Ikala muena dianyisha ne muena disanka

TSHIKANDAKANDA kampanda (Calgary Herald) tshia mu Canada tshidi tshiamba ne: “Muoyo wa dianyisha ke bualu bunene butu bantu basue.” Tshikandakanda etshi tshiakaleja mêyi a bamue bana balongi ba bidimu tshitema bavua mulongeshi wabu muambile bua bafunde malu onso avua abasaka bua kuleja dianyisha. Muana umue wa balume wakamba ne: uvua ne dianyisha kudi bena dîku diabu bualu ‘bavua bamulame bimpe.’ Muana mukuabu wa bakaji pende uvua ne dianyisha kudi dîku diabu, wakamba ne: “Badi bankuba, bangambuluisha bua kuikala ne makanda a mubidi, bantshiunga, mbanange, badi bandisha, ne bu kabuyi bua baledi banyi, tshivua mua kuikala ne muoyo pa buloba apa nansha.”

Dipanga dianyisha didi difikisha ku dikala ne tshikeku misangu yonso. Bilondeshile muena nkindi ne muena teoloji James Packer, “tudi bafukibue bua kuikala beyemene Nzambi ne bua kuikala beyemenangane umue ne mukuabu.” Bualu ebu budi butuvuluija mubelu wa meji wa mu Bible wakafundabu kukadi nkama ya bidimu, udi wamba ne: “Ikalayi bena dianyisha!” (Kolosai 3:15, Mukenji Mulenga) Mêyi a kuela nawu bakuabu tuasakidila ne a kubaleja nawu dianyisha ne muoyo mujima adi ambuluisha bua kudia malanda mimpe ne bantu.

Kabidi, patudi tulejangana dianyisha ne tuangatangana ne mushinga, tudi tudileja bena dianyisha kudi Yehowa, ne yeye udi umona bualu ebu. Bible udi wamba ne: ‘Mêsu a Yehowa adi akenzakana ku nseke yonso ya buloba bua kuleja bukole buende kudi bantu badi ne mitshima miakane kudiye.’ (2 Kulondolola 16:9) Nzambi udi utujadikila ne: udi uvuluka ne wanyisha dinanga didi bantu baleja bua dina diende. (Ebelu 6:10) Bushuwa, tudi ne malu mimpe a bungi adi ne bua kutusaka bua kudileja bena dianyisha bualu, patudi tuleja ngikadilu eu mulenga dituku dionso, udi usankisha Yehowa ne uvudija disanka dietu. Bidi anu mudi Nsumuinu 15:13 wamba ne: ‘Mutshima wa disanka udi uvuija mpala wa musangelu.’