Mâyi adi afila muoyo adi apueka mu Mikuna ya Andes

Mikuna ya Andes idi munkatshi mua ditunga dia Pérou, ne mmikosolole ditunga edi mu bitupa bibidi: tshitupa tshiume tshidi ku muelelu wa mâyi ku Ouest ne tshitupa tshidi ne dîtu dia tshitalela didi ne mitshi misampile bimpe ku Est. Mu tshitupa etshi tshia mikuna ke mudi tshimue tshia bisatu tshia bantu miliyo 27 badi mu Pérou. Bantu mbasombele bamue mu mpata mitumbuke ne mu bibadi bia mikuna mile ya Andes bakuabu mu bibandabanda bidi bimueneka biondoke menemene bia bufuke bia mu mikuna ya bipokopoko eyi.

 KABIENA bipepele bua kubuela mu mikuna ya Andes to, bualu mudi mikuna ya bungi idi mienze bizakala-bizakala. Ke bualu kayi bantu miliyo mivule badi basombelamu badi anu bu baditole pa nkayabu, kabayi batamba kumanya malu adi enzeka miaba mikuabu to.

Batu base misoko mikese ku mielelu ya misulu bua kupeta mâyi bua bikunyibua ne nyama ya Iama, ya alpaga, ya vigogne ne mikoko. Kadi kudi mâyi makuabu adi afila muoyo adi apueka mu mikuna ya Andes: mmâyi a muoyo a mu nyuma adi akolesha mitshima ya bantu, a kudi Yehowa, ‘mushimi wa mâyi a muoyo.’ (Yelemiya 2:13) Yehowa udi utuma Bantemu bende bua kuambuluishabu bantu badi basombele mu misoko eyi idi kulu kua Mikuna ya Andes bua bapete dimanya dijalame dia malu ende ne dia bidiye mulongolole bua kuenza.​—Yeshaya 12:3; Yone 17:3.

Bu mudi Nzambi musue bua “bantu bonso basungidibue, bafike ku dimanya dia malu malelela,” bena mudimu ba Nzambi aba badi badienzeja ne muoyo mujima bua kuya mu misoko eyi bua kutuadila benamu mukenji wa mu Bible udi ufila muoyo. (1 Timote 2:4) Mukenji eu wa mu Bible udi ulongesha bantu ne ubalengeja. Mmupikule banangi ba bulelela ba mu misoko eyi ku bitabataba, ku bilele bia bankambua ne ku malu adi abasaka bua kutshina bafue ne nyuma mibi ne makole kampanda a mu bifukibua. Bualu bua mushinga mukole mbua se: mukenji eu udi ubapesha ditekemena dilenga dia kupeta muoyo kauyi ndekelu mu buloba bukudimuna mparadizu.

Badi badienzeja

Bamanyishi ba Bukalenge badi baya mu bitupa ebi bia kule badi ne bua kudilongolola mu malu mavule. Bua kulenga mitshima ya bantu, balongeshi ba Bible aba badi ne bua kumanya miakulu minene ibidi ya mu tshitupa etshi: tshiena-Quechua ne tshiena-Aymara.

Bua kufika mu misoko ya mu Mikuna ya Andes ki mbualu bupepele to. Kamutu njila ya bungi ya tuwulu to. Bua njila ya mikuna ne miuvu mibi, biambula bitu biyamu bitu ne njiwu ya bungi. Kadi mmunyi mudi Bantemu bafika ku dituadila bantu badi basombelamu mukenji wa Bukalenge?

Bayishi ba lumu luimpe ba dikima mbitabe lutatu elu ne badi benza anu bu muprofete Yeshaya wakamba ne: “Ke meme eu, untume meme.” (Yeshaya 6:8, MMM) Batu bangate mashinyi asatu a makadika panyima bua kuya mu misoko ya ku Nord, ya munkatshi ne ya ku Sud kua ditunga edi. Bampanda-njila aba ba lukunukunu anyi benji ba mudimu wa Nzambi mbakune ntete ya bulelela bua mu Bible ku diambuluisha dia Bible ya bungi ne mikanda mikuabu idibu baye nayi munkatshi mua bena mu misoko eyi ba musangelu, bantu badi bamanye mua kuakidila benyi bimpe ne kabidi badi basue bulelela bikole.

Mu bibende bia njila ya mu mikuna eyi ke mutu nangananga njiwu. Bua mashinyi kupitshilawu mu imue ya ku njila eyi, adi ne bua kuyila mu njila ya mantonya-mantonya idi pa mikuna eyi. Mu lumue luendu lua mushindu’eu, misionere mukuabu uvua musombe panyima pa bise wakatangila pa dididishi, e kumonaye ndundu umue wa kunyima muikale ku muelelu menemene kua lupongo luondoke lua metre matue ku 190! Wakabuita ku mêsu too ne pakapita bise muaba au.

Imue njila kayitu mimpe to, ne itu mikese ya dikema. Bua kupitshila mu njila eyi, amue mashinyi a makadika aa avua enda apueka mu kajila kakese mpindieu wowu kusambakena ne kaminyo kanene ka mukokakoka kenda kabanda. Mashinyi a dikadika aa akapingana tshianyima too ne kuulu kua mukuna muaba uvuawu onso abidi mua kupitangana bimpe.

Nansha nanku, mudimu wa tshisumi eu mmupatule bipeta bimpe menemene. Udi musue kumanya malu makuabu adi autangila anyi?

“Badi bafila mâyi” mu Dijiba dia Titicaca

Dijiba dia Titicaca mu Mikuna ya Andes ndia kumpala ku ditumbuka bua buloba bujima ditu mazuwa a mâyi endela; didi mulu mutantshi wa metre 3 800 ku mutu kua mbuu. Mâyi a neje itu ku nsongo ya mikuna (imue mikale bule bua metre mapite pa 6 400) ke adi mpokolo wa misulu mivule ya ku 25 idi idiela mu Dijiba dia Titicaca. Mashika atu mu misoko eyi a bungi bualu idi pa mikuna mile, ne bitu bitatshisha bantu batu kabayi bakolele muaba eu bikole.

Kukadi matuku, bamue bampanda-njila badi bamanye tshiena-Quechua ne tshiena-Aymara  bakaya mu bidiila ebi: tshia Amantani ne tshia Taquile, bidi binyungulula kudi Dijiba dia Titicaca. Bakaya kabidi ne filme uvua ne tshiena-bualu tshia se: “Tukonkononayi bimpe bimpe malu adi enzeka mu bitendelelu,” muvuabu baleja patoke mashimi a mu Bukua-buena-Kristo. Bantu bakanyisha filme au bikole. Muntu mukuabu wakakidila bana betu ne kubapeshaye muaba mu nzubu wende bua bobu kusombelamu ne kulongeshilamu bantu Bible.

Bantu 100 bakabuela mu tshisangilu tshia kumpala tshiakenzeka mu Amantani; ne bantu 140 bakabuela mu tshia mu Taquile. Filme au uvua mu tshiena-Quechua. Muntu mulume mukuabu ne mukajende bavua kabayi mu bidiila ebi kumpala bakamba ne: “Dîba diakakumbana bua nuenu Bantemu ba Yehowa kutuvuluka. Tuvua tusambila bua nuenu kulua.”

Pa kumbusha bidiila ebi binene bibidi, mbayishe kabidi lumu luimpe mu bimue bia ku bidiila 40 bitu bimueneka bu bileleme pa Dijiba dia Titicaca. Bidiila bimueneka bu bileleme? Eyowa, mu bidiila ebi mutu bituta bitu bitoloka imue miaba idi mâyi a dijiba edi mikale mîpi. Bituta ebi bitu bitoloka mu mâyi ne bipatuka pamutu pawu. Bua kuenza tshidiila, bantu ba muaba eu batu batshibula bituta ebi kadi kabayi babitula to, ne babituangaja pamue bua kuenza tshintu tshienze bu tshisasa. Pashishe badi bela bitotshi pa tshisasa etshi ne batshikolesha ne bituta bikuabu bidibu bakosa. Bantu batu basombele mu mitanda mienza ne bituta miashila pamutu pa tshibumba etshi.

Bantemu ba Yehowa bakapeta buatu bua kuya nabu bua kuyisha bantu mu bidiila bia Dijiba dia Titicaca. Buatu ebu budi mua kuambula bantu 16. Kunyima kua Bantemu aba bamane kuimanyika buatu ku tshitudilu tshia muaba eu, badi babanda pa tshibumba tshia buloba etshi, baya ku mutanda ne ku mutanda. Badi bamba ne: pa tshibidilu batu bumvua buloba bua tshibumba etshi bu budi bubuyika padibu bendelapu. Eu ki mmuaba wa bantu batu batshina mâyi to!

Bantu batu bakula tshiena-Aymara batu basombele mu misoko mishilangane idi ku mielelu ya mâyi ne mu tutupa tua maloba tudi tulunguluke too ne munkatshi mua dijiba edi. Batu bayamu bipepele lua mâyi kupita lua panshi. Badi batshinka ne: bantu bonso badi basombele mu tshitupa etshi tshitu matu aa aya bua kumanyisha mukenji wa Bukalenge mbatue ku 400 000. Matu aa neikale mua kuenza mudimu wa bungi mu amue matuku adi alua kumpala eku.

Badi bajikija nyota ya mu nyuma

Flavio uvua musombele mu musoko wa Santa Lucía, pabuipi ne Juliaca, mu Mikuna ya Andes. Bavua bamulongeshe dilongesha dia inferno mu Ekeleziya wa Evanjelike muvuaye. Wakenza bidimu bia bungi muikale anu ne buôwa bua dinyoka dia kapia ka tshiendelele. Uvua pa tshibidilu udikonka bua tshinyi Nzambi wa dinanga uvua mua kuikala ukengesha bantu mu kapia bua kashidi mushindu’eu. Pavua Tito (muyishi wa ku dîba ne ku dîba wa Bantemu ba Yehowa) muye mu musoko au, wakayikila ne Flavio.

Lumue lua ku nkonko ya ntuadijilu yakela Flavio luvua lua se: “Tshitendelelu tshienu tshidi tshilongesha ne: batu bakengesha bantu mu inferno anyi?” Tito wakandamuna ne: dilongesha edi ndibi menemene ku mêsu kua Mufuki ne didi dipendesha dîna diende dia Yehowa, Nzambi wa dinanga. Tito wakangata Bible wa Flavio ne kumulejaye ne: bafue kabena bamanye bualu nansha bumue ne mbindile bua kubika ku lufu pa buloba mu Bukalenge bua Nzambi. (Muambi 9:5; Yone 5:28, 29) Malu aa akabulula Flavio mêsu. Wakitaba diakamue bua kulonga Bible ne pashishe kutambulaye.

Musoko wa bena dianyisha

Elabi meji mudibi bisankisha bua kutuadila bena ku misoko Mikanda ya Nzambi itubu kabayi banji kumona anyi bua kuyisha mu misoko muvua bantu kabayi banji kumvua bakula bua Bantemu ba Yehowa anyi bua lumu luimpe ludibu bayisha. Ke tshivua bana betu ba bakaji basatu bampanda-njila (Rosa, Alicia ne Cecilia) benze; bakayisha mu musoko wa Izcuchaca ne wa Conayca, idi kulu ku mukuna mutantshi wa metre 3 600 munkatshi mua Pérou.

Pakafikabu mu musoko wa kumpala, kabavua  ne muaba wa kusombela to. Bakayikila ne komanda wa bampulushi wa mu musoko au, kumulejabu kendela kabu. Tshiakenzeka ntshinyi? Wakabanyishila bua kulala butuku abu ku biro bia bampulushi. Pakatshiabu, bampanda-njila aba bakapeta miaba ya kusombela ivuabu benzela midimu yabu.

Abidi mmale asatu mmipi, dituku dia Tshivulukilu tshia Lufu lua Kristo kufikadi. Bampanda-njila aba bavua bayishe ku mpangu yonso ya mu musoko wa Izcuchaca, bavua babanyine bantu Bible ya bungi, ne batuadije kulonga Bible ne bantu ba bungi. Kumpala kua Tshivulukilu, bakatumina bantu tubeji tua dibabikila natu mu tshibilu etshi, bumvuijamu kipatshila ka musekelelu eu ne diumvuija dia diampa ne mvinyo. Bavua babikile bana betu tshisumbu bua kuambuluishabu mu tshibilu etshi, ne umue wa kudibu wakenza muyuki. Ndisanka kayipu bua kumona bantu 50 ba mu musoko mukese au balue mu tshibilu etshi tshia pa buatshi! Bantu aba bakapeta diumvuija dia Didia dia Mukalenge bua musangu wabu wa kumpala. Kabidi, bakasanka bikole bua muvuabu bapete Bible!

Dipikudibua ku majitu manene

Kutuadila bantu badi ku bupika bua bitendelelu bia dishima mâyi a bulelela bua mu Bible kutu misangu yonso kusankisha. Pisac mmuaba uvua ampire wa kale wa ba-Inca muele miji bikole. Bantu ba bungi badi basombelamu lelu batu babalongeshe dilongesha dia inferno ditu kadiyi nansha dia mu Bible. Bansaserdose babu batu babambila ne: anu bobu babasambidile ke kushishabu kuya mu diulu.

Bushuwa, bantu ba buena aba badi ne nyota ya mâyi a bulelela bua mu Bible. Pavua Santiago (muyishi wa ku dîba ne ku dîba wa Bantemu ba Yehowa) uyisha ku nzubu ne ku nzubu, wakumvuija muntu mukuabu ne: bantu bakane nebapete muoyo pa buloba bukudimuna mparadizu. (Musambu 37:11) Santiago wakamubadila mu Bible ne: bafue nebabike, ne nebalongeshe bantu njila mipuangane ya Yehowa bua kushalabu ne muoyo wa tshiendelele. (Yeshaya 11:9) Too ne dîba divuabu bayikila adi, muntu au uvua muena Katolike wa dilambu, uvua muditue mu malu a nyuma mibi, ne uvua ne tshilele tshia kukuatshika maluvu bikole. Mpindieu Bible wakamupetesha ditekemena dia kusomba mu Mparadizu. Wakosha bintu biende bionso bia malu a nyuma mibi ne kulekelaye dikuatshika maluvu. Wakasangisha dîku diende pamue ne kubangabu kulonga Bible. Panyima pa matuku bena mu dîku diende bonso bakadilambula kudi Yehowa ne kutambulabu.

Badi bakidila benyi bimpe

Bantu batu basombele pa mikuna batu bakidila benyi bimpe be. Nansha mudi nzubu yabu mikale mikese ne bantu bikale bapele, batu bambuluisha benyi ne bintu bidibu nabi. Kumpala kua kumanya mikenji miakane ya mu Bible, muena kumbelu uvua mua kuakidila muenyi ne mabeji a coca bua ikale wenda uatshiankunya padibu benda bayikila. Kadi padiye ulua Ntemu, udi mua kupesha muenyi nsukadi mu nkutu tente, udi muikale ne mushinga wa muomumue ne mabeji a coca mu miaba eyi ya kule. Muanetu kampanda wakambila misionere mukuabu bua aye kumufila bua kumona muntu uvuaye muyishe. Kunyima kua bamane kubanda mukuna kampanda mule ne lutatu luonso, bakakuma tshikashi pakafikabu ku mushiku wa nzubu wa muntu au. Muntu au wakabambila bua kubuela mu nzubu uvua muikale wa nsona; bua kubuelamu bavua ne bua kuinama bualu tshiibi tshivua tshîpi. Bakasambuka bimpe muaba uvua pankatshi pa nzubu uvua buloba bumueneke, uvua mamu mumbule tshina, muelamu mbulankete, ne muladikemu muanende wa mu diboko. Nansha muvua muana eu kayi ne mushindu wa kupatukamu, uvua unaya wenza mutoyi pavua bantu bakole bayikila. Kunyima kua bamane kuyikila bikole bua mabenesha afila Bukalenge, muntu mukaji muena kumbelu wakapatula tshisangala tshinene tshia maluvu atubu banua mu musoko au. Mpindieu bana betu kupuekabu mukuna au bua kuyikila ne bantu bakuabu.

Bia kunowa bia bungi

Mpindieu kudi tusumbu tuditole pale pale tutue ku lukama tuikale ne bantu bapite pa tshinunu badi balonga Bible ne Bantemu ba Yehowa muaba eu. Batu batumamu bana betu badi bajikija mu Kalasa ka Dilongesha Mudimu mu tshimenga tshia Lima bua kuambuluisha tusumbu etu tulue bisumbu binene. Bantu badi banange malu makane bavua ku bupika bua bitendelelu bia dishima ne mayisha a mafi munkatshi mua matuku a bungi mbapete budikadidi ku diambuluisha dia lumu luimpe lua Bukalenge! (Yone 8:32) Nyota yabu ya mâyi a bulelela idi yenda italala.

[Tshimfuanyi mu dibeji 10]

Badi bayisha mu bidiila bia mu Dijiba dia Titicaca bitu bimueneka bu bileleme