Nkonko ya babadi

Danyele uvua penyi pavua bena Ebelu basatu mu diteta kumpala kua lupingu lunene luvua Nebukadenesâ muase mu mpata wa Dula?

Bible kêna uleja muaba uvuaye to, nunku lelu muntu nansha umue kêna mua kujadika muaba uvua Danyele mu tshikondo tshia diteta adi to.

Bamue mbafike ku diamba ne: bu muvua muanzu uvua Nebukadenesâ mumupeshe mupite wa Shadalaka, Meshaka ne Abedenego, nanku Danyele kavua muenzejibue bua kuya mu mpata wa Dula to. Danyele 2:49 udi uleja ne: tshikondo kampanda Danyele uvua ne muanzu mupite wa balunda bende basatu aba. Kadi katuena mua kujadika ne: muanzu eu ke uvua mumupeshe budikadidi bua kubenga kudisangisha ne bantu bakuabu kumpala kua lupingu alu nansha.

Bakuabu mbakebe bua kumvuija tshivua Danyele mupumbishile dîba adi bamba ne: uvua mua kuikala ku luendu mu mudimu wa mbulamatadi peshi uvua usama. Kadi Bible kêna wamba nanku to. Tshitudi bamanye ntshia se: Danyele kavua ne pa kumubandilabu mu tshilumbu etshi to, bualu bu biobi bikale nanku, banene ba mbulamatadi wa Babulona ba mukawu abu bavua kuikala bamufunde. (Danyele 3:8) Nunku kumpala ne kunyima kua muanda eu, Danyele wakashala mulame muoyo mutoke, mulamate anu Nzambi nansha pavuaye kumpala kua diteta dia mushindu kayi. (Danyele 1:8; 5:17; 6:4, 10, 11) Nenku nansha mudi Bible kâyi wamba tshivua Danyele mupumbishile mu mpata wa Dula, tudi bajadike ne: kakashintuluka to, wakashala anu ne lulamatu kudi Yehowa Nzambi.​—Yehezekele 14:14; Ebelu 11:33.