Longesha mutshima webe bua kutshina Yehowa

‘O, ngakadi kusua bua [balongeshe mutshima wabu eu] bua kuntshina ne bua kuenza mikenji yanyi yonso matuku onso.’​—DUTELONOME 5:29.

1. Bua tshinyi tudi bajadike ne: dimue dituku bantu kabakuikala kabidi batshina tshintu?

 DITSHINA nditatshishe bantu bikole munkatshi mua nkama ne nkama ya bidimu. Bantu ba bungi badi ne kanyinganyinga dîba dionso bua ditshina nzala, masama, bilumbu ne mvita. Bua muanda eu, mêyi a ntuadijilu a mu mukanda wa Dimanyisha dia Manême a Bantu pa Buloba bujima adi aleja ne: mbasue kuvuija buloba ebu muaba wikala bantu bonso ne bua kusomba kabayi batshina tshintu. * Tudi tumvua disanka bualu Nzambi nkayende udi utujadikila ne: bantu nebasombe pa buloba kabatshiyi batshina tshintu, ne bionso ebi nebienzeke kabiyi ku bukole bua bantu. Yehowa udi utulaya mukana mua muprofete wende Mika ne: mu bukua-panu buende bupiabupia ne buakane, ‘kakuena muntu wakuatshisha bantu bende buôwa.’​—Mika 4:4.

2. (a) Mmushindu kayi udi Bible utubela bua kutshina Nzambi? (b) Nnkonko kayi idi mua kujuka patudi tukonkonona dibanza ditudi nadi dia kutshina Nzambi?

² Kadi ditshina didi kabidi mua kuambuluisha muntu. Bible udi ubela basadidi ba Nzambi njila ne njila bua kutshinabu Yehowa. Mose wakambila bena Isalele ne: ‘Nutshine Yehowa, Nzambi wenu, numuenzele yeye nkayende mudimu.’ (Dutelonome 6:13) Kunyima kua bidimu nkama mivule Solomo wakalua kufunda ne: ‘Utshine Nzambi, utumikile mikenji yende; ebu mbualu buonso budi muntu ne bua kuenza.’ (Muambi 12:13) Tudi petu tuambila bantu bonso bua ‘batshine Nzambi ne bamutumbishe’ mu mudimu wa buambi utudi tuenza ku bulombodi bua banjelu. (Buakabuluibua 14:6, 7) Pa kumbusha ditshina Yehowa, bena Kristo badi ne bua kumunanga kabidi ne mutshima wabu mujima. (Matayo 22:37, 38) Mmunyi mutudi mua kunanga Nzambi eku bikale kabidi tumutshina? Bua tshinyi tudi ne bua kutshina Nzambi wa dinanga? Ntshinyi tshitudi tupeta patudi tutshina Nzambi? Bua kuandamuna nkonko eyi tudi ne bua kuanji kujingulula tshidi ditshina dia Nzambi diumvuija ne mushindu udidi ne mushinga wa bungi mu malanda etu ne Yehowa.

Dikatshila, kanemu ne ditshina

3. Ditshina dia Nzambi didi diumvuija tshinyi?

³ Bena Kristo badi ne bua kuikala ne ditshina dia Nzambi bualu yeye udi Mufuki wabu. Dimue diumvuija dia ditshina edi didi se: “dikatshila ne kanemu kakole bua Mufuki ne buôwa buakanyine bua kubenga kumubungamija.” Nenku ditshina dia Nzambi didi ne mushinga mu malu manene abidi: ngikadilu wetu kumpala kua Nzambi ne ngikadilu wetu mu malu adiye mukine. Bushuwa, malu abidi aa adi ne mushinga wa bungi ne adi akengela tuetu kuakonkonona ne ntema. Anu mudi nkonga-miaku mukuabu wa Vine uleja, bua bena Kristo ditshina edi dia kanemu ‘mbukole budi buludika malu a mu nsombelu wabu, malu abu a mu nyuma ne a ngikadilu wabu.’​—Expository Dictionary of New Testament Words.

4. Mmunyi mutudi mua kufika ku dikatshila ne ku dinemeka Mufuki wetu?

⁴ Mmunyi mutudi mua kufika ku dikatshila ne ku dinemeka Mufuki wetu? Tutu tukatshila patudi tumona mpata kampanda mulengele anyi tshibila tshia mâyi tshinenanenayi peshi mubuelu wa dîba mulenga. Dikatshila edi didi dikola patudi  tujingulula ne mêsu a ditabuja ne: Nzambi ke udi mufuke bintu ebi. Kabidi, anu bu Mukalenge Davidi, tudi tujingulula bukese buetu kumpala kua bintu ebi bia dikema bidi Yehowa mufuke. Davidi wakamba ne: ‘Pandi ntangila diulu diebe, didi mudimu wa bianza biebe, ne ngondo ne mitoto biwakufuka; muntu udi nganyi bua wewe kumuelela meji?’ (Musambu 8:3, 4) Dikatshila dikole edi didi ditufikisha ku dinemeka Yehowa, ne kanemu aka paku kadi katusaka bua kumuela tuasakidila ne kumutumbisha bua bionso bidiye utuenzela. Davidi wakafunda kabidi ne: ‘Ndi nkusakidila, bualu bua difukibua dianyi didi dilengeja meji a mua kukunemeka bikole, didi dinkemesha. Midimu yebe yonso idi malu a kukema; mutshima wanyi udi mumanye bualu ebu bimpe.’​—Musambu 139:14.

5. Bua tshinyi tudi ne bua kutshina Yehowa, ne ntshilejilu kayi tshilenga tshitudi natshi bua bualu ebu?

⁵ Lungenyi lua dikatshila ne kanemu ludi lufikisha ku ditshina mu mushindu muakanyine bukole budi nabu Nzambi bu Mufuki ne bukokeshi buende bu eu udi ne bukenji bua kuikala Mfumu wa diulu ne buloba. Yone wakamona mu tshikena-kumona aba ‘badi bapita nyama wa luonji ne tshifuanyikiji tshiende [bukole],’ mmumue ne: bayidi ba Kristo bela manyi pakadibu mu muanzu wabu wa mu diulu, bamba ne: ‘Mukalenge Nzambi Wa-Bukole-Buonso, midimu yebe idi minene ne ya dikema. Wewe, Mukalenge wa bikondo, njila yebe idi miakane ne milelela. Mukalenge, nnganyi udi kayi utshina, udi kayi utumbisha dîna diebe?’ (Buakabuluibua 15:2-4) Ditshina dia Nzambi difumine ku kanemu kakole bua bunene buende didi disaka bantu aba bakokesha pamue ne Kristo mu Bukalenge bua mu diulu ku ditumbisha Nzambi bualu udi Mukokeshi udi ku mutu kua bionso. Patudi tukonkonona bionso bikadi Yehowa muenze ne mushindu muakane udiye ulombola bia panu, katuenaku tumvua muoyo utusaka bua kumutshina anyi?​—Musambu 2:11; Yelemiya 10:7.

6. Bua tshinyi tudi ne bua kuikala ne buôwa buakanyine bua kubenga kubungamija Yehowa?

⁶ Kadi pa kumbusha dikatshila ne kanemu, ditshina dia Nzambi didi ne bua kumvuija kabidi buôwa buakanyine bua kubenga kumubungamija anyi bua kubenga kumutumikila. Bua tshinyi? Bualu nansha mudi Yehowa muikale kayi “ukuata tshiji lubilu, mûle tente ne luse lujalame,” tudi ne  bua kumanya ne: ‘kêna ubingisha muntu udi upila.’ (Ekesode 34:6, 7) Nansha mudi Yehowa muikale ne dinanga ne luse, kêna ubuikila mêsu pa malu mabi adi bantu benza ku bukole to. (Musambu 5:4, 5; Habakuka 1:13) Bantu badi ne tshilele tshia kuenza malu adi mabi ku mêsu kua Yehowa ku bukole ne badi badivuija baluishi bende kabena mua kushala kabayi banyoka to. Anu muakabiamba mupostolo Paulo, ‘mbualu bua buôwa bua kupona mu bianza bia Nzambi udi ne muoyo.’ Kuikala ne ditshina diakanyine dia kubenga kupona mu nsombelu eu kudi kutukuba bimpe menemene.​—Ebelu 10:31.

“Nulamate kudiye”

7. Mmalu kayi adi atusaka bua kueyemena bukole budi nabu Yehowa bua kupandisha bantu?

⁷ Ditshina Nzambi ne kanemu ne dikala bamanya bimpe ne: udi ne bukole bua dikema mmalu adi atusaka bua kueyemena Yehowa. Anu mutu muana udiumvua mu bukubi padi tatuende muikale pabuipi nende, ke mutudi tumvua petu ne katuyi tulubakana padi Yehowa utulombola. Tangila tshiakenza bena Isalele kunyima kua Yehowa mumane kubapatula mu Ejipitu: ‘Bena Isalele bakatangila bualu bukole buakenzela Yehowa bena Ejipitu, ne bantu bonso bakatshina Yehowa; bakeyemena Yehowa.’ (Ekesode 14:31) Muanda wakamona Elisha udi utujadikila kabidi ne: ‘muanjelu wa Yehowa udi wasa tshitudilu tshiende tshinyunguluke badi bamutshina, udi ubasungila.’ (Musambu 34:7; 2 Bakelenge 6:15-17) Malu a bantu ba Yehowa ba mu tshikondo tshietu etshi anyi pamu’apa malu akadi matufikile tuetu nsungasunga adi ajadika ne: Nzambi udi wenza mudimu ne bukole buende bua kuambuluisha bantu badi bamusadila. (2 Kulondolola 16:9) Nunku tudi tufika ku dijingulula ne: “udi utshina Yehowa udi ne tshieyemenu tshikole.”​—Nsumuinu 14:26.

8. (a) Bua tshinyi ditshina dia Nzambi didi ditusaka bua kuenda mu njila yende? (b) Umvuija mushindu utudi ne bua ‘kulamata’ Yehowa.

⁸ Ditshina diakanyine dia Nzambi didi ditusaka bua kumueyemena ne bua kuenda kabidi mu njila yende. Pakabanjija Solomo ntempelo, wakalomba Yehowa ne: ‘[Bena Isalele] bakutshine, bende mu njila yebe patshidibu bashikame mu buloba buwakapa batatu betu.’ (2 Kulondolola 6:31) Bidimu bia bungi kumpala, Mose ukavua muambile bena Isalele ne: ‘Nuenu nulonde Yehowa, Nzambi wenu, numutshine, nutumikile mikenji yende, numuenzele yeye nkayende mudimu, nulamate kudiye.’ (Dutelonome 13:4) Mvese eyi idi ileja bimpe ne: dieyemena Yehowa didi ditusaka bua kuenda mu njila yende ne bua ‘kulamata’ kudiye. Bulelela, ditshina dia Yehowa didi ditusaka bua kumutumikila, kumusadila ne kumulamata anu mudi muana mutekete ulamata tatuende udiye weyemena ne muoyo mujima.​—Musambu 63:8; Yeshaya 41:13.

Kunanga Nzambi nkumutshina

9. Ndiumvuangana kayi didi pankatshi pa dinanga dia Nzambi ne dimutshina?

⁹ Bilondeshile Bible, kutshina Nzambi kakuena kupangisha muntu bua kumunanga nansha. Bua kujadika, bavua bambile bena Isalele bua ‘kutshina Yehowa ne kuenda mu njila yende yonso, ne bua kumusua.’ (Dutelonome 10:12) Nunku ditshina dia Nzambi ne dimunanga bidi bipetangana bikole. Ditshina dia Nzambi didi ditusaka bua kuenda mu njila yende, ne dienda mu njila yende edi didi dijadika ne: tudi bamunange. (1 Yone 5:3) Muanda eu mmulelela bualu patudi banange muntu, tudi tutshina bua kumubungamija. Bena Isalele bakabungamija Yehowa pakamutombokelabu mu tshipela. Bushuwa, katuena basue kuenza bualu nansha bumue budi mua kupesha Tatuetu wa mu diulu kanyinganyinga ka mushindu’eu to. (Musambu 78:40, 41) Kabidi, bu mudi ‘Yehowa usanka bua badi bamutshina,’ butumike ne lulamatu luetu bidi bisankisha mutshima wende. (Musambu 147:11; Nsumuinu 27:11) Dinanga dia Nzambi didi ditusaka bua kumusankisha, ne ditshina dia Nzambi didi ditukanda bua kumubungamija. Ngikadilu ibidi eyi (dinanga ne ditshina) idi ikumbajangana, kadi kayena ibengangana to.

10. Mmunyi muakaleja Yezu ne: uvua ne disanka dia kutshina Yehowa?

¹⁰ Nsombelu uvua nende Yezu Kristo udi uleja bimpe mushindu utudi mua kunanga ne kutshina Nzambi. Muprofete Yeshaya wakafunda bua Yezu ne: ‘Nyuma wa Yehowa neashikame pambidi pende, nyuma wa meji ne wa kujingulula kua malu, nyuma udi umukuatshisha ne meji ne bukole, nyuma wa kumanya Yehowa ne wa [kumutshina]. Disanka diende nedikale mu [ditshina] diende dia Yehowa.’ (Yeshaya 11:2, 3) Bilondeshile  mulayi eu, nyuma wa Nzambi wakasaka Yezu bua kutshina Tatuende wa mu diulu. Tudi tumona kabidi ne: ditshina edi divua dimusankisha, kadi kadivua bualu buvua bumunemene bujitu to. Yezu uvua usanka bua kuenza disua dia Nzambi ne bua kumusankisha nansha mu ntatu mipite bukole. Pakavuabu pabuipi ne kumushipa ku mutshi wa makenga, wakambila Yehowa ne: “Bualu buenjibue bu mûdi musue, kabuenjibu bu mundi musue.” (Matayo 26:39) Bua ditshina diende dia Nzambi, Yehowa wakateleja malomba a Muanende eu, kumukoleshaye ne kumusungilaye ku lufu.​—Ebelu 5:7.

Tulongayi mua kutshina Yehowa

11, 12. (a) Bua tshinyi tudi ne bua kulonga mua kutshina Nzambi? (b) Mmunyi mudi Yezu utulongesha mua kutshina Yehowa?

¹¹ Ditshina dia Nzambi kaditu didivuila nkayadi bu mudi dikatshila ditu didivuila musangu umue patudi kumpala kua tshintu kampanda tshia bukole anyi tshinenanenayi nansha. Ke bualu kayi Davidi Munene Yezu Kristo udi utuela lubila elu mu mêyi a tshiprofete wamba ne: ‘Luayi bienu, nuenu bana banyi ba balume, telejayi matshi enu kundi; nennuyishe mudi ditshina dia Yehowa.’ (Musambu 34:11) Mmunyi mutudi mua kulongela ditshina dia Yehowa kudi Yezu?

¹² Yezu udi utulongesha bua kutshina Yehowa padiye utuambuluisha bua kujingulula bumuntu bulenga bua Tatu wetu wa mu diulu. (Yone 1:18) Tshilejilu mene tshia Yezu tshidi tshituleja mushindu udi Nzambi wela meji ne udiye wenzela bantu malu, bualu Yezu udi uleja bumuntu bua Tatuende bimpe menemene. (Yone 14:9, 10) Kabidi, mulambu wa Yezu udi utunzuluila njila bua kulomba Yehowa luse mu masambila bua mpekatu yetu. Mushindu’eu wa pa buawu udi Nzambi uleja luse luende udi mene bualu bunene budi ne bua kutusaka bua kumutshina. Mufundi wa Misambu wakamba ne: “Wewe ngudi muena luse, bua bantu bakutshine.”​—Musambu 130:4, MMM.

13. Mmalu kayi adibu baleje mu mukanda wa Nsumuinu adi atuambuluisha bua kutshina Yehowa?

¹³ Mukanda wa Nsumuinu udi uleja malu a bungi atudi ne bua kuenza bua kufika ku dipeta ditshina dia Nzambi. ‘Muananyi, biwitabuja mêyi anyi, biwateka mikenji yanyi munda muebe, bua wewe utelejije matshi ebe ku meji, bua kufila mutshima webe ku dijingulula dia mianda; e, biwadidila dijingulula dia mianda muadi, biwabandishila kumanya kua malu dîyi diebe, nunku neujingulule ditshina dia Yehowa, neusangane dimanya dia malu a Nzambi.’ (Nsumuinu 2:1-5) Nunku bua kutshina Yehowa tudi ne bua kulonga Dîyi diende, kudienzeja ne muoyo mujima bua kumvua mayisha ende ne pashishe kutumikila mibelu yende ne lubatshi.

14. Mmunyi mutudi mua kulonda mubelu uvuabu bapeshe bakalenge ba Isalele?

¹⁴ Bavua bambile mukalenge yonso wa Isalele wa kale bua kutentula mukanda wa Mikenji ne bua ‘kuubalaye matuku ende onso, bua amanye mua kutshina Yehowa, Nzambi wende, ne mua kutumikila mêyi onso ne mikenji yonso.’ (Dutelonome 17:19) Dibala Bible ne dimulonga bidi ne mushinga wa bungi kutudi bituikala basue kulonga mua kutshina Yehowa. Patudi tutumikila mêyi a mu Bible, tudi tuenda tupeta ku kakese ku kakese meji ne dimanya bia kudi Nzambi. Tudi tufika ku ‘dijingulula ditshina dia Yehowa’ bualu tudi tumona mamuma mimpe adidi dipatula mu nsombelu wetu, ne tudi tuanyisha malanda atudi  badie ne Nzambi. Kabidi, patudi tudisangisha pa tshibidilu ne bena Kristo netu, bana ne bantu bakole badi bateleja malu adi Nzambi ulongesha, balonga mua kumutshina ne kuenda mu njila yende.​—Dutelonome 31:12.

Disanka didi kudi muntu yonso udi utshina Yehowa

15. Mmu malu kayi mudi ditshina dia Nzambi dipetangana ne dimutendelela dietu?

¹⁵ Malu atudi bamone aa adi atuleja ne: ditshina dia Nzambi nngikadilu mulenga utudi tuetu bonso ne bua kuikala nende ne udi ne mushinga wa bungi mu ntendelelu wetu wa Yehowa. Didi ditusaka bua kumueyemena ne muoyo mujima, bua kuenda mu njila yende ne bua kumulamata. Anu muvuabi bua Yezu Kristo, ditshina dia Nzambi didi kabidi mua kutusaka bua kukumbaja tshituvua baditshipile kudiye mpindieu ne kashidi ne tshiendelele.

16. Bua tshinyi Yehowa udi utukankamija bua kumutshina?

¹⁶ Ditshina dia Nzambi kaditu dibungamija anyi dikale ne mikandu mipitepite idi kayiyi ne mushinga nansha. Bible udi utujadikila ne: ‘Disanka didi kudi muntu yonso udi [utshina] Yehowa, udi wenda mu njila yende.’ (Musambu 128:1) Yehowa udi utukankamija bua kumutshina bualu mmumanye ne: ditshina neditukube. Tudi tumona dinanga diende mu mêyi aa avuaye muambile Mose bua amanyishe bena Isalele ne: ‘O, ngakadi kusua bua [balongeshe mutshima wabu eu] bua kuntshina ne bua kuenza mikenji yanyi yonso matuku onso, ne bobu bikale ne dikasa dimpe, ne bana babu badi balonda kunyima tshiendelele!’​—Dutelonome 5:29.

17. (a) Mmasanka kayi atudi tupeta patudi tutshina Nzambi? (b) Mmalu kayi adi atangila ditshina dia Nzambi atuamona mu tshiena-bualu tshidi tshilonda?

¹⁷ Bia muomumue, tuetu balongeshe mutshima wetu bua kutshina Nzambi, netupete diakalenga. Mmu mushindu kayi? Tshia kumpala: ngikadilu eu neasankishe Nzambi ne neatusemeje pabuipi nende. Davidi wakadimuena ne: ‘yeye udi umana dijinga dionso dia badi bamutshina, udi umvua muadi wabu kabidi, udi ubasungila.’ (Musambu 145:19) Tshibidi: ditshina dia Nzambi nedituambuluishe bualu neditusake bua kuepuka malu mabi. (Nsumuinu 3:7) Tshiena-bualu tshidi tshilonda netshileje mushindu udi ditshina dia Nzambi ditukuba ku njiwu ya mu nyuma, ne netshikonkonone bimue bilejilu bia mu Bible bia bantu bakatshina Nzambi ne kuepukabu malu mabi.

[Mêyi adi kuinshi]

Udi mua kuandamuna nkonko eyi anyi?

• Ditshina dia Nzambi didi diumvuija tshinyi, ne mmunyi mudidi dituambuluisha?

• Ndiumvuangana kayi didi pankatshi pa ditshina dia Nzambi ne dienda nende?

• Mmunyi mudi tshilejilu tshia Yezu tshileja ne: ditshina dia Nzambi didi dipetangana ne dinanga dia Nzambi?

• Mmu mmalu kayi mutudi ne bua kulongesha mutshima wetu bua kutshinawu Yehowa?

[Nkonko ya dilonga]

[Tshimfuanyi mu dibeji 17]

Bavua bambile bakalenge bena Isalele bua kutentula mukanda wa Mikenji ne bua kuubala dituku dionso

[Tshimfuanyi mu dibeji 18]

Ditshina dia Yehowa didi ditusaka bua kumueyemena anu mutu muana weyemena tatuende

[Mêyi a dianyisha bua tshimfuanyi mu dibeji 15]

Mitoto: Foto mukuata kudi Malin, © IAC/​RGO 1991