Tshimuna malu adi akupangisha bua kukola mu nyuma

FUANYIKIJA ne: udi muele mashinyi ebe vitese ne motere mmuteme, kadi adi abenga bua kuya kumpala. Mmanyanguke anyi? Tòo, kudi dibue dinene didi kumpala kua ndundu umue. Wewe anu mumbushe dibue edi, adi asa luendu.

Bia muomumue, bamue badi balonga Bible ne Bantemu ba Yehowa badi ne malu adi abapangisha bua kudiunda mu nyuma. Tshilejilu, Yezu wakatudimuisha ne: bintu bu mudi ‘malu a pa buloba ne mashimi a biuma’ bivua mua “kunyengela dîyi” dia bulelela ne kupumbisha dikola.​—Matayo 13:22.

Bua bakuabu, bibidilu bikola nabi anyi butekete buabu kampanda bua dipanga bupuangane bidi bibapangisha bua kukola mu nyuma. Muntu mulume mukuabu wa mu ditunga dia Japon (diende Yutaka) uvua munange mukenji wa mu Bible, kadi uvua ne tshilema tshinene tshia kunaya manaya a mfranga. Uvua mutete njila ne njila bua kulekela tshibidilu tshibi etshi, e kupangila. Bua tshilele tshiende etshi, wakajimija makuta a bungi, nzubu isatu, kanemu ka bena mu dîku diende ne bunême buende. Uvua mua kumbusha tshipumbishi etshi ne kulua muena Kristo anyi?

Tangila kabidi tshilejilu tshia muntu mukaji mukuabu, diende Keiko. Bible wakamuambuluisha bua kulekela amue malu mabi bu mudi ditendelela mpingu, buendenda ne ditempa dia mbuku. Kadi udi wamba ne: “Tshipumbishi tshitambe bunene buanyi meme tshivua dinua makanya. Ngakateta misangu  ya bungi bua kualekela, kadi kabiakakumbana to.”

Pamu’apa udi pebe mua kuikala ne bualu budi bumueneka bu tshipumbishi tshinene tshia kukola kuebe kua mu nyuma. Nansha bualu ebu buikale bua mushindu kayi, ikala mujadike ne: Nzambi udi mua kukuambuluisha bua kubutshimuna.

Vuluka mubelu wa Yezu wakapeshaye bayidi bende kunyima kua buobu bamane kupangila bua kuipata demon uvua nende muntu uvua ne disama dia tshiseke. Pakipata Yezu demon eu uvua bayidi bende bapangile bua kuipata, wakabambila ne: ‘Bulelela ndi nnuambila ne: binuikala ne ditabuja bunene bua lutete lua mutada, nenuambile mukuna eu ne: Umbukaku, ya kuakua, neumuke; kakuena bualu budi mua kunukolela.’ (Matayo 17:14-20; Mâko 9:17-29) Eyowa, lutatu lutudi mua kumona bu mukuna wa kabandi banyane mbualu bukese menemene kumpala kua Mufuki wetu wa bukole buonso.​—Genese 18:14; Mâko 10:27.

Manya malu adi akupangisha bua kukola mu nyuma

Kumpala kua wewe kutshimuna malu audi nau adi akupumbisha, anji keba bua kuamanya. Kadi mmunyi muudi mua kuamanya? Imue misangu muanetu muena Kristo bu mudi mukulu anyi muntu udi ukulongesha Bible udi mua kukuleja bualu kampanda. Pamutu pa mubelu eu muimpe kukufikishawu munda, udi ne bua kudipuekesha bua ‘kumvua diyisha, kuikala ne meji.’ (Nsumuinu 8:33) Misangu mikuabu, udi mua kufika ku dijingulula butekete buebe paudi ulonga Bible. Bualu Dîyi dia Nzambi “didi ne muoyo ne bukole.” (Ebelu 4:12) Dibala Bible ne mikanda yetu ya kumulonga nayi didi mua kukuleja meji masokome ne bipatshila bidi mu mutshima webe. Dibala Bible edi didi dikuambuluisha bua wewe kudipima bilondeshile mikenji milenga ya Yehowa. Didi disokolola ne dileja malu adi mua kukupangisha bua kukola mu nyuma.​—Yakobo 1:23-25.

Tshilejilu, mulongi wa Bible mmupete tshibidilu tshia kudifuankijila peshi kupitshisha bimfuanyi bia malu a tshiendenda mu mutu wende. Pamu’apa kêna umona ne: kuenza nunku nkubi to, bualu udi wela meji ne: kêna ne bualu bubi budiye wenza nansha bumue. Munkatshi mua dilonga diende, udi ufika pa mêyi adi mu Yakobo 1:14, 15 adi amba ne: ‘Muntu yonso udi uteyibua kudi lukuka luende pamukokalu ne pamulobeshalu. Pashishe lukuka, pimitalu, ludi lulela bubi: ne bubi, pakolabu, budi bulela lufu.’ Mpindieu udi umona ne: yeye mutungunuke ne tshikadilu tshiende etshi, kakukola mu nyuma to! Mmunyi mudiye mua kushimbula tshipumbishi etshi?​—Mâko 7:21-23.

Mushindu wa kutshimuna malu adi apumbishangana

Pamu’apa muena Kristo mupie udi mua kuleja mulongi wa Bible mua kukeba imue ngenyi mu Dîyi dia Nzambi ku diambuluisha dia Index des publications de la Société Watch Tower. * Tshilejilu, mutu wa bualu udi wamba ne: “Pensées” (ngenyi) udi utuma mubadi mu biena-bualu bikadi bipatuke bidi bileja mushindu wa kutshimuna didifuanyikijila anyi dipitshisha bimfuanyi bibi bia malu a tshiendenda mu meji ende. Biena-bualu ebi bidi ne mvese idi yambuluisha bikole bu mudi wa Filipoi 4:8 udi wamba ne: ‘Malu onso adi malelela, ne malu onso adi a bunême, ne malu onso adi makane, ne malu onso adi a butoke bua mutshima, ne malu onso adi malengele a dinanga, ne malu onso adi ne lumu luimpe; bikalaku buimpe ne bikalaku butumbi, nuelangane meji a malu aa.’ Eyowa, tudi ne bua kupingaja ngenyi ya butoke bua mutshima ne idi itukolesha mu nyuma pamutu pa ngenyi ya malu a tshiendenda.

Padi mulongi ukeba mumvuija makuabu nunku, neajingulule manga mêyi a mu Bible amuambuluisha bua kubenga kukolesha lutatu luende alu. Tshilejilu, mêyi adi mu Nsumuinu 6:27 ne adi mu Matayo 5:28 adi atubela bua kuepuka dibueja malu adi ajula majinga a tshiendenda mu lungenyi luetu. Mufundi wa Misambu wakasambila ne: ‘Ukudimune mêsu anyi bua kaatangidi malu a patupu.’ (Musambu 119:37) Bulelela, kubala mvese eyi nkayaku kakuena ne mushinga to. Muena meji wakamba ne: “Mutshima wa muntu muakane udi welangana meji.” (Nsumuinu 15:28) Padi mulongi welangana meji bikole bua tshidi Nzambi mulombe ne kabidi bua tshidiye mutshilombele, udi mua kupeta dijingulula dimpe menemene dia meji ne bulenga bua njila ya Yehowa.

 Bua kujikija, muntu udi uluangana bua kutshimuna bualu budi bumupangisha bua kukolaye mu nyuma, udi ne bua kukeba diambuluisha dia Yehowa kayi welakana. Mbimpe kuenza nunku bualu Nzambi mmutumanye biakane, mmumanye se: tudi bapange bupuangane, benza ku lupuishi. (Musambu 103:14) Kusambila Yehowa njila ne njila eku tuenza muetu muonso bua kuepuka dipitshisha ngenyi ya malu a buendenda mu mitu yetu nekutupeteshe dimuma dilenga bu mudi kuondo ka muoyo katoke kadi kakayi kalubakana.​—Ebelu 9:14.

Kupangi to

Nansha wewe uluangana bua kulekela bualu kampanda budi bukutatshisha, ikala mumanye ne: imue misangu udi mua kubupinganyina kabidi. Bitu bibungamija ne binyingalaja bikole padibi bienzeka nanku. Kadi vuluka mêyi a mu Galatia 6:9 (MMM) aa: ‘Katupangi mu kuenza kua malu mimpe; bualu bua palua tshikondo tshia kuapuola netuapuole bituikala katuyi tupanga.’ Basadidi banene ba Nzambi bu mudi Davidi ne Petelo bakapona mu imue mpekatu mikuate bundu. Kadi kabakalekela to. Bakitaba mibelu ne budipuekeshi buonso, kushintulukabu ne kutungunukabu ne kuleja ne: bavua basadidi ba pa buabu ba Nzambi. (Nsumuinu 24:16) Nansha muvua Davidi muenze bilema, Yehowa wakamubikila ne: ‘Muntu udi mutshima wanyi musue, yeye neenze malu onso andi musue.’ (Bienzedi 13:22) Bia muomumue, Petelo wakalekela bilema biende, kuluaye dikunji mu tshisumbu tshia bena Kristo.

Bantu ba bungi lelu mbafike pabu ku ditshimuna malu avua abapumbisha. Yukata utudi batele ku ntuadijilu, wakitaba bua kulonga Bible. Udi wamba ne: “Dikuatshisha ne masanka bia kudi Yehowa mu tshidia tshionso tshimvua ngela bua kuya kumpala biakangambuluisha bua kulekela tshilele tshimvua natshi tshia manaya a mfranga. Ndi ne disanka dia bungi bua mundi mmone bulelela bua mêyi a Yezu a se: muntu yeye ne ditabuja, udi mua kumbusha ‘mikuna’ apa kuyituma kuaka.” Mu bungi bua matuku, Yutaka wakalua musadidi wa mudimu mu tshisumbu.

Kadi Keiko, eu uvua ne tshilele tshia kunua mfuanka? Muanetu wa bakaji uvua ulonga nende Bible wakamubela bua kuikalaye ubala biena-bualu bia bungi bia mu Réveillez-vous! bivua biakula bua tshilele tshia kunua mfuanka. Keiko wakalamika ne mêyi a mu 2 Kolinto 7:1 mu mashinyi ende bua kuikalaye uvuluka dituku dionso bua se: udi ne bua kuikala mukezuke ku mêsu kua Yehowa. Kadi kakakokesha bua kulekela tshilele etshi to. Keiko udi wamba ne: “Mvua ne kanyinganyinga kakole. Nunku meme kubanga kudikonka tshimvua njinga menemene: mvua musue kusadila Yehowa anyi mvua musue kusadila Satana?” Dituku diakangataye dipangadika dia se: Yehowa ke uvuaye musue kusadila, wakasambila ne muoyo mujima ulomba diambuluisha. Udi wamba kabidi ne: “Ngakakema, bualu ngakalekela kunua makanya tshiyi ne lutatu lua bungi to. Ndi nyingalala anu bua mumvua tshiyi mualekele kuonso aku to.”

Wewe pebe udi mua kutshimuna malu adi akupangisha bua kukola mu nyuma. Paudi wenza bua meji, majinga, mêyi ne bienzedi biebe bilonde mikenji idi mu Bible, udi ubanga kudimona ne mushinga ne muikale muntu mushindame. Nebikoleshe bana benu ba mu nyuma ne bena mu dîku dienu kabidi ku muoyo, ne nebikale bumvua bimpe padibu basomba nebe. Bualu bua mushinga mutambe mbua se: neukoleshe malanda ebe ne Yehowa Nzambi. Wakalaya ne: ‘neumbushe tshilenduishi tshionso mu njila wa bantu bende’ padibu banyema bukokeshi bua Satana. (Yeshaya 57:14) Ne udi ne bua kuikala mujadike bua se: wewe wenza muebe muonso bua kumbusha ne kutshimuna malu adi akupangisha bua kukola mu nyuma, Yehowa neakupeshe masanka a bungi.

[Mêyi adi kuinshi]

[Tshimfuanyi mu dibeji 28]

Yezu wakalaya ne: muntu yeye ne ditabuja, udi mua kutshimuna bipumbishi bidi bu mikuna

[Tshimfuanyi mu dibeji 30]

Kubala Bible kudi kutukolesha bua kutshimuna matekete etu a mu nyuma