Dibue didi ditulongesha tshinyi?

MUKANDA kampanda wa tshibungu wa malu a mu Bible udi wamba bua dibue dia kankinda (palmier dattier) mudidi “mutshi muimpe kumona.” Mu bikondo bivuabu bafunda Bible ne mu matuku etu aa, mabue a tunkinda atu alengeja Tshibandabanda tshia musulu wa Nil wa mu Ejipitu, ne atu afila dileji dimpe mu tu-bisense tua mu Tshipela tshia Négueb.

Dibue dia kankinda ditu ne mulamba mululame anu mutu mabue makuabu a bungi. Amue atu afika bule bua metre 30 ne enza bidimu 150 atungunuka anu ne kukuama ngaji. Bushuwa, dibue dia kankinda ditu dilenga kudimona ne ditu dikuama nkuaminu wa dikema. Tshidimu tshionso didi dikuama bishishi bia bungi bia ngaji (datte). Tshishishi tshimue tshianana tshidi mua kuikala ne ngaji mipite pa 1 000. Mufundi mukuabu wakamba bua ngaji eyi ne: “Bantu badi . . . badie anu ngaji ya kankinda miume miela mu makopo idibu bapana mu butike ki mbamanye bushême buayi patshidiyi mibishi nansha.”

Nanku mbiakanyine mudi Bible ufuanyikija bamue bantu ne mabue. Bua muntu kusankishaye Nzambi, udi ne bua kuikala ne ngikadilu mulenga ne kutungunuka ne kukuama mamuma malenga bu dibue edi ditu dikuama ngaji milenga. (Matayo 7:17-20) Ke bualu kayi bavua balengeje mu ntempelo wakibaka Solomo ne wa mu tshikena-kumona tshia Yehezekele ne bimfuanyi bia mabue a ngaji. (1 Bakelenge 6:29, 32, 35; Yehezekele 40:14-16, 20, 22) Nunku bua Nzambi kuanyishaye ntendelelu wa muntu, muntu eu udi ne bua kuikala ne ngikadilu mimpe anu bu bintu bimpe bidi nabi dibue dia kankinda. Dîyi dia Nzambi didi diamba ne: ‘Bantu bakane badi bakola bu dibue.’​—Musambu 92:12.