Nkonko ya babadi

Nyoka wakenza mushindu kayi mu budimi bua Edene bua kufikisha Eva ku dishipa mukenji uvua utangila mutshi wa dimanya dia malu mimpe ne malu mabi?

Genese 3:1 udi wamba ne: ‘Nyoka wakatamba nyama yonso yakafuka Yehowa Nzambi budimu. Nyoka wakakonka mukaji ne: Nzambi wakamba ne: kanudi mamuma a mitshi yonso idi mu budimi anyi?’ Bantu batu bamba malu a mishindu ne mishindu bua kumvuija muvua nyoka mua kuikala muyikile ne Eva. Bamue badi bamba ne: wakamuakuisha ne jeste anyi diyungisha dia mubidi. Tshilejilu, Joseph Benson, munene wa ekeleziya wa mu ditunga dia Angleterre wakamba ne: “Bidi bitamba kumueneka ne: wakakula nende mu jeste kampanda. Bushuwa, bamue badi bela meji ne: nyoka ivua ne tshipedi tshia diela meji ne ivua mimanye mua kuakula, . . . kadi kakuena tshijadiki tshia bualu ebu nansha tshimue.”

Kadi mmunyi muvua nyoka, anu ne dinyungisha mubidi nkayadi mua kuakula ne Eva ne kumupesha meji a se: uvua mua kulua bu Nzambi ne kutuadija kudisunguila tshivua tshimpe ne tshivua tshibi bu yeye mua kudia tshimuma tshivua tshikandika? Tumanye kabidi ne: Eva wakakula ne nyoka, wakandamuna lukonko luvuaye mumuele. (Genese 3:2-5) Tuetu bambe ne: nyoka wakakula ne Eva anu ne dinyungisha kampanda dia mubidi wende nkayadi, bumue bidi mua kuleja kabidi ne: Eva pende wakamuandamuna ne jeste, eku Bible wamba ne: Eva wakakula.

Mupostolo Paulo wakadimuija bena Kristo nende ne bualu ebu ne: ‘Kadi ndi ntshina ne: bu muakadi nyoka udinga Eva ne budimu buende, bumue meji enu neapambuishibue.’ Njiwu yakatela Paulo ivua iluila kudi ‘bapostolo badingi, bena mudimu ba mashimi.’ Njiwu ya kudi bantu aba bavua badimona bu ‘bapostolo badi batambe bonso bunene’ kayivua ya dinyungisha dia mubidi nansha. Njiwu ayi ivua mu bivuabu bamba, mmumue ne: mêyi a budimu avuabu bamba bua kupambuisha bantu.​—2 Kolinto 11:3-5, 13.

Nansha muvuabu bapambuishe Eva ne mêyi mu budimi bua Edene, katuena mua kuamba ne: nyoka wetu wa bushuwa eu uvua ne mujilu utu dîyi dipatukila padi muntu wakula to. Kavua nansha nawu dijinga to. Pakakula Balâma ne muanjelu wa Nzambi mukana mua mpunda mukaji, nyama eu kavua ne bintu bishilashilangane mu dibodi bidi biambuluisha bua kupatula dîyi bu dia muntu to. (Nomba 22:26-31) Bidi bimueneka patoke ne: ‘Mpunda wakadi kamama wakakula mukana bu muntu’ au wakakula nanku ne diambuluisha dia bukole buvua bufumina muaba wa mu nyuma.​—2 Petelo 2:16.

Bible udi ubikila tshifukibua tshia mu nyuma tshiakasaka nyoka bua kuakula ne Eva ne: ‘nyoka wa kale, yeye udi muidikibue ne: Diabolo ne Satana.’ (Buakabuluibua 12:9) Mêyi akateleja Eva bimpe ne kuandamunaye ne mêyi umvuika bimpe avua a Satana, utu mene ‘udiandamuna bu muanjelu wa munya.’​—2 Kolinto 11:14.

[Tshimfuanyi mu dibeji 27]

“Nenuikale bu Nzambi, nenumanye malu mimpe ne malu mabi”