Dîyi dia mushinga mukole ditshidi kabidi ne dikuatshisha

Nansha mudi bantu ba bungi bangata Dîyi dia mushinga mukole bu dilongesha dia malu a mu nsombelu divua Yezu mufile, Yezu muine wakamba ne: “Dilongesha dindi ndongesha ki ndianyi meme to, ndifume kudi Udi muntume.”​—Yone 7:16, Mukanda wa Mvidi Mukulu [Katolike, MMM].

BUSHUWA, Muena malu avua Yezu ulongesha, pamue ne muanda wakalua kumanyika pashishe bu Dîyi dia mushinga mukole, ngeu uvua mutume Yezu, mmumue ne: Mufuki wa bionso, Yehowa Nzambi.

Ku ntuadijilu Nzambi uvua mulongolole bua bantu bonso bikale benzelangana malu anu mudibu basue bua babenzele pabu. Wakafila tshilejilu tshilenga be tshia dijingila bakuabu diakalenga mu mushindu wakabafukaye: ‘Nzambi wakafuka muntu ne tshifuanyikiji tshiende, wakamufuka ne tshifuanyikiji tshia Nzambi; wakabafuka mulume ne mukaji.’ (Genese 1:27) Miaku eyi idi yumvuija ne: Nzambi wakapesha bantu ndambu wa ngikadilu yende ya pa buayi bua basombe mu ditalala, mu disanka ne mu diumvuangane  bua kashidi ne tshiendelele. Pavuabu balongesha kuondo ka muoyo kavua Nzambi mubapeshe bimpe, kinaka kavua mua kabalombola bua kuenzela bakuabu malu avuabu buobu bine basue bua babenzele.

Bantu bavule badi bakeba anu disanka diabu nkayabu

Bantu bavua batuadije nsombelu wabu bimpe, kadi ntshinyi tshiakalua kuenzeka? Dikeba anu masanka abu nkayabu ke diakatuadija kubanyanga. Bantu ba bungi mbamanye muyuki wa mu Bible wa bualu buakenza mulume ne mukaji wa kumpala, udibu balonde mu Genese nshapita 3. Bu muvuabu babapeshe lungenyi kudi Satana (muluishi wa mikenji yonso miakane ya Nzambi), Adama ne Eva bakela bukokeshi bua Nzambi nyima bua buobu kupeta budikadidi ne kuikalabu badiangatshila mapangadika. Buntomboji buabu ebu ne dijinga dia kudisankisha nkayabu biakabafikisha ku dijimija bintu bia bungi, kukebelabu too ne ndelanganyi yabu yakalua pashishe ntatu mipite bunene. Bualu ebu buakaleja patoke ntatu yakapeta bantu pakalengululabu dilongesha diakalua kumanyika pashishe bu Dîyi dia mushinga mukole. Ke bualu kayi, “bubi mbubuele mu buloba bualu bua muntu umue; bubi ke budi bubueje lufu, kukuatalu bantu bonso, bualu bonso mbeji ba bibi.”​—Lomo 5:12, MMM.

Nansha muvua bantu mu tshibungi bele mikenji milenga ya Yehowa Nzambi nyima, yeye kakabalekela to. Tshilejilu, Yehowa wakapesha tshisamba tshia Isalele Mikenji ivua ne bua kutshilombola. Mikenji eyi yakabalongesha bua kuenzela bakuabu malu avuabu buobu bine basue bua babenzele. Mikenji ivua ibaleja mushindu wa kuangata bapika, bana ba nshiya ne bakaji ba mu lufuila. Ivua ileja tshia kuenza padi muntu muluishangane, mukuate mukaji ku bukole ne muibe tshintu. Mikenji ya mankenda ivua ileja muvuabu bajingila bakuabu makanda mimpe a mubidi. Kuvua kabidi mikenji ivua itangila malu a disangila dia mulume ne mukaji mu nzubu. Yehowa wakumvuija Mikenji eyi mu tshikoso pakambilaye bantu aba ne: “Sua mukuenu bu mûdi mudisue,” mêyi akalua Yezu kutela bidimu bia bungi panyima. (Lewitiki 19:18; Matayo 22:39, 40) Mikenji ivua kabidi ileja  mushindu wa kuangata benyi bavua munkatshi mua bena Isalele. Mikenji ivua ibalomba ne: “Kanukengeshi muenyi wa munkatshi muenu, bualu bua nuenu nudi bamanye mutshima wa muenyi, nuenu nuakadi benyi mu buloba bua Ejipitu.” Anyi tudi mua kuamba ne: bena Isalele bavua ne bua kuikala bumvuila bakengi luse ne babambuluisha.​—Ekesode 23:9; Lewitiki 19:34; Dutelonome 10:19.

Pavua anu tshisamba tshia Isalele tshitumikila Mikenji ne lulamatu, Yehowa uvua utshibenesha. Mu bukokeshi bua Davidi ne bua Solomo, tshisamba tshiakadiunda bikole ne bantu bavua ne disanka dia bungi. Muyuki wa mu Bible udi utuambila ne: ‘Bena Yuda ne bena Isalele bakadi bungi bua nsenga ya ku muelelu wa mâyi manene; badiadia, banuanua, basankasanka. Bena Yuda ne bena Isalele bonso bakashikama talalâ, muntu ne muntu muinshi mua muonji wende wa tumuma tukese ne mua mutshi wende wa mfigi.’​—1 Bakelenge 4:20, 25.

Diakabi, ditalala dia tshisamba etshi kadiakanenga mutantshi mule to. Nansha muvua bena Isalele ne Mikenji ya Nzambi, kabakayitumikila to; bakalekela dijinga diabu dia kudisankisha anu buobu dibapangisha mua kuenzela bakuabu malu mimpe. Muanda eu, pamue ne butontolodi buabu, biakakebela muntu yonso ntatu ne tshisamba tshijima kabidi. Ndekelu wa bionso, mu tshidimu tshia 607 K.B.B., Yehowa wakalekela bena Babulona babutula bukalenge bua Yuda, tshimenga tshia Yelushalema too ne ntempelo mulenga uvuamu. Bua tshinyi? ‘Bualu bua kanuakumvua mêyi anyi, monayi, nentume dîyi bua kuangata ba mu mêku onso a ku luseke lua ku nôde, mmudi Yehowa wamba; nembikile Nebukadenesâ, mukalenge wa Babulona, muntu wanyi; nendue nabu bua kuluisha bena buloba ebu ne bonso badi bashikamemu, ne bua kuluisha ba mu bisamba bidi binunyunguluke. Nembutule ba mu buloba ebu, nembavuije bu tshintu tshidi tshikemesha bantu, tshidibu babingila, bu bikulu tshiendelele.’ (Yelemiya 25:8, 9) Ndifutu kayipu diakafutabu bua muvuabu balekele ntendelelu mulelela wa Yehowa!

Tshilejilu tshia kuidikija

Yezu Kristo yeye wakalongesha Dîyi dia mushinga mukole ne kufilaye kabidi tshilejilu tshitambe bulenga tshia mushindu wa kuditumikila. Uvua ujingila bakuabu disanka ne muoyo mujima. (Matayo 9:36; 14:14; Luka 5:12, 13) Umue musangu, pavuaye pabuipi ne tshimenga tshia Naina, Yezu wakamona mukaji mukamba udila udinyenga ne kanyinganyinga munkatshi mua tshisumbu tshia bantu batangile ku nkita bua kuya kujika muanende umuepele uvuaye nende. Bible udi wamba ne: ‘Pakamutangila mukalenge, yeye wakamufua luse.’ (Luka 7:11-15) Bilondeshile nkonga-miaku kampanda, tshiambilu ‘kufua luse’ tshidi tshiumvuija “kumvua bia munda bu bidi binyunga.” (Vine’s Expository Dictionary of Old and New Testament Words) Wakumvua pende kanyinganyinga kavua naku mukaji eu mu mutshima wende, ne kanyinganyinga aka kakasaka Yezu bua kuenza malu avua mua kukepesha lutatu lua mamu eu. Mukamba eu wakapeta disanka divule pakabiisha Yezu muana eu ne ‘kumufilaye kudi mamu wende.’

Ku ndekelu, biumvuangane ne disua dia Nzambi, Yezu wakitaba bua kukenga ne wakafila muoyo wende bu mulambu bua kupikula bantu ku bupika bua mpekatu ne lufu. Etshi tshivua tshilejilu tshitambe buimpe tshia muntu wakatumikila Dîyi dia mushinga mukole.​—Matayo 20:28; Yone 15:13; Ebelu 4:15.

Bantu badi batumikila Dîyi dia mushinga mukole

Kudiku bantu matuku etu aa badi batumikila Dîyi dia mushinga mukole edi anyi? Eyowa, ne kabena baditumikila anu padibu bamona malu enda bimpe nansha. Tshilejilu, mu tshikondo tshia Mvita Mibidi ya buloba bujima, mu ditunga dia Allemagne Bantemu ba Yehowa bakashala anu ne ditabuja kudi Nzambi ne kushalabu anu banange bantu nabu, kubengabu bua kutupa ku Dîyi dia mushinga mukole. Pavua Mbulamatadi musake bantu bua kukina ne kuikala ne kansungansunga kudi bena Yuda, Bantemu ba Yehowa bakatungunuka ne kulonda Dîyi dia mushinga mukole. Nansha pavuabu mu maloko manene, Bantemu ba Yehowa bakatungunuka ne kuambuluisha bantu nabu, babanyangana biakudia ne bena Yuda ne bavua kabayi bena Yuda, nansha pavuabi bikese. Kabidi, nansha muakabambila Mbulamatadi bua kuambula bingoma ne kushipa bantu nabu, bakabenga bualu ebu anu muvuabu buobu kabayi basue bua babashipe kudi bantu bakuabu. Mmunyi muvuabu mua kushipa bantu bavuabu ne bua kunanga bu muvuabu badinange? Bu muakabengabu bualu ebu, bakela ba bungi mu maloko ne kushipabu bakuabu.​—Matayo 5:43-48.

 Paudi ubala tshiena-bualu etshi, udi umona tshilejilu tshikuabu tshilenga tshidi tshileja ditumikila Dîyi dia mushinga mukole. Bantemu ba Yehowa mbajadike ne: lelu bantu ba bungi mbashikile ne bapange tshia kuenza. Bua muanda eu, Bantemu ba Yehowa badi bambuluisha bakuabu ku budisuile bua kulongabu malu adi atangila ditekemena ne mibelu milenga bidi mu Bible. Eu mmudimu wa dilongesha wa katshia ne katshia udi wenzeka pa buloba bujima. Kudi bipeta kayi? Bu mukavua Yeshaya 2:2-4 mumanyishe, “ba mu bisamba bionso,” tuamba ne: bantu bapite pa miliyo isambombo buloba bujima ‘mbabayishe bienzedi bia Yehowa ne badi benda mu njila yende.’ Mu tshimfuanyi, mbalonge mua ‘kufula nkasu ya kudima nayi ku miele yabu ya mvita, nebafule miele ya kukosa nayi matamba mafubidile ku mafuma abu.’ Badi ne ditalala ne bupole mu bikondo ebi bia ndululu.

Kadi wewe pebe?

Anji kuelabi meji tshitupa bua makenga ne ntatu bidi dilengulula Dîyi dia mushinga mukole bikebele bantu katshia ku buntomboji bua mu Edene bujudija kudi Satana Diabolo. Yehowa mmulongolole bua kushintulula nsombelu eu mu tshitupa tshîpi emu. Mmushindu kayi? ‘Bua bualu ebu Muana wa Nzambi wakamueneshibua bua kubutuleye midimu ya Diabolo.’ (1 Yone 3:8) Muanda eu neukumbane mu Bukalenge bua Nzambi, budiye mupeshe muntu wa meji ne mukumbane Yezu Kristo, eu wakalongesha ne wakatumikila Dîyi dia mushinga mukole.​—Misambu 37:9-11; Danyele 2:44.

Davidi mukalenge wa kale wa Isalele wakamba ne: ‘Ngakadi nsongalume, katataka ngakulua muntu mukole; kadi tshiena muanji kutangila muntu muakane mushale patupu, anyi bana bende baledibue balomba biakudia. Dinda too ne ku dilolo yeye udi uleja bantu luse, udi ubasombesha bintu; tunkanunuina tuende tudi tuvudijibua disanka.’ (Musambu 37:25, 26) Kuenaku mumone ne: lelu bantu ba bungi batu anu bangata ne balama pamutu pa “kulejangana luse ne kupeshangana” pabu anyi? Bulelela, kulonda Dîyi dia mushinga mukole kudi mua kufikisha ku ditalala ne bupole bia bushuwa bualu kudi kupesha muntu mushindu wa kupeta mabenesha mpindieu ne mu matuku atshilualua (mu Bukalenge bua Nzambi). Bukalenge bua Nzambi nebumushe lungenyi luonso ludi nalu bantu lua dikeba masanka abu nkayabu ne lua kuenza malu mabi pa buloba, ne neapingaje ndongoluelu mupiamupia muenza kudi Nzambi pa muaba wa ndongoluelu eu munyanguke udi bantu bakokesha. Dîba adi, bantu bonso nebikale ne disanka dia kutumikila Dîyi dia mushinga mukole.​—Musambu 29:11; 2 Petelo 3:13.

[Bimfuanyi mu mabeji 4, 5]

Yezu wakalongesha Dîyi dia mushinga mukole ne wakafila kabidi tshilejilu tshitambe bulenga tshia mushindu wa kuditumikila

[Bimfuanyi mu dibeji 7]

Kutumikila Dîyi dia mushinga mukole kudi mua kufikisha ku ditalala ne bupole bia bushuwa