Baledi, kumbajayi majinga a bana benu!

BANA batu dijinga ne mibelu ne diyisha bibapesha ne dinanga nangananga kudi baledi babu. Bua bualu ebu, mukaji mukuabu mulongeshi wa mu ditunga dia Brésil diende Tania Zagury udi wamba ne: “Muana yonso utu ne dijinga dia kukeba disanka. Bidi bikengela kuela mikalu. Baledi ke badi ne bua kuela mikalu eyi. Bobu kabayi bayele, bana badi batomboka.”

Kadi, mu matunga a bungi lungenyi lua kulekelela bantu benza malu mudibu basue, ludi lusaka muntu yonso bua kuangata budikadidi buende ne mushinga ludi mua kuvuija ditumikila mubelu eu bualu bukole. Kadi nkuepi kudi baledi mua kupetela diambuluisha? Baledi badi batshina Nzambi mbamanye bimpe ne: bana babu badi ‘bumpianyi bufume kudi Yehowa.’ (Musambu 127:3) Nunku, badi bakeba diambuluisha mu Bible bua kumanya mushindu wa kubakolesha. Tshilejilu, Nsumuinu 13:24 (MMM) udi wamba ne: “Muntu udi kayi ututa muanende lukodi kena mumunange, kadi udi munange muanende udi umunyoka.”

“Lukodi” ludi Bible wamba muaba eu kaluena lumvuija anu kukuma to, ludi luleja mushindu wonso wa kululamija muana. Bushuwa, misangu ya bungi mêyi a mukana nkayawu adi mua kukumbana bua kululamija ngikadilu mukonyangale wa muana. Nsumuinu 29:17 udi wamba ne: ‘Kengesha muanebe bua kumuyisha, ne neakupe dikisha; e, neasankishe mutshima webe.’

Bana batu dijinga ne diyisha difila ne dinanga bua kulekelabu ngikadilu idi mibi. Dilulamija muana bimpe mushindu’eu ne dîsu dikole didi tshijadiki tshia se: muledi mmulame muanende bimpe. (Nsumuinu 22:6) Nunku, baledi kanuteketshi to! Nuenu bikale nulonda mibelu milenga idi mu Bible, nenusankishe Yehowa Nzambi, ne bana benu nebanunemeke.