Kumpala tuvua mibuabua, mpindieu tudi mikoko!

Patutshivua bana batekete meme ne Sakina, tuvua bena mutumba. Sakina uvua muntu wa mubidi munene ne mupatakane, kadi meme mvua wa mubidi mukese wa tshitupa. Tuvua tutandangana misangu ya bungi, ne dimue dituku tuakaluangana mvita mikole ya dikema. Kubangila anu pine apu, tuetu kujilangana katutshiyi kabidi tuelangana nansha muoyo to. Kunyima kua matuku, tuetu bonso tuakamuangala kakuyi muntu mumanye muaba uvua mukuabu.

Mu tshidimu tshia 1994, ngakatuadija kulonga Bible ne Bantemu ba Yehowa, ne ku kakese ku kakese ngikadilu yanyi e kubanga kushintuluka. Kunyima kua bidimu binayi, tuetu mu mpuilu wa dituku dimue wa pa buende mu Bujumbura (ku Burundi), ngakapapuka patuakasambakena ne Sakina mu mpukapuka. Ngakasanka bikole bua muvuaye mu mpuilu au, kadi muoyo utuvua belangane uvua anu wa mashika. Pashishe dine dituku adi, tshiakitaba ne n’Sakina to pangakamumona munkatshi mua bantu bavua ne bua kutambula! Yeye pende uvua mushintuluke bikole. Katshivua kabidi muntu wa bilumbu utuvua tuluangana nende dîba dionso to. Ndisanka kayipu dia kumumona utambula mu mâyi dituku adi bua kufila tshijadiki tshia patoke tshia didilambula diende kudi Nzambi!

Pakapatukaye mu mâyi, ngakanyema lubilu bua kumupukila, ne meme kumuambila ku ditshi ne: “Udi muvuluke mutuvua tuluangana mvita?” Yeye kuamba ne: “Eyowa, kadi au mmalu a kale. Mpindieu nkadi muntu mupiamupia.”

Tuetu bonso babidi tudi ne disanka bua mutudi bapete bulelela bua mu Bible budi busangisha bantu mu buobumue ne bua mutudi bashintulule ngikadilu ituvua nayi bu mibuabua ne bangate ngikadilu ya mikoko ya Yehowa Nzambi, Mulami Munene. Bushuwa, bulelela bua mu Bible budi bushintulula bantu.