Nkonko ya babadi

Mmunyi mudi mukaji muena Kristo mua kuleja nkatshinkatshi pa bidi bitangila lulamatu luende kudi Nzambi ne dikokela bayende udi kayi muena Kristo bikala bayende eu wenza mafesto a mu tshitendelelu tshiende?

Bualu ebu budi bumulomba meji ne mbabi. Kadi nebitambe kuikala bimpe bu yeye mua kuenza muende muonso bua kuikala ne nkatshinkatshi mu malu abidi aa adiye ne bua kukumbaja. Yezu wakafila mubelu bua bualu bua buena ebu pakambaye ne: ‘Nupe Kaisa bintu bia Kaisa, nupe Nzambi bintu bia Nzambi.’ (Matayo 22:21) Bushuwa, uvua wakula bua malu adi bantu ne bua kuenzela mbulamatadi, ivuabu balue kuambila bena Kristo pashishe bua kuyikokelabu. (Lomo 13:1) Kadi, mubelu wende eu udi mua kutangila kabidi mushindu udi mukaji mua kuleja nkatshinkatshi padiye ne bua kukumbaja malu adi Nzambi umulomba ne eku muikale ne bua kukokela bayende (nansha yeye kayi muena Kristo) anu mudi Mukanda wa Nzambi ulomba.

Muntu yonso udi mumanye Bible mmujadike ne: Bible udi uleja ne: bualu bua kumpala budi muena Kristo ne bua kuenza mbua kushala mulamate Nzambi Wa-Bukole-Buonso mu bikondo bionso. (Bienzedi 5:29) Nanku, mu malu a bungi mutendeledi mulelela udi mua kukumbaja tshidi mukokeshi kampanda udi kayi muena Kristo umulomba kadi kayi ushipa mikenji ya Nzambi milenga nansha.

Tudi ne tshilejilu tshidi tshitulongesha pa muanda eu tshia bena Ebelu basatu, tshidibu balonde mu Danyele nshapita 3. Muntu uvua ku mutu kua mbulamatadi wabu, Nebukadenesâ, wakatuma dîyi ne: bena Ebelu aba ne bantu bakuabu balue mu mpata wa Dula. Pakajingululabu ne: bavua balongolole bua kuenza malu a ntendelelu wa dishima, bena Ebelu basatu aba kabavua pamu’apa mua kujinga bua kufika muaba au to. Bumue Danyele uvua ne mushindu wa kubenga kufikapu, kadi bena Ebelu basatu aba buobu kabavua ne mushindu wa kuenza nanku to. * Ke buobu kuitaba bua kufika muaba au, kadi  kabavua mua kubuelakana mu bualu kampanda bubi nansha, ne kabakabuelakanamu to.​—Danyele 3:1-18.

Bia muomumue, pabuipi ne bikondo bia mafesto kampanda, mulume udi kayi muena Kristo udi mua kulomba mukajende muena Kristo bua kuenzaye bualu budi mukajende eu wepuka bua kuenza. Tuangate bimue bilejilu: Udi umuambila bua kulambaye biakudia bia mushindu kampanda dituku dikalaye yeye ne bakuabu mua kusekelela difesto kansanga. Anyi udi ulomba bua se: bena mu dîku diende bonso (pamue ne mukajende) baye kuendela balela bende buenyi dituku adi bua didia kampanda anyi bua kubamona tshianana. Peshi nansha kumpala kua difesto adi, udi mua kuamba ne: padi mukaji uya kusumba bintu mu tshisalu, udi ne bua kumusumbila bimue bintu, bu mudi biakudia bia pa buabi bua difesto adi, tudo tua dipeshangana, peshi mabeji a kuvungila tudo ne tuarte tua kupeshangana natu tudo.

Muaba eu kabidi, mukaji muena Kristo udi ne bua kuikala mupangadike muende muonso bua kubenga kubuelakana mu bilele bia ntendelelu wa dishima, kadi neenze tshinyi bua bintu bidi bayende mumulombe ebi? Tudi bamanye ne: mulume ke mfumu wa dîku, ne Dîyi dia Nzambi didi diamba ne: ‘Nuenu bakaji, nukokele babayenu, ke budi buakane mu Mukalenge.’ (Kolosai 3:18) Mu malu aa, mukaji udiku mua kuleja mudiye ukokela bayende eu eku mushale mulamate Nzambi anyi? Udi ne bua kupangadika pa mushindu wa kuleja nkatshinkatshi pa bidi bitangila ditumikila bayende ne butumike buende kudi Yehowa budi buikale buobu ne mushinga wa bungi kupita.

Mu bimue bikondo bidi kabiyi bia mafesto, bayende udi mua kumuambila bua alambe bimue biakudia, bituye mutambe kusua anyi bituye ne tshibidilu tshia kudia mu tshikondo kampanda tshia pa buatshi. Neajinge bua kumuleja dinanga ne kabidi kukokela bukokeshi buende. Udiku mua kuenza nunku nansha yeye mumulombe bua kubilamba dituku dia difesto kampanda anyi? Bamue bakaji bena Kristo badi mua kuikala ne mushindu wa kuenza nunku ne kuondo ka muoyo katoke, bangata dilamba biakudia ebi bu mudimu wa pa tshibidilu utubu benza ku dituku dionso. Bushuwa, mukaji muena Kristo wa lulamatu kêna ne bua kuenza bualu ebu ne lungenyi lutume ku difesto kampanda to, nansha bayende yeye muikale ne meji au. Bia muomumue, bayende udi mua kumulomba bua aye kumufila bua kumona balela bende matuku mashilangane a mu ngondo yonso anyi a mu tshidimu tshionso. Udiku mua kuitaba bualu ebu nansha biobi bikale dituku dia difesto anyi? Peshi, padiye wenda usumba bintu mu tshisalu, udiku mua kuitaba bua kumusumbila bintu bidiye mumuambile kayi udikonka tshidiye usua kuenza nabi anyi?

Bushuwa, mukaji muena Kristo udi ne bua kuela meji bua bakuabu, tshidi bualu kampanda mua kubakebela. (Filipoi 2:4) Neepuke bua kuenza malu adi aleja ne: mmubuelakane mu difesto edi, anu muvua bena Ebelu basatu mua kuikala bajinge bua bantu bakuabu kababamonu pavuabu baya mu mpata wa Dula. Nanku mukaji muena Kristo udi mua kuteta bua kuyikila ne bayende ne mbabi yonso bua kumona bikala bayende udi bumue mua kudienzela nkayende bimue bintu bidi bitangila difesto adi, bionso ebi anu bua katatshishi mukajende udi mumunange ne umunemeka nansha. Udi mua kufika ku dimona ne: ki mbimpe bua yeye ne mukajende badibueje mu malu adi mua kulua kubabungamija bu mukajende mua kubenga bua kubuelakana mu bilele kampanda bia ntendelelu wa dishima. Bulelela, kudianjila kuyukila mu lutulu kudi mua kufikisha ku dipeta diandamuna dimpe dia ditalala.​—Nsumuinu 22:3.

Bua kujikija, muena Kristo wa lulamatu udi ne bua kukonkonona malu ne pashishe kuangata dipangadika dia tshidiye mua kuenza. Anu bu muvuabi bua bena Ebelu basatu aba, ditumikila Nzambi didi ne bua kulua pa muaba wa kumpala. (1 Kolinto 10:31) Mushale mulame anu bualu ebu mu lungenyi, eu udi muena Kristo udi ne bua kupangadika bua kumanya malu (adi kaayi atupa ku mêyi a Nzambi) adiye mua kuenza, adibu bamulombe kudi muntu udi ne bukokeshi mu dîku anyi mu musoko wabu.

[Mêyi adi kuinshi]