Bakoshi ba mitshi

MU TSHIKONDO tshitshivuabu bafunda Bible, bantu bavua bangata mitshi bu bintu bia mushinga. Tshilejilu, pakasumba Abalahama muaba wa kujika Sala mukajende munanga, bakatela mitshi munkatshi mua bintu bivua mu buloba buakasumbaye abu.​—Genese 23:15-18.

Lelu’eu kabidi, bantu batu bangata mitshi ne mushinga wa bungi, ne batu badienzeja pa buloba bujima bua kukuba metu. Mukanda kampanda udi wamba ne: “Nansha mudi bantu bavule ba mu matunga a mashika makanyine baditatshisha bua metu a mu matunga a luya, pamu’apa ki mbamanye bua se: metu a mu matunga abu ke adi matambe kushala a palepale ne adibu batamba kunyangakaja bikole.” (State of the World 1998) Ntshinyi tshidi tshinyanga metu aa mu matunga a ku Mputu ne a mu Amerike wa ku Nord aa? Bantu ba bungi batu bamba ne: ndikosa dia metu, kadi kudi bintu bikuabu bidi bitamba kujikija mitshi umue ku umue. Mbintu kayi abi? Ndinyanga dia lupepele ne aside utu uloka bu mvula. Bintu ebi bidi mua kunyanga mitshi ku kakese ku kakese, ibuela bîshi ne ikuatshika masama tshianana tshianana.

Kukadi bidimu bia bungi mpindieu, bena malu a dikuba dia buloba ne bintu bidipu, ne bantu bakuabu mbaleje pabu bua se: bidi bikengela kukuba mitshi ne nyama. Mu bidimu bia 1980, kunyima kua bena meji bamane kulonga dinyanguka dia lupepele ne mushindu udi aside udi uloka bu mvula eu binyanga mitshi, bakalua kuamba ne: ‘Bobu kabayi batangile bimpe, patuamba kufika mu tshidimu tshia 2000, bantu nebashale banyishila metu anu mu foto ya kale ne mu filme.’ Diakalenga, bukole bua didiakajilula budi nabu buloba mbuambuluishe bua metu kaanyanguki bikole bu muvuabu bambe amu to.

Kadi Nzambi ke wenza malu a bungi bua kukuba metu munkatshi mua matuku a bungi. ‘Udi unuisha mikuna ne mâyi a mu nzubu yende ya kulu’ ne ‘udi umenesha bisosa bua kudisha nyama, ne mitshi bua kuambuluisha bantu.’ Mmulaye kabidi “bua kubutula badi babutula buloba.” (Musambu 104:13, 14, MMM; Buakabuluibua 11:18) Bulelela, nsombelu neikale mulenga pikala bantu mua kusomba tshiendelele pa buloba kabuyi bunyanguke!​—Musambu 37:9-11.