Mushindu uudi mua kupeta diakalenga mu bunsonga buebe

BAKAKONKA bena mu dimue ditunga dia ku Mputu bua kusungulabu tshintu tshimue ku bisatu ebi: bulengele, biuma ne bunsonga. Bakasungula bunsonga kumpala kua bikuabu bionso. Bushuwa, bantu ba bidimu bionso batu bamona bidimu bia patshidi muana tshitende, kumbukila ku 13 too ne padiye ubuela mu bidimu 20 bu tshikondo tshia pa buatshi. Bantu bonso batu basue bua diumbuka dia bansonga ku buana batangile ku buntu bukole dienzeke bimpe. Kadi mmunyi mudidi mua kuenzeka nanku?

Bible udi mua kubambuluisha anyi? Tudi tuandamuna kakuyi dielakana ne: Eyowa. Tumonayi mishindu ibidi idi Dîyi dia Nzambi mua kuambuluisha bansonga mu mushindu wa pa buawu, tumone mudidi pamu’apa mua kubambuluisha bobu kupita bantu ba bidimu bikuabu kayi bionso.

Dimanya mua kusomba ne bakuabu

Jugend 2000 nduapolo lua nkonko ivuabu bele bantu bashilashilangane bua ngikadilu, malu a mushinga ne bibidilu bia bansonga bapite pa 5 000 ba mu ditunga dia Allemagne. Mandamuna akafilabu adi aleja ne: patu bansonga bajikija mukodi ne bintu bu mudi diteleja mijiki, manaya, anyi diya kupitshisha kapepa muaba kampanda, batu misangu ya bungi ne bantu bakuabu. Pamu’apa bansonga batu bobu basue kusomba ne binabu kupita bantu ba bidimu bikuabu. Nunku bidi bimueneka ne: bumue bua ku malu adi apetesha diakalenga ku bunsonga ndimanya mua kusomba bimpe ne bakuabu.

Kadi kabitu anu bitekete bua kusomba ne bakuabu to. Bushuwa, disomba ne bantu ke muanda utu bansonga balume ne bakaji ba bungi baleja ne: utu ubatatshisha misangu ya bungi. Kadi Bible udi mua kubambuluisha bikole. Dîyi dia Nzambi didi ne mibelu mimpe idi mua kuambuluisha bansonga bua kusomba bimpe ne bantu. Ntshinyi tshidi Bible wamba?

Dimue dia ku mêyi a mushinga mutambe bunene adi atangila disomba bimpe ne bantu didi diamba ne: “Enzelayi bakuabo malu onso anudi basue banuenzele.” Kunemeka bakuabu, kubambika bunême ne kubenzela malu malenga kudi kubasaka pabu bua kukuenzelabu pebe mushindu wa muomumue. Tshikadilu tshimpe tshidi mua kulekesha matandu ne tunyinganyinga. Bantu bobu bakumanye ne: utu wangata bakuabu ne mushinga, badi mua kukuangata pabu ne mushinga ne kukuanyisha. Kuenaku umvua bimpe padi bakuabu bakuanyisha anyi?​—Matayo 7:12, Muanda Mulenga Lelu.

Bible udi ukubela ne: “unange muntu nebe muudi mudinange.” Udi udinanga paudi udilama bimpe ne udinemeka mu mushindu muakanyine, kuyi upitshisha anyi ushadila bikole menemene to. Bua tshinyi kuenza nunku kudi kuambuluisha? Bualu biwikala wewe nkayebe kuyi udinemeka, udi  mua kubanga ditobolola bakuabu bikole, ne udi mua kupanga kusomba bimpe ne bantu bakuabu. Kadi didiangata ne mushinga mukumbanyine ke diakuambuluisha bua kudia bulunda budi bulala bikole ne bantu.​—Matayo 22:39, Mukanda wa Mvidi Mukulu [Katolike, MMM].

Padi bantu babidi badia bulunda, bidi bikengela bua yonso wa kudibu adienzeje bua kubukolesha. Kufila dîba mu malu adi atangila bulunda kudi ne bua kukupesha disanka, bualu “disanka dia kupa ndipite dia kupeta.” Umue mushindu wa kupa nkufuilangana luse, kudi kumvuija kulengulula tulemalema ne kubenga kukeba bua bakuabu balue bapuangane. Bible udi utuambila ne: “Bulenga buenu bumanyike kudi bantu bonso.” Bushuwa, “binuamanya mua kuenza nunku mu bienzedi bienu, nuikale ne bantu bonso ditalala.” Newenze tshinyi bu mulunda webe mua kukuleja tshilema tshiebe kampanda? Udi mua kumvua munyi? Tangila mubelu mulenga wa mu Bible: “Kuikadi ufika munda lukasa” bualu “padi mulunda webe ukututa, mmukunange.” Kabienaku bilelela bua se: balunda bebe badi mua kunyanga ngenyi yebe, ngakuilu ne tshikadilu tshiebe anyi? Ke bualu kayi Bible udi utudimuija ne: “Malunda mabi adi anyanga malu makane a bantu.” Kadi, “udi wenda ne bena meji udi ulua muena meji.”​—Bienzedi 20:35; Filipoi 4:5, MMM; Lomo 12:17, 18; Muambi 7:9; Nsumuinu 13:20; 27:6, MMM; 1 Kolinto 15:33.

Marco udi wimanyina bansonga ba bungi balume ne bakaji padiye wamba ne: “Mêyi a mu Bible adi ambuluisha bikole bua kusomba bimpe ne bakuabu. Bamue bantu bandi mumanye batu anu batangila majinga abu nkayabu ne masanka adibu mua kupeta patshidibu ne muoyo. Pabi Bible udi utulomba bua kuvuluka bakuabu pamutu pa kudivuluka amu tuetu nkayetu. Pandi ntangila bimpe, eu ke mushindu mulenga udi bantu mua kusomba bimpe.”

Malu adi bansonga bu Marco balonga mu Bible adi abambuluisha mu bunsonga buabu ne mu bidimu bia ku buntu bukole bidi bilonda. Bua matuku atshilualua, kudi mushindu mukuabu udi Bible mua kuambuluisha bansonga bikole.

Dipampakana bua matuku atshilualua

Bansonga ba bungi batu ne dijinga dia kumanya malu a bungi. Pamu’apa batu basue kumanya malu adi enzeka ne tshidiwu enzekela kupita bantu ba bidimu bikuabu kayi bionso. Bible udi umvuija tshidi malu adi pa buloba lelu enzekela ne udi utuambila tshitudi mua kutekemena mu matuku atshilualua. Aa ke malu adi bansonga basue kumanya. Bua tshinyi tudi tuamba nunku?

Nansha mutu bantu ba bungi bamba ne: bansonga batu bamona amu pabuipi, amue mandamuna a nkonko ivuabu bele adi aleja lungenyi lukuabu lusua kushilangana ne elu kakese. Adi aleja ne: misangu ya bungi bansonga batu bamona ne lubatshi malu adi enzeka muaba udibu, ne pashishe badi badifuanyikijila nkayabu mu lungenyi mushindu wikala nsombelu mu matuku atshilualua. Tshidi tshijadika bualu ebu ntshia se: bansonga balume ne bakaji basatu pa banayi batu bela meji “misangu mivule” anyi “misangu mivule menemene” bua matuku atshidi kumpala. Nansha mutu pa tshibidilu bansonga bamona ne: malu onso neende anu bimpe, ba bungi batu ne dipampakana bua matuku atshilualua.

Bua tshinyi batu bumvua bibatonda? Bansonga ba bungi lelu bakadi bapete ntatu mibakebela kudi bilumbu bidibu babunde, malu a tshikisu adibu  benze ne diamba didibu banua. Bansonga batu balubakana bua mushindu udibu mua kupeta mudimu muimpe muaba udi bantu batamba kutembangana. Badi badimona benzejibue bua kutuka miaba mimpe mu kalasa anyi bua kulua benji ba malu manene ku mudimu wabu. Nsongakaji mukuabu wa bidimu 17 wakadiabila ne: “Tudi basombe ne bantu badi kabayi ne luse. Muntu yonso udi wenza anu tshidiye musue. Badi bakeba anu bua wanji kuleja tshiudi, bualu ebu budi buntonda be.” Nsongalume mukuabu wa bidimu 22 wakamba ne: “Benji ba malu manene batu bapeta diakalenga ne batu basombe ku matshi talala. Kadi bantu bena diakabi buobu badi ne malu a bungi adi abapangisha bua kuenza pabu bia muomumue batu anu bashadila kunyima.” Bua tshinyi bantu badi batembangana mushindu’eu? Nsombelu neatungunuke amu nunku anyi?

Diumvuija dilelela

Padi bansonga babungama anyi banyingalala bua nsombelu udi pa buloba, nansha buobu bamanye anyi kabayi bamanye, tshidibi badi bitaba tshidi Bible wamba. Dîyi dia Nzambi didi dileja ne: “bantu badi kabayi ne luse” lelu badi bikale benza tshimanyinu tshia tshikondo etshi. Mupostolo Paulo wakafunda bua matuku etu aa mu mukanda wakafundilaye nsonga Timote ne: “Malu makole nealue.”  Bua tshinyi malu makole? Anu muvua Paulo mutungunuke ne kuleja, bualu bantu bavua ne bua kuikala ‘badisui, banangi ba biuma, baditumbishi, badileji, kabayi ne kusakidila, kabayi ne tshijila, bena lonji.’ Edi ki ndiumvuija dilelela dia ngikadilu udi nende bantu ba bungi lelu anyi?​—2 Timote 3:1-3.

Bible udi wamba ne: malu makole aa avua ne bua kumueneka mu ‘matuku a ku nshikidilu,’ kumpala kua kushintululabu malu a bungi pa buloba bujima. Malu aa neatangile muntu yonso, bansonga ne bantu bakole. Mmalu kayi au ashintuluka? Mu tshitupa tshîpi emu, bukalenge bua mu diulu nebukokeshe bantu, ne bantu bikala ku bukokeshi bua bukalenge ebu nebapete “ditalala dikumbane” miaba yonso. ‘Bantu bakane nebapiane buloba, nebashikamemu tshiendelele.’ Dipampakana ne didilakana kabiakuikalaku kabidi to.​—Musambu 37:11, 29.

Anu Bible ke mukanda udi ufila diumvuija dijalame bua matuku atshilualua. Padi nsonga mumanye malu enzeka mu bidimu bikese bidi kumpala, udi mua kudilongolola bua malu aa ne udi mua kusomba talala muikale ne dishindika bua muoyo wende. Muanda eu udi ukepesha dibungama ne dipampakana. Nunku tudi mua kuamba ne: Bible udi umvuija tshidi dijinga dinene dia bansonga: ndia kujingulula malu adi enzeka ne kumanya ikala mua kuenzeka matuku atshilualua.

Mua kupeta diakalenga mu bunsonga

Ntshinyi tshidi tshileja ne: muntu mmupete diakalenga mu bunsonga? Ndilonga tulasa tua bungi anyi, mbiuma anyi, peshi ndikala ne balunda ba bungi? Bantu ba bungi badi mua kuela meji mushindu’au. Bidimu bia patshidi muntu tshitende ne bia padiye ubuela mu bidimu bia 20 bidi ne bua kumuambuluisha bua kutuadija bimpe matuku ende a ndekelu a muoyo. Mbuena kuamba ne: diakalenga didi muntu upeta mu bunsonga didi mua kuleja tshikala mua kuenzeka mu bidimu bialua.

Anu mutudi bamone, Bible udi mua kuambuluisha nsonga bua kupetaye diakalenga mu bunsonga buende. Bansonga ba bungi bakadi badimuenene bualu ebu. Batu babala Dîyi dia Nzambi dituku dionso ne batu benza bidibu balonga. (Bala “ Mubelu mulenga udi nsonga kampanda musadidi wa Yehowa ufila,” mu dibeji 6.) Bulelela, Bible udi mukanda wa bansonga lelu bualu udi mua kubambuluisha bua ‘kuikala bakumbajibue, balongolola tshishiki bua midimu yonso mimpe.’​—2 Timote 3:16, 17.

[Lungenyi lunene lua mu dibeji 5]

Bumue bua ku malu adi apetesha bansonga diakalenga nkusomba bimpe ne bakuabu

[Lungenyi lunene lua mu dibeji 6]

Pamu’apa bansonga batu basue kumanya malu adi enzeka ne tshidiwu enzekela kupita bantu ba bidimu bikuabu kayi bionso

[Kazubu mu mabeji 6, 7]

 Mubelu mulenga udi nsonga kampanda musadidi wa Yehowa ufila

Alexander udi ne bidimu 19. Uvua mukolele mu dîku dia Bantemu ba Yehowa, ne mmudifile mu ntendelelu wende ne muoyo mujima. Kadi kabivua anu nanku kumpala to. Bua tshinyi? Alexander udi umvuija ne:

“Bidi mua kukukemesha bua kumvua ne: ngakatantshila Bantemu ba Yehowa bidimu bipite pa muanda-mutekete kadi tshiyi ntambula to. Munkatshi mua bidimu abi, ntendelelu wanyi uvua wa mioyo ibidi, uvua wa tshidingijilu patupu. Ndi ngela meji ne: tshivua ne bukole bua meme kudikonkonona bimpe bimpe nansha.”

Kadi Alexander wakalua kushintuluka. Udi utungunuka wamba ne:

“Baledi banyi ne balunda banyi ba mu tshisumbu bakatungunuka ne kumbela bua kubala Bible dituku dionso ne bua meme kumanya Yehowa biakane. Ke meme kupangadika bua kuteta. Nanku ngakakepesha mêba amvua ntangila televizion ne meme kubangisha kubala Bible pa dinda dituku dionso. Ndekelu wa bionso, ngakabanga kumvua tshidi Bible menemene. Ngakamanya mushindu udiye mua kungambuluisha. Ne tshivua ne mushinga wa bungi menemene ntshia se: ngakajingulula ne: Yehowa mmusue bua meme kumumanya. Pangakumvua bualu ebu, malanda anyi nende akabanga kushema, ne bulunda buanyi ne bana betu mu tshisumbu buakalengela. Bible mmushintulule nsombelu wanyi bikole! Ndi ndomba nsonga yonso musadidi wa Yehowa bua ikale ubala Bible dituku dionso.”

Kudi bansonga miliyo mivule mu buloba bujima badi badisangisha ne Bantemu ba Yehowa. Udi umue wa kudibu anyi? Udi musue bua dibala dia Bible pa tshibidilu dikuambuluishe anyi? Bua tshinyi kubenga kulonda tshilejilu tshia Alexander? Kepesha mêba audi wenza malu adi ne mushinga mukese, ne bueja dibala dia Bible mu malu autu wenza dituku dionso. Nunku neupete masanka a bungi.