Nkonko ya babadi

Yehowa wakadia tshipungidi ne Abalahama mu Ula anyi mu Halana?

Mu Genese 12:1-3 mudi muyuki wa kumpala wa tshipungidi tshivua Yehowa mudie ne Abalahama. Mvese eu udi wamba ne: ‘Yehowa wakambila Abalama ne: Umuka mu musoko webe ne kudi bana benu ne ku nzubu wa tatuebe; ya biebe mu muaba undualua kukuleja. Nenkuvuije tshisamba tshinene. Bisamba bionso bia pa buloba nebisanke bua bualu buebe.’ * Pamu’apa Yehowa uvua mua kuikala mudie tshipungidi etshi ne Abalahama patshivuaye mu Ula, kuluaye kumujadikilatshi mu Halana.

Mu bidimu lukama bia kumpala, Stefano wakakula bua muvua Yehowa muambile Abalahama bua kuyaye mu Kanâna. Wakambila bena ku kabadi ka Sanedren ne: ‘Nzambi wa butumbi wakamueneka kudi tatu wetu Abalahama, pakadiye mu Mesopotamia, diambedi yeye kai muanji kushikama mu Halana, wakamuambila ne: Umuke mu buloba buebe ne munkatshi mua bena kuenu, ulue mu buloba bundualua kukuleja.’ (Bienzedi 7:2, 3, tuetu mbadi baladike maleta.) Stefano udi uleja apa ne: Abalahama uvua mufumine mu Ula, muakamuambilabu bua musangu wa kumpala bua kuya mu Kanâna. (Genese 15:7; Nehemiya 9:7) Nansha muvua Stefano kayi muakule bua tshipungidi tshivua Nzambi mudie ne Abalahama, mu Genese 12:1-3 mbakule bua malu onso abidi: tshipungidi etshi ne dîyi diakamutuminabu bua kuya mu Kanâna. Nanku mbiakanyine bua kuitaba ne: Yehowa wakadia tshipungidi ne Abalahama mu Ula.

Kadi patudi tubala muyuki wa mu mukanda wa Genese ne ntema, tudi tumona ne: Yehowa wakambuluila Abalahama tshipungidi etshi mu Halana, kutshiambululaye ne kumvuijaye bimpe amue malu atshi mu Kanâna. (Genese 15:5; 17:1-5; 18:18; 22:16-18) Bilondeshile Genese 11:31, 32, Tela tatuende wa Abalahama wakumbuka mu Ula ne Abalahama ne Sala ne Lota batangile mu Kanâna. Bakaya mu Halana ne kushalabu muomu too ne pakafua Tela. Abalahama wakashala mu Halana matuku mavule bua kupetaye bubanji bua bungi. (Genese 12:5) Ne mu tshikondo kampanda, Nahô muanabu ne Abalahama wakayamu pende.

Bible udi uleja mêyi akambila Yehowa Abalahama panyima pa lufu lua Tela, wamba kabidi ne: “Nunku Abalama wakaya bu muakamba Yehowa.” (Genese 12:4) Ke bualu kayi Genese 11:31–12:4 udi utamba kusua kuleja bu se: Yehowa wakamba mêyi adi mu Genese 12:1-3 kunyima kua lufu lua Tela. Bikalabi nanku, Abalahama wakumuka mu Halana ne kuyaye mu ditunga divua Yehowa mumuambile bilondeshile dîyi divuaye ufuma ku diumvua ne dikavuaye mumvue mu Ula bidimu bia bungi bimane kupita.

Bilondeshile Genese 12:1, Yehowa wakambila Abalahama ne: ‘Umuka mu musoko webe ne kudi bana benu ne ku nzubu wa tatuebe.’ Tshikondo kampanda “musoko” wa ba Abalahama uvua Ula, ne ‘nzubu’ wa tatuende uvua mu musoko au. Kadi, tatuende wa Abalahama wakamuangala ne ba mu nzubu muende kuyabu mu Halana, ne Abalahama wakalua kubikila muaba eu ne: nkuabu. Panyima pa mumane kuenza bidimu bia bungi mu Kanâna, wakatuma musadidi wende bua kupetela Isaka mukaji ‘kuabu, kudi bana babu’, yeye kuya “mu musoko wa Nahô” (uvua mua kuikala Halana anyi muaba mukuabu wa pabuipi apu). (Genese 24:4, 10) Musadidi eu wakapeta Lebeka wa munkatshi mua bana babu ne Abalahama, mu dîku dia Nahô (divua dinene).​—Genese 22:20-24; 24:15, 24, 29; 27:42, 43.

Stefano wakakula kabidi bua Abalahama kumpala kua kabadi ka Sanhedren ne: ‘Pakafua tatu wende, Nzambi wakamumushaku, wakamuteka mu buloba ebu bunudi bashikamemu katataka.’ (Bienzedi 7:4) Ebi bidi bileja ne: Yehowa wakayikila ne Abalahama pavuaye mu Halana. Anu mudi Genese 12:1-3 uleja, tudi tuitaba kabidi ne: tshikondo atshi Yehowa wakambulula tshipungidi tshivuaye mudie ne Abalahama bualu tshipungidi etshi tshiakatuadija kukumbana pakaya Abalahama mu Kanâna. Nunku patudi tutangila malu onso bimpe, tudi tumona ne: Yehowa uvua mua kuikala muenze tshipungidi ne Abalahama mu Ula ne mumujadikiletshi mu Halana.

[Mêyi adi kuinshi]