“Bantu badi bamba ne: ndi nganyi?”

TUDI kabidi mpindieu mu tshikondo tshia Nowele. Bantu ba pa buloba bujima badi badilongolola bua kusekelela diledibua dia muntu kampanda. Diledibua dia nganyi? Ndia Muana wa Nzambi anyi ndia muena Yuda mukuabu uvua musue malu a Nzambi bikole, uvua ukeba bua kushintulula malu a ntendelelu uvuaku muaba uvuaye musombele mu bidimu lukama bia kumpala? Divua diledibua dia muakuidi wa bapele anyi peshi ntomboji uvua ukeba kutonkola bukokeshi bua bena Lomo, bamona nanku ke buobu kumushipa, anyi pamu’apa ndia muena meji uvua ukankamija bantu bua kudimanyabu ne bua kupetabu bukalenge buvua mua kuenza malu a meji mu ditunga diabu? Nanku kuena ne tshibi tshiudi wenza paudi udikonka ne: ‘Yezu Kristo muine uvua nganyi menemene?’

Yezu uvua musue kumanya muvua bantu bandamuna lukonko alu. Dimue edi wakakonka bayidi bende ne: “Bantu badi bamba ne: ndi nganyi?” (Mâko 8:27, Mukanda wa Mvidi Mukulu [Mishionyi, MMV]) Bua tshinyi wakela lukonko elu? Bantu ba bungi bakavua balekele dimulonda. Bakuabu bavua bamueneka bapange tshia kuenza ne batekete mu mikolo pakabengaye bua buobu kumuteka mukalenge. Kabidi, pavua baluishi bende bamuelesha mpata, Yezu kavua ufila tshimanyinu kampanda tshia mu diulu bua kubajadikila tshivuaye menemene nansha. Nunku, ntshinyi tshiakamba bapostolo bende bua kuandamuna lukonko elu? Bakaleja imue ngenyi  ivua mitangalake mu bantu ne: ‘Bakuabu badi bamba ne: Yeye udi Yone Mubatiji, bakuabu ne: Yeye udi Eliya; bakuabu ne: Yeye udi Yelemiya anyi muprofete mukuabu.’ (Matayo 16:13, 14) Kabakatela mêyi mabi a bungi avua bantu babipisha nawu Yezu avua matangalake tshikondo atshi mu Palestina a se: uvua upenda Nzambi, uvua mudingidiji wa malu, muprofete wa dishima, nansha ne: uvua mupale to.

Mishindu mivule idibu baleja Yezu

Bu Yezu mua kuela lukonko lumue lumue elu lelu, udi mene mua kuluela ne: “Bakebuludi ba malu a mu Bible badi bamba ne: ndi nganyi?” Musangu eu kabidi tudi mua kuleja mu tshikoso mandamuna adi bantu bafila ne: Kudi ngenyi ya bungi mishilangane. Mulongeshi David Tracy wa mu Iniversite wa Chicago wakamba ne: “Yezu uvua muikale bu kabalu kadi bantu ne bantu babande ne bangate masangu mavule mashilangane.” Mu bidimu lukama bishale ebi, bakebuludi ba malu a mu Bible mbenze mudimu ne mishindu mivule mikodiakane ya malu a mu nsombelu wa bantu ne makuabu a mu mikanda pavuabu bakeba mandamuna a lukonko lua kumanya Yezu ni uvua nganyi menemene. Ndekelu wa bionso ntshinyi tshiakaluabu kumanya pa bidi bitangila Yezu menemene?

Bamue bakebuludi mbatungunuke ne kuamba ne: Yezu udibu balonda mu miyuki ya kale uvua muprofete muena Yuda uvua umanyisha nshikidilu wa bukua-panu ne ukankamija bantu bua kukudimunabu mitshima yabu. Kadi badi babenga bua kumubikila ne: Muana wa Nzambi, Masiya ne Musungidi. Ba bungi badi babenga kuitaba muyuki wa mu Bible uvua wakula bua ntuadijilu wende wa mu diulu ne dibika diende ku lufu. Bua bakuabu, Yezu uvua patupu muntu uvua tshilejilu tshiende tshimpe ne malongesha ende bisake bantu bua kuenza bitendelelu bivule biakalua ndekelu wa bionso kudisangisha mu Buena-Kristo. Anu mudibu baleje mu mukanda kampanda, banga pabu badi bangata Yezu bu “muena sinike, muena meji uvua kayi utua nyima panshi, anyi bu muena musoko uvua uyikila ne Nzambi; mulongolodi wa malu mu musoko, ntomboji mufundi wa malu a kubipisha nawu bulongame buvuabu bajadike, peshi bu muena meji wa mu njila uvua usomba ne mangumba mabi, uvua umanyisha ngenyi yende patoke pavuaye wenda utambakana mu misoko miditole ivua ne bapele ne bantu bavua bafuanyike kujula ndululu mu Palestina.”​—Theology Today.

Kudi kabidi malu makuabu adibu bamba adi kaayi a pa tshibidilu. Lungenyi lua se: Yezu mmuntu mufike ludi luenda lumuenekela mu mijiki ya rap, ku mpingu minene idibu bibaka mu bimenga ne nansha mu maja atu bantu baja. * Bakuabu pabu badi bamba ne: Yezu uvua muntu mukaji wa tshia bushuwa. Mu muvu wa été mu tshidimu tshia 1993, bantu bavua baye kuendakana mu tshimenga tshia Comté d’Orange mu Californie (États-Unis) bakamona lupingu lua “Christie,” “Kristo” mukaji kayi ne bilamba, muikale ku nkuruse. Bu mu tshine tshikondo atshi bakaleja “Christa,” mu tshimenga tshia New York, mmumue ne: “Yezu” muikale muntu mukaji mupopela pa nkuruse. Mpingu yonso ibidi eyi yakajudija makokangana a bungi. Ku mbangilu kua tshidimu tshia 1999, bapanyi ba bintu bakapeta mukanda uvua wakula “bua dinanga divua Nsonga Yezu ne mbua wende (Muanjelu) balejangana.” Badi bamba bua malanda avuabu nawu ne: adi “akoleshangana mu nyuma ne adi aleja mudi nsongalume eu ne mbua wende badilongolole muntu yonso bua kufila muoyo wende bua bualu bua mukuabu.”

Bidi ne mushinga menemene anyi?

Bua tshinyi udi ne bua kukeba bua kumanya tshivua Yezu ne tshidiye mene? Tshilejilu, tuetu mua kuambulula mêyi a Napoléon, mbualu “Yezu Kristo mmushintulule ne mmulombole bantu Bende Yeye muine kayi kuoku mu bumuntu to.” Ku malongesha ende a bukole ne nsombelu wende, Yezu mmushintulule nsombelu wa bantu miliyare ne miliyare munkatshi mua bidimu bu binunu bibidi bijima. Mufundi mukuabu wakambilamu ne: “Biluilu bionso bikadi biluangane mvita, mazuwa onso a mvita akadibu benze, bipangu bionso bia bena mbulamatadi bikadibu benze, bakalenge bonso bakadi bakokeshe, bionso bisangisha pamue ki mbishintululeku bikole nsombelu wa bantu panu pa buloba mushindu’eu nansha.”

Udi kabidi ne bua kumanya muntu uvua ne udi Yezu, bualu neikale ne mushinga mu nsombelu webe wa matuku atshilualua. Udi ne mushindu wa kulua umue wa ku aba bikala mbulamatadi ukadibu bajadike mu diulu ne bua kukokesha, mmumue ne: Bukalenge bua Nzambi budi Yezu ukokesha. Buloba ebu budi bûle tente ne bimvundu nebabupingaje bimpe muvuabu ne bintu biabu bionso ku bulombodi bua Yezu. Milayi ya mu Bible idi itujadikila ne: Bukalenge bua Yezu nebudishe badi ne nzala, nebuambuluishe bapele, nebuondope badi basama ne nebubishe bafue.

Bushuwa, tudi bamanye se: udi ujinga bua kumanya ne: muntu udi ku mutu kua mbulamatadi eu udi bantu bakeba udi muntu wa mushindu kayi. Tshiena-bualu tshidi tshilonda netshikuambuluishe bua wewe kumanya Yezu mulelela.

[Mêyi adi kuinshi]