Badi batela dîna dia Nzambi mu Afrike wa munkatshi

BANTU ba bungi ba mu Afrike wa munkatshi badi bitabuja Nzambi. Kabena bela mpata bua se: yeye ke Mufuki wa bintu bionso to. (Buakabuluibua 4:11) Anu bu bantu bavule ba minga miaba, bena mu Afrike wa munkatshi ba bungi kabatu bamanye dîna disunguluke dia Nzambi dia Yehowa to.

Bena mu Afrike wa munkatshi ne bantu ba minga miaba batu bakula bua dîna dia Nzambi patubu bamba mu Disambila dia Tatu wetu ne: “Banemeke dîna diebe.” (Matayo 6:9) Kadi munkatshi mua matuku a bungi, anu bantu bakese patupu ke bavua bamanye dîna dia Nzambi edi. Pabi munkatshi mua bidimu bivule, diyisha dia Bantemu ba Yehowa ne lukunukunu ndishintulule mushindu udi bantu bamona ditela dia dîna dia Nzambi. Kadi lelu, dîna dia Nzambi ndimanyike ne ndianyishibue bikole mu miakulu ya bungi ya mu Afrike, bu mudi wa Zulu (uJehova), Yoruba (Jehofah), Xhosa (uYehova) ne wa Tshisawudi (Yehova). Kadi, batshidi bepuka bua kufunda dîna dia Nzambi edi mu Bible mivule ya mu miakulu eyi.

Umue wa ku Bible mimpe udi ne dîna dia Nzambi ngua mu muakulu Zande utubu bakula mu bimue bitupa bia mu République Centrafricaine, mu Soudan ne mu République démocratique du Congo. Mu tshitupa etshi tshia buloba, bantu mbamanye dîna dia Nzambi, badi badibikila ne: Yekova mu muakulu wabu. Nansha buobu bafunde dîna dia Nzambi mushindu kayi mu muakulu kampanda, tshidi ne mushinga nkuikala kudibikila. Bua tshinyi? Bualu eu “yonso udi ubila dîna dia Yehowa neapandishibue.”​—Lomo 10:13, NW.

[Karte/​Tshimfuanyi mu dibej 32]

(Bua kumona malu bimpe, tangila mu mukanda)

SOUDAN

RÉPUBLIQUE CENTRAFRICAINE

RÉPUBLIQUE DÉMOCRATIQUE DU CONGO

[Mêyi a dianyisha]

The Complete Encyclopedia of Illustration/​J. G. Heck