Dipoloma dia mudimu mulenga

EU MMUKANDA wa tshibata udi nsangilu wa bakamona-kamba, AJOCAD (Association des journalistes congolais et africains pour le développement) mufila mu ditunga dia République démocratique du Congo bua “kusakidila bantu anyi malongolodi adi ambuluishangana, adi madisunguluje patoke bua diambuluisha didiwu afila bua kulubuluja malu mu [Congo].”

Mu matuku 17 a ngondo wa dikumi ne umue, mu 2000, bakapesha Bantemu ba Yehowa dipoloma dia mudimu mulenga bua mudibu “bambuluisha bua muana wa muena Congo yonso alubuluke ku diambuluisha dia malu adibu bayisha ne balongesha mu mikanda yabu.”

Pavuatshi tshiumvuija bua dipoloma edi, tshikandakanda tshia ku Kinshasa tshia Le Phare tshiakamba ne: “Mbikole bua kusangana muena Congo udi kayi muanji kulenga bibejibeji bia Tshibumba tshia Nsentedi ne Réveillez-vous! anyi mikanda mikuabu mipatula kudi Bantemu ba Yehowa. Bibejibeji ebi bidi [biakula] bua malu onso a mu nsombelu.” Tshiena-bualu atshi tshiakamba kabidi ne: mikanda yabu eyi idi ileja “mushindu wa kutantamena ntatu lelu” ne idi ifila kabidi “diumvuija dilelela dia tshidi malu adiku lelu enzekela.” Nimero nansha umue wa Réveillez-vous! “katu ubuelakana mu malu a tshididi anyi utumbisha dikoba kampanda kupita dikuabu.” Kabidi, mikanda eyi idi isaka “bantu bua kutekemena bukua-panu bua ditalala ne bupole budi Mufuki wa bionso mulaye, bukadi pa kupingana pa muaba wa bukua-panu ebu bubi ne bua bashipi ba mikenji.”

Anu mudi bena AJOCAD baleje, mikanda ya Bantemu ba Yehowa mmiambuluishe bantu ba bungi mu Congo. Bu mudi mikanda eyi mu miakulu ya bungi, malu adimu adi afila ditekemena adi mua kukuambuluisha wewe pebe.

Suaku ubala malu adi kuinshi eku bua umanye mushindu uudi mua kuyipeta bua kukuambuluishayi pebe.