Udi muvuluke anyi?

Dibala dia nimero ya Tshibumba tshia Nsentedi ya matuku mashale aa divuaku dikusankishe anyi? Nanku anji tetabi bua kuandamuna nkonko idi ilonda eyi:

• Bua tshinyi tudi ne bua kuelangana meji lelu bua nkonko idibu bele mu Yobo nshapita wa 38?

Malu a kukema a bungi adi Nzambi utangijaku ntema yetu kabena mua kuumvua bimpe menemene nansha kudi bena meji ba lelu to. Munkatshi muawu badi bumvuijamu mushindu udi bukole bua gravitation buenza bua buloba kushalabu anu mu njila wabu, tshidi butoke buikale menemene, bua tshinyi kudi mishindu ne mishindu ya bitatutatu bia neje, mushindu utu mamata a mvula adienza ne mutu bukole buenzeja makubakuba a mvula.​—15/4, dibeji 4-11.

• Mbilejilu kayi bia mu Bible bidi mua kutuambuluisha bua kutantamena diteketa mu mikolo?

Asafa, Baluka, ne Naomi bakapeta malu avua atekesha mu mikolo anyi avua akeba tunyinganyinga tukuabu, ne miyuki ya mu Bible idi ileja muvuabu batantamene ntatu eyi idi mua kutuambuluisha petu.​—15/4, dibeji 22-24.

• Ng’imue mishindu kayi milenga ya kuambuluisha bakaji bakamba?

Balunda badi mua kubaleja mu buimpe patoke ne: mbasue kubambuluisha. Bena mu dîku anyi bantu bakuabu badi mua kuikala ne mushindu wa kubambuluisha ne makuta anyi ne bintu, padibu nabi dijinga menemene. Bena Kristo bakuabu badi pabu mua kubambuluisha ne dinanga mu dibapesha diambuluisha dia mu nyuma ne dikankamija.​—1/5 dibeji 5-7.

• Bua tshinyi bidi ne mushinga bua kuselangana ‘anu mu Mukalenge’ mudibu batubela mu 1 Kolinto 7:39?

Kuselangana ne muntu udi kayi muena Kristo kutu misangu mivule kulela ntatu ya bungi. Kabidi, kutumikila mubelu eu kudi kuleja mutudi balamate Yehowa Nzambi. Patudi tutumikila Dîyi dia Nzambi, mitshima yetu kayena itupisha to. (1 Yone 3:21, 22)​—15/5, dibeji dia 20-21.

• Bu mudibi ne: Yehowa ke udi mua kutubuikidila mpekatu yetu, bua tshinyi bena Kristo badi ne bua kutonda mpekatu minene kumpala kua bakulu ba tshisumbu?

Bushuwa, bena Kristo badi ne bua kukeba bua Yehowa ababuikidile mpekatu yabu minene. (2 Samuele 12:13) Kadi anu muvua muprofete Natana muambuluishe Davidi, balume bapie ba mu tshisumbu badi mua kuambuluisha benji ba mpekatu badi banyingalale bua mpekatu yabu. Kuya kudi bakulu kudi kupetangana ne mubelu mufila mu Yakobo 5:14, 15.​—1/6, dibeji 31.

• Ntshijadiki kayi tshidi tshileja ne: tudi ne bua kuambuluisha bana ba nshiya ne bakaji bakamba badi mu dikenga?

Miyuki ya malu a kale idi ileja ne: kufila diambuluisha dia mushindu’eu kuvua tshimanyinu tshia ntendelelu mulelela munkatshi mua Bena Ebelu ba kale ne mua bena Kristo ba kumpala. (Ekesode 22:22, 23; Galatia 2:9, 10; Yakobo 1:27) Mupostolo Paulo wakafunda mu Bible mibelu mitoke bua mushindu uvua bena Kristo ne bua kuambuluisha bakaji bakamba bavua mu dikenga. (1 Timote 5:3-16)​—15/6, dibeji dia 9-11.

• Ntshinyi tshidi tshikale nsapi wa nsombelu muimpe wa disanka?

Tudi ne bua kudia ne kulama malanda mimpe ne Yehowa, Tatu wetu wa mu diulu. Dilonga dia Bible ke tshintu tshia mushinga tshidi mua kutuambuluisha bua kuenza nanku.​—1/7, dibeji 4-5.

• Muntu yonso utu ne nyuma utu ushala ne muoyo kunyima kua lufu anyi?

Nansha mudi bamue bantu bitaba ne: nyuma (kadi ki ng’anyima to) katu ufua, Bible kêna wamba nanku to. Udi uleja ne: padi muntu ufua, udi upingana ku lupuishi ne kenaku kabidi to. Kadi Nzambi udi ne bukole bua kupesha kabidi muntu au muoyo, nenku ditekemena dionso dia kuikala ne muoyo mu matuku atshilualua ku diambuluisha dia dibika didi anu mu bianza bia Nzambi. (Muambi 12:7)—15/7, dibeji 3-6.

• Danyele uvua penyi pavua bena Ebelu basatu mu diteta mu mpata wa Dula?

Bible kêna wamba muaba uvuaye to. Bidi mua kuikala se: Danyele kavua muenzejibue bua kuya mu mpata au bua muanzu uvuaye nawu, anyi uvua mua kuikala muye ku luendu mu mudimu wa mbulamatadi. Kadi tudi mua kuikala bajadike ne: kakanyanga lulamatu luende kudi Yehowa to.​—1/8, dibeji dia 31.