Mbijadiki kayi biudi nabi bia malu audi witaba?

Kuitaba bualu kudi kumvuija “kubuanyisha ne: mbulelela.” Dimanyisha dia Manême a Bumuntu (dia Bulongolodi bua Matunga Masanga) didi dipesha muntu yonso “bukenji bua kupeta budikadidi bua lungenyi, bua kuondo ka muoyo ne bua tshitendelelu.” Bukenji ebu budi bukonga budikadidi bua muntu bua “kushintulula tshitendelelu tshiende peshi bidiye witaba” pikaleye musue kuenza nunku.

KADI bua tshinyi muntu yonso udi mua kushintulula ntendelelu wende anyi bidiye witaba? Bantu ba bungi batu bamba ne: “Ndi ne anyi malongesha andi ngitabuja, ne adi ansankisha.” Ba bungi batu bela meji ne: malongesha nansha wowu a dishima kaena ne bubi budiwu enzela bantu to. Tshilejilu, eu udi witaba ne: buloba budi tshibatubatu, kêna pamu’apa udienzela yeye bibi anyi mukuabu muntu nansha. Bamue bantu batu bamba ne: “tudi anu ne bua kuitaba bidi bakuabu bamba nansha biobi bishilangane ne bitudi tuetu tuamba.” Kuitaba nunku kutu njila wa meji misangu yonso anyi? Doktere udiku mua kuitaba anu bua tshimfula muoyo bikala doktere nende kampanda utungunuka ne kuamba ne: udi mua kufumina diakamue ku dilenga bitalu ku tshilaminu tshiabi ne kubuela musangu umue mu lupitadi bua kubanga kuteta babedi anyi?

Pa bidi bitangila ntendelelu, malongesha a dishima akadi menzele bantu malu mabi a bungi. Elabi meji bua tunyinganyinga tuakapeta bantu bua muvua balombodi ba bitendelelu “basaka bena Kristo ba lukunukunu lunekesha ku tshikisu katshiyi luse” mu tshikondo tshia mvita ya munanunanu ya Krwazade mibikila ne: mvita minsantu yakenzeka mu tshikondo tshia Moyen Âge. Elabi kabidi meji bua “bena Kristo” bavua bambule bingoma mu mvita idi mienzeke matuku adi panshi aa, “bavua balamike bimfuanyi bia Mariya ku mitu ya bingoma biabu anu bu baluanganyi ba mvita ba mu Moyen Âge bavua ne mêna a bansantu mafunda pa bilabi bia miele yabu ya mvita.” Bena lukunukunu lunekesha bonso aba bavua bela meji ne: bavua benza bimpe. Pabi, kabiyi mpata, mu mvita ya bitendelelu eyi anyi mikuabu, muvua tshimue tshintu tshibi tshitambe.

Bua tshinyi kudi dikondakana ne dibengangana dia malongesha? Bible udi wandamuna ne: bualu Satana Diabolo udi ‘mudingi wa ba pa buloba buonso.’ (Buakabuluibua 12:9; 2 Kolinto 4:4; 11:3) Mupostolo Paulo wakadianjila kuamba ne: batendeledi ba bungi bavua ne bua  “kujimina” bualu Satana uvua ne bua kubashima pa kuenzeja “bishima bia mishindu yonso, ne bimanyinu bia dikema bia mafi.” Paulo wakamba kabidi ne: bantu abu, bavua ne bua kubenga “kunanga bulelela buvua mua kubapandisha” nunku bavua mua ‘kuitaba malu a didinga.’ (2 Tesalonike 2:9-12, Mukanda wa Mvidi Mukulu, [Katolike, MMM]) Kadi mmunyi muudi mua kuepuka ditaba bualu bua mafi? Mbijadiki kayi biudi nabi bia malu audi witaba?

Mbakukoleshe mu malu aa anyi?

Bumue udi mukolele mu malongesha a mu tshitendelelu tshia dîku dienu. Bidi mua kuikala bualu buimpe bualu Nzambi mmusue bua baledi balongeshe bana babu. (Dutelonome 6:4-9; 11:18-21) Tshilejilu, nsonga Timote, wakapeta masanka a bungi bua muvuaye uteleja mamuende ne kakuende. (2 Timote 1:5; 3:14, 15) Mukanda wa Nzambi udi ulomba bana bua bikale banemeka malu adi baledi babu bitabuja. (Nsumuinu 1:8; Efeso 6:1) Kadi Mufuki webe mmukuambile ne: wikale witaba malu anu bualu baledi bebe badi baitaba anyi? Kuitaba kua malu avua bantu bitabuja ne benza kale kakuyi busunguluji kudi mua kufikisha kubi.​—Musambu 78:8; Amosa 2:4.

Mukaji muena Samalea wakayikila ne Yezu Kristo uvua mukolele mu tshitendelelu tshia bena Samalea. (Yone 4:20) Yezu wakanemeka budikadidi buende bua kusungula tshivuaye musue kuitaba, kadi wakamuambila kabidi ne: ‘Nudi nutendelela tshinudi kanuyi bamanye.’ Bulelela malongesha a bungi a mu tshitendelelu tshia mukaji eu avua a dishima, ne Yezu wakamuambila ne: uvua ne bua kushintulula mitabuja ende bu bikalaye uvua musue kutendelela Nzambi mu mushindu uvuaye wanyisha, mbuena kuamba ne: ‘ne nyuma ne bulelela.’ Mukaji eu ne bantu bakuabu bu yeye kabakashala balamate ku mitabuja abu avuabu banange bikole to, ndekelu wa bionso bakitaba ‘lumu luimpe’ luvua Yezu Kristo mubayishe.​—Yone 4:21-24, 39-41; Bienzedi 6:7.

Mbakulongeshe bua kuitaba malu a bamanyi anyi?

Balongeshi ne bamanyi bavule ba malu kabukabu mbakanyine kanemu ka bungi. Kadi, miyuki ya malu a kale mmiuule ne bilejilu bia balongeshi banene bavua balongesha anu malu a dishima. Tshilejilu, Bertrand Russell mufundi wa malu a kale wakamba bua mikanda ibidi ya malu a siyanse ivuabu bafunde kudi muena nkindi muena-Gelika Aristote ne: “Kabena mua kuitaba tshiambilu nansha tshimue tshia mu mikanda eyi mu siyanse wa lelu to.” Nansha bamanyi ba matuku etu aa batu bitaba malu a dishima dibiadibi. Lord Kelvin muena siyanse wa mu ditunga dia Grande-Bretagne wakamba mu 1895 ne: “Bantu kabena mua kuenza biamu bidi bibuka bipite lupepele ku bujitu nansha kakese.” Ke bualu kayi, muntu udi ne meji kêna witabakana bualu ne: mbulelela anu bualu ke mudi mulongeshi kampanda wamba nansha.​—Musambu 146:3.

Bidi bikengela kabidi budimu bua buena ebu mu malu adi bitendelelu bilongesha. Mupostolo Paulo uvua mulongesha bimpe kudi balongeshi ba mu tshitendelelu tshiende ne uvua mutambe kuikala ne ‘lukunukunu lukole bua bilele bia bankambua [bende].’ Kadi, lukunukunu luende bua bilele bia bankambua bende luakamukebela bushuwa malu a bungi. Luakamufikisha ku ‘dikengesha bena ekelezia wa Nzambi ne dibabutula.’ (Galatia 1:13, 14; Yone 16:23) Bualu bubi butambe buvua bua se: munkatshi mua tshikondo tshile, Paulo uvua “ukandamana bu mudi ngombe usuba bikono ku lusongo lua dikombo dia mfumuende!” bualu uvua ubenga kuenza malu avua mua kumufikisha ku ditabuja Yezu Kristo. Biakakengela bua Yezu yeye nkayende kuakula ne Paulo bua kumufikisha ku dishintulula mitabuja ende.​—Bienzedi 9:1-6; 26:14, Muanda Mulenga Lelu.

Udi ulonda malu a ku tudiomba ne a mu bikandakanda anyi?

Bumue malu a bungi audi witaba adi afumina ku tudiomba ne mu bikandakanda. Bantu ba bungi batu ne disanka bua mudiku budikadidi bua diakula ku tudiomba ne difunda malu mu bikandakanda, budi bubafikisha ku dipeta ngumu idi mua kubakuatshisha. Kadi, ku tudiomba ne mu bikandakanda mutu malu atu asesuisha bantu bikole. Ngumu itubu batamba kumanyishamu ya kansungasunga idi mua kunyanga lungenyi luebe bikole.

 Bua kumona mua kupeta bantu ba bungi ne kubalobesha, tudiomba ne bikandakanda bitu bikeba bua kupatula malu adi asankisha bantu adibu bamona bu a pa buawu. Kukadi kupite bidimu bikese patupu, malu avuabu kabayi banyisha bua kuatelejabu anyi kuabalabu kudi bantu bonso, bakadi baateleja ne baabala miaba yonso lelu. Bantu badi benda banyanga mêyi a mu nsombelu ne baadiatakaja mu makasa ku kakese kakese. Ngelelu wa meji wa bantu udi anu wenda unyanguka. Badi babanga kuitaba ne: ‘bualu bubi mbuakane, ne bualu buakane mbubi.’​—Yeshaya 5:20; 1 Kolinto 6:9, 10.

Mushindu wa wewe kuitaba malu adi mimpe

Kuitaba ngenyi ne nkindi ya bantu kudi bu kuibakila nzubu pa lusenga. (Matayo 7:26; 1 Kolinto 1:19, 20) Kadi mmuaba kayi udi mitabuja ebe ne bua kufumina ne dieyemena dionso? Bu mudi Nzambi mukupe lungenyi ludi lukuambuluisha bua kukonkonona malu adi enzeka panuapa ne kuela nkonko pa bidi bitangila malu a mu nyuma, kabienaku bileja ne: udi kabidi ufila mushindu wa kupeta mandamuna malelela a nkonko yebe anyi? (1 Yone 5:20) Eyowa, udi mua kuenza nunku! Kadi mmushindu kayi uudi mua kujadika tshidi tshilelela mu malu a ntendelelu? Katuena ne dielakana nansha dikese bua kuamba ne: Bible nkayende ke udi mua kutuambuluisha bua kuenza nunku.​—Yone 17:17; 2 Timote 3:16, 17.

Mukuabu muntu udi mua kuamba ne: “Kadi anji indila. Batu ne Bible ki mbadi batamba kujudija ndululu ne dikondakana pa buloba anyi?” Ntshia bushuwa bua se: balombodi ba bitendelelu badi bamba mudibu balonda Bible mbapatule malongesha mavule makondakane ne adi abengangana. Bidi bienzeka nunku bualu malongesha abu kaena afumina mu Bible nansha. Mupostolo Petelo udi ubabikila ne: “baprofete ba mashimi” ne “bayishi ba mashimi” bavua ne bua kuasa “[tusumbu tua] dibutuka.” Petelo udi wamba ne: ‘njila wa [bulelela] neapendibue’ bua bualu buabu. (2 Petelo 2:1, 2) Kadi Petelo udi wamba kabidi ne: ‘Tudi ne dîyi dia mulayi dishindika bikole; ne nudi nuenza bimpe pa kuteyaku ntema bu ku muendu udi ukenka mu muaba wa mîdima.’​—2 Petelo 1:19, NW; Musambu 119:105.

Bible udi utulomba bua kukonkonona mitabuja etu bilondeshile tshidiye ulongesha. (1 Yone 4:1) Miliyo ya babadi ba tshibejibeji etshi badi mua kujadika ne: padibu benze nunku nsombelu wabu mmulue ne mushinga ne mmushindame. Ikala ne mutshima mumana kulongolola bu wa bena Beloya. Bantu aba ‘bakadi badikebela mu Mukanda wa Nzambi ku dituku ku dituku’ kumpala kua kuitaba bualu ne: mbulelela. (Bienzedi 17:11) Bantemu ba Yehowa nebikale ne disanka dia kukuambuluisha bua kuenza nunku. Bushuwa, wewe nkayebe ke udi ne bua kuangata dipangadika dia kuitaba malu audi musue. Kadi bidi njila wa meji bua kujadika ne: mitabuja ebe kaena afumina ku meji ne majinga bia bantu to, kadi adi afumina mu Dîyi dia Nzambi dia bulelela didiye musokolole.​—1 Tesalonike 2:13; 5:21.

[Bimfuanyi mu dibeji 6]

Mitabuja ebe adi mua kufumina mu Bible ne dieyemena dionso