“Ntshinyi tshidi tshienda tshienzeka mu France?”

“Budikadidi, budikadidi buetu butudi banange bikole.” Mêyi aa nga mu musambu wa ditunga dia France udibu babikila ne: “La Marseillaise.” Kakuyi mpata, budikadidi ntshintu tshia kuangata ne mushinga. Kadi malu adi menzeke mu France matuku adi panshi aa adi anyingalaja bikole bualu badi benda banyanga budikadidi ebu. Ke bua tshinyi mu Ditanu dia 3 Kasuabanga 2000, Bantemu ba Yehowa binunu ne binunu bakabanyina bantu trakte wa pa buende miliyo mitue ku 12 uvua ne tshiena-bualu ne: “Que se trame-t-il en France? Les libertés pourraient-elles régresser?” (Ntshinyi tshidi tshienda tshienzeka mu France? Budikadidi budi mua kukepela anyi?)

KUKADI bidimu bia bungi mpindieu, mbaluishe Bantemu ba Yehowa ba mu France kudi bena tshididi bashilangane ne kudi bisumbu bia bantu badi bakine bimue bisumbu bia malu a Nzambi. Bualu ebu mbukebeshe ntatu idi mikuate Ntemu ne Ntemu yonso, mu bisumbu biabu ne mu ditunga dijima. Kadi mu dia 23 Kabalashipu 2000, kabadi kakulu ka malu a mbulamatadi ka mu France (Conseil d’État) kakangata dipangadika dinene diakakuata ku tshikavua tubadi tukese 31 tuambe mu bilumbu bia ku tubadi bipite pa 1 100. Kabadi kakulu aka kakajadika kamba ne: ntendelelu wa Bantemu ba Yehowa udi umvuangana tshishiki ne mikenji ya mu France, nunku kabena ne bua kufutshisha Nzubu yabu ya Bukalenge bitadi anu mudibu kabayi bafutshisha bitendelelu bikuabu.

Kadi Ministre muomekela malu a mpetu wa mu France udi upepeja dipangadika edi ne utungunuka ne kubengela bulongolodi bua Bantemu ba Yehowa bukenji budi mikenji ya ditunga ipesha bitendelelu bua kabikadi bifuta bitadi. Biro bia Ministre eu mbifundile Bantemu bua kufuta tshitadi tshidi ne mushinga wa mfranga 60 pa lukama ya mu mapa adibu bafila kudi Bantemu ne balunda babu batu badisangisha mu bisumbu 1 500 bidi mu ditunga dijima dia France. Tshilumbu etshi tshitshidi ku kabadi too ne lelu.

Bavua babanye trakte utudi batele kulu eku bua kuela muanda eu patoke ne bua kuleja njiwu idi mu difutshisha bitadi dibi dia mushindu’eu ne  mu mikenji idibu bele idi mua kunyanga budikadidi buonso bua bitendelelu. *

Dituku dile

Pa dîba ibidi wa butuku, Bantemu ba mu bimue bisumbu bakavua batuadije kuabanya trakte pambelu mu ngala ya tuwulu, mu biapu ne ku bipalu bia ndeke kabidi. Pa dîba isambombo wa dinda, bantu kubangabu kuendakana mu tshimenga tshia Paris. Bantemu batue ku 6 000 bavua bimane miaba minene ivuabu mua kupeta bantu bavua baya ku midimu. Muntu mukaji mukuabu wakamba ne: “Tshinudi nuenza bua budikadidi bua bitendelelu ntshimpe be. Kabiena bitangila amu malu a Bantemu ba Yehowa nkayabu to.” Mu tshimenga tshia Marseille, Bantemu bapite pa 350 bakapesha bantu trakte ku ngala ya tuwulu tua muinshi mua buloba ne mu njila. Mu dîba dijima, bena ku tudiomba tua ditunga kumanyishabu bualu ebu, bambila bateleji ne: kabakemi bikalabu bamone Bantemu ba Yehowa baya kudibu bua kubayikidisha. Mu tshimenga tshia Strasbourg, (muaba utu tshilombuedi tshia Kabadi ka ku Mputu ka Manême a Bantu) bena luendu bavua ku ngala munene bakela mulongo bindile ne lutulu bua kubapeshabu muntu ne muntu wende trakte. Mulumbuluidianganyi mukuabu wakamba ne: nansha muvuaye kayi witaba malu atutu tulongesha, uvua ulondesha tshilumbu tshietu ne ntema yonso, bualu mmumone ne: tshitudi tuluangena ntshintu tshia mushinga ne tshiakane.

Mu dinda pa dîba muanda-mukulu, nansha muvuaku mvula mukole mu tshimenga tshia Grenoble tshidi mu mikuna ya Alpes, Bantemu 507 bakabanyina bantu trakte mu njila yonso ne kuelela bakuabu trakte ayi mu tushete tuabu tua mikanda. Pakamona bendeshi ba mashinyi ne ba tuwulu ne: kuvua bualu buvua buenda buenzeka, bakimanyika mashinyi ne tuwulu tuabu bua kulomba pabu trakte eu. Mu tshimenga tshia Poitiers tshidi ku Ouest kua ditunga, bena ngendu bavua batuluka ku kawulu ka pa dîba tshitema bakavua bamane kupeta trakte eu muaba uvuabu bashile luendu. Mu tshimenga tshia Mulhouse, pabuipi ne ku mikalu ya ditunga dia Allemagne, bakapesha bantu trakte 40 000.

Patukavua pa dîba dikumi jajaja, bisumbu bia bungi bikavua biabanye trakte mipite pa tshia bibidi tshimue. Patukavua tuya batangile ku dîba dia mujalamu, anu bantu bakese menemene ke bavua babenge bua kuangata trakte, kadi ba bungi bavua bitabe bua kuyikila nabu. Mu tshimenga tshia Besançon, tshidi mutantshi wa kilometre 80 ne mikalu ya ditunga dia Suisse, nsongalume mukuabu wakaleja dijinga dia kumanya malu a mu Bible ne wakakonka tshidi Nzambi mulekele makenga. Ntemu uvua uyikila nende wakamulomba bua kuyabu kutungunuka ne muyuki wabu ku Nzubu wa Bukalenge uvua pabuipi apu, kutuadijabu kulonga Bible anu muaba au mu broshire wa Ntshinyi tshidi Nzambi utulomba?

Mu midi, dîba dia dikisha pa miaba yabu ya midimu, Bantemu ba bungi bakenza dîba dimue anyi abidi bayisha bantu. Bakatungunuka ne kuabanya trakte eu mu mêba a mapingaja, ne bisumbu bia bungi biakajikija mudimu’eu pa dîba isatu peshi inayi wa dilolo. Mu tshimenga tshia Reims, bamue bantu bavua balonge anyi badisangishe ne Bantemu ba Yehowa kale bakaleja dijinga dia kubangulula didisangisha kabidi mu tshisumbu. Mu tshimenga tshia Bordeaux bana betu bakatuadija kulonga Bible ne bantu basatu. Mu tshimenga tshine etshi, Ntemu umue wakabuela mu magazen makuabu bua kusumba tshikandakanda, yeye kumonaye mushiki wa trakte miteka pa mesa a tshisumbishidi tshia bintu. Muntu mukaji uvua usumbisha mu magazen au uvua Ntemu kale, bavua bamupeshe pende trakte eu, pakamonaye ne: trakte uvua wamba malu a mushinga, ke yeye kuenza fotokopi bua kuabanyinaye pende bantu.

Mu tshimenga tshia Le Havre (mu provense wa Normandie), muntu mukaji mukuabu muena Mishonyi wakanyingalala bikole pakumvuaye ku tshisanji  ne: badi bafutshisha Bantemu ba Yehowa bitadi bua mapa atubu bapeta. Wakitaba trakte eu ne muoyo mujima ne kuelaye Bantemu kalumbandi bua muvuabu bele kansungasunga aka patoke. Pa dîba dia kajimba buenyi (anyi dîba 7:20 wa dilolo), mu ngumu ya ku TV wa mu tshimenga tshia Lyon bakakula bua diabanya dia trakte eu bamba ne: “Mu dinda dia lelu bivua bipepele bua kunyema mamata a mvula, kadi kabivua bipepele bua kunyema trakte ya Bantemu ba Yehowa nansha.” Buobu kuela Bantemu babidi nkonko ne kumvuijabu tshivuabu babanyina bantu trakte eu.

Bantemu bavua bajinga kuabanya trakte eu kunyima kua bamane kufuma ku mudimu wabu wa bianza bakapesha bena mudimu bavua bapingana kumbelu trakte ne kuelabu mikuabu mu tushete tua mikanda tua bantu. Mu bimenga bu mudi tshia Brest ne tshia Limoges (tshidi tshimanyike bua dienza dia bintu bia mabumba) bantu bavua bafuma mu dibandila dia filme pa dîba 11:00 wa butuku bavua ku bantu ba ndekelu bakapeta trakte eu dituku adi. Bakasangisha trakte ivua mishale ne kuluabu kuyabanyina bantu dituku diakalonda mu dinda.

Bipeta

Ntemu umue wakafunda ne: “Baluishi betu badi bela meji ne: badi benda batutekesha. Kadi badi badishima.” Mu bisumbu bia bungi, Bantemu 75 pa lukama bavua benze mudimu eu dituku adi, bamue bavua benze mêba 10, 12 peshi 14 mu mudimu eu. Mu tshimenga tshia Hem (ku Nord kua France) Ntemu mukuabu, yeye mumane kuenza wende mpungi wa mudimu wa butuku, wakabanyina bantu trakte kutuadijila pa dîba itanu wa dinda too ne pa dîba isatu mu mapingaja. Mu tshimenga tshia Denain tshidi pabuipi apu (mutu tshisumbu tshia Bantemu katshia mu 1906) Bantemu 75 bakenza mêba 200 benda babanya trakte mu Ditanu. Bakuabu, nansha muvuabu bakulakaje, balema ne nansha muvua kulu kubi, bakapangadija pabu bua kuabanyina bantu trakte eu. Tshilejilu, mu tshimenga tshia Le Mans, bantu bakaji basatu ba bidimu 80 ne bia mu njila bakenza mêba abidi benda bela trakte mu tushete tua mikanda tua bantu, ne Ntemu mukuabu uvua mu dikalu diende dia balema wakabanyina bantu trakte kumpala kua ngala wa tuwulu. Bivua bikankamija bikole bua kumona Bantemu ba bungi bavua kumpala kabatshiyi bayisha benza pabu mudimu eu wa pa buawu.

Kakuyi mpata, diabanya dia trakte edi diakambuluisha bua kuyisha bantu ba bungi. Bantu ba nsombelu yonso, ba bungi batutu tusangana kumbelu anu mu mpukapuka, bakapeta trakte eu. Bantu ba bungi bakamona ne: pa kumbusha dikuba dia midimu ya Bantemu, diabanya trakte eu ndiambuluishe bikole mu malu makuabu a bungi. Ba bungi bakangata mudimu eu bu diluangena budikadidi bua kuondo ka muoyo ne bua ntendelelu bua bena mu France bonso. Bua kujadika muanda eu, bantu bakalomba trakte mikuabu bua kuyabu kupesha balunda babu, bena mudimu nabu ne balela babu.

Bushuwa, Bantemu ba Yehowa ba mu France badi ne disanka dia kumanyisha dîna dia Yehowa ne kuluangena midimu ya Bukalenge. (1 Petelo 3:15) Mbatekemena ne muoyo mujima bua se: badi mua ‘kusomba ne ditalala ne bupole, kulamata [Nzambi] tshishiki ne nsombelu wa kanemu menemene’ ne bua se: bantu bakuabu binunu bivule nebalue pabu kudisangisha nabu bua kutumbisha Yehowa Tatu wabu wa mu diulu.​—1 Timote 2:2, MML.

[Mêyi adi kuinshi]