Bamanyishi ba Bukalenge badi balonda

“Udi mutue nimero wa tshianana”

MU TSHIMENGA tshia Johannesburg, mu ditunga dia Afrique du Sud, Leslie ne Caroline bavua bayisha ku telefone bashilangana, bayikila ne bantu mu umue muaba uvua bena pansio ba bungi basombele ne uvua basalayi balame ku tshibueledi. Bavua bapeta bantu anu bakese ku nzubu yabu, ne bantu bavuabu bapeta abu kabavua nansha batamba kuteleja malu avua bena Kristo aba babamanyisha to, ke bualu kayi Caroline wakumvua bimpe be pakitaba muntu mukaji mukuabu ku nshinga.

Caroline kumukonka ne: “Wewe ke Ina-banza B— anyi?”

Muntu au kumuandamunaye ne dîyi dimpe ne: “Tòo, meme ndi Ina-banza G—. Udi mutue nimero wa tshianana.”

Pakumvua Caroline ne: mamu eu uvua wakula ne musangelu, wakamuambila ne: “Tuasakidila, nanku lekela nkuambila bualu bumvua nkeba kuambila Ina-banza B—.” Ke Caroline kubangaye kumuambila bua malu malenga alua Bukalenge bua Nzambi kuenza. Yeye mumane kuitaba bua kumutuadilabu broshire wa Ntshinyi tshidi Nzambi utulomba?, Ina-banza G— kukonkaye ne: “Anji ngambila tung, wewe muine udi wa mu tshitendelelu kayi?”

Caroline kuandamuna ne: “Ndi Ntemu wa Yehowa.”

“Eyi, abu kabundengi, tshitendelelu atshi to! Nanku tshiena mubimone bimpe bua wewe kulua kabidi to.”

Ke Caroline kumuambilaye ne: “Kadi, Ina-banza G—, mu minite 20 yapitshi eyi ndi mukuleje ditekemena ditambe bulenga, mukuleje mu Bible malu ikala Bukalenge bua Nzambi mua kuenzela bantu mu katupa kîpi emu. Wewe kusanka bikole bua kumvua malu aa, ne wewe kujinga mene bua kumanya makuabu a bungi. Kadi ntshinyi tshiudi mumanye menemene bua Bantemu ba Yehowa? Wewe ne disama, udi mua kuya kudi mulongolodi wa mashinyi bua akondope anyi? Bua tshinyi kubenga kuitaba bua meme kukuleja malongesha a Bantemu ba Yehowa?”

Ina-banza eu kuanjiye kushala mupuwe katupa, pashishe kuluaye kuandamuna ne: “Ndi ngela meji ne: tshiudi muambe ntshilelela. Wewe mulue mbimpe. Kadi ikala mumanye ne: kuakunkudimuisha mutshima nansha bia munyi!”

Caroline kumuandamunaye ne: “Ina-banza G—, nansha bu meme musue kuenza nanku, tshiena ne bukole bua kukudimuisha mutshima webe to. Anu Yehowa ke udi mua kukukudimunawu.”

Bakaya kumushila broshire, ne Ina-banza G— (Betty) kuitabaye bua Caroline alue kumutangila kabidi. Pakapinganaye, Betty wakamuambila ne: uvua muambile bakaji bakuabu bavuabu basombe nabu ku mesa amue mu nzubu uvuabu bonso badila biakudia ne: uvua uyikila ne Bantemu ba Yehowa. Buobu kumukonka bela bianza mulu ne: “Munyi muudi mua kuenza bualu bua nunku? Bantu abu kabatu bitabuja Yezu to!”

Diakamue Caroline kuvuluijaye Betty bualu bunene buvuabu bayikile bua Bukalenge bua Nzambi.

Caroline kumukonka ne: “Nnganyi wikala Mukalenge?”

Betty ne: “Si n’Yezu.”

Caroline kuamba ne: “Anu muwambi amu menemene.” Pashishe yeye kutungunuka ne kumuambila ne: Bantemu ba Yehowa badi balongesha ne: Yezu udi Muana wa Nzambi, kadi kêna mumue ne Nzambi mu Busatu bunsantu mutu bantu bamba to.​—Mâko 13:32; Luka 22:42; Yone 14:28.

Kunyima bakayikila kabidi munkatshi mua matuku ndambu, ne bakalua kusangana ne: nansha muvua Betty umueneka ne disanka, uvua usama. Uvua ne disama dia kansere ne uvua ne buôwa bua kufua. Betty muine wakamba ne: “Mvua mua kuikala nansha mumvue malu aa mu bidimu bishale ne mvua nansha mua kuikala ne ditabuja dienu edi.” Caroline wakamukolesha ku muoyo ne mvese ya mu Bible idi ileja ne: lufu ludi bu tulu tukole, ne bantu nebikale mua kubika ku dibishibua. (Yone 11:11, 25) Mêyi aa akakolesha Betty ku muoyo bikole, ne mpindieu udi ulonga Bible pa tshibidilu. Anu disama diende didi dienda dikola ke didi dimupangisha bua kubuela mu bisangilu ku Nzubu wa Bukalenge.

Caroline udi wamba ne: “Ndi ngitaba ne: banjelu badi balombola mudimu wa buambi eu. Betty udi mpindieu ne bidimu 89, yeye ke uvua ‘nimero wa tshianana’ umvua mutue.”​—Buakabuluibua 14:6.