Nkonko ya babadi

Mitshi ya kuambuila mushete wa tshipungidi ivua milonga mushindu kayi, bualu 1 Bakelenge 8:8 udi wamba ne: ivua imueneka patoke mu tshibambalu tshia Munsantu?

Pakaleja Yehowa Mose mushindu wa kuenza tabernakle mu tshipela, tshintu tshinene tshimue tshia ku bintu bivuamu tshivua mushete wa tshipungidi. Mushete eu uvua mulaba or pambidi pawu, ne munda muawu muvua bimue bintu, tshilejilu bu mudi mabue avua mafunda Mikenji. Uvua mu tshibambalu tshia munda menemene, tshivuabu babikila ne: Mutambe Bunsantu. Pa tshibuikidiji pawu pavua bakeluba babidi benza ne or, bikale ne mapuapua abu mabalula. Ku nseke yawu kuvua bikanu bienza bua kumona mua kuwambula bimpe ne milangala ibidi mienza ne mitshi ya misasa (akasia) milaba or. Nenku mitshi ibidi eyi bavua bayibueja mu bikanu bionso bia mushete, umue eku umue eku. Mushete uvua mu Mutambe Bunsantu (uvua lua ku Est), mitshi ivua mitangile yoyi lua ku Nord-Est. Ke muvuabi kabidi tshikondo tshivua mushete wa tshipungidi mu ntempelo uvua Solomo muibakishe.​—Ekesode 25:10-22; 37:4-9; 40:17-21. *

Kuvua tshilamba anyi rido uvua utapulula tshibambalu tshia Mutambe Bunsantu ne tshia Munsantu (tshivua tshiotshi lua ku mpenga). Pavua muakuidi ubuela mu Munsantu kavua mua kumona mu Mutambe Bunsantu ne nunku kumona Mushete wa tshipungidi (uvua muaba uvua Nzambi uyikidila). (Ebelu 9:1-7) Ke bua tshinyi bidi bienza bu bidi bikemesha bua padi 1 Bakelenge 8:8 wamba ne: ‘Mitshi eyi yakatamba bule, nunku bakamanya mua kuyitangila mu muaba wa tshijila [anyi Munsantu]; kadi kabakamanya mua kuyitangila pa bule.’ 2 Kulondolola 5:9 udi wamba tshintu tshia mushindu umue. Kadi bantu bavua mu tshibambalu tshia Munsantu tshia ntempelo bavua bamona pabu mitshi eyi munyi?

Bamue badi bela meji ne: mitshi eyi ivua imueneka bualu ivua itua ku rido. Kadi kabivua mua kuikala nanku to bu rido mua kuikala ku luseke lumue lua mitshi. (Nomba 3:38) Kudi diumvuija dikuabu didi dimueneka dimpe. Mitshi eyi ivua mua kuikala imueneka bu kuoku kuikale mpunga pankatshi pa rido ne tshimanu tshia ntempelo peshi ivua mua kumueneka dîba divua muakuidi munene ubuela mu Mutambe Bunsantu. Rido eu uvua ujika Mushete mujima kadi uvua mua kuikala ushiya muaba uvua mitshi mua kumuenekela. Kadi nansha mudi diumvuija edi dimueneka dimpe, katuena mua kuamba kudishindika menemene to.

Kudi malu a bungi atudi ne bua kulonga. Mupostolo Paulo wakakula bua amue a kudiwu mu mukanda uvuaye mutumine bena Ebelu. Wakalua kuamba ne: “Bua bintu ebi kakuena bualu bua kuamba katataka mudi tshintu ne tshintu.” (Ebelu 9:5) Pabika bantu bena lulamatu ku lufu (bu mudi Mose, Alona, Besalele, ne bakuabu bavua benze mudimu mu tabernakle), dîba adi netumanye malu a bungi.​—Ekesode 36:1.

[Mêyi adi kuinshi]