi diboba ditu dimueneka patoke

[Tshimfuanyi mu dibeji 15]

Tudi tudiunda mu nyuma patudi tutungunuka ne kuikala ne bulelela budi Yehowa utusokoluela

[Tshimfuanyi mu dibeji 17]

Disambila didi dituambuluisha bua kuleja “mamuma a nyuma”