Yehowa udi tshisokomenu tshietu

“Bualu bua wewe [wakuamba ne: Yehowa udi tshisokomenu] tshianyi, nunku bualu bubi kabuena bukukuata.”​—MUSAMBU 91:9, 10.

1. Bua tshinyi tudi mua kuamba ne: Yehowa ntshisokomenu tshietu?

 YEHOWA udi tshisokomenu tshilelela bua bantu bende. Bituikala badifile kudiye ne muoyo mujima, badi mua ‘kutufimpakaja nseke yonso, kadi kabayi batuboza to; tudi mua kupanga tshia kutekemena, kadi katuena tujimija ditekemena; badi mua kutukengesha, kadi kabena batulekelela to; badi mua kutufina panshi, kadi kabena batubutula to.’ Bua tshinyi? Bualu Yehowa udi utupesha ‘bukole bupite.’ (2 Kolinto 4:7-9, MMM) Bulelela, Tatu wetu wa mu diulu udi utuambuluisha bua tuikale ne nsombelu mulenga, nanku ke bualu kayi tudi ne bua kutumikila mêyi a mufundi wa Misambu a se: ‘Bualu bua wewe [wakuamba ne: Yehowa udi tshisokomenu] tshianyi, ne wakuvuija Nzambi Mutambe Bunene wa mulu muaba webe wa kushikamamu, nunku bualu bubi kabuena bukukuata.’​—Musambu 91:9, 10.

2. Ntshinyi tshitudi mua kuamba bua Musambu wa 91, ne ntshinyi tshidiwu ulaya?

² Mose ke uvua mua kuikala mufunde mêyi a mu Musambu wa 91 eu. Mutu wa mukanda udi umutela yeye bu mufundi wa Musambu wa 90, ne Musambu wa 91 udi uulonda kakuyi manga mêyi  adi aleja dîna dia mufundi mukuabu to. Pamu’apa Musambu wa 91 bavua bawimba bapunguluja; mmumue ne: muntu umue uvua mua kuikala mutume (91:1, 2), ne bakuabu tshisumbu bapunguluja (91:3-8). Pamu’apa dîyi dimue kuluadi kuimba (91:9a) ne bakuabu tshisumbu balue kuandamuna (91:9b-13). Pashishe muntu umue uvua mua kuikala muimbe mêyi a ndekelu (91:14-16). Nansha bikalabu bavua bimbe Musambu wa 91 mushindu kayi, udi ulaya bena Kristo bela manyi mu tshibungi bua kubakuba mu nyuma ne udi ujadikila kabidi balunda babu bonso badi badilambule kudi Nzambi bualu bua muomumue ebu. * Nunku tuetu bonso basadidi ba Yehowa tukonkononayi musambu eu.

Badi batukuba mu “tshisokomenu tshia Nzambi”

3. (a) “Tshisokomenu tshia Nzambi Mutambe Bunene” ntshinyi? (b) Ntshinyi tshitudi tupeta patudi ‘bashikame mu mundidimbi wa Nzambi Wa-Bukole-Buonso’?

³ Mufundi wa Misambu udi wimba ne: ‘Udi mushikame mu tshisokomenu tshia Nzambi Mutambe Bunene wa mulu neikale mu mundidimbi wa Nzambi wa Bukole buonso. Nengambe bua Yehowa ne: Yeye udi [tshisokomenu] tshianyi ne [lumbu luanyi] ne Nzambi wanyi undi ngeyemena.’ (Musambu 91:1, 2) “Tshisokomenu tshia Nzambi Mutambe Bunene” mmuaba wa mu tshimfuanyi udiye utukuba, nangananga bua bela manyi, bualu bobu ke badi Diabolo mutambe kuasa mutu. (Buakabuluibua 12:15-17) Uvua mua kutubutula tuetu bonso bu kabiyi bua ditukuba dia Nzambi bualu tudi bantu badi basombe nende bu benyi bende ba mu nyuma. Patudi ‘bashikame mu mundidimbi wa Nzambi Wa-Bukole-Buonso,’ tudi mu dileji anyi mu mundidimbi wa Nzambi. (Musambu 15:1, 2; 121:5) Kakuena tshisokomenu tshimpe menemene anyi lumbu ludi lutshingisha baluishi kupita Yehowa Mukalenge wetu Munene wa diulu ne buloba nansha.​—Nsumuinu 18:10.

4. Satana “tshilembi tshia nyunyu” udi uteyangana ne binganyi, ne mmunyi mutudi tupandukamu?

⁴ Mufundi wa Misambu udi wamba kabidi ne: ‘Bualu bua [Yehowa] neakupandishe ku buteyi bua tshilembi tshia nyunyu, neakusungile ku tshipupu tshidi tshivuija [makenga].’ (Musambu 91:3) Mu Isalele wa kale tshilembi tshia nyunyi uvua utamba kukuata nyunyi ne mateyi anyi budimbu. Munkatshi mua mateyi a “tshilembi tshia nyunyu” eu udi muikale Satana mudi bulongolodi buende bubi ne “mayele” ende. (Diumvuija kuinshi kua dibeji bua Efeso 6:11, NW) Utu ututeya ne mateyi masokome mu njila utudi tuendela, bionso ebi bua kutufikisha ku dienza malu mabi ne kutukebela kabutu ka mu nyuma. (Musambu 142:3) Kadi bu mutudi balekele malu mabi, ‘mioyo yetu idi ipanduka bu mudi nyunyi upanduka mu buteyi.’ (Musambu 124:7, 8) Tudi ne dianyisha dia bungi bua mudi Yehowa utupikula mu bianza bia “tshilembi tshia nyunyu” mubi eu.​—Matayo 6:13.

5, 6. ‘Ntshipupu’ kayi tshidi tshivuije “makenga,” kadi bua tshinyi bantu ba Yehowa kabena bafuaku?

⁵ Mufundi wa Misambu udi wakula bua ‘tshipupu tshidi tshivuija makenga.’ Anu bu disama dia tshiambu, kudi tshintu kampanda tshidi tshikebela bantu bonso ne nansha aba badi balamate bumfumu bua Yehowa “makenga.” Bua muanda eu mufundi wa miyuki ya kale Arnold Toynbee wakamba ne: “Katshia Mvita Mibidi ya Buloba bujima yajika banangi ba matunga abu mbavudije mbulamatadi midikadile misangu ibidi . . . Lungenyi ludi nalu bantu mpindieu ndua kuenda kutapulukangana bikole.”

⁶ Munkatshi mua nkama mivule ya bidimu, bamue bamfumu batu bakoleshe makokangana adi matapulule matunga. Batu bambile kabidi bantu bua babakukuile buobu anyi bimfuanyi peshi bintu bikuabu. Kadi Yehowa katu muanji kulekela bena lulamatu bende bafua ku ‘tshipupu’ tshia nunku to. (Danyele 3:1, 2, 20-27; 6:7-10, 16-22) Tuetu buonso ne bana betu ba dinanga badi pa buloba bujima tudi balamate amu Yehowa nkayende, ne anu mudi Bible ulomba, katuena tubuelakana mu malu a panu, katuena ne kansungansunga to, kadi tudi bajadike ne: ‘[Nzambi] udi witabuja wa mu tshisamba tshionso udi umutshina, udi wenza malu makane.’ (Bienzedi 10:34, 35; Ekesode 20:4-6; Yone 13:4, 35; 17:16; 1 Petelo 5:8, 9) Nansha mutudi tupeta “makenga” padibu batukengesha bualu tudi bena Kristo, tudi ne disanka ne tudi mu bukubi bua mu nyuma “mu tshisokomenu tshia Nzambi Mutambe Bunene.”

7. Mmunyi mudi Yehowa utukuba ‘ne masala ende’?

⁷ Mêyi adi alonda aa adi atukolesha ku muoyo  bualu adi aleja ne: Yehowa udi tshisokomenu tshietu: ‘Neakubuikile ne masala ende, neusangane [tshisokomenu] muinshi mua mapuapua ende; bujalame buende bua bushuwa budi ngabu [munene ne lumbu].’ (Musambu 91:4) Nzambi udi utukuba anu mutu nyunyi ubuikila bana bende mu masala. (Yeshaya 31:5) ‘Udi utubuikila ne masala ende.’ Misangu mivule “masala” a nyunyi atu aleja mapuapua ende. Nyunyi utu uabuikila bana bende, ubakuba ku nyama ta nyunyi itu idia mikuabu. Anu bu bana ba nyunyi, tudi mu bukubi mu mapuapua a Yehowa a mu tshimfuanyi bualu tudi basokomene mu bulongolodi buende bua bena Kristo balelela.​—Luta 2:12; Musambu 5:1, 11.

8. Mmu mushindu kayi mudi ‘bujalame bua bushuwa’ bua Yehowa buikale ngabu munene ne lumbu?

⁸ Tudi tueyemena ‘bujalame bua bushuwa’ anyi lulamatu. Budi anu bu ngabu uvuabu bavuale mu tshiadi mu tshikondo tshia kale, ne ngabu eu uvua misangu mivule bunene bu bua tshiibi tshia nzubu ne uvua ukumbana bua kujika mubidi mujima wa muntu. (Musambu 5:12) Kueyemena bukubi bua mushindu’eu kudi kutumusha buôwa. (Genese 15:1; Musambu 84:11) Anu bu mudi ditabuja dietu, bujalame bua bushuwa bua Nzambi budi ngabu wa mu tshiadi udi wimanyika mikete ya kapia ya Satana ne uyitshinguluja kua tshianana. (Efeso 6:16) Budi kabidi lumbu anyi tshibumba tshikole tshitudi tuimana panyima patshi bua tuetu kuikala mu bukubi.

‘Katuena tutshina’ to

9. Bua tshinyi butuku butu butshingisha bantu, kadi bua tshinyi tuetu katuena tutshina?

⁹ Mufundi wa Misambu udi wamba bua bukubi bua Nzambi ne: ‘Kuena utshina bualu budi bukuatshisha muntu buôwa butuku, anyi mukete udi upita lubilu mu munya; anyi tshipupu tshidi tshiendakana mu mîdima, anyi dibutuka didi dibutula bantu munda munya.’ (Musambu 91:5, 6) Butuku budi mua kutshingisha bualu malu mabi a bungi batu baenza mu mîdima. Baluishi betu batu misangu mivule banyemena ku malu a dishima mu mîdima ya mu nyuma idi mibuikile buloba mpindieu bua kumona mua kunyanga dinanga dietu dia malu a mu nyuma ne kulekesha mudimu wetu wa diyisha. Kadi ‘katuena tutshina bualu budi bukuatshisha muntu buôwa butuku’ bualu Yehowa udi utukuba.​—Musambu 64:1, 2; 121:4; Yeshaya 60:2.

10. (a) ‘Mukete udi upita lubilu mu munya’ udi mua kuikala uleja tshinyi, ne ntshinyi tshitudi tuenza bua bualu ebu? (b) ‘Tshipupu tshidi tshiendakana mu mîdima’ ntshia mushindu kayi, ne bua tshinyi katuena tutshitshina?

¹⁰ ‘Mukete udi upita lubilu mu munya’ udi mua kuikala uleja bipendu bidibu batupenda. (Musambu 64:3-5; 94:20) Patudi tusuminyina ne kuyisha bantu bulelela, diluisha mudimu wetu wa tshijila patoke mushindu’eu kadiena ne tshididi dituenzela to. Katuena nansha tutshina ‘tshipupu tshidi tshiendakana mu mîdima’ to. Etshi ntshipupu tshia mu tshimfuanyi tshidi tshitangalake mu mîdima ya bena panu badi mene ne bikadilu bibole ne banyanguke mu malu a nzambi, ne kabidi badi ku bukokeshi bua Satana. (1 Yone 5:19) Tshipupu etshi tshidi tshikebesha lufu lua lungenyi ne mutshima, tshishiya bantu mu mîdima pa bidi bitangila Yehowa, majinga ende ne malu malenga adiye mulongolole bua kuenza. (1 Timote 6:4) Kadi tuetu katuena tutshina mîdima eyi to, bualu tudi  ne butoke bua mu nyuma bupite bungi.​—Musambu 43:3.

11. Ntshinyi tshidi tshienzekela bantu badi bapeta ‘dibutuka dia munda munya’?

¹¹ “Dibutuka didi dibutula bantu munda munya” kadiena padi ditutshingisha to. “Munda munya” mudi mua kuikala tshidibu babikila ne: butoke bua panu. Bantu badi bapona mu malu a panu a dizuka bua kupeta bintu badi babutuka mu nyuma. (1 Timote 6:20, 21) Patudi tumanyisha mukenji wa Bukalenge ne dikima, katuena tutshina baluishi betu to, bualu Yehowa ke udi utukuba.​—Musambu 64:1; Nsumuinu 3:25, 26.

12. Bantu binunu ne binunu badi ‘bapona’ ku luseke lua nganyi, ne mmu mushindu kayi udibu bapona?

¹² Mufundi wa Misambu udi utungunuka ne: ‘Bantu tshinunu badi mua kupona ku luseke luebe, ne bantu binunu dikumi badi mua kupona ku luseke lua tshianza tshiebe tshia balume; kadi bualu ebu kabuena bufika pabuipi nebe. Neumone difutu dia bantu babi anu ne mêsu ebe, neutangile mudibu babafuta.’ (Musambu 91:7, 8) Bu mudi bantu ba bungi kabayi bavuije Yehowa tshisokomenu tshiabu, ‘badi bapona’ mu lufu lua mu nyuma ku “luseke” luetu. Bushuwa, “bantu binunu dikumi” mbapone ku ‘tshianza tshia balume’ tshia bena Isalele ba mu nyuma ba mu tshikondo tshietu etshi. (Galatia 6:16) Kadi nansha tuetu bikale bena Kristo bela manyi anyi balunda babu badi badilambule kudi Nzambi, Yehowa udi utukuba mu “tshisokomenu” tshiende. Tudi ‘tumona difutu dia bantu babi,’ mushindu udibu bapeta ntatu mu mushinga wabu,  mu malu a ntendelelu ne makuabu kabidi.​—Galatia 6:7.

‘Bualu bubi kabuakutukuata’

13. Mmalu mabi kayi adi kaayi atukuata, ne mbua tshinyi?

¹³ Nansha mudi bukubi bua pa buloba apa buenda bukepa, tudi tuteka Nzambi pa muaba wa kumpala ne tupeta dikima mu mêyi a mufundi wa Misambu a se: ‘Wewe [wakuamba ne: Yehowa udi tshisokomenu] tshianyi, ne wakuvuija Nzambi Mutambe Bunene wa mulu muaba webe wa kushikamamu, nunku bualu bubi kabuena bukukuata, kakuena tshipupu tshiafika pabuipi ne nzubu webe wa ntenta.’ (Musambu 91:9, 10) Bushuwa, Yehowa udi tshisokomenu tshietu. Kadi tudi kabidi tuvuija Nzambi Mutambe Bunene ‘muaba wetu wa kushikamamu’ utudi tupeta bukubi. Tudi tutumbisha Yehowa bu Mukalenge wa diulu ne buloba, ‘tushikama’ munda muende bu Mpokolo wetu wa bukubi, ne tumanyisha lumu luimpe lua Bukalenge buende. (Matayo 24:14) Nanku ‘bualu bubi kabuakutukuata,’ mbuena kuamba ne: bualu bubi nansha bumue bua ku adi maleja ku ntuadijilu kua musambu eu. Nansha padi bipupu bu mudi bikumina, mpepele mikole, diula dia mâyi a misulu, nzala ne binyangu bia mvita bitukuata pamue ne bantu bakuabu bonso, bintu ebi kabiena bibutula ditabuja dietu anyi bukubi buetu bua mu nyuma to.

14. Bua tshinyi bipupu bia lufu kabiena bitukuata tuetu basadidi ba Yehowa?

¹⁴ Bena Kristo bela manyi badi bu benyi badi basombe mu ntenta pa muaba wa nkayabu panu apa. (1 Petelo 2:11) ‘Kakuena tshipupu tshiafika pabuipi ne nzubu wabu wa ntenta.’ Nansha ditekemena dietu diodi dikale dia kupeta muoyo mu diulu anyi pa buloba, katuena ba pa buloba ebu, ne bipupu biabu bidi bikeba lufu lua mu nyuma bu mudi tshiendenda, dizuka bua kupeta bintu, bitendelelu bia dishima ne ntendelelu wa “nyama wa luonji” ne ‘tshifuanyikiji’ tshiende tshidi tshikale Bulongolodi bua Bisamba Bisanga, kabiena bitukuata nansha.​—Buakabuluibua 9:20, 21; 13:1-18; Yone 17:16.

15. Mmu malu kayi mudi banjelu batuambuluisha?

¹⁵ Mufundi wa Misambu udi wamba bua mushindu udi Yehowa utukuba ne: ‘Bualu bua [Yehowa] neakufile mu bianza bia banjelu bende [bua] kukulamabu mu njila yebe yonso. Nebakuambule mu bianza biabu bua wewe kututshi dikasa diebe ku dibue.’ (Musambu 91:11, 12) Yehowa utu mupeshe banjelu bukole bua kutukuba. (2 Bakelenge 6:17; Musambu 34:7-9; 104:4; Matayo 26:53; Luka 1:19) Badi batulama ‘mu njila yetu yonso.’ (Matayo 18:10) Banjelu badi batuludika ne batukuba patudi tumanyisha Bukalenge, ne katuena tulenduka mu nyuma to. (Buakabuluibua 14:6, 7) Nansha ‘mabue,’ tshilejilu bu mudi dikandika mudimu wetu ki mmatulenduishe anyi matupangishishe dianyisha dia Nzambi to.

16. Mmunyi mudi nduishilu wa “muana wa ntambue” ne “nyoka wa ntoka” bishilangane, ne ntshinyi tshitutu tuenza padibu batuluisha nunku?

¹⁶ Mufundi wa Misambu udi utungunuka ne: ‘[Newende] pa nyama wa ntambue ne pa nyoka wa [ntoka], [neudiate] muana wa nyama wa ntambue ne nyoka [munene].’ (Musambu 91:13) Anu mutu muana wa ntambue ubundulangana patoke, bamue baluishi betu badi batuluisha patoke padibu belesha mikenji ne tshipatshila tshia kulekesha mudimu wetu wa diyisha. Ne badi batuela kabidi mvita kayiyi mitekemena anu mutu nyoka wa ntoka wenza padiye musokome muaba kampanda. Balombodi ba bitendelelu batu imue misangu batuluisha bikale basokomene panyima pa bedi ba mikenji, banzuji ne bakuabu bantu. Kadi bu mudi Yehowa utukuatshisha, ne ditalala dionso tudi tukeba dibinga ku tubadi, nanku ‘tubingisha ne tujadika lumu luimpe ku diambuluisha dia mikenji.’​—Filipoi 1:7, NW; Musambu 94:14, 20-22.

17. Mmushindu kayi utudi tuendela pa mutu pa “nyama wa ntambue”?

¹⁷ Mufundi wa Misambu eu udi wakula bua diendela pa ‘muana wa nyama wa ntambue ne pa nyoka munene.’ Muana wa ntambue udi mua kuikala ne luonji lua bungi, ne nyoka munene udi mua kuikala tshidika tshinenanenayi. (Yeshaya 31:4) Kadi nansha muana wa ntambue yeye ne luonji lua mushindu kayi padiye uluisha muntu patoke, mu tshimfuanyi, tudi tuendela pa mutu pende patudi tutumikila Nzambi pamutu pa bantu anyi malongolodi adi mafuane ntambue. (Bienzedi 5:29) Nenku “nyama wa ntambue” udi ukuatshisha buôwa eu kêna utuenzela bualu bubi mu nyuma nansha bumue.

18. “Nyoka munene” udi utuvuluija nganyi, ne ntshinyi tshitudi ne bua kuenza bikalaye utuluisha?

¹⁸ Badi babikila “nyoka munene” mu Bible wa tshiena-Gelika wa Septante ne: “dragon.” Dîna edi didi mua kutuvuluija bimpe ‘dragon munene,  nyoka au wa kale, yeye udi muidikibue ne: Diabolo ne Satana.’ (Buakabuluibua 12:7-9; Genese 3:15) Udi bu tshidika tshidi tshilamba panshi tshikale ne bukole bua kuboza ne kumina tshintu tshiditshi tshikuata. (Yelemiya 51:34) Padi Satana ukeba bua kutukuata, bua kutuboza ne ntatu ya panu ne ukeba bua kutumina, tudikopolayi mu nkanu yende ne tuendelayi pa mutu pa “nyoka munene” eu. (1 Petelo 5:8) Bena Kristo bela manyi badi ne bua kuenza bualu ebu bikalabu basue kukumbaja pabu mêyi adi mu Lomo 16:20.

Yehowa ke udi utupandisha

19. Bua tshinyi tudi tusokomena mu Yehowa?

¹⁹ Mufundi wa Misambu udi uleja mudi Nzambi wamba bua mutendeledi mulelela ne: ‘Bualu bua yeye udi ulamata kundi mu dinanga diende, nemmupandishe; nemmushikike mu muaba udi kulu, bualu bua yeye udi mumanye dîna dianyi.’ (Musambu 91:14) Tshiambilu tshia se: “Nemmukube” ke tshidibu bakudimune muaba eu ne: “nemmushikike mu muaba udi kulu,” muaba udi kauyi kupeta. Tudi tusokomena mu Yehowa bu batendeledi bende nangananga bualu ‘tudi tulamata kudiye mu dinanga dietu.’ (Mâko 12:29, 30; 1 Yone 4:19) Nzambi pende udi ‘utupandisha’ ku baluishi betu. Kabakutubutula pa buloba apa nansha kakese. Yehowa neatupandishe bualu tudi bamanye ne tubila dîna diende, kabidi bualu tudi ne ditabuja. (Lomo 10:11-13) Ne tudi bapangadike bua ‘kuenda mu dîna dia Yehowa tshiendelele.’​—Mika 4:5; Yeshaya 43:10-12.

20. Ntshinyi tshidi Yehowa ulaya musadidi wende wa lulamatu mu mêyi a ndekelu a Musambu wa 91?

²⁰ Musambu wa 91 udi ujika ne mêyi aa adi Yehowa wamba bua musadidi wende wa lulamatu ne: ‘Pambikilaye, nengitabe kudiye; nengikale nende pabuelaye mu dikenga, nemmupandishe, nemmutumbishe. Nensankishe mutshima wende ne dilepa dia matuku ende, nemmuleje lupandu luanyi.’ (Musambu 91:15, 16) Patudi tubila Nzambi mu disambila mushindu udiye musue, udi utuandamuna. (1 Yone 5:13-15) Tukadi bapitshile mu ntatu ya bungi bua buluishi budi Satana mutukebele. Kadi mêyi a se: ‘nengikale nende pabuelaye mu dikenga’ adi atulongolola bua ntatu itshilualua; adi kabidi atujadikila ne: Nzambi neatukuatshishe pabutulaye ndongoluelu mubi eu.

21. Mmunyi mukadi bela manyi batumbishibue?

²¹ Nansha mudiku buluishi bukole bua Satana, bela manyi bonso badi munkatshi muetu nebatumbishibue mu diulu mu tshikondo tshidi Yehowa mulongolole: kunyima kua ‘dilepa dia matuku’ pa buloba. Kadi mishindu ya dikema idi Nzambi mupandishe bantu ikadi mipeteshe bela manyi butumbi bua mu nyuma. Ne ndumu kayipu ludibu nalu lua kuikala Bantemu ba Yehowa bantunga-mulongo pa buloba mu matuku aa a ku nshikidilu! (Yeshaya 43:10-12) Lupandu lunene luikala Yehowa mua kupesha bantu bende nelumueneke mu mvita yende minene ya Armagedone pabingishaye bumfumu buende ne patumbishaye dîna diende dinsantu.​—Musambu 83:18; Yehezekele 38:23; Buakabuluibua 16:14, 16.

22. Mbanganyi bikala ‘Yehowa mua kuleja lupandu luende’?

²² Nansha tuetu bikale bena Kristo bela manyi anyi balunda babu badilambule kudi Nzambi, tudi batekemene bua Nzambi kutupeshaye lupandu. Mu ‘dituku dinene dia Yehowa didi dikuatshisha bantu buôwa,’ Nzambi neapandishe bantu badi bamusadila ne lulamatu. (Yoele 2:30-32) Ba kutudi bikala munkatshi mua “musumba munene” wa bantu bapanduka bua kubuela mu bukua-panu bupiabupia bua Nzambi ne bashala ne lulamatu mu diteta dia ndekelu, yeye ‘neasankishe mitshima yabu ne dilepa dia matuku abu,’ mmumue ne: neabapeshe muoyo wikala kauyi ne ndekelu. Neabishe kabidi bisumbu ne bisumbu bia bafue. (Buakabuluibua 7:9, MMM; 20:7-15) Bulelela, Yehowa neasanke bua ‘kutuleja lupandu luende’ mu Yezu Kristo. (Musambu 3:8) Bu mudi malu aa matuindile kumpala eku, tutungunukayi ne kulomba diambuluisha kudi Nzambi bua atuleje mua kubala matuku etu bua kumutumbisha. Tutungunukayi ne kuleja ku mêyi ne ku bienzedi bietu ne: Yehowa udi tshisokomenu tshietu.

[Mêyi adi kuinshi]

Newandamune munyi?

• “Tshisokomenu tshia Nzambi Mutambe Bunene” ntshinyi?

• Bua tshinyi katuena tutshina?

• Bua tshinyi ‘bualu bubi kabuakutukuata’?

• Bua tshinyi tudi mua kuamba ne: Yehowa ke mpokolo wa lupandu luetu?

[Nkonko ya dilonga]

[Tshimfuanyi mu dibeji 17]

Udiku mumanye mushindu udi bujalame bua bushuwa bua Yehowa buikale ngabu wetu munene anyi?

[Bimfuanyi mu dibeji 18]

Yehowa udi wambuluisha basadidi bende bua kuenzabu mudimu wabu nansha kuoku buluishi ne mvita ya patoke bidibu kabayi batekemene

[Mêyi a dianyisha]

Nyoka wa ntoka: A. N. Jagannatha Rao, Trustee, Madras Snake Park Trust