Bamanyishi ba Bukalenge badi balonda

Nzambi mmumukupule binsonji ku mêsu

BANTU badi bashintulula nsombelu wabu, babanga kutumikila mikenji ne mêyi a Yehowa batu bapeta masanka a bungi. Kadi nansha mutubi misangu mivule kabiyi bipepele bua kushintuluka, diambuluisha ne dikankamija kabitu bipangika to. (Musambu 84:11) Bualu budi bulonda ebu (buvua buenzeke mu Asia wa ku Sud-Est), budi bujadika nanku.

Pavua Ntemu mukuabu wa mu ditunga dia France mu dikisha, wakayikila ne muena magazen mukuabu diende uvua Kim, * kumulejaye malu adi Yehowa mulongolole bua kuenza pa buloba apa. Wakashila kabidi Kim mukanda wa Udi mua kuikala ne muoyo wa kashidi pa buloba bukudimuna mparadizu. Pakela Kim dîsu mu mukanda eu, wakamona mêyi a se: ‘Yeye neakupule tshinsonji tshionso ku mêsu kuabu.’ (Buakabuluibua 21:4) Kim udi wamba ne: “Mvese eu wakandenga ku muoyo bikole bia dikema. Bua muvua bantu bammona ne disanka ku mudimu, nnganyi uvua mua kumanya ne: pamvua anu mpingana kumbelu dilolo, mvua ndadila muadi?” Wakaleja tshivua tshimukebela kanyinganyinga wamba ne: “Mvua musombe ne mulume mukuabu bidimu 18 bijima ne mvua ne dibungama dikole bualu wakabenga bua kunsela. Mvua musue kulekela nsombelu wa mushindu’eu, kadi bu munkamvua musombe nende matuku a bungi, tshivua ne bukole bua kumulekela to.”

Kunyima kua matuku makese, Kim wakitaba bua kulonga Bible ne Ntemu wa Yehowa umue diende uvua Linh. Udi wamba ne: “Mvua ne dijinga dikole dia kutumikila malongesha a mu Bible. Tshilejilu, ngakalekela kutendelela bankambua, nansha muakafikishabi bena mu dîku dietu munda. Ngakajinga kabidi bua kuelesha dibaka dietu edi ku mikanda ya mbulamatadi, kadi yeye wakabenga. Mu tshikondo tshikole etshi, Ntemu wa mu France au wakatungunuka ne kuntumina mikanda ya malu a mu Bible, ne Linh uvua unkankamija bikole. Lutulu ne dikuatshisha bia bana betu ba bakaji aba biakangambuluisha bua kutungunuka too ne pangakamanya tshivua menemene mulume au. Ngakalua kumanya ne: ukavua ne bakuabu bakaji 5 ne mulele nabu bana 25! Bualu ebu buakampesha dikima dia meme kumulekela.

“Kumbuka mu nzubu munene ne mulenga bua kuya kubuela mu kazubu kakese kakuvua bualu bupepele to. Bualu bukuabu: mulume eu wakangenzeja bua meme kupingana bua kusomba nende kabidi, ne uvua mene umfunyina bua kungela aside ku mêsu pamvua mbenga. Kadi bua diambuluisha dia Yehowa, ngakenza tshivua tshiakane.” Kim wakatungunuka ne kuya kumpala ne ndekelu wa bionso kutambulaye mu 1998 mu ngondo muinayi. Bana babu babidi ba bakaji ne muanende wa balume bakatuadija kulonga Bible ne Bantemu ba Yehowa.

Kim udi wamba ne: “Kumpala mvua ngela meji ne: nsombelu wanyi kavua mua kulengela to. Kadi lelu wa ndaya, ndi ne disanka ne tshitshiena kabidi ndila butuku to. Yehowa mmumane kunkupula binsonji ku mêsu.”

[Mêyi adi kuinshi]