Malu a mu nsombelu

Ndi ne dianyisha bua malu mimpe andi mvuluka!

MALONDA KUDI DRUSILLA CAINE

Mu tshidimu tshia 1933, tuvua tufuma ku diselangana ne Zanoah Caine, uvua pende kolportere (ke muvuabu babikila bampanda-njila tshikondo atshi) anu bu meme. Bua disanka dipite bungi dimvua nadi, ngakadilongolola bua kuikala nya kufila bayanyi mu mudimu wende, kadi bua kuwenza bivua binkengela dikalu, dimvua tshiyi muanji kukokesha bua kusumba bua mushinga mukole uvuadi, bualu nsombelu uvua mukole mu tshikondo atshi tshivua mfranga mipueke mushinga. Tshingakenza ntshinyi?

PAKUMVUA ba bayanyi-tshina lutatu lumvua nalu, bakakeba biamu bia kale bia dikalu muaba uvuabu balamina bintu bia kuimansha, bua buobu kunjudilabu dikalu. Bakabipeta, ne buobu kujula dikalu! Pangakamanya mua kudiendesha, meme ne Zanoah tuakamata mu njila ne makalu tuenda tuyisha bantu bonso batuvua tupeta mu Worcester ne mu Hereford, misoko ya mu ditunga dia Angleterre.

Tshivua mumanye ne: bua tshidia tshikese etshi tshia ditabuja, mvua mua kudimona ne malu malenga mapite bungi amvua ne bua kushala mvuluka to. Kadi, baledi banyi ke bavua banshindamije mu nyuma.

Bidimu bia ntatu ya mu tshikondo tshia Mvita Minene

Mvua muledibue mu Tshisua-munene 1909. Kunyima kua matuku makese, Mamu wakapeta mukanda wa Le Divin Plan des Âges, ne mu 1914, baledi banyi bakaya nanyi bua kumona “Foto-Drama wa bufuki” mu Oldham, mu Lancashire. (Mukanda au ne Foto-Drama bivua bipatula kudi batudi tubikila lelu ne: Bantemu ba Yehowa.) Nansha muntshivua muana, ndi mvuluka bimpe mumvua ngenda ntumpika ne disanka bua bimvua mumone patuvua tupingana ku nzubu. Dîba adi Frank Heeley wakenza kasumbu ka dilonga dia Bible mu Rochdale mutuvua basombele. Dibuela mu dilonga edi  diakambuluisha dîku dietu bua kumvua Mukanda wa Nzambi bimpe.

Ditalala dituvua nadi diakanyanguka anu tshiotshi tshidimu atshi pakabudika Mvita Minene itudi tubikila lelu ne: Mvita ya Kumpala ya Buloba bujima. Bakakuata Tatu bua kumubueja ku busalayi ku bukole, kadi kakabuelakanamu to. Bakamubikila ku kabadi ne: uvua “muntu muena malu mimpe menemene,” ne tshimue tshikandakanda tshia muaba eu tshiakaleja ne: mikanda ya bungi yakafuma kudi “bantu banene bamba ne: bavua bela meji ne: uvua wambilamu pavuaye ubenga bua kuambula bingoma.”

Kadi pamutu pa kupeshabu tatu budikadidi buonso buvua bumuanyishila bua kubenga kuambula bingomba, bakamufundila ne: tshidiye kayi mua kuenza tshidi “anu mudimu wa diluangana mvita.” Bakabanga kumuseka anu muvuabu batuseka meme ne Mamu kabidi. Ndekelu wa bionso, bakamushintulula, kumutumabu ku mudimu wa budimi. Bamue bena madimi bavua bamuenzeja mudimu mukole eku bamufuta anu tuntu tukese anyi kabayi mene bamufuta tshintu to. Bua kuambuluisha dîku dietu, Mamu uvua wenza mudimu mukole mu nzubu wende wa disukuila bantu bilamba ne upeta anu makuta makese tshianana. Kadi, mpindieu ndi mmona muvuabi ne mushinga bua meme kupitshila mu ntatu eyi ku buana buanyi; biakangambuluisha bua kuanyisha bintu bia mu nyuma bidi ne mushinga wa bungi menemene.

Dituadija ne bantu bakese

Mutantshi eu tuetu kulua kumanyangana ne Daniel Hughes, uvua mulongi wa Bible wa tshisumi. Uvua mumbudi wa sharbon anyi makala a muinshi mua buloba (mu kabanda ka makala) mu Ruabon, musoko uvua mutantshi wa kilometre 20 ne tshimenga tshia Oswestry, mutuvua baye kusombela. Manseba Dan (ke mumvua mmubikila nanku) wakatungunuka ne kulua kumona dîku dietu, ne misangu yonso ivuaye ulua kutumona, uvua anu wakula malu a mu Mukanda wa Nzambi. Kavuaku wakula malu a tshianana nansha. Bakunzulula kalasa ka dilonga Bible mu Oswestry mu 1920, ne mu 1921 Manseba Dan wakampesha mukanda wa La Harpe de Dieu. Ngakanyisha mukanda eu bikole bualu wakangambuluisha bua kumvua malongesha a mu Bible bimpe menemene.

Pashishe tuakamanyangana kabidi ne Pryce Hughes, * wakalua musadidi mulombodi wa filiale wa Bantemu ba Yehowa wa mu tshimenga tshia Londres. Uvua musombele ne dîku diende pabuipi netu mu Bronygarth, ku muelelu kua Welsh, ne yayende Cissie wakalua mulunda munene wa Mamu.

Ndi mvuluka disanka dimvua nadi mu 1922 pakatulombabu bua ‘kumanyisha Mukalenge ne bukalenge buende.’ Mu bidimu biakalonda, nansha muntshivua mu kalasa, mvua nya panyi kuabanya trakte ya pa buayi, nangananga wa Difundimbua dia bamfumu ba bitendelelu (Angl.) mu 1924. Pandi mvuluka malu akenzeka mu bidimu dikumi abi, divua diakalenga dinene dia kumanyangana ne bana betu ba balume ne ba bakaji ba lulamatu bapite bungi; munkatshi muabu muvua Maud Clark * ne mukajende Mary Grant, * Edgar Clay, * Robert Hadlington, Katy Roberts, Edwin Skinner, * pamue ne Percy Chapman ne Jack Nathan * bakaya kuambuluisha bubidi buabu mu ditunga dia Canada.

Muyuki muenza ne Bible uvua ne tshiena-bualu ne: “Bantu miliyo mivule badi ne muoyo mpindieu kabakufua nansha” uvua bumanyishi buakafika mu tshikondo tshiabu mu teritware wetu munene au. Mu dia 14 Lumungulu 1922, Stanley Rogers, uvua bulela ne Pryce Hughes, wakafumina mu tshimenga tshia Liverpool bua kuenza muyuki eu mu Chirk, musoko uvua ku Nord kua tshimenga tshituvua, ne wakawenza kabidi dituku adi ku dilolo mu nzubu wa dilejila filme wa Picture Playhouse mu tshimenga tshia Oswestry. Ntshidi mene ne tubeji tutuvua tuabanyina bantu bua kubamanyisha bua tshibilu atshi. Mu tshikondo tshionso etshi, batangidi bena ngendu (batuvua tubikila ne: bendakanyi) aba: Herber Senior, Albert LIoyd ne John Blaney bakatungunuka ne kulua kukolesha kasumbu ketu kakese aku.

Tshikondo tshia kuangata dipangadika

Mu 1929, ngakangata dipangadika ne meme kutambula. Mvua ne bidimu 19, ne anu tshiotshi tshikondo atshi ngakapeta diteta dianyi dia kumpala. Ngakapetangana ne nsongalume mukuabu muana  wa muena tshididi. Tuakanangangana nende, yeye kungambila bua kunselaye. Tshidimu tshimue kumpala kua tuetu kupetangana nende, mukanda wa Bukalenge (Angl.) ukavua mupatuke, nunku ngakamupeshawu. Kadi ngakamona diakamue ne: kavua musue bukalenge bua mu diulu, buvua tshiena-bualu tshia mukanda eu to. Malu amvua mulonge akandeja ne: Nzambi uvua muelele bena Isalele wa kale mukenji wa kubenga kuselangana ne bantu bavua kabayi batendelela Yehowa, ne mukenji eu uvua utangila kabidi bena Kristo. Nunku, ngakabenga bua yeye kunsela nansha muvuabi kabiyi bitekete bua meme kubenga.​—Dutelonome 7:3; 2 Kolinto 6:14.

Mêyi a Paulo adi alonda aa akankolesha bikole: ‘Katupangi mu kuenza kua malu mimpe; bualu bua palua tshikondo tshia kuapuola netuapole bituikala katuyi tupanga.’ (Galatia 6:9) Manseba Dan wakankankamija pakamfundilaye ne: “Mu mateta makese ne manene, tumikila Lomo 8 mvese wa 28,” udi wamba ne: ‘Tudi bamanye kabidi ne: malu onso adi akuatshishangana bua kuvuija diakalengele kudi bantu badi bananga Nzambi, kudi badi babikidibue bu mudi disungula diende.’ Kabivua bipepele to, kadi mvua mumanye bimpe ne: mvua muangate dipangadika diakane. Tshidimu atshi ngakabuela mu mudimu wa bu-kolportere.

Ndi mpeta lutatu

Mu 1931 tuakangata dîna dipiadipia dia Bantemu ba Yehowa, ne anu tshiotshi tshidimu atshi tuvua mu kampanye kanene ka diabanya kakanda ka Bukalenge nditekemena dia bukua-bantu. (Angl.) Tuakapesha muena tshididi yonso, muntu yonso uvua ku mutu kua tshitendelelu ne ngenda-mushinga yonso kakanda aka. Teritware wanyi wa kuyishila uvua umbukila mu Oswestry too ne mu Wrexham, kilometre mitue ku 25 too ne ku Nord. Bivua bualu bukole bua kujikija teritware eu yonso mujima ne diyisha.

Mu mpungilu wakenzeka mu tshimenga tshia Birmingham tshidimu tshiakalonda, bakela lubila bakeba bena budisuile 24. Tuvua munkatshi mua bantu 24 bakafila mêna abu ne disanka dionso bua kuenza mudimu mupiamupia eu, kadi katuyi bamanye ni uvua mudimu kayi. Elabi meji mushindu utuakapapuka pakatutumabu babidi babidi bua kuabanya kakanda kapiakapia aku ka Bukalenge nditekemena dia bukua-bantu, eku bambule mabaya a bujitu avua mafundila mêyi avua amanyisha Bukalenge.

Pamvua nyisha bitupa bivua nzubu wa Mvidi Mukulu, mvua ngumvua bibi bualu bantu bavua bantangila, kadi mvua ndikolesha ku muoyo ne: muntu nansha umue kavua mummanye mu tshimenga atshi to. Kadi, muntu wa kumpala wakalua kungela lukonko uvua nsongakaji mukuabu utuvua balonge nende mu kalasa kamue, wakamba ne: “Mbinganyi biudi muambule nunku?” Muanda eu wakangumbusha buôwa buonso bumvua nabu kumpala kua bantu!

Ndi mpatuka kabidi

Mu 1933, tuakaselangana ne Zanoah, uvua mufuishe mukajende wa kumpala ne uvua mumpite ku bidimu 25. Mukajende wa kumpala uvua Mulongi wa Bible wa lukunukunu, ne pakafuaye Zanoah uvua anu mushale wenza mudimu wende ne lulamatu. Mutantshi eu tuetu kumbuka mu Angleterre batangile mu teritware wetu mupiamupia ku Nord kua pays de Galles, mutantshi wa kilometre mitue ku 150. Tuvua basuike bimpe turton, bibuta ne bintu bikuabu bia mushinga pa bisasa bia makalu ne ku kidon, bikuabu bisuikila pa milonda yawu, ne biela mu bitunga, kadi nansha nanku tuakafika bimpe kutuvua tuya. Makalu avua atuambuluisha bikole mu mudimu eu: tuvua tuya nawu miaba yonso, nansha too ne ku mutu kua Cader Idris, mukuna wa mu pays de Galles wa bule bua metre mafike ku 900. Bivua disanka dia bungi patuvua tupeta bantu bavua basue kuteleja ‘lumu luimpe elu lua bukalenge.’​—Matayo 24:14.

 Katuvua banji kuenza matuku a bungi to pakatuambila bantu ne: muntu mukuabu diende Tom Pryce uvua mubayishe anu mutuvua tubayisha. Ndekelu wa bionso tuakafika muaba uvua Tom usombela: mu Long Mountain, pabuipi ne tshimenga tshia Welshpool, ne ndisanka kayipu dituvua nadi! Mu matuku antshivua ntuadijilaku kuyisha au, mvua mumupeshe mukanda wa kulonga nawu Bible wa Réconciliation (Angl.). Wakadilongelawu, kufundilaye bena ku Londres bua bamutumine mikanda mikuabu, ne uvua uyisha bantu malu a ditabuja diende dipiadipia ne lukunukunu katshia apu. Tuakasomba nende mêba a bungi, busatu buetu tuvua tulonga pamue bua kukankamijangana.

Tshipupu tshidi tshifikisha ku masanka

Mu 1934, bakambila ba-kolportere bonso bavua pabuipi ne ku Nord kua pays de Galles bua kuyabu mu tshimenga tshia Wrexham bua kuabanyina bantu kakanda ka Mukokeshi Muakane (Angl.). Dituku dimue kumpala kua tuetu kutuadija mudimu eu, kuvua kuenzeke tshipupu mu ditunga. Kabanda ka makala ka mu Gresford kavua mutantshi wa kilometre isatu ku Nord kua Wrexham kavua katayike ne kashipe bena mudimu 266. Bana bapite pa 200 bakashala bana ba nshiya, ne bakaji 160 kushalabu bakamba.

Tuakafunda mêna a bavua bafuishe, tuetu kuya kubasamba ne kubashila kakanda aku. Dimue dia ku mêna akampeshabu divua dia Inabanza Chadwick uvua mufuishe muanende wa balume wa bidimu 19. Pangakaya kumumona, ngakasangana ne: tutuende wa nsongalume uvua mufue au uvua mulue kusamba mamuende. Nsongalume eu wakamanya mpala wanyi kadi kakangambila to. Pashishe, wakabala kakanda aku e kukebaye kabidi kakuabu ka Mvita ya ndekelu (Angl.), kamvua mumushile bidimu ndambu kumpala.

Jack ne mukajende May bakamanya muaba umvua nsombela ne kuluabu kukeba mikanda mikuabu. Mu 1936 bakitaba bua bisangilu kuikalabi bienzekela mu nzubu muabu mu Wrexham. Ngondo isambombo kunyima kua dikumbula dia Albert LIoyd, bakenza tshisumbu mu Wrexham ne Jack Chadwick ke uvua mutangidi muludiki. Mpindieu mu Wrexham mudi bisumbu bisatu bijima.

Tudi tusombela mu dikadika

Too ne mu tshikondo atshi tuvua tulala muaba wonso utuvua tupeta kutuvua tuya, kadi Zanoah wakamona ne: mpindieu tuvua ne bua kusombela mu wetu nzubu utuvua mua kutambakana nende. Bu muvuaye mumanye mudimu wa mabaya wa dienza makadika bikole, wakenza dikadika dia tuetu kusombela. Tuvua tudibikila ne: Elisabeta, dîna dia mu Bible didi diumvuija ne: “Nzambi mmuena bintu bia bungi.”

Ndi mvuluka umue muaba utuakatudila: muinshi mua mitshi ku muelelu wa mâyi. Buanyi meme muaba au uvua anu bu mu Mparadizu menemene! Kakuvua tshintu tshivua tshitunyangile disanka dituvua nadi mu bidimu bituvua basombe mu dikadika adi to, nansha muvuadi dikese ne kamuyi bintu bia bungi. Mu tshikondo tshia mashika, dra ya pa bulalu ivua ibola ne mâyi ne ilamata ku bimanu bia dikadika, ne lumuma ke lutatu lutuvua nalu misangu yonso. Tuvua kabidi tuenda ne mâyi mu dikadika, pamu’apa mutantshi mule, kadi ntatu yonso eyi yakapita.

Dimue dituku ngakasama mu muvu wa hiver, ne tuvua anu ne biakudia bikese ne katuvua ne makuta to. Zanoah wakasomba pa bulalu, kunkuataye ku tshianza, ne kumbadilaye Musambu 37:25 ne: ‘Ngakadi nsongalume, katataka ngakulua muntu mukole;  kadi tshiena muanji kutangila muntu muakane mushale patupu, anyi bana bende baledibue balombe biakudia.’ Wakantangila e kuambaye ne: “Tshintu nansha tshimue katshiyi tshienzeke mpindieu mpindieu, mmumue ne: netubangishe kulomba ka-pa-luse, kadi tshiena mua kuitaba bua se: Nzambi udi mua kulekela bualu bua buena ebu buenzeka to!” Pashishe yeye kuyaye kuyisha bena mutumba netu.

Pakapingana Zanoah mu midi bua kungenzelaku tshintu tshia meme kunua, amvelope uvua mumuindile. Muvua dolare 75 ivua tatuende mutume. Kukavua kupite bidimu bia bungi, bavua bashiminyine Zanoah ne: uvua muibe makuta, kadi bakalua kumona ne: kavua mumanye bualu to. Nunku, makuta avuabu bamutumine au avua a tshibawu tshivuabu bamufute. Avua mafike pa dîba menemene!

Dilongesha dia mushinga

Imue misangu tutu tupeta malongesha kunyima kua bidimu bia bungi bimane kupita. Tshilejilu, kumpala kua meme kujikija kalasa mu 1927, ngakayisha balongi betu ne balongeshi betu bonso, pa kumbusha anu mulongeshi umue: Lavinia Fairclough. Bu muvua muntu nansha umue kayi musue tshimvua mulongolole bua kuenza mu nsombelu wanyi, ne bu mumvua tshiyi ntamba kupetangana ne mulongeshi Fairclough au, ngakabenga bua kumuyisha yeye. Elabi meji mungakapapuka ne mungakasanka pakangambila Mamu kunyima kua bidimu bitue ku 20 ne: mulongeshi eu uvua mupingane bua kumona balunda ne balongi bende bonso ba kale bua kubambila ne: mpindieu, uvua mulue Ntemu wa Yehowa!

Patuakapetangana nende, ngakamuleja tshimvua mubengele bua kumuambila malongesha etu musangu au ne bua mudimu umvua mudifundile bua kuenza. Wakanteleja ne ntema, ne kungambilaye ne: “Mvua munkatshi mua dikeba bulelela kuonso aku. Ke tshintu tshimvua nkeba mu nsombelu wanyi!” Muanda eu uvua dilongesha dia mushinga buanyi meme, bua se: tshiena ne bua kubenga bua kuyisha bantu bonso bandi mpetangana nabu, ne tshiena ne bua kudianjila kuelela muntu meji mabi nansha.

Mvita mikuabu ne malu angakamona pashishe

Matunga akabanga kudilongolola kabidi bua kuluangana mvita pavua bidimu bia 1930 bitangile ku ndekelu kuabi. Bakambila Dennis (muakunyanyi wa balume mushadile kundi ku bidimu dikumi) ne: bua buobu kumulekela kayi wenza busalayi, atungunuke ne mudimu wende wa bianza. Dennis kavuaku muanji kuitaba bulelela to, ke meme ne bayanyi tuetu kulomba bampanda-njila ba muaba uvuabu au, Rupert Bradbury ne muanabu David bua kuyabu kumutangila. Bakaya kumutangila ne kutuadijabu kulonga nende Bible. Dennis wakatambula mu 1942, pashishe wakangata mudimu wa bumpanda-njila ne kuluaye mutangidi muena ngendu mu 1957.

Muananyi wa bakaji Elizabeth uvua muledibue mu 1938, ne bua kukumbaja majinga a dîku, Zanoah wakadiundisha dikadika dietu adi. Patuakalela Eunice muanetu muibidi mu 1942, tuakamona ne: bivua bimpe kukeba nzubu bua tuetu kusomba kaba kamue. Bua bualu ebu Zanoah wakanji kulekela bumpanda-njila munkatshi mua bidimu bikese, tuetu kuya kubuela mu nzubu mukese pabuipi ne Wrexham. Kunyima, tuakasombela mu Middlewich pabuipi ne musoko wa Cheshire. Ke muakafuila bayanyi munanga mu 1956.

Bana banyi bakalua bambi ba lumu luimpe ba ku dîba ne ku dîba, ne bubidi buabu badi ku mabaka mimpe. Eunice ne bayende udi mene mukulu batshidi anu bampanda-njila ba pa buabu mu Londres. Bayende wa Elisabeth udi pende mukulu, ne ndi ne disanka dia kusomba nabu, bana babu, ne bana ba bana babu banayi mu Peston, mu Lancashire.

Ndi ne dianyisha bua mundi ne mushindu wa kuenda ku makasa kumbukila ku tshiibi tshia nzubu wanyi too ne ku Nzubu wa Bukalenge udi dia muamua dia njila. Mu bidimu bidi panshi ebi ndi mubange kudisangisha ne bana betu bena kasumbu ka muakulu wa Gujarati, badi badisangishila anu mu Nzubu wa Bukalenge eu. Kulonga muakulu eu ki nkutekete to bualu ndi ngumvua ne lutatu mpindieu. Imue misangu bitu bikole bua meme kusunguluja mêyi mashilangane bu mudi bantu batshidi ne bukole mua kuasunguluja. Kadi elu ndutatu ludi kaluyi lutonda to.

Ntshidi ne bukole bua kuyisha ku nzubu ne ku nzubu ne bua kulombola malonga a Bible mu nzubu muanyi. Patu balunda banyi balua kuntangila, ntu anu ne disanka dia kubalondela malu antu mumone mu bidimu bishale. Ndi ne dianyisha bua mundi mvuluka masanka andi mupete mu dishala dianyi munkatshi mua bantu ba Yehowa bidimu pabuipi ne 90.

[Mêyi adi kuinshi]

[Tshimfuanyi mu dibeji 25]

Kabeji ka dimanyisha naku muyuki wa malu a mu Bible wa “Bantu miliyo mivule badi ne muoyo mpindieu kabakufua nansha,” ungakumvua mu dia 14 Lumungulu 1922

[Tshimfuanyi mu dibeji 26]

Meme ne Zanoah matuku makese kunyima kua dibaka dietu mu 1933

[Tshimfuanyi mu dibeji 26]

Ndi muimane pabuipi ne “Elisabeta,” dikadika divua bayanyi muenze