“Ndekelu wa bionso ngamanyi tshivua tshintatshisha!”

MÊYI aa ke akamba muntu kampanda wa mu tshimenga tshia Tokyo pakabalaye malu a mu nsombelu wa muanetu mukuabu mu Tshibumba tshia Nsentedi tshia dia 1 Tshisua-munene 2000. Tshiena-bualu atshi tshivua tshiamba ne: “Kanuena bamanye muikala muoyo wenu makelela,” ne tshivua tshilonda bualu bua muanetu mukuabu wa balume uvua misionere udi usama disama dia mpala didi baminganga babikila mu Mfualansa ne: psychose maniaco-dépressive.

Muntu wa mu Tokyo eu wakamba mu mukanda uvuaye mutumine bafundi ba tshibejibeji etshi ne: “Bimanyinu bia bubedi ebu ke bimvua ngumvua menemene. Ke meme kuya mu lupitadi lua bena masama a mpala ne kungambilabu ne: ndi ne disama dia mpala edi. Munganga wakanteta wakakema bikole. Wakangambila ne: ‘Bantu batu ne disama edi kabatu batamba kumanya ne: badi basama to.’ Biakangambuluisha bua kumanya ne: ndi ne disama edi kumpala kua diodi kukola.”

Dibala dia tshibejibeji tshia Tshibumba tshia Nsentedi ne tshia Réveillez-vous! ndiambuluishe bantu miliyo mivule pa buloba bujima mu malu kabukabu. Batu bamona biena-bualu bidimu bikale bibamanyisha malu mapiamapia ne bibasankisha bikole. Mpindieu tshibejibeji tshia Tshibumba tshia Nsentedi tshidi tshipatuka mu miakulu 141, ne tshia Réveillez-vous! tshiotshi tshidi tshipatuka mu miakulu 86. Wewe pebe neumone dibala dia Tshibumba tshia Nsentedi ne Réveillez-vous! pa tshibidilu dikusankisha.