Kutshidi mushindu wa kupeta ditabuja dilelela anyi?

“Ditabuja ndieyemena bulenga bua Nzambi ne muoyo mujima, ndituishibua ne dijadika malu bimpe didi difikisha muntu udi nadi ku ditaba bua kuteka muoyo wende mu njiwu bua bualu buadi misangu nansha tshinunu.”​—MARTIN LUTHER (1522).

“Mu malu pabuipi ne onso tukadi balue bu bantu badi kabayi batendelela, badi kabatshiyi ne ditabuja ne bilele bia bena Kristo munkatshi muabu.”​—LUDOVIC KENNEDY (1999).

BANTU badi ne ngenyi mishilangane bikole pa bidi bitangila ditabuja. Kale bantu ba bungi bavua bitabuja Nzambi. Kadi lelu udi mpata ne makenga biûle panu, ditabuja Nzambi ne Bible dilelela didi dienda dijimina ne lukasa.

Ditabuja dilelela

Bua bantu ba bungi, “ditabuja” didi diumvuija patupu kuitaba mayisha kampanda a mu tshitendelelu anyi kulonda ntendelelu kansanga. Kadi bilondeshile Bible, “ditabuja” didi diumvuija nangananga dieyemena Nzambi ne malaya ende ne muoyo mujima kakuyi dielakana. Ditabuja ngikadilu udi uleja ne: muntu eu mmuyidi wa Yezu Kristo.

Dimue dituku, Yezu Kristo wakambila bayidi bende bua mushinga wa kuikala kusambila ‘kabayi balekela.’ Pavuaye ubambila bualu ebu, wakebeja bua kumanya bikala ditabuja dilelela divua mua kuikalaku mu tshikondo tshietu etshi. Wakakonka ne: ‘Pafika Muana wa muntu, neasangane ditabuja [edi] pa buloba anyi?’ Bua tshinyi wakajula lukonko lua buena elu?​—Luka 18:1, 8, Mukanda wa Mvidi Mukulu [Katolike, MMM].

Ditabuja didi dijimine

Kudi malu a bungi adi mua kufikisha bantu ku dijimija ditabuja dionso didibu mua kuikala nadi. Munkatshi muawu tudi mua kutela tunyinganyinga ne ntatu bia ku dituku ne ku dituku. Tshilejilu Michael Goulder, Mulongeshi wa mu iniversite, uvua nsaserdose mu parwase kampanda mu tshimenga tshia Manchester (Angleterre), dîba diakakuluka ndeke mu Allemagne mu 1958 ne banayi ba bungi ba ndundu ba tshisumbu tshia Manchester United kufuabu. Joan Bakewell kamona-kamba wa ku Televizion wa BBC wakamba ne: Goulder “wakadiumvua mioyo ya munda mimushikile bikole pakamonaye kanyinganyinga kavua naku bantu.” Bumue bualu buakenzeka mbua se: “wakajimija ditabuja divuaye nadi kudi Nzambi uvuaye wamba ne: utu udianjila  kufundila bantu malu onso adi abafikila.” Goulder wakamba tshivuaye witabuja mpindieu ne: “Bible ki . . . ndîyi dia Nzambi dilelela to,” kadi “ndîyi dia bantu didi didingangana, didi pamu’apa ne bimue bitupa bia palepale bifundisha ku nyuma wa Nzambi.”

Imue misangu ditabuja ditu diteketa. Ke tshiakenzekela mufundi ne kamona-kamba Ludovic Kennedy. Udi wamba ne: katshia ku buana buende, “mpata [yende] ne dielakana [pa bidi bitangila Nzambi] bivua bimufikila ku misangu ne malu avua amusaka bua kubenga kuitabuja akavula.” Bidi bimueneka ne: kakuvua muntu uvua mua kumupesha mandamuna mimpe a nkonko yende to. Lufu lua tatuende mu mâyi luvua bualu buvua kabuyi butekemena buakatekesha ditabuja diende bikole. Masambila atuakenza tulomba Nzambi ne: “utukube ku njiwu ya pa mâyi ne ku tshikisu tshia baluishi” kaakapeta mandamuna pakaluishabu mazuwa avua ne tatuende ne kuatayishabu kudi mazuwa a mvita a bena Allemagne mu Mvita Mibidi ya Buloba bujima.​—All in the Mind—​A Farewell to God.

Malu a buena aa atu enzeka miaba ya bungi. Mupostolo Paulo udi wamba ne: ‘Bonso kabena ne ditabuja.’ (2 Tesalonike 3:2) Wewe udi wela meji kayi? Kutshidi mushindu wa kuikala ne ditabuja dilelela kudi Nzambi ne mu Dîyi diende lelu udi bantu ba bungi benda balua bena mpata anyi? Bala tshiena-bualu tshidi tshilonda bua umvue tshiditshi tshiamba bua bualu ebu.