“Dituku dia budikadidi bua ntendelelu”

BU MUVUA malu avuaye muyikile ne Bantemu ba Yehowa mamusankishe bikole, muntu mukaji mukuabu mulombodi wa tshimue tshilongelu tshia mu ditunga dia Pologne wakalongoluela tshilongelu tshiende “Dituku dia Budikadidi bua ntendelelu.” Wakambila balongi (munkatshi muabu muvua bena Katolike, bena Bouddha ne Bantemu ba Yehowa) bavua basue bua kulongololabu miyuki mîpi bua kumanyisha balongi bakuabu malongesha ne bilele biabu. Bansonga basatu Bantemu ba Yehowa bakitaba diakamue bualu ebu.

Pakakumbana dituku adi, wa kumpala wakakula uvua Malwina, nsongakaji wa bidimu 15. Wakamba mu tshikoso ne: “Ba bungi ba kunudi bakavua batumanye kumpala kua tuetu kubanga kulonga mu tshilongelu etshi, bualu tukadi balue kunuyisha ku nzubu yenu. Bumue nudi nudikonka bua kumanya tshitudi tutungunukila ne kuenza nanku. Mbualu tudi tulonda tshilejilu tshia Yezu Kristo, Mubangishi wa Buena-Kristo. Wakayisha lumu luimpe lua Bukalenge bua Nzambi muaba wonso uvuaye upeta bantu. Bapostolo ne bena Kristo bakuabu ba kumpala bakenza pabu mudimu eu. Miaba ya bungi lelu Bantemu ba Yehowa badi batantamena mateta makole, kadi tudi ne disanka bua mutudi tuetu ne ditalala mu tshilongelu tshietu etshi, disanka dinudi nuenu bonso benze bua dikaleku. Tudi tunuela tuasakidila bua bualu ebu!”

Ku ndekelu kua muyuki wende, Malwina wakamba ne: “Kudi bualu bukuabu bututu tuluila ku nzubu yenu. Tudi tunujingila diakalenga. Bible udi wamba ne: mu katupa kîpi emu bantu nebamone mianda minene ya tshikuma pa buloba apa. Nenku patualua ku nzubu kuenu musangu udi ulonda, suayi nuitabe bua kututeleja. Tudi tujinga bua kunumanyisha mushindu utudi mua kusomba pamue, bikale ne muoyo wa kashidi mu buloba bukudimuna mparadizu.”

Muntu muibidi wakakula uvua Mateusz, uvua pende ne bidimu 15. Mateusz wakambila bateleji bende ne: munkatshi mua bidimu bia bungi Bantemu ba Yehowa mbatangalaje lumu luimpe mu mishindu kabukabu. Tshilejilu mu 1914, mu tshikondo tshia filme ivuabu baleja bimfuanyi patupu kabiyi ne mêyi, Bantemu bavua baleja bantu “Foto-Drama wa bufuki,” uvua filme wa bimfuanyi binyunga uvuabu baleja pamue ne mêyi makuata ku tshisanji.

 Mateusz wakaleja mushindu uvua kadiomba (tshisanji) kambuluishe bua kutangalaja mukenji wa Bukalenge, ne pashishe wakumvuija bua programe wa ordinatere wa MEPS utu Bantemu ba Yehowa bapatule bua kukudimuna mikanda mu miakulu mishilangane. Wakabalondela kabidi mudi Bantemu ba Yehowa baleje baminganga mishindu ya kuondapa bantu kakuyi dibela dia mashi. Wakamba ne: “Mpindieu, baminganga bapiluke ba mu Pologne badi banyisha dipangadika dietu pa tshilumbu etshi ne badi baleja ne: tshidimu tshionso badi bapanda babedi bapite bungi badi kabayi Bantemu kabayi babela mashi to.”

Bua kujikija, Mateusz wakakula bua diasa dia Nzubu ya Bukalenge ne kuambaye ne: “Nudi basue kulua ku Nzubu yetu ya Bukalenge anyi? Batu babuelamu tshianana, kabatu bendesha dilongo bua kusangisha makuta nansha.” Mateusz wakakula bua muaba wa dienzela mpungilu mu tshimenga tshia Sosnowiec, wamba ne: “Nenumone nzubu eu munene ne mulenga. Bua tshinyi katuena mua kuyaku nenu pamue? Tudi ne bualu bukuabu bua kunuambila, mulunda wetu wa bakaji Katarzyna neanuambilebu.”

Pashishe, Katarzyna (uvua pende ne bidimu 15) wakamba ne musangelu ne: “Tudi tunujingila difika dilenga mu mpungilu wa distrike wa Bantemu ba Yehowa mu tshimenga tshia Sosnowiec. Nemuikale miyuki idi itangila bansonga.” Katarzyna wakakula kabidi bua musekelelu munene wa bena Kristo: Tshivulukilu tshia lufu lua Yezu Kristo. Wakakankamija bantu ne mêyi aa: “Tshidimu tshishale bantu bapite pa miliyo 14 pa buloba bujima bavua babuele mu tshibilu etshi. Bua tshinyi kanuena mua kubuelamu netu musangu udi ulonda?”

Kunyima kua miyuki yabu eyi, Malwina, Mateusz ne Katarzyna bakapesha balongeshi mukanda wa Les Témoins de Jéhovah: Prédicateurs du Royaume de Dieu ne bande ibidi ya video idi yumvuija malongesha ne midimu ya Bantemu ba Yehowa. * Balongeshi bakayitaba ne dianyisha ne kulayabu bua kulongeshabu nayi mu dilongesha dia Malu a kale (Istware).

Kunyima kua miyuki eyi, Martyna muana wa bakaji wa bidimu 12 wakimbila bonso bavua balue musambu uvua ne tshiena-bualu tshia se: “Tudi tukuanyisha, Yehowa.” Bansonga Bantemu aba ‘[Nzambi] wakabapa dikima’ bua kuyishabu bimpe. (1 Tesalonike 2:2, MML) Ntshilejilu kayipu tshilenga bua bansonga Bantemu ba Yehowa ba miaba yonso!

[Mêyi adi kuinshi]

[Tshimfuanyi mu dibeji 26]

Katarzyna udi ukeba mvese ya kubala mu muyuki wende

[Tshimfuanyi mu dibeji 26]

Malwina udi ulongolola muyuki matuku makese kumpaka kua kuwenza mu kalasa