“Netumonangane mu Bukalenge bua Nzambi”

“Mulunda wanyi munanga Rupert, bankosedi tshibawu tshia lufu lelu. Kudidi to. Ndi nnuela muoyo wewe ne bonso ba mu nzubu muebe. Netumonangane mu Bukalenge bua Nzambi.”

MU DIA matuku 8 a ngondo muisambombo tshidimu tshia 1942, Franc Drozg wakafunda mêyi aa katupa kîpi kumpala kua kumuasabu tshingoma kudi basalayi ba bena Nazi. Bakamushipa bua tshinyi?

Bilondeshile mikanda idi mu tshilaminu tshia bintu bia kale (Musée de Libération Nationale) tshia mu tshimenga tshia Maribor mu ditunga dia Slovénie, nsenda wa biamu eu wa bidimu 38 wakabenga bua kubuela mu tshisumbu tshia basalayi (tshia Wehrmannschaft) tshia bena Allemagne tshivua tshikuate ditunga dia Slovénie. Uvua Bibelforscher anyi Mulongi wa Bible (ke muvuabu babikila Bantemu ba Yehowa ba muaba au). Bu muvuaye ujinga kutumikila Yeshaya 2:4, kavua mua kuambuluisha bena Nazi mu mvita nansha kakese ne wakaleja ne: uvua yeye muena Bukalenge bua Nzambi.​—Matayo 6:33.

Franc uvua mumanyike bimpe mu tshimenga tshiabu (Ptuj) bu mumanyishi wa tshisumi wa lumu luimpe lua Bukalenge bua Nzambi. (Matayo 24:14) Nansha muvuaye ne ntatu ya bungi, wakayisha lumu luimpe kayi ulekela too ne pakamukuatabu mu ngondo muitanu wa tshidimu tshia 1942.

Bena Nazi bakakengesha Bantemu ba Yehowa ba bungi ba mu ditunga dia Slovénie bikole. Franc uvua Ntemu wa kumpala wa kudibu wakashipabu bua ditabuja divuaye nadi. Anu bu bena Kristo ba mu bidimu lukama bia kumpala, mêyi a ne: ‘Bua tuetu kubuela mu Bukalenge bua Nzambi, anu patuapitshila mu makenga a bungi’ akakolesha Franc ku muoyo bikole. (Bienzedi 14:22) Ditabuja divuaye nadi dia se: mbulamatadi wa mu diulu udiku bulelela diakamuenekela mu mêyi ende a ndekelu aa: “Netumonangane mu Bukalenge bua Nzambi.”

[Mêyi a dianyisha bua bimfuanyi mu dibeji 32]

Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia