Malu a mu nsombelu

Butoke bua mu nyuma budi butokesha mu matunga a ku Moyen-Orient

MALONDA KUDI NAJIB SALEM

Mu bidimu lukama bia kumpala B.B., butoke bua Dîyi dia Nzambi buakamunyika kubangila mu matunga a ku Moyen-Orient ne kufikabu ne ku ntengu ya buloba ya kule menemene. Mu lukama lua bidimu lua 20, butoke abu buakapingana bua kumunyika kabidi tshitupa etshi tshia buloba. Kadi ntelejayi nnulondele muvuabi bienzeke.

BAKANDELA mu tshidimu tshia 1913, mu tshimenga tshia Amioun, ku Nord kua ditunga dia Liban (Lebanona). Tshidimu atshi ke tshivua tshia ndekelu tshivuaku malu mashindame ne kabidi kuikale ndambu wa ditalala pa buloba, bualu tshidimu tshiakalonda Mvita ya Kumpala ya Buloba bujima yakabudika. Pakajika mvita mu 1918, ditunga dia Liban (divua dimanyike tshikondo atshi bu busanga bua ku Moyen-Orient) diakateketa bikole menemene mu malu a mpetu ne a tshididi.

Mu 1920, pakatuadija tshiakabidi midimu ya ku poste ya dituminangana mikanda mu Liban, tuakabanga kupeta mikanda ya kudi bena Liban bavua basombele ku ba bende. Munkatshi muabu muvua ba mansebanyi babidi, Abdullah Ghantous ne George Ghantous. Bavua bafundila tatuabu (kaku muledi wa Mamu) Habib Ghantous, bamuambila bua Bukalenge bua Nzambi. (Matayo 24:14) Pavuaye ulondela bena mu tshimenga tshiabu malu avua mu mikanda ya kudi bana bende, bavua bamuseka. Bantu ba mu tshimenga etshi bakabanga kutangalaja lumu ne: bana ba Habib bavua bambila tatuabu bua asumbishe lupangu, asumbe kabalu ne aye wenda uyisha.

Butoke budi butuadija kutangalaka

Tshidimu tshiakalonda, mu 1921, Michel Aboud, uvua musombele ku Brooklyn, mu provense wa New York (mu États-Unis), wakalukila mu tshimenga tshia Tripoli, mu Liban. Ukavua mulue Mulongi wa Bible, dîna divuabu babikila Bantemu ba Yehowa tshikondo atshi. Nansha muvua  tshitupa tshinene tshia balunda ne balela ba muanetu Aboud babenge lumu luimpe lua mu Bible, bantu babidi bamanyike bikole bakitaba, kuvua mulongeshi Ibrahim Atiyeh, ne munganga wa menu Hanna Shammas. Doktere Shammas wakafila nzubu ne muaba uvuaye wondapila bua kuikala kuenzelamu bisangilu bia bena Kristo.

Ntshitshivua anu ka-nsongalume pakalua muanetu Aboud ne muanetu Shammas mu musoko wa Amioun mumvua musombele. Dilua diabu diakangambuluisha bikole, ne ngakabanga kuya ne muanetu Aboud mu diyisha bantu. Munkatshi mua bidimu 40 bijima tuvua tuya mu buambi bubidi buetu pa tshibidilu, too ne muakalua muanetu Aboud kufua mu 1963.

Pankatshi pa tshidimu tshia 1922 ne tshia 1925, butoke bua bulelela bua mu Bible buakatangalaka bikole mu misoko mivule ya ku Nord kua Liban. Bantu batue ku 20 anyi 30 bavua badisangisha bua kuyukila malu a mu Bible mu nzubu ya bana betu, bu mudi mu musoko wetu wa Amioun. Balombodi ba bitendelelu bavua batuma bana ne biesu bia malata bua babikumakaje ne benze mitoyi ne bele mbila mikole ne tshipatshila tshia kutunyangila bisangilu bietu, ke bualu kayi imue misangu tuvua tuya kuenzela bisangilu mu ditu dia mitshi ya pin.

Pantshivua nsonga, lukunukunu lumvua nalu bua diyisha ne bua dibuela mu bisangilu bionso bia bena Kristo, luakanginyikisha dîna dia Timote. Mulombodi wa tshilongelu tshimvua wakangambila bua meme kulekela dibuela mu bisangilu bivuaye ubikila ne: “bisangilu abi.” Pangakabenga, wakangipata mu kalasa.

Ndi nyisha mu matunga adi mamanyike mu Bible

Diakamue panyima pa batismo wanyi mu 1933, ngakabanga mudimu wa bumpanda-njila, mutu Bantemu ba Yehowa babikila mudimu wa ku dîba ne ku dîba. Nansha mututshivua bakese dîba adi, tuakayisha mu misoko ya bungi ya ku Nord kua Liban ne tuakafika too ne mu tshimenga tshia Beyrouth ne mu misoko yatshi yonso ya pa mpenga ne mu luseke lua ku Sud kua Liban. Mu bidimu bia kumpala abi, pa tshibidilu tuvua tuenza ngendu ku makasa anyi pa tubalu, anu muakenza Yezu ne bena Kristo bende ba mu bidimu lukama bia kumpala.

Mu 1936, Yousef Rahhal, Ntemu wa mu Liban uvua muenze bidimu bia bungi mu États-Unis, wakapingana mu Liban bua kuendakana. Uvua mulue ne biamu bia mêyi ne bisanji bibidi bia fono (turne-diske). Tuakasa bintu ebi mu mashinyi a Ford menza mu 1931 ne tuetu kutuadija kuendakana mu Liban mujima ne mu Syrie, tuenda tuyisha mukenji wa Bukalenge too ne miaba ya kule. Bantu bavua mua kumvua mêyi a bikolokolo too ne mutantshi mupite wa kilometre 10. Bantu bavua babanda pa misonga ya nzubu yabu bua kuteleja mêyi avuabu babikila ne: mêyi a mu diulu. Bantu bavua ku madimi bavua banji kushiya midimu yabu ne balua pabuipi bua kuteleja.

Lumue lua ku ngendu yanyi ya ndekelu ne Yousef Rahhal luvua lua mu tshimenga tshia Aleppo, mu ditunga dia Syrie, tuvua mu muvu wa Hiver wa mu 1937. Kumpala kua yeye kupingana ku États-Unis, tuakaya nende ku Palestine. Patuvuamu, tuakaya mu tshimenga tshia Haifa ne tshia Jérusalem ne mu misoko mikuabu ya mu ditunga edi. Umue wa ku bantu batuakapetangana nabu uvua Ibrahim Shehadi, unkavua mumanyangane nende mu mikanda ituvua tutuminangana. Ibrahim ukavua mumanye malu a bungi a mu Bible, bualu patuakafika, wakabanga kupatuka netu mu mudimu wa diyisha ku nzubu ne ku nzubu.​—Bienzedi 20:20.

Mvua kabidi ne dijinga dikole dia kupetangana ne mulongeshi Khalil Kobrossi, muena Katolike wa kalanda-musenga ukavua mubange kulonga Bible ne Bantemu ba Yehowa mu mikanda ivuabu batuminangana nabu. Mmushindu kayi uvuaye mupete adrese wa Bantemu ku Liban? Mu magazen makuabu a mu Haifa, muntu uvua usumbishamu uvua mukutshile Khalil bimue biakudia bivuaye musumbe mu dibeji divuaye mutule mu umue mukanda wa Bantemu ba Yehowa. Mu dibeji edi  muvua adrese wetu. Tuakamonangana bimpe bitambe, ne kunyima mu 1939, wakalua mu Tripoli bua kutambulaye.

Mu 1937, Petros Lagakos ne mukajende bakalua mu Tripoli. Mu bidimu bikese biakalonda, busatu buetu tuakayisha tshitupa tshinene tshia Liban ne Syrie, tuenda tuyukila ne bantu ku mabu tubambila mukenji wa Bukalenge. Mu tshikondo tshiakafua muanetu Lagakos mu 1943, Bantemu bakavua bafikishe butoke bua mu nyuma mu bimenga ne misoko mivule ya mu Liban, mu Syrie ne mu Palestine. Misangu mikuabu, bantu batue ku 30 ba munkatshi muetu bavua bajuka pa dîba isatu wa butuku ne mashinyi makese anyi bise bua kumona mua kufika mu bitupa bia kule menemene.

Mu bidimu bia 1940, Ibrahim Atiyeh uvua ukudimune Tshibumba tshia Nsentedi mu tshiena-Arabe. Panyima, mvua ntentula ku bianza bua kupeta bibejibeji ebi binayi ne mbitumina Bantemu ba mu Palestine, mu Syrie ne mu Ejipitu. Mu matuku au a Mvita Mibidi ya Buloba bujima, bavua baluisha mudimu wetu wa buambi bikole, kadi tuakatungunuka ne kuyikila ne bantu bavua banange bulelela bua mu Bible mu tshitupa etshi tshia ku Moyen-Orient. Meme nkayanyi ngakazola tuarte tua bimenga ne misoko ivua mibinyunguluke, ne tuakangata dipangadika dia kufikisha lumu luimpe mu miaba eyi.

Mu 1944, patshivua Mvita Mibidi ya Buloba bujima itua ipela, ngakasela Evelyn, muana wa mpanda-njila nanyi Michel Aboud. Tuakalela bana basatu, wa bakaji umue ne babidi ba balume.

Tudi tuenza mudimu pamue ne ba-misionere

Mutantshi mukese kunyima kua mvita, balongi ba kumpala bakajikija Kalasa ka Gilada bakafika mu Liban. Bualu ebu buakambuluisha bua kuenza tshisumbu tshia kumpala tshia mu Liban, ne bakanteka musadidi wa tshisumbu (lelu mutangidi-muludiki). Pashishe, mu 1947 Nathan Knorr ne mufundi wende Milton Henschel bakalua mu Liban ne kukankamijabu bikole bana betu. Kunyima kua matuku makese, bamue ba-misionere kufikabu, ne bakatuambuluisha bikole bua mushindu wa kulongolola mudimu wa diyisha ne wa kulombola bisangilu bia tshisumbu.

Mu lumue luendu lutuakaya mutantshi mule mu Syrie, muepiskopo wa muaba au kavua musue bua tuetu kuyishamu to. Wakatufunda wamba mutuvua tuabanya mikanda ivuaye ubikile ne: mikanda ya bena Siona. Kumpala kua 1948, balombodi ba bitendelelu bavua batusendeka pavuabu batubikila ne: “ba-Koministe.” Musangu au, bakatukuata ne kutuelabu nkonko munkatshi mua  mêba abidi majima, ne mu mêba onso abidi aa tuakafika ku diyisha bimpe bitambe.

Ku ndekelu, nzuji wakateleja tshilumbu tshietu wakamba ne: “Nansha mundi ntshipa muevu [dîna divuabu binyike muepiskopo au] udi munubande ne malu a dishima, ndi ne bua kuwela tuasakidila bua mudiwu mumpeshe mushindu wa kuyikila nenu ne kumanya malongesha enu.” Pashishe wakatulomba luse bua mukodi eu uvuabu batuenzele.

Kunyima kua bidimu dikumi patuvua tuya batangile ku Beyrouth mu bise, ngakatuadija kuyukila ne muntu mulume uvua musombe ku luseke luanyi, uvua mumanyi mupiluke wa malu a madimi. Yeye mumane kuteleja malongesha etu mu minite mikese, wakamba ne: ukavua mumvue malu a muomumue kudi mulunda wende mukuabu mu Syrie. Mulunda wende au uvua nganyi? Nzuji wakateleja tshilumbu tshietu ku tubadi kukavua kupite bidimu dikumi!

Mu bidimu bia 1950, ngakaya kutangila Bantemu ba mu ditunga dia Irak ne tuetu kuenza nabu mudimu wa diyisha ku nzubu ne ku nzubu. Ngakaya kabidi misangu ya bungi mu Jordanie ne mu Cisjordanie. Mu 1951 mvua munkatshi mua Bantemu banayi bakaya mu Beteleheme. Tuakenzelamu Didia dia Mukalenge. Mu dinda dituku adi, bantu bonso bavuapu bua tshibilu etshi bakanji kuya ku musulu wa Yadene ne bise, ne bantu 22 bakatambula bua kuleja didilambula diabu kudi Yehowa. Patuvua tupeta bantu bavua kabayi batusue, tuvua tubambila ne: “Tudi balue bua kunuambila ne: umue wa ku bana benu balela nealue Mukalenge wa buloba bujima! Bua tshinyi nudi nufika munda? Nudi ne bua kuikala ne disanka!”

Tudi tuyisha mu ntatu

Bantu ba ku Moyen-Orient batu misangu mivule ne muoyo mulenga, badipuekeshi ne bakididi ba benyi. Ba bunyi batu bateleja mukenji wa Bukalenga ne ntema. Bushuwa, kakuena tshintu tshidi mua kukolesha ku muoyo bu mudi kumanya ne: mu katupa kîpi emu mulayi eu wa mu Bible neukumbane: ‘Nzambi muine neikale nabu [bantu]. Yeye neakupule tshinsonji tshionso ku mêsu kuabu, ne lufu kaluena luikalaku kabidi; madilu kaena ikalaku kabidi, nasha muadi, nasha kanyinganyinga kabidi.’​—Buakabuluibua 21:3,4.

 Ngakamona ne: bantu ba bungi badi babenga mudimu wetu ki mbamanye mudimu eu biakane ne mukenji utudi tuenda tumanyisha nansha. Balombodi ba Bukua-buena-Kristo batu benze malu a bungi be bua kutunyangila lumu! Ke tshiakenza bua se: mu tshikondo tshia mvita yakatuadija mu 1975 mu Liban, ne yakenza bidimu 15, Bantemu bakapeta ntatu bungi kabuyi kubala.

Umue musangu mvua ndombola dilonga dia Bible ne dîku kampanda divua didifile bikole mu malu a tshitendelelu tshiabu. Ditungunuka diabu ne kulonga bimpe bulelela bua mu Bible diakafikisha balombodi ba tshitendelelu munda. Nenku butuku bukuabu, balombodi ba tshitendelelu kampanda tshia pabuipi apu bakasaka bantu babu bua kunyangabu magazen a dîku edi, ne bakuosha bintu bivuamu bivua ne mushinga wa dolare ya bena Amerika 10 000. Butuku bumue abu, buobu kulua bua kunkuata ku bukole. Kadi, ngakelesha mfumuabu meji, meme kumumvuija ne: bikalabu bavua bena Kristo balelela, kabavua ne bua kuenza malu a buenzavi a mushindu’au nansha. Umvua nanku, yeye kutuma dîyi bua bimanyike mashinyi ne kungambilaye bua meme kutuluka.

Musangu mukuabu, bakankuata kudi bena mvita banayi. Panyima pa bamane kumfunyina bikole, mfumuabu uvua wambe bua kungasa tshingoma, wakashintulula lungenyi diakamue, ne buobu kundekela. Babidi ba ku bantu aba badi mpindieu mu buloko bua dishipangana ne dinyengangana dia bintu, ne babidi bakuabu bakadi babashipe.

Bikondo bikuabu bia kuyisha

Misangu mivule mvua mpeta mushindu wa kumbuka mu edi ditunga kuya mu dikuabu ku ndeke. Umue musangu pamvua mu ndeke ngumbuka ku Beyrouth mutangile ku États-Unis, mvua musombe ku luseke lua Charles Malek, uvua kale ministre wa malu a mbenyi mu ditunga dia Liban. Wakanteleja ne ntema yonso, kuanyishaye mvese yonso imvua mumubadile mu Bible. Ku ndekelu kungambilaye ne: uvua mulongele mu tshilongelu kampanda tshia Tripoli muvuabu ne mulongeshi diende Ibrahim Atiyeh, uvua tatuanyi-muenu mulongeshe bulelela bua mu Bible! Muena-muabu Malek kuambaye ne: Ibrahim uvua mumulongeshe bua kunemeka Bible.

Musangu mukuabu tuetu mu ndeke, mvua musombe ku luseke lua muleji-mpala wa ditunga dia Palestine mu Bulongolodi bua Bisamba Bisanga. Ngakamuambila lumu luimpe lua Bukalenge bua Nzambi. Panyima, yeye kummanyisha kudi dîku dia muakunyende wa balume divua mu New York, ne misangu ya bungi mvua nya kubatangila. Mvua ne mulela wanyi mukuabu uvua wenza mudimu mu nzubu wa Bulongolodi bua Bisamba Bisanga mu provense wa New York. Dimue dituku ngakenza mêba asatu mu biro biende, munkatshi mua mêba aa ngakamuyisha malu a Bukalenge bua Nzambi.

Mpindieu ndi ne bidimu 88, ne ntshidi anu ne bukole bua kukumbaja majitu anyi a mu tshisumbu ne tshisumi. Mukajanyi Evelyn utshidi anu usadila Yehowa pamue nanyi. Muananyi wa bakaji bakamusela kudi mutangidi muena-ngendu wa Bantemu ba Yehowa, udi mpindieu mukulu mu tshisumbu kampanda tshia mu Beyrouth. Muanabu wa bakaji udi pende Ntemu. Muananyi wa mukala ne mukajende badi kabidi Bantemu, ne muanabu wa bakaji udi pende mu bulelela. Kadi bua muananyi wa balume wa kumpala, tuvua bamulongeshe bulelela bua bena Kristo, ndi mutekemene bua se: mu bungi bua matuku, neafike ku dibuitaba.

Mu 1933, bakanteka mpanda-njila, wa kumpala bua mu Moyen-Orient mujima. Tshivua ne tshikuabu tshintu tshilenga tshimvua bua kuenza ne muoyo kupita kusadila Yehowa bu mpanda-njila mu bidimu bionso 68 bikadi bipite ebi. Ne ndi mudisuike bua kutungunuka ne kuendela mu butoke bua mu nyuma budiye ufila.

[Tshimfuanyi mu dibeji 23]

Najib mu 1935

[Tshimfuanyi mu dibeji 24]

Badi ne mashinyi a bikolokolo bia mêyi mu Mikuna ya mu Liban, mu 1940

[Bimfuanyi mu dibeji 25]

Ku mutu: tulonda mutu milonda ya dîba inyunguluka tumbukila kulu ku dia bakaji: Najib, Evelyn, muanabu wa bakaji, muanetu Aboud ne muanabute wa Najib, mu 1952

Kuinshi (mulongo wa kumpala): Muanetu Shammas, Knorr, Aboud, ne Henschel ku nzubu kua Najib, mu Tripoli mu 1952

[Tshimfuanyi mu dibeji 26]

Najib ne mukajende Evelyn