Mukanda udi bansonga ba bungi kabayi bangata ne mushinga

NSONGAKAJI mukuabu, diende Beate, wakamba ne: “Mmunyi mundi mua kumanya ne: Bible n’Dîyi dia Nzambi bulelela? Mmukanda utu kauyi unsankisha to.”

Bansonga ba bungi ba mu ditunga dia Allemagne mudi Beate musombele batu ne meji a buena ende aa, ke bualu kayi kabatu bangata dibala Bible ne mushinga to. Mandamuna a nkonko ivuabu bele bantu mu ditunga edi matuku mashale aa mmaleje ne: nsonga bu umue nanku pa lukama utu utamba kubala Bible misangu ya bungi menemene, bansonga babidi pa lukama batu bamubala misangu ya bungi, 19 pa lukama batu bamubala mu mpukapuka, ne bakuabu pabuipi ne 80 kabatu bamubala nansha kasangu kamue to. Bishiferi ebi bidi mua kuikala bifuanangane ne bia mu matunga makuabu, pamu’apa ne bia mu ditunga diudi musombele. Kakuyi mpata, Bible mmukanda udi bansonga ba bungi kabayi bangata ne mushinga to.

Nunku kabiena bitukemesha bua mudi bansonga ba bungi kabayi babala Bible nansha. Ku ntuadijilu kua tshidimu tshia 2000, tshikandakanda tshikuabu (Lausitzer Rundschau) tshiakamba bua dikonkonona diakaleja bungi bua bantu bavua bamanye Mêyi Dikumi ne bavua baatumikila. Bua bena bidimu bipite pa 60, bantu 67 pa lukama bavua bamanye mêyi dikumi aa ne bavua kabidi baatumikila; bua bena bidimu muinshi mua 30, bavua anu bantu 28 tshianana pa lukama. Bulelela, bansonga ba bungi ki mbamanye Dîyi dia Nzambi to.

Bamue badi badiangata mushindu mukuabu

Kadi mu buloba bujima mudi bansonga miliyo mivule badi bamone buobu Dîyi dia Nzambi dikale ne mushinga wa bungi menemene. Tshilejilu, Alexander udi ne bidimu 19 ne utu ubala Bible dituku dionso mu dinda kumpala kua kuyaye ku mudimu. Udi wamba ne: “Buanyi meme eu mmushindu mulenga wa kutuadija dituku.” Sandra utu ne tshibidilu tshia kubala tshitupa tshia Bible dituku dionso dilolo. Udi wamba ne: “Dibala edi ndilue bumue bua ku malu antu ne tshibidilu tshia kuenza dituku dionso.” Ne Julia (udi ne bidimu 13) ukadi yeye ne tshibidilu tshia kubala nshapita nansha umue wa mu Bible kumpala kua yeye kulala. Udi wamba ne: “Ndi munange dibala edi bikole, ne ndi musue kutungunuka ne tshibidilu etshi tshia kubala Bible too ne mu matuku adi kumpala.”

Mmushindu kayi wa kuangata Bible udi muakane ne wa meji? Bible mmukanda udi muakanyine kuubala anyi? Udiku mua kuambuluisha bansonga anyi? Udi wela meji kayi?