Nkonko ya babadi

“Dikisha” didibu bambe mu Ebelu 4:9-11 ndikisha kayi, ne mmunyi mudi muntu ‘ubuela mu dikisha adi’?

Mupostolo Paulo wakafundila bena Kristo bena Ebelu ba mu bidimu lukama bia kumpala ne: ‘Kudi kushala dikisha [dia Nsabatu] dia bantu ba Nzambi. Bualu bua wakamana kubuela mu dikisha diende, yeye muine wakikisha kabidi ku midimu yende bu muakikisha Nzambi ku midimu yende yeye. Nunku tutshintayi bietu bua kubuela mu dikisha adi.’​—Ebelu 4:9-11.

Pakamba Paulo ne: Nzambi wakikisha ku midimu Yende, bidi bimueneka ne: uvua mutume meji ku mêyi adi mu Genese 2:2, atudi tubala ne: ‘Mu dituku dia muanda mutekete Nzambi wakadi mumane kujikija mudimu wende wakenzaye; yeye wakikisha dituku dia muanda mutekete ku mudimu wonso wakenzaye.’ Bua tshinyi Yehowa “wakikisha dituku dia muanda mutekete”? Bushuwa, kabivua bualu uvua musue kupetulula makanda bua ‘mudimu wonso wakenzaye’ nansha. Mvese udi ulonda udi utuambuluisha bua kuandamuna lukonko elu: ‘Nzambi wakavudijila dituku dia muanda mutekete disanka, wakadijidila; bualu bua yeye wakikisha dituku diadia ku mudimu wende wonso wa kufuka ne kuenza.’​—Genese 2:3; Yeshaya 40:26, 28.

“Dituku dia muanda mutekete” divua dishilangane ne matuku makuabu asambombo akavua mapite bualu diodi ke divua Nzambi mubeneshe ne mujidile, mmumue ne: divua dituku dilamina anyi ditekela dijinga dia pa buadi. Ndijinga kayi adi? Ku ntuadijilu, Nzambi ukavua muleje disua diende bua bantu ne bua buloba. Wakambila mulume ne mukaji wa kumpala ne: ‘Nulelangane, nukumbane ba bungi, nuuje buloba tente; nubukokeshe; nuikale ne bukokeshi ku mutu kua minyinyi ya mu mâyi, ne nyunyu ya mulu, ne tshintu tshionso tshidi ne muoyo tshidi tshiendakana pa buloba.’ (Genese 1:28) Nansha muvua Nzambi mufuke bantu ne buloba bikale bipuangane, bivua ne bua kuangata matuku bua kukokesha buloba bujima ne kubukudimuna mparadizu mûle tente ne bantu bapuangane muvua Nzambi mulongolole. Nenku “dituku dia muanda mutekete” Nzambi wakikisha anyi wakimanyika mudimu wa difuka pa buloba bua bikavuaye mufuke bimone mua kulubuluka bu muvua disua diende. Ku ndekelu kua “dituku” adi, bionso bivua Nzambi mulongolole nebikale bikadi bikumbane. Dituku adi nedinenge mutantshi bule kayi?

Patudi tupingana ku mêyi a Paulo adi mu Ebelu, tudi tumona uleja ne: ‘kudi kushala dikisha dia nsabatu dia bantu ba Nzambi,’ ne wakambila bena Kristo nende bua benze muabu muonso bua “kubuela mu dikisha adi.” Ebi bidi bileja ne: pavua Paulo mufunde mêyi aa, “dituku dia muanda mutekete” dia dikisha dia Nzambi (dikavua dienze bidimu bitue ku 4 000) ditshivua ditungunuka. Nedijike anu pikala disua dia Nzambi didi ditangila bantu ne buloba dikumbane dionso nkong ku ndekelu kua Bukokeshi bua Bidimu Tshinunu bua Yezu Kristo, ‘Mukalenge wa dituku dia [nsabatu].’​—Matayo 12:8; Buakabuluibua 20:1-6; 21:1-4.

Bu muvua Paulo ne ditekemena edi dilenga, wakumvuija mushindu uvua muntu mua kubuela mu dikisha dia Nzambi. Wakafunda ne: ‘Wakamana kubuela mu dikisha diende, yeye muine wakikisha kabidi ku midimu yende bu muakikisha Nzambi ku midimu yende yeye.’ Mêyi aa adi atuleja ne: nansha muvua bantu bafukibue ku tshibangidilu bapuangane, kabavua babuele buonso buabu mu dikisha dia Nzambi to. Biakenzeka nanku bualu Adama ne Eva kabakanemeka mutantshi mule dikisha dia Nzambi mu “dituku dia muanda mutekete” pa kuitaba bivuaye mubalongoluele nansha. Kadi bakamutombokela ne bakajinga bua kulua badikadile kumpala kua Nzambi. Bulelela, bakitaba meji a Satana pamutu pa kuitaba buludiki buimpe bua Nzambi. (Genese 2:15-17) Ke bualu kayi bakajimija ditekemena dia kuikala ne muoyo wa tshiendelele mu mparadizu pa buloba. Kubangila anu dîba adi, bantu buonso bakalua bapika ba mpekatu ne ba lufu.​—Lomo 5:12, 14.

Buntomboji bua bantu kabuakapumbishisha disua dia Nzambi to. Dituku diende dia dikisha ditshidi ditungunuka. Kadi Yehowa wakafila tshintu tshia mushinga mukole: mulambu wa Muanende Yezu Kristo, bua bantu bonso badi bawitabuja batekemene dibapikula ne dikisha ku bujitu bua mpekatu ne lufu. (Lomo 6:23) Ke bua tshinyi Paulo wakambila bena Kristo nende bua ‘kuikisha ku midimu yabu.’ Bivua bibalomba bua kuitaba tshivua Nzambi mubapeshe bua kupeta lupandu ne kubenga kukeba bua kudipetela lupandu mu wabu mushindu bu muakenza  Adama ne Eva. Bivua kabidi bibalomba bua kubenga kutungunuka ne kuenza malu abu nkayabu bua kudimuenesha bu bakane ku mêsu kua Nzambi.

Kulekela malu a panu anyi kujinga a didisankisha dietu nkayetu bua kuenza disua dia Nzambi kudi kutupesha dikisha. Yezu wakela lubila ne: ‘Luayi kundi, bonso badi ne mudimu mukole, badi ne bujitu bunene, meme nennupe dikisha. Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu. Bualu bua mutshi wanyi wa tshikokedi udi muakane ne bujitu buanyi budi bupepele.’​—Matayo 11:28-30.

Malu akamba Paulo bua dikisha dia Nzambi ne mushindu uvua muntu mua kubuelamu biakakankamija bikole bena Kristo bena Ebelu ba mu Yelushalema bavua batantamene makenga mavule eku babaseka bua ditabuja diabu. (Bienzedi 8:1; 12:1-5) Bia muomumue, mêyi a Paulo adi mua kukankamija bena Kristo lelu’eu. Bu mutudi bamanye ne: mulayi wa Nzambi wa se: buloba nebukudimuke mparadizu mu Bukalenge buende buakane ukadi pa kukumbana, tuetu petu tudi ne bua kuikisha ku midimu yetu ne kuenza muetu muonso bua kubuela mu dikisha adi.​—Matayo 6:10, 33; 2 Petelo 3:13.

[Bimfuanyi mu dibeji 31]

Mulayi wa Nzambi wa se: buloba nebukudimuke mparadizu neukumbane ku ndekelu kua dituku diende dia dikisha